-

Повести древних лет, яже содеяшася в Великом Новегороде.

О Посаднике Добрыне.

(Из древней рукописи.)

«В лета благочестивых великих Князей наших Русских, живущим Новгородцем в своей свободе и со всеми землями в мире и совокуплении, прислаша Немцы от всех семидесяти городов Посла своего, биша челом Архиепископу Новгородцкому и Посадником и Тысяцким и всему. Великому Новугороду, глаголюще: «милыи наши соседы! дайте нам место у себе посреди Великого Новагорода, где поставити божница по нашей вере и [197] обычаю». И Новгородцы отмолвиша им, рекуще: «милостию Божиею и Его Пречистые Богоматери и отца нашего господина Архиепископа благословением и молитвою, у нас в вотчине, господы нашей великих Князей Русских, в Великом Новегороде стоят все церкви Православные нашей Веры Христианскиа, — ино кое причастие свету к тме, также и вашей божнице быти как в нашем граде?» Бе же тогда Посадник Степенный, Добрыня именем. И Немцы слышавше жестокий ответ от Архиепископа и от всего народа, и своим лукавством биша челом посаднику Добрыне и даша ему посул велик: о села, бо и Соломон рече: все послушают злата. Посадник же Добрыня и с злыми своими советниками повеле Немцем говорити Старостам купецким и купцом Новгородским: «только нашей божнице, храму Святых Верховных Апостол Петра и Павла, не быти у вас в Великом Новегороде, ино вашим церквам у нас по нашим городам не быти ж». И то слышавше Старосты купецкие и все гости Новгородцкие, начаша бити челом господину своему отцу Архиепископу имрек. и всему Великому Новугороду, рекуще: «пожалуйте, [198] поволите Немцем поставити ропату по их обычаю и вере и место им дайте, где полюбят, занеже не будет их божницы зде, ино нашим церквам у их не быть»; — таже и Посадник Добрыня за Старост и за гости начат говорити: «только не будет наших церквей по Немецким городом, ино нашим гостем Новгородцким вельми будет нужно». Архиепископ и Новгородцы, послушав посаднича совета и гостей своих челобитья, поволиша Немцом поставити ропату, а место им укажет Посадник, где будет прилично. И Немцы избраша себе место посреди града в торгу, где стоит церковь древяна Святого Иоанна Предтечи. Посадник же Добрыня, ослеплен мздою и научен диаволом, повелел снести церковь Святого Предтечи на ино место, а то место отвел Немцом. Предтеча же Господень, не терпя вражия навета и его злого советника, что испоругал святый его храм, мзды ради; в нощи убо той услыша пономарь тоя церкви Предтечевы глас, глаголющ ему: заутра, на третьем часу дневном, иди на великий мост и повели Новгородцем смотрити Добрынина посаднича чуда. И понамарь заутра возвести Новгородцом, якоже слыша, и [199] абие стекошась множество народа на великий мост видении, что хощет быти. И какож поеха Посадник Добрыня с веча, к своей улице, чрез Волхово в насаде с людьми своими, и внезапу прииде вихрь и взем насад взнесе на высоту, яко боле дву саженей, и удари о воду, и ту потопе Посадник Добрыня к дну, а прочих всех переимаша в судех в малых перевозники: и тако неводы, мрежами и ужи едва възмогоша вывлещи тело его из реки; за свое ж лукавство не получи и погребения, яже есть обычай православным. — Сия ми поведа Игумен Сергий Островского манастыря от святого Николы отец Закхиев нынешнего Игумента Хутыньского.

О той же ропат.

И якоже совершиша Немцы ропату свою и наяша иконников Новгородских и повелеша им написати образ Спасов на ропатнем углу, на полуденней стране вверху, на прелесть Христианом и на соблазн. И якоже написаша иконописцы образ Спасов на ропате, а Архиепископу не доложа, и открыта покров, и абие вскоре по том часе прииде туча с дождем и с градом, и выбила градом и [200] место то, идеже был написан образ Спасов, и левкас смыло дождем, якоже не явитися ни знамению писания. Сия до зде:

Той же чудный муж Сергий поведа о Благовещенской церкви монастыря Благовещенского, юже солдаша два брата по плоти, потом же оба бывша Архиепископа великому Новугороду, именем Григорий и Иван и т. д.».

За сим следуют еще несколько повестей Новгородских. Взято из книги, писанной в 4. разными руками, под названием Сборник, заключающий в себе много любопытных бумаг. Статья, из коей приведены сии выписки, кажется, принадлежит, по почерку, к концу XV, или началу XVI века.

Текст воспроизведен по изданию: Сведение о подьячем Анкудинове, ложно назвавшимся сыном царя Василья Иоанновича Шуйского // Северный архив, Часть 26, № 6. 1827