-

|л. 231| Словеса похвалная купно же и нравоучителная на двадесять и един праздник угодников Божиих во оглавлении изъявителных народовещателная, ползы ради всех христиан правоверных. Благовернейшему христолюбивнейшему самодержавнейшему тишайшему великому государю царю и великому князю Алексию Михайловичю всея Великия и Малыя и Белыя России самодержцу всесмиренно врученная от сложившаго ю трудолюбне мно[го]грешнаго иеромонаха Симеона Полоцкаго в царствующем граде Москве, во обители Всемилостиваго Спаса нерукотвореннаго образа его же за Иконным рядом в лето от создания мира 7183, от Рождества же по плоти Господа нашего Иисуса Христа 1675.

Еленхос, или Оглавление слов в книзе сей содержимых.

Первым слово тому написася,
иже человек Божий съвыше звася.
Сей есть АЛЕКСИЙ, то есть пособитель
царя нашего присный защититель. /л. 231 об./

Второе слово потщахся писати
тебе, святая НАТАЛИА мати,
Яко царица светлая то носит
имя святое и тя в помощь просит.

Третие слово — ФЕОДОРУ святу
по сих в похвалу силну Стратилату,
Яко сын царский первейшь имя тое
в правду БОЖИИ ДАР получи святое.

Четверто слово тебе, ИОАННЕ,
о предитече Христу предпосланне.
Яко сын царский вторый имя твое
любезне носит и славит святое.

Пятое слово первопрестолному
писах в похвалу ПЕТРОВИ святому.
Яко сын царский третий ПЕТР прозвася
святаго ПЕТРА защите отдася. [20]

Шестое слово преславней девице
ИРИНЪ святей дивней мученице,
Ей же светлая ИРИНА царевна
Богоизволне есть тезоименна. /л. 232/

Седмое слово АННЕ положися,
ею же мати Божая родися,
И ей же АННА пресветла царевна
от юности есть в защиту временна.

Слово осмое тебе, ТАТИАНО,
от усердия в почесть написано
О мученице Богом возлюбленна,
ей же ЦАРЕВНА есть тезоименна.

Слово девятое, ЕВДОКИЕ, тебе,
страстотерпице, живущая в небе
Есть в похвалу, яко имя носит
твое ЦАРЕВНА и молитв ти просит.

Слово десятое тебе, МАРФО, мати
столпника рождшей, тщахся написати,
Юже ЦАРЕВНА МАРФА величает
и в прошениих ползу познавает.

Первое выше десяти есть слово
тебе, СОФИЕ святая, готово,
И дщерем твоим, а СОФИА тебе
ЦАРЕВНА славит въдающи ти себе. /л. 232 об./

Слово второе выше десятицы
ЕКАТЕРИНЫ славу мученицы
Поет, ея же молбыми ЦАРЕВНА
ЕКАТЕРИНА да будет спасенна. [21]

Трина десято слово тебе, МАТИ
МАРИЕ, изволь любезно прияти
И дщерь царскую МАРИЮ хранити,
да бы зде долго, в небе — вечно жити.

Четверто слово выше десятицы,
ФЕОДОСИИ в славу мученицы,
Юже дщерь царска светло величает
ФЕОДОСИЯ и спастися чает.

Зде НАТАЛИИ писати бы слово,
но в числе втором то зрится готово,
Едино имя имат дщерь и мати
слово едино может довле стати.

Преподобная ФЕОДОРО мати,
пятонадесять слово изволь взяти
И ФЕОДОРУ, царску дщерь, хранити,
да бы ей лета здраво многа жити. /л. 233/

Шестоенадесять слово составися
ПЕТРУ, иже первый престолник явися
Во граде Московстем, его же молвами
буди, Христос Боже, сам со всеми нами.

Седмоенадесять слово чюдотворцу
АЛЕКСИЮ, иже угодил есть Творцу,
Пасый стадо его Российский страны,
Его же нам мощи в ползу Богом даны.

Осмоенадесять ИОНЕ святому
пастырю слово в честь ны помощ скорому,
Его же молбами милосерд нам буди,
Боже един в Троице, спаси твоя люди. [22]

Девятоенадесять ФИЛИППУ святому,
митрополиту слово есть всероссийскому,
Его же ходатайством даждь нам мирно жити,
Христе Боже, и тебе прилежно служити.

Два десятое слово СЕРГИЮ святому
преподобно пожившу отцу пречюдному,
Наставнику иноков, его же молбами
и ходатайством теплым буди, Христе, с нами.

Двадесять первое Звенигородскому САВВЕ
слово написая руска ради славе
Пожившу аггелско в плоти, чисто, свято,
днесь же со аггелы ликующа за то.

Текст воспроизведен по изданию: Имя в риторике и поэзии XVII века у восточных славян // Славяноведение, № 1. 2002