110

1393 г.— Духовная Остафия Ананьевича на недвижимое и движимое имущество в Ловоти, Шенкурье, Кокшенгском погосте и других местах

Список начала XVII в.; озаглавлен: Списокъ з духовные слово в слово; после текста рукою И. Ф. Розова: ЛЪта 6901. ГПБ, собр. Погодина, № 1840, лл. 2 об.— 11.— Списки XIX в.: 1) озаглавлен: Духовная грамота новгородца Евстафия Ананьича Своеземцова в лето 6901 (1393); после текста: Прим. Подлинника не отыскано; сия копия списана с древнего списка, хранимого в городе Шенкурске. ЛОИИ, собр. рукописных книг, № 584, лл. 3—5; 2) ЛОИИ, по опис. Барсукова № 32, II, л. 58 об.—60 об. См. легенду к № 279.

АЮ, № 409, I (по списку сборн. № 32, II).

Основание датировки: условно на основании помет.

Во имя отца и сына и святаго духа. Се язъ рабъ божии Остафеи списахъ рукописанье при своемъ животЪ. А приказываю животъ свои госпоже своеи матери Онтоньи и сынови своему Федору, отцыну свою и дЪдину, землю i воду, по отца своего рукописанью и по володЪнью. А что отцына моя и дЪдина на Ловоти, (В списке XVII в.: Волоти; исправлено на основании № 278, где упоминается та же земля.) земля i вода, и пожне, и лЪсы, въ Ходыни, i в ДроздинЪ i в Селскои лукЪ, по володеныо отца моего и дяди моего, и по нашему володЪнью мнЪ з братомъ своимъ з Григорьемъ наполъ, а моя половина сыну моему чиста. А что отцына моя и дЪдина моя, земля и вода за Волокомъ в Шенкурье, а въ тои землЪ мнЪ з братомъ з Григорьемъ половина i в лЪсе, i в озерахъ, i в рЪчкахъ, i в ловищахъ, по володЪнью отца моего и дяди моего. Что прикупле отца моего, а то сыну моему цыста по купнымъ грамотамъ и по володенью отца моего. А з братомъ моимъ з Григорьемъ моя половина сыну моему цыста по роздЪлнои грамотЪ, а Федору посаднику и его братаномъ другая половина. А что отцына наша на Кокшенскомъ погостЪ, земля i вода, и лЪсъ, а въ томъ мнЪ съ своимъ братомъ з Григорьемъ и з дядею съ Семеномъ половина, а посаднику Федору и его братаномъ другая половина; а въ нашеи половинЪ Кокшенского погоста Семену половина, а мнЪ и брату моему Григорью другая половина; а въ [167] нашеи половинЪ з Григорьемъ мнЪ двЪ чясти, а брату моему Григорью треть. А что отцына моя и дЪдина моя въ Ясеничяхъ i в Ло[в]шичяхъ земля, а въ томъ мнЪ половина з братомъ з Григорьемъ, а дяде Семену половина. А что земля i вода в ЛетмЪ, а въ томъ мнЪ з братомъ з Григорьемъ половина, а дяде Семену половина; а старая грамота Ясеническои земли у Семена. А что купля отца моего Онаньина и Семенова въ Ясеничяхъ земля, а то мнЪ з дядею с Семеномъ по купнымъ грамотамъ, и по серебру, и по отца моего рукописанью; а купные грамоты тои землЪ у Семена вси, а не виноваты Семену ничимъ же. А что есми утягали (В списке XVII в.: утагали.) з дядею своимъ съ Семеномъ Онисима земчя в тои Ясеническои земли, а та грамота утягальная у Семена. А что въ Шенкурье вода и земля Яропугская (В списке XVII в.: Яропунская.) не дЪлна, i в томъ мнЪ половина, а брату моему Григорью половина. А что земля наша отцына на СнЪ i в РокитнЪ, мнЪ з братомъ з Григорьемъ половина, а Семену половина. А что бабе нашеи Федосьи купля въ Подберезьи Киселеве село, а то ми з братомъ з Григорьемъ наполъ, а Семену ту не надоби. А что купля отца моего Яковково село Тавруева, то сыну моему чисто по купнымъ грамотамъ отца моего, а Семену и Григорью то не надоби. И дворъ мои городчкиi, а то ми з братомъ зъ Григорьемъ наполъ. А что лавка наша на Хопылскомъ ряду и голбецъ во святомъ МихаилЪ, а въ томъ мнЪ з Григорьемъ половина, а Семену половина. А пожня на Быстрои, а в томъ мнЪ з братомъ з Григорьемъ половина, а Семену другая половина. А въ МашковЪ болотЪ, в пожняхъ, i в колу, i в маломъ колцу, мнЪ з братомъ з Григорьемъ осмая чясть. А что Новгородъ пожаловалъ отца моего и меня и далъ грамоту на Валжане, i в томъ у отца моего и у мене купилъ Александръ посадникъ четвертую чясть, а далъ на неи дватцать рублевъ и сто, и послалъ Александръ въ свое мЪсто на свою чясть Тимофея Прокопьина, и Тимофеи ималъ Олександрову чясть в Олександрово мЪсто; а чи будетъ вписалъ Александръ въ свое рукописанье на отцЪ на моемъ и на мнЪ ту дватцать рублевъ и сто, а тымъ отецъ мои ни язъ не виноватъ Александру ни инымъ ничимъ же, по отца моего рукописанью и по моему рукописанью; и была отцу моему говорка с Олександромъ предъ владыкою ОлексЪемъ о томъ серебрЪ, и отмолылся Александра отецъ мои. А взяти ми где что по жеребьямъ и по грамотамъ, а то все мое чисто возметъ сынъ мои Федоръ: у Матфеевыхъ, у Болсина, у Семена и у ГордЪя пять рублевъ за Марфу за ОхромЪеву тещу; у Голузе у Чемеркова и у его дЪтеи пять рублевъ; у Филипа Яскоминова три рубля, а грамота в закладе; у Оксентеика въ Ясеничяхъ полчетверта рубля; у Пышкова сына у Степанова три рубля; у Захара [168] з братомъ у Олферовыхъ дЪтеи шесть рублевъ и портище овцынъ; у Устинца полтина; у Демидца полтина; у Кондратка з братьею у Терентьевыхъ дЪтеи три четверти; у тово ж Кондратка полтина, опришь братьи; у Семенца у Максимцова пасынка полтина, а Максимке в порукЪ. А что моеи челяди дерноватои, что досталося отцу моему у дяди у Бориса в оддЪлъ: Степанко Гаврилцовъ с женою и с дЪтми; зять его Яковке з братомъ, з женою и з дЪтми; Iванко Долгои съ сыны, а жена его и дцери свободны; Олекса з женою и з дЪтми; Карпъ с женою и з дЪтми; Съвохъ съ сыномъ и з снохою, а жена его и дцери свободны; Озарка и Демидецъ з женою и з дЪтми; Денесья з женою; Данилка з женою и з дЪтми; Ермакъ съ сыны, а жена и дцери свободны; Обросимецъ съ сыны, а жена и дцери свободны; Павлечь, брать его, съ сыны, а жена и дцери свободны; Якимецъ Сушко с сыны, а жена и дцери свободны, и сестра Якимцева з дЪтьми; Савица з женою и з дЪтми; Савостьянецъ Мишуковъ и сестра его КиликЪя и дцери; Данилецъ Петеримовъ — мои. А Мину з женою и з дЪтми мать моя и азъ отпустили есми на свободь, и Оленицу с матерью и з сестрою. А жена моя, оже всЪдитъ в животЪ моемъ, ино осподарына животу моему; или поидетъ замужъ, ино еи надЪлка десять рублевъ, а что принесла порты, и круту, и челядь, а то еи и есть. А будетъ у моеи жены сынъ, ино моимъ дЪтемъ животъ мои, и села мои, и челядь моя наполъ, или будетъ дчи (В списке XVII в.: тчи.), ино выдасть ю брать Федоръ по силе. А доколе сынъ мои Федоръ подростетъ, а дотолЪ Ъздитъ по моимъ селамъ братъ мои Григореи в мое мЪсто и людми моими володЪетъ; а хлЪбъ, и куны, и даръ, а то идетъ матери моеи и сыну моему Федору. Или богъ умыслить о дЪтехъ моихъ, ино брату Григорью половина в животе моемъ, в землЪ i в воде. А другую половину живота моего, в землЪ i в воде, ты, брать Григореи, испродаи, да впиши во вседневниi службы отца моего, и матерь мою, и мене, а остаткомъ и ты по насъ помяни. А челядь мою дерноватую, а то всю, брать мои Григореи, отпусти на свободу. А в приказЪ приказываю господину посаднику Федору ТимофЪевичю, господину посаднику Юрью Дмитреевичю и господину ОлексЪю, и шурьи своеи Iвану i Василью, и дяде своему Юрью Федорову, и брату своему Ермоле Микифорову: а бога для, господо, постерегите матери моеи и дЪтокъ моихъ, цы хто ихъ иметь обидити. А не виноватъ есми никому ничемъ, развие богу душею. А на то богъ послухъ и отецъ мои духовнои попъ Амосъ святаго Михаила. А писалъ рукописанье диякъ ЕремЪи святаго Михаила. А хто сие рукописание преступить, судитца со мною предъ богомъ въ день страшнаго суда.