Главная   А  Б  В  Г  Д  Е  Ж  З  И  Й  К  Л  М  Н  О  П  Р  С  Т  У  Ф  Х  Ц  Ч  Ш  Э  Ю  Я  Документы
Реклама:

№ 179

1622 г. февраля 11. — Грамота патриарха Филарета архиепископу сибирскому Киприану о религиозном состоянии его паствы и о мерах к установлению благочестия.

Благословение великого господина святейшего патриарха Филарета Московского и всеа Руси о святом дусе сыну и сослужебнику нашего смирения Киприяну архиепископу сибирскому и тобольскому. Ведомо нам учинилось от воевод и от приказных людей, которые преж сего бывали в Сибири, что в сибирских городех многие служилые и жилецкие люди живут некрестьянскими обычаи и не по преданиям святых апостол и святых отец, но по своим скверным похотем; многие ж русские люди и иноземцы литва и немцы, которые в нашу истинную православную християнскую веру крещены, крестов на себе не носят и святых постных дней, среды и пятницы, не хронят, и в постные дни едят мясо и всякие скверны з бусорманы, с татары, и с остяки и с вогуличи вместе; и которые люди ходят х колмакам и в иные землицы для государевых дел, и те пьют и едят и всякие скаредные дела делают с поганскими за один, и с татарскими и с остяцкими и с вагулецкими поганскими женами смешаютца и скверная деют, а иные живут с татарскими с некрещеными как есть с своими женами, и дети с ними приживают, а иные и горше тово творят: поймают за себя в жены в сродстве, сестры свои родные и двоюродные и названные и кумы крестные, а иные де и на матери свои и на дщери блудом посягают и женятца на дщерях и на сестрах, еже ни в поганых и незнающих бога не обретаетца, о них же неточию писати, и слышати [277] гнусно; и в таком пребеззаконном деле многие и дети с ними приживают. А иные де многие служилые люди, которых воеводы и приказные люди посылают к Москве и в ыные городы для дел, жены свои в деньгах закладывают у своей братьи у служилых же и у всяких людей на сроки, и отдают тех своих жен в заклад мужи их сами, и те люди, у которых они бывают в закладе, с ними до сроку, покаместа которые жены муж не выкупит, блуд творят беззазорно; а как тех жен на сроки не выкупят, и оне их продают на воровство ж и в работу всяким людем, не бояся праведного суда божия; и те люди, покупая тех жен, также с ними воруют и замуж выдавают, а иных бедных и убогих вдов и девиц беспомощных для воровства к себе емлют сильно, и у мужей убогих работных людей жен отнимают и держат у себя для воровства, и крепости на них емлют воровские за очи; а те люди бедные, у которых жены поотымают, скитаются меж двор, и от насильства покиня жену свою, даютца в тех же и в иных городех в неволю, в холопи, всяким людем, и женят их на иных женах; а те их отнятые жены после того выдают за иных мужей, и продают и в заклад и в холопи отдают всяким людем. А попы сибирских городов тем вором не запрещают, а иные де попы черные и белые тем всяких чинов людем и молитвы говорят, а иных и венчают без знамен, не по крестьянскому закону. А иные многие люди мужи и жены в болезнех постригаютца во иноческий образ и потом, оздравев, живут в домех своих по прежнему, и многие из них постригшись жены с мужи своими и с наложники блуд творят и детей приживают, а иные многие и ростригаютца и платье чернеческое с себя сметывают. А в которых де городех монастыри мужеские и девичьи устроены, и в тех де монастырех старцы и старицы живут с мирскими людьми с одново, в однех домех, и ничем от мирских людей не рознятца. А которые де сибирские служилые люди приезжают к Москве з государевою денежною и соболиною казною, и те де служилые люди на Москве и в ыных русских городех подговаривают многих жонок и девок и привозят их в сибирские городы и держат их за жен места, а иных порабощают и крепости на них емлют сильно, а иных продают литве и немцом и татаром и всяким людем в работу, и иные всякие беззаконные дела делают, чего не токмо писати, и слышати жалостно и богу мерзко. А воеводы, которые в сибирских городех ныне и преж сего были, того не брегут и тех людей от такова воровства и беззаконных и скверных дел не унимают и наказанья им не чинят, покрывая их для своей корысти; а иные де воеводы и сами таким ворам потакают и попом приказывают говорити им молитвы и венчати их сильно. И всякое де насильство и продажи воеводы тутошним торговым и всяким людем и улусным иноверцом, вагуличам и татаром и остяком, чинят великое. И о том де к тебе сыну и богомольцу нашему бедные люди в насильствах, у которых жены у живых мужей поотыманы и подаваны за иных мужей и сами порабощены, тебе сказывают, и вдовы и девицы в насилии и во осквернении и в подговорех, что они осквернены и порабощены насильством, и про многих людей безчинства и пребеззаконное житие извещают и бьют челом, и в духовных де делех тяшкие вины доходят до многих людей, а ты о том не брежешь и дерзающих таковая прескверная дела и насилия творити не востязуеши и наказания им духовного и телесного никоторого от тебя нет. А бедные люди от таких законопреступных людей бедне насилуеми и оскверняемы и порабощаемы бывают, и ниоткуда ж избавленья приемлют. И к нам о том ни о чем не пишешь. И мы, слыша о таком пребеззаконном деле, слезне скорбим, что по грехом под паствою нашею такие богомерзкие и человеком гнусные дела совершаютца. И аще убо сия тако суть, якоже слышание обноситца, кая убо польза таковая творящим и нарицатися християны, дела ж горша поганых и непознавших истины имущим, таковыми бо имя божие, нареченное на нас, во языцех хулитца. Како ж и ты и протчии под твоею паствою священницы, иже от господа бога учинени [278] стражие и пастыри словесного стада христова, о паствах своих не брежете, кий ответ имате воздати в день страшнаго и неумытнаго судища христова, и что речете пред нелицемерным судиею вместо сего еже бы реши; се аз и дети их же дал ми еси, господи, их же упаствити не возмогосте или в небрежении полагающе и о спасении их не пекущесь, и жестосердое их и скоцское житие ведяще и божественных законы 1 да никогда ж послушающих, востязати им не хотяще. Подобает убо тебе, сыну нашего смерения, о порученном ти от бога стаде велико и твердо попечение имети, неослабно же и тщательно о них прилежати и вседушно о люцком спасении промышляти и заблуждающих человек и всякими сквернодействы удаленных от господа божественными законы утвержати. Веси убо, что глаголет бог к пастырем пророком Иезикиилем: сыне человечь, стража дается дому Израилеву, слыши от мене слово и запретиши им, и аще засвидетельствуеши им и неотвратятца от беззаконий своих, и во гресех своих умрут, ты ж чист еси; аще ли же не засвидетельствуеши им, кровь их от руки твоея взыщу, истиннаго бо пастыря дело есть, еже положити душу свою о людех, да егда приидет господь, возрадуетца о нем и о овцах возвеселитца; аще ли же обрящутца нецыи от овец отпадше, горе пастырем о нем, яко приимшим паства и о стаде нерадящим и с сего ради подобает пастырем всяко тщание и попечение и подвиг имети о стаде овец христовых: поручено бо им от владыки христа твердо блюсти я да ничто от них преступаемо и забвением преминаемо и невзысканием оставляемо, во он день в муках изыскуемо будет. Божественным бо правилом несохраннемым различная преступления бывают, и сего ради божий гнев и многия казни бывают, овогда глад и плодов умаление, ово ж брани и нестроение. Веси бо, яко по благодати святаго и животворящаго духа стража тя и пастыря и учителя стране онои рукоположих, и ничто же от тебе изыскую, токмо паствы и спасения сих, их же ради Христос кровь свою пролия. Воспомяни убо спасом реченное слово яко ему ж дано будет много, много и взыскано от него будет. И сего ради должны есмы человек, по своих похотех ходящих, а не по преданиям святых и божественных апостол и законоположением святых отец и противящихся здравому учению, наипаче ж вслед похоти плотских скверностей ходящих и о господних повелениях нерадящих, правым учением исправляти, непокоряющих же ся и злословных и страхом и прощением мук востязати по божественному писанию, яко же и верховный апостол Петр в соборных посланиях своих пишет тако: яко тако есть воля божия, благотворящим обуздовати безумных человек невежество. И Павел божественный к Тимофею пишет о преступающих закон, тако глаголя: умоли, обличи, запрети таковая творящих. Виждь убо, яко первое умолити повелевает, потом же обличити, яко непослушавших, непокорившихся истиние запретити, еже есть отринути или отсещи, яко гнил уд, повелевает. А иже дерзающих в сродстве блудству примешатись, слыши, что о сем той же избраный сосуд учитель Павел в послании своем еже к римляном пиша глаголет: откуду ли, рече, слышатца в вас блужение, и таково блужение, яково же ни во языцех именуетца, яко некоему имети жену отчюю, сиречь мачеху, и вы разгоресте и непаче плакасте да изметца, рече, от среды вашея, соделавыи дело сие, аз убо, рече, аки не у вас сыи телом туж живыи духом, уже судах яко ту сыи содеявшего таковое о имене господа нашего Иисуса христа предати таковаго сатане во измождение плоти, сиречь в нестерпимые муки плотские вложити того и никакож пощадети содеявшего таковое зло, да дух его спасетца в день господа нашего Иисуса христа. И паки той же глаголя, писах, рече, к вам в послании не примешатись блудником, и не точию блудником мира сего и лихоимцем или хищником или идолослужителем. И аще, рече, некий брат имянуем будет блудник или лихоимец или идолослужитель или досадитель или хичник с таковыми ниже ясти. Зри же вселенского учителя тако повелевающа: [279] законопреступных не пощадевати, но се убо суд неумолим о некоем соблудившем с отчею женою, еже есть с мачехою; что убо хотим реши о иже дерзающих на матери и нестыдящихся своего ложа, откуду изыдоща, или на дщери немилующих своей крови, или на сестры на родные и ближняя своя, не в теле ли суть огню геенскому предани. Воистину таковые, ничтоже от нечистивых псов разликуют, и неточию христианы, но и человеки чюже им нарицатися, а душа убо их яко во гробе затворена и увы страшно слышание таковая деющих. Мню бо, яко суд божий остави таковых в телесех страдати да и в будущем безответно мучими будут; но горе воистинну слышащим таковая, паче ж зрящим и неистязающим таковех сквернения яко последователие хотят сим быти в геену огненную, их же огнь не угасает и червь не умирает. А то же и о других речем, иже великий образ ангельский обругающим; первое убо усвоившимся и яко некое возложение честное себе богови принесшим, потом же напрасно скочившим и возвратившимся, яко псом на своя блевотины, и всех владыку, яко непотребна оставльшим, паки к бесовским хотениям пририщющим, мню, яко невежеством сия творят, понеже не имут воспоминающего их от такового начинания. Что священницы мнящесь тех отцы и пастыри возглаголют, иже видяще таковая творящих, и не востязают; по истине не суть отцы и пастырие, но волцы и бесом способницы наричются; иже бо согрешая в неведении, аще и суд подемлет, но с милостию наказание, понеже в невежествии и в неучении сия сотвори. А иже разумея и не востязуя тех, сей убо не пастырь, но вождь сатанину творению обрящетца и горшая мука постражет. О таковех бо спас во евангелии рече: горе вам, книжницы и фарисеи и лицемерии, яко взясте ключь разумения, сами не входите и входящим возбраняете. Но убо, сыну, подобающе ти о таковех соболезновати и попечение имети непрестанно и плакати и слезити о таковех, и всяческим зельным прилежанием и по бозе тшательным учением утвержати, и на познание истинны возвращати, и многое попечение о спасении душ их всегда имети, воспоминая реченный глагол господом нашим Иисусом Христом к божественным его учеником: блюдитеся, рече, да не погибнет един от малых сих, понеже от рук ваших изыщу сия; и паки глаголет: изводяй бо, рече, честное от недостойного, яко уста моя суть. Зри ж убо человеколюбие божее, каковех творит обращающих согрешивших от заблуждения и какову свойству сподобляет, яко уста, рече, моя суть, иже бо нашего ради спасения в нашу нищету облечеся и наша худшая и нищая восприим, в небесных богатствовати нас устрои. Сие убо видящи владыки нашего бога х кающимся со усердием милостивное преклонение, подобает нам согрешающих человек и отступших от истиннаго пути всячески исправляти и во истинное покаяние приводити, яко же апостол глаголет: должны есмя мы сильнии немощи немощных носити и не себе угождати, но кождо нас ближнему угождает к созданию, изнемогающего же о вере утверждати. И сего ради повелеваем и заповедаем священному ти епископству таковех убо первое молити да престанут от таковых начинаний и к тому к таковым злым не примешаютца да не в горшее впадут тяжести ж ради греха опитемьям подлагаеми да будут, яко да явитца истинное тех покаяние; призывати же сих начасте и с сими собеседовати, и слово истины тем предлагати и гладостию словес, яко медом, услаждающим, устне тех помазати; в аще убо благопослушливы обрящутца, благодать создавшему нас, яко обретохом погибшее по глаголющему: яко велия радость бывает на небеси о едином грешнице кающемся. Таковех бо покаяние и в мале времени исправить и во общение прияти сильни есмя; зрит убо владыка не на долготу лет, но на мал час кающагося со истиною, якоже и разбойник много беззакония сотвори, пришед же к мучению, аще и невольне, при кресте мал глас испусти, велию благодать обрете, предшественник рая обретесь. Ведый же буди, яко три убо сосудове владыки нашего бога: первый убо щедр, другии же милостив, третий же долготерпелив и многомилостив, сего бо ради [280] о всех человецех милостивно возглагола и низу падших ко спасению воздвиже, яко не хощу, рече, смерти грешнику, но еже обратитися и живу быти ему. И убо известно вемы, яко несть грех побеждающ божие человеколюбие. Нехотящих же последовати словесе вашего учении повелеваем убо таковым запрещати и от божественных тайн отлучати и ниже церкви тех приимати, ниже попом в таковых домы входити, яко да познавшие в какове доме согрешении лежаще, ото обычных тем преступлении воспрянут и слезне к божественной церкви притекут и согрошенная ими покаянием исправят. Аще ли же нецыи сего не послушают и всячески сопротивни будут вашему учению, наипаче же христове вере и апостольскому преданию, таковых убо не точию запрещати и обличать, но и градским казнем подлагати закон повелевает, точию по различию греха и с велицем рассмотрением, пощадевати же никако же, понеже сопротивни не точию нашему учению, но и самому богу, и лучше есть согнивший уд от тела отнята, да не все тело погибнет. Смотрительно же повелеваем о таковех рассуждати и казнем подлагати таковех, иже отнюдь не хотяще истины слово учения прияти, прибеззакония творящим, с ними прежде к тому во едином граде уж не пребудут да не паки обешницы страстем сих явятся, и ово убо по рассуждению лет и возраста в жития и нрава во мнишеский образ облечени да будут, друзии же законным браком да причтутца. Аще возможно вся сия да бывают со многим рассуждением по известным отеческим правилам. Мужие же, иже прежде сподобльшеся образу мнишескому, со женами своими также и жены, постригшие власы, к тому да никако же во едином дому пребудут: беззаконно бо дело есть и сено огню никако же согласовати молят, но в монастырех или во иные грады да пошлютца и во едином граде к тому да не прибудут, да не от воззрения о тех душевную тщету подоимут и паки умом пленятца и дерзостью погибнут. Аще ли же и еще нецыи и правого пути совратившесь и в горшая успевающе, божественных закон паки небрещи дерзнут и учения послушати не восхотят, таковых убо непослушных и жесткосердых невежеству подобает и страхом мук и прещенми истязати и воли их злой быти не попущати, по апостолу, глаголящему, яко благия творящи обуздовают злых человек нечестия начало, злобных же и градским судиям предаяти во изстление телеси да дух его спасетя. Якож слышим многия божественныя отца в писаниях повелевающа: таковых градским кажнением подлагати, о них же и книги правильнае изложиша яко да непременно будет таковое предание; непокаряющих же ся сим анафеме предают, сиречь проклятию. Аще ли же нецыи малоумни хотят рещи, яко не подобает согрешающих человек и ненокоряющихся истине мирским казням подлагати, и таковое повеление немилостиво наречет кто, да слышат убо таковыи, что о сих великий Афонасей Александрийский глаголет: аще кто речет, яко не подобает судити творящим смертные грехи, сие еретический отроцы глаголют; аще ли же тако бы было, не бы праведный Ной судил Хама ругателя раба быти братиям своим, и Моисей же поклонившихся тельцу во един день 3000 повеле мечем изсещя, собравшего же дрова в субботу повеле камением побити; и Иисус Навин Ахара крадьбы ради со всем домом потреби; Финесей же блуда ради Замврия погуби и от бога вечною правдою свидетельствован; и Самоил Агага царя пред господем убив и не осквернися; Илия же ложные пророки, яко свинья в потоце искла и два пятидесятника и с прочими огнем с небесе сожже; Елисей же Гнозию приятия ради имения осуди и прокаженна показа, и Данил муж желании блудный старца законом Моисеевым осудив погуби; и святый верховный апостол Петр ключа небесного царства приемый Ананию со женою его от своего их стяжания утаивших цену осудив, абие издохнути сотвори и Симона волхва смерти молитвою предаде; избранный же сосуд Павел Александра ковача и Менея ж и Филита предасть сатане, да накажутца не хулити, и Елиму волхва словом ослепи; великий же Иван богослов Купола волхва молитвою в мори потопи; тако ж и снятый апостол Филипп архиерея, глаголавшего хулу [281] на господа нашего Иисуса Христа, земли поглотити повеле; блаженный же Лев епископ Катанский, внегда убо служащу ему святую литоргию, виде некоего волхва, именем Луидора, стужающа ему и божественнеи вере ругающаясь, на мнозие же сему бывшу, не стерпе, но с яростию от церкви искочи и огню возгнещену бывшу повелением того амфором своим волхва связав и сам во огнь вшед нечистаго сожже, сам же не опалися; и мнози от святых ревностию по бозе разжигаеми злочестивых погубиша и истинны не отпадоша. И святый апостол Июда в послании глаголет: овах убо милуйте разсуждающе, овых же страхом спасайте; и наш божественный Афонасей и великий Иван Златоустый в своих писаниях глаголют: царскими ж суды и градскими законы обуздоваетца безумных человек воля, иже смертный грехи творящих и душа с телом губящих. Аще ли же нецыи не хотяще послушати пастырского словесе, таковых под градским правилом муками истязаемы да бывают и смертию осуждаются; градские бо судия сего ради учинени, яко да повелением царским благая творящим царской милости усвояют, противящих же ся мукам и казнем подлагают, яко мстителе неправдам по реченному еже ко царем и властем повелеваемое правильное слово: слышите, рече, царие и князи и разумеите, яко от бога дана бысть держава вам, яко слуги божие есте, и сего ради поставил есть вас пастыря и стража людем своим, да соблюдете стадо его от волков невредимо; вас бо бог в себе место избрал на земли и на свой престол вознес посади, милость и живот положи у вас и мечь божия вышняя десница вручи вам. Да никто же речет, яко не достоит сопротивящегося богови и закону мукам и казнем подлагати; едино бо есть и помни первое другого, еже нища и убога помиловати и богу противящаяся обличити и мукам предаяти, яко ж священный Златоуст уча сице глаголя: еже убо по воли божий бываемо, аще и озлобили мнитца всех есть доидиши, и аще убьет кто по воле божией человеколюбия всякого есть лутши убийство оно; аще же пощадить человеколюбствуя чрез угодное оному убийства всякого непреподобнейши будет сие пощадение, яко же и бытейская книга являет: пощаде убо некогда чрез божию волю Саул царь Израилев Агага, царю Аммаликова, и за се пощадение приять от бога осуждение и неточию сам, но и все семя его; тако ж Адера царя ассирийска Ахав паче угодного богови снабдев отпусти, и речено бысть к нему яко мужа губителя отпустил еси, душа твоя вместо души его и люди твои вместо людей его в погибель будут; яко же некий пророк к некоему рече словом господним; бий мя и не восхоте человек он бити его, и порази его лев, и рече пророк другому: бий мя и би его человек той и сокруши ему лице; что убо будет сего преславнейши: бивый пророка спасеся, а пощадевый мучен бываше. Да навыкнем, яко аще богу повелевающе недостоит испытывати естество бываемых, но повиноватися точию, и сего ради засвидетельствую ти пред богом и господем нашим Иисусом христом хотящим судити живым и мертвым, проповедуй слово истины, со дерзновением настой, побуди благовременне и безвременне, обличи, запрети, умоли со всяким долготерпением и учением, на сие убо и поставлен еси. Веси бо, колики сокровища благочестивый христолюбивый сын наш великий государь царь и великий князь Михайло Федоровичь всеа Русиа и аз истощихом красоты ради церкви божия и человеческого спасения егда рукоположихом тя епископа быти и всех пребывающих с тобою в далечайшей оной стране, никто же прибытка желая от вас, точию сего ради, да проповедь спасения словеси божия в стране оной растет и множитца, и страна отчюждена и закона божия весьма не ведуща, спасенные проповеди слово приимет, с любовию сие содержит. И аз, слышав таковая о здравем ти учении и о протчих человек спасении, возрадуюся, и труд нашего учения со успехом возврастати будет, и паки вси еже обычно есть мне, егда убо вижу чада моя паствы во спасенных повелениях ходяща, радостию яко на небеса восходит дух мой. Аще же вижу нецыи неразумием и неучением ходяще и самочинием боляща, болезнует душа моя, ведый бо ярко сия истязати [282] имать от мене владыка в день века. И сего ради заповедаю ти, да никако ж обленишися попечение имети о преданнем ти стаде, аще и огорчат тя противлением, но никакож ослабевши в таковых, ревнуя апостольским преданиям, яко и сии человецы быша, и егда убо послани на божественную проповедь, исперва убо поношаема бесчествуеми, ругаеми, уничтожаеми бываху, но никако ж сумняшесь истинны слово утверждати, радующесь рече апостолы идуще аще от лица собору яко сподобишась за имя господа Иисуса христа безчестие прияти. Последи же тии же от преже поругавшихся им прославляеми бываху и не точию прославляеми, но и поклоннями. Всяка убо скорбь по бозе не может быти, во мир и радость духовная, якоже и Стефан велики пермский иже бывый преже во оной стране, виде человек и заматеревши и состаревшись в делех злых и в служениих дьяволих и весьма чужди апостольские проповеди, не усумнеся ниже убояся тех сверепства, но дерзну о бозе; аще исперва и поругаем сими, но последи, яко ко отцу притигающе того учению, яко ангела божия, того стыдящеся и почитающе, паче же и бояхуся, яко самого бога, да не прежнего ради тех, иже ко оному казнь на ся от бога привлекут, но и по смерти блаженного оного учителя прославляют и храм во имя того поставляют и равноапостолом того наричют, и неточию недра, приимшая того мощи, и персть, в вей же положися, святу наричют. О протчих же, мнящихся правящих власти, неисправлении и поползновении, паче ж бывающего ради от них лакомства, да не обленившись их востязати и здравым учением и с сими начасте беседовати, и слово спасения тем предлагали и поползновения тех тем востязати ово убо словом разсуждения, ово же и страхом царского прещения. Аще ли всяко сопротивни обрящутца и людий божиих и нашиих со истинною управляти не восхотят, но, сребролюбия недугом боляще, восхотят похищати, мы убо государскую отческую милость тем предложихом и слово учения прострохом, по не восхотеша послушати, и сего ради царским судом судими и наказаеми будут по разнству согрешении, ни единого же благославна на се имуща. А сее бы нашу грамоту велел чести вслух в соборной церкви, и для того велел в церковь быть боярину и воеводам и дьяку и детем боярским и всяким служилым и жилецккм людем. И которые будет речи будут им неразумны, и ты б им то рассуждал и росказывал на простую молву, чтоб ся наша грамота во всех сибирских городех была ведома, и самовольных бы, не по закону ходящих людей вперед не было и прежнее их беззаконное дело нигде не именовалось. Да ведомо нам учинилось, что есть в Сибири старая грамота за дьячьею за Ондреевою приписью Щелкалова, что сибирским людем поволено с Москвы и из иных городов свозить жен и девиц и с ними жить по своей воле и отымати у них тех жен и девиц не велено; и ты б богомолец наш велел тое грамоту принести к себе, а взяв ее прислал к нам к Москве; а ко государеву боярину и воеводам и к дьяку от государя о том о всем писано. Милость же всещедрого и человеколюбивого бога нашего и пречистые богородицы и всех святых молитвы и нашего смирения благословение и молитвы да есть и будет на освященном ти верси и на всех послушающих нашего повеления и здравого учения, аминь. Не покорящихся же самоизволен суд да постигнет. Писан на Москве лета 7130-го февраля в 11 день.

На подлинном з грамоты списке: Дияк архиепископа сибирского и тобольского Иван Максимов.

ГАФКЭ, портфели Миллера, № 478, II, грам. № 7. Cnиc. XVII в. 18 сставов. Список XVIII в. в ААН, ф. 21, оп. 4, № 5, лл. 158-166 об., № 145; № 16, лл. 405-415, № 103. Напеч. в СГГД, III, стр. 245-253, № 60.


Комментарии

1. В рукописи: законников.