Странствования Василья Григоровича-Барского по святым местам Востока с 1723 по 1747 г.

(под редакциею Н. Барсукова)

Ч. I. СПб, 1885. С. 407-424. Ч. II. СПб, 1886. С. 157-166.

1727 год

Поклоншися убо аз в оной обители честному и животворящему древу и замедливши тамо и на иннихь местехь монастира 3 дни, возвратихся кь своему паки сопутнику, и абие 1 отъидохомь кь первому нашему пристанищу Лемесу 2, идеже три дни замедлихомь, готовящеся в предумишленний путь, и обретше корабль Французский, хотящий плисти в Александрию, наяхом и вкораблившеся отплихом от славнаго морскаго Кипра, Июлия 18 числа, хотяще дойти в Александрию, яже 500 мил отстоить. Не сущу же времени благополучну, пловохом по мору шесть дний и уже близь сущим Александрии нам явися буря велия и противная путешествию нашему, яко отнюд не можахомь плисти. Сего ради господин корабля приста кь единому пристанищу, нижей Александрии сущему, именуемому Апокерия, иже есть место убого и оскудно в вся, понеже на песку стоит идеже ничтоже не раждается, токмо финиковь многое множество, от нихь же Арави кошници плетут зело лепотним художеством и продают вь вселенную. Тамо християне не обитают, токмо самие Агаряне. Уведавше же от пришелец, яко в Александрии патриарха нест, но в Египте, понеже патриарха ради тамо [407] хотехом дойти, а не инной вини 3, сего ради пренесше своя вещи в ин маль корабль Ефиопский и замедливше тамо два дни, третияго дне отплихом к граду, рекомому Рахит 4, идеже первее плихом морем, таже дванадесят миль рекою Нилом. Рахить нест град стеною оточен, но касапас, си есть множество народа и зданий, якоже градь имущ. Стоит же при Ниле реце, за дванадесят миль от брега морскаго, на равномь и прекрасном зело месте; много имать древа садовнаго от смоков, бросквин и лимоний, наипаче же финиковь безчисленное множество, иже, аки леси, лето и зиму зеленеют, понеже от онихь древесь никогда же листвие отпадает, от них же делают Ефиопи кошници, верви, клети и прочая, на потребу купеческих товаров; 12 бо миль от мора, даже до Рахита, вси бреги и острови Нила полни сут древес финиковихь; сице же лепоту являют человеку, яко не могут насладитися очеса его. Есть же пристанище великое и богатое, понеже от Египта Нилом рекою тамо вси товари купеческия приходят и оттуду в иние страны разносятся. Приходят же тамо по суху и по водам торговци великие от всея вселенния: от всея Анатолии, Чермнаго же и Белаго моря 5, от Венеции и всей Италии, и взимают оттуду кафе, риж, лен, плоди финикови, ткания различна и инние вещи драгие, от Индии приходящие. Не приходят же тамо корабле великие, но малие все, понеже река мелка есть; сего ради оттуду товари купеческие переносятся малими кораблецами в Александрию, яже стоить на пристанищи морскомь, и оттуду развозятся кораблями великими в инние странни. В Рахите строение домовь високое и зело лепотное, понеже окон множество малих же и великих имут, яко полати, аки сет сквозе [408] зрятся и ветр дихает внутрь от всех стран; вся же здания суть от плинф дробних, печенних, а не от камене, понеже тамо каменя трудно есть обрести, ибо несть нигде же гор, но всюду равное поле и земля мягка, якоже в Российских странах. Тамо различнаго язика и вери людие обретаются: Греки, Римляне, Армени, Копти, Жидове, Турки же и Арави. Християнских церков две токмо: Греческая, ею же обладает патриарх Александрийский, и Римляновь монастир с церковию, прочее же Турецких мечетовь полно. Тамо брашно и всяко ядение несть скупо, токмо вино, понеже тамо не раждается, но привозится от инних стран, Християн ради и Жидовь; Турки и Ефиопи, по правиле вери своея, не пиют вина, разве некий тайно, не храняй твердо вери своея. Тамо кладязовь и источниковь кь питию несть, но вес народ от реки Нила почерпают и пиют; аще и ископовают студенци, то слану воду обретают, яже точию к помиванию сосудовь угодна ест. Тамо аз разлучися сь вишшеписанним спутником, иеромонахомь от гори Афона, и замедливши 3 дни, отплихь рекою Ниломь в великий град Египет 6, Июлия последнего дня, и приспехь тамо четвертаго дня.

О пришествии моем к великому и везде прослутому граду Египту.

Пришедши аз в великий град Египет и не ведущи (яко странен и нищ), где главу поклонити и обител обрести на некое время, моляхь всещедраго Бога, да попечется о мне грешном. Идохь же в метох 7 кь иноком горы Синайския, си есть в двор их, в нем изшедши от монастиря иноци потребы [409] ради в Египет или в ину странну грядуще чрез Египет тамо препочивают неколики дни, иние же всегда седят, ради послушания монастирскаго, яко то пшеницы ради, елея, сира и прчихь вещей, яко вся на пищу, на потреби монастырские от Египта купующе, посилают тамо. Пришедшу же ми в метохь и сущу тамо на то время архиепископу горы Синайския, именем Иоаникию, абие идохь к нему и приветствовавши его по достоянию, сказах ему намерение и вину, коея рады прийдох в Египет. Отвеща ми, яко аще би кто тысящи истощал, не может нине пойти в гору Синайскую: не токмо бо страннии, но ниже ми своихь иноковь прекормити, ниже отсюду послати тамо, се же того ради, яко ми не могуще прекормити Ефиопов, избегохом вси иноци нине в Египет, токмо оставихомь малихь числомь, ради церковнаго правила, да обител святая не опустеет. Еже бысть истинно, в то бо время слишашеся от всего народа, яко Арави путь заключиша к монастиру и невозможно есть никому пойти. По изволению убо архиепископа, дадоша мне едину келию к обитанию на время вне метоха, с купцами Греческими, идеже замедлевши дный неколико, ходихь всякаго дне к иноком на трапезу и питахься от нихь. Вопрошахь же последи вторицею и третицею архиепископа аще мощно есть мне не лишитися онаго святаго поклонения, отвеща ми паки, яко невозможно ест отнюдь нине, донележе не примиримся паки с Ефиопи и отверзется монастир, а еже когда то будет, ми не можем ведати, или по неколицехь месяцехь, или по неколицехь летехь; тожде реша и прочии иноцы. Тогда аз прискорбен бих зело, недоумея, что творити, понеже возвращатися в отчество кроме сего поклонения, толь многие благодатию Божиею посетивши святие места, зело [410] печално ми бысть, ожидати же паки, не ведущи конца времени и како и оттуду би питатися, и истощание на путь имети, зело неудобно мняшеся бити. Прочее возвергох на Господа печаль мою, да Той мя, якоже Сам вест, препитает, положивши в уме своем, яко аще ест воля Божия желание мое исполнити. Он вся добре промислит о мне. Случившужеся тогда бити в Египте святейшему патриарсе Александрийскому Козме 8, и хотящу оттуду изийти в Рахит, желах прияти от него благословение. В един убо от дний идохь в двор патриярший и, угоден час получивши, удостоихься его святую лобизати десницу и прияти благословение, купно же и сьбеседовати, иже мя вопроси: кто есмь и откуду, и чесо ради прийдохь вь Египет, яже вся аз вкратце известихь. Сжалижеся о мне, яко в толь далечайший странны прийдохь, найпаче же в нищете сий и не мый, где глави приклонити, советова мне, да сотворюся от него инок и пребуду с ним вкупе, мне же на то не преклоншуся, остави мя и рече, яко в гору Синайскую неудобен есть проход, но аще имаши намерение премедлити некое время в Египте, ожидая угоднаго времене поклонения твоего, седи зде в дворе моем и кормися вкупе от трапези инокь моихь, донележе ти ест угодно; даде же ми и писание общее к всем християном, еже мя миловати, и самь от своея десници даде ми милостини. Азь же сподобивийся таковую восприяти от него благодать, припад к ногам его и святейшую его облобизавши десницу, благодарствовах до зела. Препоручи же мя своими усти инокомь, ихь же остави малихь числомь в дворе своемь, ради управления церкви и христиан. Сказа же в ден неделий поучение к народу Греческим диялектомь, ради Грековь, иже тамо обретаются много; купно [411] же при боку его стояше и толмачь, иже, яже слишаше от усть святейшаго патриархи глаголемая словеса, абие таяжде к Арапом християномь Арапским языком толковаше. По поучении же всем людемь, в церкви сущим, общее разрешение прочте. Таже вутрее виийде от Египта, с многою частию провождающу его духовному собору и всему клиру церковному. Тогда архиепископ Синайския горы примирися с святейшим патриархом, понеже прежде между собою распрю некую имеяху. По отшествии убо святейшего патриархи остахся аз в Египте, в дворе его, с прочиими иноки, пищею и питием питаемь доволно, якоже в дворе родившаго мя отца, и обитыхь тамо, ожидающи ден от дне угоднаго времени путешествию моему, в Греческомь поучаяся язику, славях же и благодарях Бога и великаго благодетеля моего, святейшего патриарху Александрийскаго Козму; труда же и дела чуждаго никаковаго же не имехь, разве токмо на свою потребу; токмо иноки сотвориша мя на время трапезаромь, имь постилахь и изметахь трапезу и самь купно с ними ядях, яковаго послушания аз самь паче хотех, нежели они. Любяху же мя иноци вси, патриарха ради, понеже мя онимь любезно вручи, и препровождахь дни благополучно и сотворихь многихь себе знаемихь и другов, с ними же, аможе хотехь, свободно ходихь в Египте и расмотрехь всю красоту, величество и строение града, еще же вся чини и обичая народа Египетска, еже последует в описании Египта.

 

О великом и пресловутом граде Египте.

 

Египет есть град зело ветхий, не зданиемь, но лети, еще бо прежде Рождества Христова и прежде ветхаго закона, Моисеомь даннаго бисть; из него же изведе пророк Божий Моисей люд Израильский, си ест [412] Жидовский, свобождши от работи Фараонови и преведе их чрез Чермное море, о чесомь ясно и пространно пишется в старой Библии, в книгах Исхода: самое же видение паче слуха уверяет: вне бо града суть многие гори, яже не суть естественни, но чрез толь многие времена народ, в Египте обретающийся, зметающе своя доми и стогни 9 и вергающе вне града сотвориша гори от сметия. Ведати же подобает, яко Египет разделяеться на два именования: Египет именуеться вся страна Египетская и Египет именуеться град: град паки Египет именуется двогубо: Египет ветхий и Египет новий 10, еже есть град ветхий и новий градь, убо ветхий, иже прежде бяше, в время жидовское, нине зело обетша, стени же и доми падоша многи, обаче несть ввся разорен и пуст, но и нине народ обитает, наипаче же от християнь много; новий же град мало от ветхаго есть отдален, в немь же князи и велможи великие и богатие купци и многь различен народь обретается, и о семь Египте слово мое предлежит. Египет есть слово Еллинско, еже происходит в Славенском и Латинском язице, простимь же язикомь Римским именуется Gran Cairo, Турецким — Мисир и Арапским — Мауар. Египет стоит на равном, веселом и добром месте, над рекою славною Нилом, яже великие користи 11 творит в стране той, токмо крепость, то ест замок 12, на височайшем от града месте, при горе рекомой, яже прежде не бист тамо, но в время святейшаго патриархи Александрийскаго Герасима бившу некоему уничижению на веру християнскую, молбами его и всехь христиан, найпаче же за молениемь единаго богоугоднаго и добродетелнаго мужа, сапожника суща от [413] Александрии, повелением божественным подвижеся от места своего издалече и прийде тамо, о чесом несуменно и достоверно в историах пишет и нине неотменно в Египте народ повествует, и от камения гори оной храми, полати и вся здания строятся. Тамо доми иние от родимаго камене, иние же от плинф суть зданние строением високим и лепотним, много чардаковь и окон имущие, ради прохлаждения, понеже зело тепел и неудоб стерпимь край ест. Найпаче же капища Турецкая и полати благородних мужей и отвне доволно лепотни, найпаче же внутр зело красни, верху позлащенны или цветами исписанни, низу же искуснимь художествомь различними мрамори упещренны и драгими одеждами посланни, яко места плюновению несть. Тамо обичай есть ходити босима ногама внутр домов, понеже чисто восходи и нисходи измовенни суть. Улици тамо мало обретаются широки, но все узкие, и домовь строение тесное зело, яко кь многим домом вход точию един, идеже обитают пят или шест господаровь вкупе, с женами и детми, едини низу, а другие горе; се же множества ради народа, населшагося тамо, таковая есть теснота. Обретаются бо самихь токмо капищ Турецких, якоже повествует народ, до шести сот, домовь же числа никто же весть; народа же толь много, яко на всякь ден не токмо на базаре, но але в всехь и малихь стогнахь градских разминутися нуждное есть; не токмо же вь дни, но и в нощи много людий обретается, понеже тамо вси в единь час никогда же не усипают, но инии в дни труждаются, иннии в нощи, найпаче вещи кь ядению и питию в нощи делают. По стогнахь же кандилы 13 зажженни чрез всю нощ горят, да не преткновенну имут стезю, ходящии в нощи; тому же и злый человекь абие [414] познан и уловлен бивает. Обичай бо есть тамо нощию проходити дозорцем стогни градскии, злочинцов ради, иже егда некоего уловит, аще и малейшое знамение имущаго к злу, абие на стогне, кроме всякаго суда, в главу усекается; сего ради тамо вес народ с великим страхом и опаством нощию ходять. Обретаютжеся в Египте многая капища Турецкая, пространна и велика и лепо зданна, имущая вне, на версе глави возвишенние, им же би зело прилично бити церквами християнскими, аще би токмо било изволение Божие. Улици градские не суть посланни каменми, якоже вь иннихь странахь, но имут землю естественную, и начальнейший суть чисти и пометаеми на всяк ден, неции же обретаются полни сметия и нечистот. Се же отчасти, яко народь Ефиопский варварскь и небреглив, отчасти же, яко тесно людие обитают, несть бо града болшаго вь всей Турецкой земли, паче Египта, чесо ради Италеяне, искусивши и разсмотревши многие гради и странни, повествуют общее слово сице: tre paeze bono tropo grande gran Cairo di Siria, Milano di Lombardia e Parizo di Franza, то есть: три на всей вселенной градове болшии народом и протяжением сут: Египет в Сирии, Медиолан 14 в Ломбардии, в Италиянской земли, и Париж в Французкой. В Египте обретаются людие различнаго рода, различной вери и различнаго языка, яко то: Турки и Арави, аще и единоя вери суть, такожде Греки и Арави православнии християне, иже имут церквий 3: первая Святителя Христова Николая и сия есть в новом граде и есть двопрестолная, вторая святаго велико мученника Георгия в Египте ветхом, и сия есть в монастири, в нем же убогие инокины, немощние старицы и беднии сироти обитают и пищу имут от милостини християн. Тамо обретается [415] икона Пресвятия Деви Богородици, яже пренесенна есть от Венеции единим купцемь, повелениемь и откровением ему бившим в сне, 1727 году. Третая церковь есть Пресвятия Богородицы, и та ест весма пуста, ниже врат, ни затвора, ниже каковаго либо внутрь украшения имущая, обаче и тамо на всяку суботу литургия бивает ради усопшихь, понеже тамо телеса их погребаема бивают. Храм убо той доволно ест пространен в висоту, в долготу же и широту, и познавается, яко иногда зело лепотен бяше, и зело же ветхь есть, обаче число лет уразумети нуждно есть, понеже писмена и подписания вся отрошася, точию имя святейшего патриархи Александрийскаго Григория, о чесом несть известно, аще ли в время его созданна, или обновленна бысть. Обретаетжеся в церкве той образ Пресвятия Деви, от глави до ногу на древе списан, держащ на руку Христа Господа, зело обетшалий, о нем же повествуют, яко в время гонения на христиани закопаша в землю в церкве, купно с кандилом запаленним; последи же, опустевшей церкви и многим летом прешедшим, впаде в недуг велик властелин Египетский, иноверен сий, и егда не можаше от врачевь исцелитися, бист ему явление в сне, да повелит откопати образ онь и от кандила да помажется и здравь будет. Еже сотвори без закоснения, и обретоша икону с кандилом незгасшимь, и помазався болний, и абие (о, великия благодати Твоея, Мати Божия!) изцеле и здрав бист, и от того часа даде паки в область християном церков оную. Обретаются еще в Египте Римляне 15, иноци же и мирстии, и церковь имут две: едину в новом, а другую в ветхом Египте. Литургисают же и в предреченной опустелой церкви, таможде и погребаются не токмо [416] Французи, Венециане и Гишпани, и консул Французский, иже обладает ими. Обретаютжеся в Египте Енглези и консул их. Суть паки Армен множество, и церковь свою имут и патриарху. Обретаются еще некии християне еретики, именуеми Копти, си есть обрезанци, иже и крестятся, и обрезуются, и многих прочиих ересей держатся, и тихь сут множество вь Египте и церковь ихь обретается число не мало; имут же своего особнаго патриарха и себе с ним за православнихь быти и патриарху своего достойно Александрийский престоль держати мнят и проповедуют. Греческаго же патриарху и всехь купно с нимь за неправославнихь быти почитають. Обретаютжеся тамо и Жидовь много и свою такожде синагогу и жилище особно имут. Многое же множество Турковь странних от Константинополя, Анатолии и от иннихь великих градовь и острововь морскихь обретаются тамо; но Аравовь без числа суть, тамо бо ихь род и отчество есть. Египтяне не имут инной воды к питию, токмо вси пиют от реки Нила. Египет ест славен множеством купцевь, различними и драгими товары, понеже ест пристанищемь торговцев, от Индии возвращающихся. Египет великие користи имат от Нила реки и от Чермнаго моря, начало убо его совокупляется с окияномь, конец же отстоит от Египта три дни хождения землею, идеже ест пристанище, рекомое Сувез 16. Взращающеся убо купцы кораблями от Индии чрез окиян, проходят чрез Чермное море и приносят в Сувез ливан, смирну, перец, кинамонь и прочая аромата и корении благоухавная, такожде сосуди драгии фарфорнии и иннии многоценнии вещи; приносят же кафе, иже раждается в Емени 17, над Чермним морем, яже страна не в власти Турецкой ест, но особно. Та убо вся вещи [417] приносятся чрез море Чермное, даже в Сувез, а оттуду по земли в Египет; от Египта же на Чормное море посилается риж, пшеница, фава, сочиво и вся ядомие вещи, яже тамо оскудни суть. Се Чермное море кол велию корист приносит Египту. Не малое добро и Нил река творит, яже разливается на всякь год и наполняет, и тогда копают людие рови и напаяют вся поля Египетские от сладости реки, толь бо сладку и здраву воду имат, яко на островахь реки тростие раждается, сок сладок имущое, от него же делают цукор. Егда же напаятся поля и река испадеть, тогда сеют пшеницу, риж, боб, сочиво и прочая, яже вся благословениемь Божиим толь угобзаются, яко всей Аравии от Египта изобиловати, тако-бо много раждается рижа, яко в наших странах жита или пшеници. Товари же вишереченнии идут от Египта Нилом рекою в Белое море, а оттуду в всю Турецкую странну и прочие. Кораблецовь и ладий, яже на реце Ниле путшествують, суть многое множество, непрестанно бо иние от Александрии, иннии от Рахита, инни от Дамяти 18 приходят в Египет, иние же от Египта возврашаются тамо. Египет, аще и под державою ест султана Турецкого, обаче не весма ему покаряется, токмо дан дает ему, и паша, иже обладает Египтом, наставляется от Цариграда 19. Обаче паша тамо не долго господствует, одинь бо другаго низлагает; той лучший, иже крепчайший, един бо другому от господий не покаряется и един с другим дом на дом брань творит. В Египте пляц, или пазар, или торжище великое зело ест, на немь же безчисленное множество народа на всяк ден обретается, и комори 20 купеческии зело тесно устроенни сут. Истинне же рекше, весь град торжищ исполнен, идеже в всехь стогнах [418] низу комори, верху едини на других полати високо строенние сут, в нихь же окон и чардаковь множество, ради прохлаждения, суть. Верху же всехь домов Египетских, аки комини или столпи устроенние, в ня же дишеть ветр и проходит в вся келии зданий, даже до низу, и прохлаждаеть обитающих, и се ест зело нуждно и потребно тамо, понеже, ради теснихь улиц и високих зданий, не может ветрь дихати внутр домовь, инако же би не мощто било жити народу, ради горячести солнечной. В Египте вода продается, аще и река при боце ест, понеже от домовь, воскрай реки стоящих, сами людие почерпают воду, а иже внутрь града далече обитают, не могут на всяк ден ходити к реце, но суть на то особние человецы — водопродавницы, иже почерпают мехами кожанними от реки воду и, возлагающе на верблюди, приносят в градь и продают; инной же води к питию нест, донеже страна та есть слана, и аще обретаются тамо клядязи в всяком дворе, но в всехь слана вода обретаеться, ею же токмо сосуди омивают. Имуть же в Египте ископань ровь, им же река, в время умножения води, входит внутр града, и тогда на малой цене воду продают. Суть же в многих дворях господских стерни, то-ест ями, в подобие кладязом созданны, яже тогда купующе наполняют и пиют до года. В Ниле реце рибы доволно различной. Начало же ея ест от единаго озера, или ями рекомой Заира, яже обретается в Хабесии, и егда убо яма та воскипит и умножает воду, тогда и Нил много разливается в широту и многи користи творит обытающимь людемь при нем. Проходит же чрез всю Ефиопию, и нижае Египта разделяется на три части: часть течет во Александрию, часть в Рахит, часть в Тамять 21, наконец [419] впадаеть в Белое море. В Египте обретается древес садовних много: помаранчовь 22, лимоний, родий, найпаче же от финиковь; ограднихь плодовь тамо велие изобилие в зиме и лете. Хлеб, елей, сир, масло, кафе и вся вещи, яже к пище, на малой цене продаютоя, вино же и горелка скупо, понеже от Белаго моря приходит, а не тамо делается. Сребра тамо изобилно обретается, и удобно тамо может человекь обогатети, найпаче же умеющ художество, на всякаго бо художника зело тамо добре есть. Египет на четири имени разделяется: первое именуется Египет, идеже общо вес народ обитает и торжища началнейшая сут. Тамо убо и церковь Греческая, и Синайский метохь, и двор святейшаго патриархи Александрийскаго обретается, в немь же намесник его с иноки, иногдаже и самь купно обитаеть; тамо и аз пребих вся дни замедления моего в Египте. 2) Крепость, или замокь, и стоить особно на месте високомь и именуется Кале. Идеже аз множицею ходих; тамо имут армати и прахи. Тамо обитает паша и прочии начальници; тамо суди действуются и глави осужденнихь посецаются; тамо монета, или пенязи, медние, сребряние и златие делаются, еже сам своима очима видехь. Обретаютжеся тамо и донине еще полати Фараона и Иосифа Прекраснаго, иже суть нине пусти и раззоренни. Фараонових убо полат зело гордое и високое строение, от великих каменей, и внутрь познаваеться, яко позлащенни бяху. Тамо же недалече обретаются останки единаго здания великаго, идеже ныне торжище есть; тамо суть столповь много единокаменних, толь великих, яко чудитися всякому зрящему на ня, како и каковою силою толь велия тягота камене подвизашеся и здашеся, толстота бо ихь, яко трием человеком обяти, в висоту [420] же шест или седм сажний суть. Еже не вест никто же, что бяше, но мнитмися, яко домь судилшца бысть иногда, в нем же действовахуся суди в время царствования Фараонова. Обретаютсяже тамо внутрь крепости и полати Прекраснаго Иосифа, иже иногда царствоваше в Египте и в них обиташе, иже такожде пусти суть и падоша, токмо две стене стоят, на них же смотрети зело лепо и удивително есть, понеже насажденни суть позлащенною и различно — цветною муссеею и маргаритнимь чредиемь, то есть перловою матицею; не простим же художеством, но сице хитрим и искуснимь, яко землю, цвети разние, древеса, плоди, птици и прочие вещи изображенни суть.

Таможде внутрь Кале есть кладязь Иосифовь, егоже аз посещахь и соглядахь; изобразити же или описати совершенно, якоже есть в себе, велие мне есть не удобство, понеже [421] таковой вещи нигде инде не случашеся ми видети. Кладяз оний разсудним умомь и мудрим советомь есть сотворень: обаче хитрост копания его нуждно есть изявити, понеже вся в земли есть и ничтоже от вне зрится. Обаче аз разсудному уму описую и начертаваю сице: кладяз оний не имат никаковаго притворнаго внутр здания или стень, но в самой естественной земли, в мягкомь камени есть ископан на четири углы, равно в широту и долготу, яко на четири сажни и вящше, глубок же без мери. Окрест убо того кладязя ест путь копань, аки улица или пощера, иже иногда бяше даже до конца глубини, нине же точию до половини, идеже в стенахь кладязя окна суть просеченни, ради просвещения, обаче мало подают света, по глубине суще, но нужда есть сходити с огнемь, якоже и аз снийдохь. Тамо работници приставленнии низводят вниз воли, запрегают их в колесо, хитростне учиненное, им же горе воду тягнет от дна кладязя даже до половини, и сливается в едину яму, а оттуду верху кладязя иними волами, подобно запряженними, витягается вон сосудами, на вервахь повешенними, инако бо сверху даже до низу единим влечением верв неудобно досягнути води, ради великой глубини. От верхних убо воловь даже до вторихь, суть нисхождения степенсй 200, якоже аз сам измерих, а оттуду ниже мало вода зрится. Повествуют же тамо труждающиися работницы, яко еще вящшая половина есть вниз, нежели оттуду горе. Вода же несть сладка, но мала слана, обаче в нужду безбедно питися можеть. И се о двохь частехь. 3) именуеться ветхий Египет, о немь же предь рекохь, яко тамо обретается монастирь Греческий святаго великомученика Георгия и церковь Пресвятия Богородици, такожде монастирець законниковь [422] Римских и три церкви Коптских, от них же в единой обретается единь домь мал внутрь земли, в немь же (повествуется от християн) обиташе Пресвятая Дева Богородица сь Христомь, избегши из Иерусалима, даже до умертвия Иродова; таможде есть и место купели, идеже омиваше Пречистая Владичица Христа Спасителя. Между новимь и ветхимь Египтомь есть високий каменний каналь устроень, имь же от реки даже до Кале течеть вода: стоит-же на столпахь на подобие моста. Четвертое место именуется полако 23, которое отделне мало от града стоить, воскрай брега речнаго. Тамо суть полати красния и великие и садовь лепотнихь много сут. Тамо индукта 24 и торговое поплащается. Тамо коморь и имьбаровь подь полатами множество суть в нихь же торговци слагают своя товари. Обаче вся та места предреченна, аще и особнии имени имут, но вся единь Египет бити именуется. Недалече от Египта, обон поль реки Нила, сут рукотворение гори, а от Грековь нарицаемие пирамиди, иже сут четверограничныи; всякая граница на стопь 75, висота же ихь есть на стопь пятсоть. Между ими же три височайшие суть и именуются гори Фараонови, понеже Фараонь, сущи древле царемь Египетским, своимь иждивениемь созда, мислящи суетная, якоже повествуется, да, имат прибежище тамо, внегда би случилося Божиимь попущениемь разлитися реце до зела и потопити вся поля Египетская. Еще же вестно буди наконець и се, яко в Ниле реце, горе далече, от Египта, на единомь месте обретаются змееве, именуемие крокодили, на подобие ящурки сущие, с четирма ногами, обаче великие, якоже белуги или осетри, и могуть жити в воде и на земли: на время бо в воде суть, на времяже излезать на брегь, между сладкое тростие, и [423] ядуть е, или препочивают вь нихь; аще же случается, то и человека снедають. Вестно же буди в конец и се, яко в Египте в церкви Греческой двома язики чтется правило церковное: греческимь и арапскимь; греческимь убо иноки, Арапскимь же попи мирскии. Имуть же чин церковний в чтении и пении, и в служении лепотень, тако присутствующу патриарху, якоже и без присутствия его. На литургии же божественной всегда два апостола и два евангелия чтуться, гречески и аравийски, разве инако случается в повседневие, егда едва кто приходит к церкви; в праздники же Господские, Богородични и иннихь нарочитихь святихь соборное служение биваеть и по две литургии: ранная и позная, подобне и по вся недели. Иноци Синайстии приходят в церковь патриаршую служити служби Божой по вся недели и праздники, понеже в своемь метоху церкви не имут, токмо часовню прежде имеяху, но бившимь сваромь между ими и патриархомь Александрийскимь Козмою, отъяша Турки и сотвориша свой мечеть. Та убо и темь подобная аз уведевши, видевши же и слишавши, и твоей любве, тщателний читателю, вкратце написавши, соверших, Богу благодарение, рокь 1727, сидящи в предреченном дворе патриаршем в великом и славном граде Египте.

Ad M. G. D. Bea V. M. 25


1730 год

Таже оставивши Кипр, отплихом на полудне на море широкое, идеже пловуще ветромь помощнимь един ден и едину нощ, не видехом ничтоже земле, точию небо и море. Таже втораго дне пред полуднем доспехом к великому граду и знаменитому пристанищу карияте. Оттуду абие по дний седмехь отплихь [157] Ниломь рекою в великий Египет, ради поклонения египетскому патриарсе кир Козме и ради благодарения за благодеяние его, бившое мне прежде, грядущу к горе Синайской, к тому же ради взятия благословния к собранию милостины. Плихомь же тогда противу води Ниломь рекою дний 5, не имехь бо тогда ветра многопомощна, и едва пятаго дня. Августа втораго числа, доспехомь тамо. Идохь же абие несуменно (имеяй упование на первое странноприятие) в двор святейшаго патриархи, и припадохь по обичаю к святейшимь его стопамь и лобизахь много блажении его руце, и сподобихся благословения и приветствовах его блаженство по достоянию, и прият бихь страннолюбно, благимь сердцемь и лицемь веселимь, лучше нежели первее (Господ Бог, всебогатий от неисчетных своих даров, да воздаст его блаженству сторицею), и показах аз лист его первий, его же ми даде первее, лета 1727, и даде ми ин новь листь свободень в епархии милостини. И собрахь, с помощию Вишняго и его блаженства, ив Египте милостину доволну от православних христиан. (Господи их спаси), и замедлихь во дворе патриаршем, пищею и питиемь доволен чрез вес пост, даже до Успения Пресвятия Богородицы дний 13, последи же изийдохь от Египта, но не возвратихся воспят, но отплих иннимь разделениемь реки в град Рахит, имея намерение отплисти в градь Александрию, ради видения достойних в ней вещей ветхих, якоже слишится, понеже ми первее от Кипра пливши к ней, по Божию изволению, ветру противну дишущу, не случися дойти в ню. Сего ради, глаголю, оставивши пут Дамяти и отплих в Рахит. Нил бо река, наченши от своего начала, просто и неразделно течет от полудни даже под великий Египет, последи же, [158] нижае Египта 26, за неколико миль, разделяется на две части, от нихь же едина на восток завращается и течет даже до Дамяти, и впадает в море; вторая же завращается на север и течет под Рахит даже до моря, о чесомь прежде доволно писахь, егда о Египте творих описание. Изшедши убо аз от Египта, за два дни отплих в Рахит, кроме ветрила, ибо самая бистрина реки нас отнесе, и замедлих аз в Рахите дний неколико в дворе патриаршемь, при храме святителя Христова Николая. Сущу тогда наместнику его, ему же аз показахь лист патриарший, ради собрания милостини, и той взят и чте в церкве в ден неделний, по обичаю в слух всемь, и помиловаша християне, Господи их спаси. Таже минувшей седмици, егда управих аз, вся на потребу, обретши ладию, вседохь, отплих по морю в Александрию за полдня, сущу тогда ветру благополучну, понеже от Рахита река Нил точию мил 12 течеть, таже впадает в море, отъонуду же кь Александрии миль шестдесят. Ест же пут и по земли, един ден хождения имущ, но онимь шествуют, не обикшии по морю. Припливши убо аз вь Александрию, идохь в монастир патриарший на премедление неколиких дний, вь имя святаго Савви создан, понеже тамо нест ни метоха, ни двора патриарша, ни иной мирской церкви, кроме онаго монастира, о немь последи изявлю слово.

О граде Александрии.

Александрия иногда бяше град велик и крепок и много знаменит, и царское седалище, в немь же седяху древнии царие, от них же первий бист цар Македонский Александер, иже первее оний град созда [159] и в имя свое нарече: от Александра Александрия. Облада же оною и Птоломей, иже еврейские ветхаго закона книги на еллинский язикь преложи, и прочии. Нине же толь опусте и раззорися, яко едва познавается град иногда быти, но аки некая вес 27, или варош, стени бо его ввся падоша и раззоришася, и никто же тщится воздвигнути я; обаче еще останки стень обретаются, и на многих местех стоят бойницы, и врат двое затворяются на нощь, полуденнии и восточнии, иже суть от твердой земли, а иже от моря, падоша. Внутр ветхаго града мало зданий обретается, но вне, воскрай моря, много новихь дворовь, полать же и домовь, лепо от камени белаго съоруженни; таможде и торжище великое со многими чинами комор, или лавок купецких, устроенно, иде же различние товари продаются, и ту обитает вес народ избраннейший. Внутр же града ветхаго, семо и овамо 28 разсеяны, жительствуют ово християне, ово Евреи, ово Копти, ово же Турки, и вси особно монастири имут. Таможде Итали имут монастир новосоздань, вь имя святия великумученици Екатерини; таможде и монастир православних святаго Савви. Тамо внутрь ветхаго града, недалече монастира, на полудни, обретаются полати разоренни, от плинф зданнии; о нихь повествуют вси тамо християне, яко в нихь обиташе святая великомученица Екатерина, еще жива сущи. Тамо, пред полати оними, одесную и ошую 29, близ яко на вержение камене, обретаются столпи целокаменни, високи и толсти, ихь же камень аки смешен от различнихь толчених мраморов мнится бити, неции же глаголют яко от естества своего сице пестроту, червленност, черност и белост показует; и тии (мнитмися), яко в подвореи царскомь иногда обретахуся, нине же стоят [160] при путехь, осипани сметиемь града, понеже никто не дерзает двигнути ихь от места и употребити камо любо буди инамо, ради зелной тяготи, нинешнаго бо века малосилни человеци обретаются, а но якоже первие гиганты. Таможде близу, на западе, стоит един цель, вь широту и долготу великий, мечет Турецкий, аки каштел или замок, с многими окрест окнами и единою каменною главою, о нем же повествуют тамошнии жители, яко бист иногда храмь сиштаго Афанасия, архиепископа Александрийскаго, и тамо бист обитание древних патриарховь. Обретаетжеся близ монастира святаго Савви един холм, неестествен, но от многолетнаго и от многаго пометания градскаго сый изсипан, в нем же по вся дни Арави копают и пресевают прахь, и обретают некамо ово мало злата, овогда же сребра или маргарити, или каменци драгие, с изритиемь древнихь печатей, или ино что либо буди. Ест и другий холм сметян, далече от монастира отстоящ на западь, внутр стень ветхаго града, но вь оном не обретают ничтоже. Ведомо же буди, яко Александрея не ест основанна на твердой земли, но вся на столпахь и камарахь, якоже достоверно повествуется, яко аки вторий градь под спудомь обретается, и кладязи многочислены, аки храми, с столпами и заломами, внутр созданны, яже на всяко лето наполняются от Нила реки, ради пития народу и ради напоения садовь, и ради всякой потреби людской. Часть бо Нила отделястся от више Рахита, от села, нарицаемаго Фива 30, и течет чрез поля далече, таже мимоходит Александрию, от странни полуденной, и впадает вь море; не от естества же своего течет, но повествуют народи, яко царь Александер Македонский оний ровь ископа и камениемь внутрь постла, и [161] воду тамо приведе, понеже инна вода отнюдь не обретается, разве сланой. Суть же много столповь 31 каменнихь, целих, стоящих же и валяющихся семо и овамо по граде. Един же есть столпь зело великий вь висоту и толстоту, вне града яко поприщемь отстоящ, деломь и художествомь изрядний, яко многимь пришелцомь чудитися, иже именуется столп Помпея, на нем же иногда идол постановлен стояше, его же почитаху идолопоклонницы. Тот первее бист посреде града (якоже повествуют), понеже иногда град древний зело велик бяше, иже ввся раззорися, яко ни след не познавается, а яже нине некие останки зрятся стен градских, сия последи глаголются созданна бити. Той столпь есть измерен от искуснихь и разумнихь землемерцев, от странн западних приходящих (ибо они всякую вещ испитуют опасно 32), от нихь же известихься и аз, и глаголют быти, яко висоти имать стопь человеческих 122, толстоти же внутрней стопь 12, а окрест широти — самь разсуди, коль много есть.

Есть же сложен от четирех частей: от единой глава, от второй самь столпь, а от двохь частей подножие, и глаголют, яко сам столпь имать един камен, сущ стоп 100, глава же и подножие 20 и 2. Неции убо глаголют, яко полн есть, неции же, яко празен внутр, но о семь совершенно никто же вест, понеже неудоб восходимь есть от человек. Сут же еще тамо внутрь града, от страни севера, близ монастира святаго Савви, при море, инны два столпы великии, целокаменни, прозиваемыи Клеопатрини. Клеопатра бо бяше некогда древняя и многоименитая царица, яже в незабвенную себе память постави оние чудние два столпи, мерою и делом в всемь подобни суть, от нихь же един паде от многаго времени, вторий же [162] стоит непоколебимь. Тии познают бити, яко пред полати царскими иногда стояху. Имут же толстоти пядий единадесять, якоже аз самь измерихь, висоти же не могох уведати, но разсудихь бити сажней десят. Един и цел камен прост, не округол же, яко же обично столпамь, но четвероуголен, и сьверху остр, и от всехь стран единаче ширину имат, и некие печати или знамения 33 изрити глубоко, яко на два члени перста, ихь же многи видеша, но истолковати не могут, понеже не подобятся а ни до Еврейских, а ни до Еллинских, а ни до Латинских, а ни до иних коих либо буди писмен. Едино точию знамение во всемь подобное ест, якоже Русское живете 34 прочая же птицам, ина же лацухамь, ина же перстамь, ина же точкамь подобятся. Яже 35 аз вся с многим тщаниемь и трудомь исписахь от единой точию 1-вой страни столпа, в удивление зрящимь, якоже изображенно ест на иконе 36 предписанной. А понеже рекохь о толь многих вещех, прилично простерти наконець слово и о вишепомяненной обители святаго Сави. Тамо християн жилцовь зело мало, аки нет, точию пловцы 37 морскии обретаются, иже приходят и отходят, сего ради ниже церковь мирская обретается, кроме монастира святаго Савви, иже аще и внутр града обретается, но наедине, на месте особномь и уединенномь. Ест же монастир ветхолетен, от древних християн созданный, но но могохь уведати именем от кого; зданием мал, четверостенен, висок, отвне закровен, и ничтоже не являющ лепоти, внутр же имат расположение лепое келий, поварне и трапези. Врата имат железомь наполненни, от стени восточной. Церковь имать с покровомь равнимь, без глави, лепу, камениемь и мрамори посланну, в долготу, широту же [163] и висоту доволну, дванадесятми столпами високими, целокаменними поддержиму, от нихь же пят одесную, а 5 ошуюю стоят, а два созади иконостаса, то ест резання 38; кроме же техь иние малие столпи мраморние обретаются. Есть же церковь триипостасна, от нихь же первий престол ест с. Савви, вторий с. великомученика Георгия и третий празден. Началень убо олтар есть великь и леп, и имать покровь древян, с главою, на четирехь столпах, такожде древяних, лепо соружень, такожде и горное седалище зданно есть и мраморними дсками посланно. Имать же иконостас образя лепие и врат три: царскии, южнии и севернии, и еще ин малий вход в олтар от страни; еще же и фрон святейшего патриархи снецарскимь майстерствомь, красно соделань, такожде и амвонь, идеже чтется Евангелие. Одесную, вь маломь престоле, иногда, в дни святейшаго Самуила, патриархи Александрийскаго, Римляне литургисоваху и погребахуся, прежде даже не сотвориша себе особна монастира. Суть тамо неколико гробовь знаменитыхь, и надгробки на дсках мраморних изрити Латинским диалектом. Еще же обретается тамо в церкве, сзади леваго крилоса, столп мраморен бел, четвероуголен, вьдружен вь землю, его же широта пядей две. Повествуют же иноцы и белцы, яко при ономь столпе усекнуша главу с. великомученицы Екатерины, и окропися ея святою кровию. Сего ради християне, тамо приходящии на поклонение, лобизают его с благоговениемь. Храмь ест зело лепь, точию темен и мало имущ окон, стоит бо в тесноте, между зданиемь келий; имать же в долготу стопь седмьдесят седмь, в широту шестдесят и шест, в висоту же менее, и врата едини мали, от стени полунощной. И еще имат два вертоградцы 39, един сьпреди, а другий [164] созади монастира; в нихь обретаются мало маслин и фиников и мало от зелия. В болшомь же вертограде имут и болницу, в нем же иноцы болни или монастирскии, или по случаю, страннии пребивают даже до совершеннаго оздравения. И сице убо ветхий град Александрии не имат ничтоже в себе лепотнаго от зданий или полат, кроме оних предописанних вещей. Еще имать едину весь, от востока стоящую, внутр града, и более ничтоже. И аще не бы обреталися онии тяжестнии и художествомь искуснии древнии Еллинскии столпи, не имел би град той никаковия похвалы от последних новосоздавшихся вне града на примории домовь. В семь точию похвали достойна есть Александрея, яко есть многимь и различнимь кораблемь приемница. Два бо имать великии пристанища, един, менший, от востока, и сей есть ради Французовь, Енглезовь, Фиаменговь 40 и Венецияномь; второе, болшое, от запада, идеже корабле точию Турецкии и Грецкии стоят, и сие есть тишайшое и безмолвное. Посреде же сихь, на единомь тонкомь рогу, к морю простертом, есть создан каштел, лепотнимь и твердимь зданием, от камени крепка, и вьоружен армати, ради пиратовь и всяких врагов, имущих приключитися. Еще имать високо на едином столпе фанар, або лехтарня, в ней же на всяку нощ запаляется светлост, ради знамения кораблемь, в нощи случаючимься припливати, иногда же и заблуждати, да удобие обрящут пут. И сия о Александрии. Пребихь же убо аз в Александрии седмицу едину, последи же обретши кораблец мал Турецкий и давши мзду, уже не Ниломь, рекою сладкою, но сланим и горкимь морем отплих паки в Дамят. За два дни нужду же претерпехь многу, не могущу истерпети покушения морскаго, ничтоже бо не [165] могохь вкусити от пищи, но блевахь многократно, наченши от Александрии даже к Дамяте, идеже пришедше, обретох алаи, иже имут отплисти в Парашамь, то есть в предели Дамаскови и благодарих Бога, яко по желанию моему и прошению вся исполнишася, понеже имехь намерение паки возвратитися в Трипол, к предже писанному дидаскалу 41, по повелению его и моему обещанию. Замедлих же аз тогда в Дамяте дний 15, таже двигнувшуся алаю в предели Сирийски, то есть в Паршамь, якоже на всякь год тамо обиче плисти, овогда единожди, овогда же дважди, тогда и аз паки в тойдже вседох корабль, в нем же приплих к Дамяте, по знаемости корабленачалника и прочиих пловцовь, иже православни християне суще, без мзди мя взяша, и отплихомь от Дамяти Сентеврия 22 числа, в день ввторника, пред полуднемь, и пловохом тогда до вечера, и чрез нощ и утро благополучно; бист же всехь кораблей тогда, малих же и великих, числомь семьдесят 5.


Комментарии

1. Абие (ст.-слав.) — тотчас.

2. Лемес — город на Кипре, совр. Лимасол.

3. Вина (ст.-слав.) — причина.

4. Рахит — город в Дельте Нила, совр. Рашид.

5. Чермное море — Красное море, Белое море — Средиземное море.

6. Египет — здесь имеется в виду Каир.

7. Метох — монашеская община (от греч. metoch).

8. Косьма — Патриарх Александрийский в 1724–37 гг.

9. Стогна — улица.

10. Имеется в виду Старый и Новый Каир.

11. Корысть — выгода, польза.

12. Каирская цитадель.

13. Кандило — лампы, лампады (от лат. candela).

14. Медиолан — Милан.

15. Римляне — здесь: католики.

16. Сувез — совр. Суэц.

17. Емень — Йемен.

18. Дамята — город в Дельте Нила, совр. Думьят.

19. Цариград — Стамбул, тогда столица Турции.

20. Коморы — торговые лавки.

21. Тамять — совр. Думьят.

22. Помаранч — апельсин.

23. Полако — Булак, район на севере Каира.

24. Индукт — торговое соглашение (от лат. inductus).

25. Ad Majorem Gloriam Dei (et) Beatae Virginis Mariae — К превеликой славе Божией и Пресвятой Девы Марии.

26. Т.е. ниже Каира.

27. Весь — село.

28. Семо и овамо (ст.-слав.) — тут и там.

29. Одесную и ошую — справа и слева.

30. Фива — совр. Фува.

31. Столп — здесь: обелиск.

32. Опасно (ст.-слав.) — усердно.

33. Знамения — здесь: знаки, т.е. египетские иероглифы.

34. "Живете" — древнерусское название буквы Ж. Речь идет об иероглифе ***, похожим на букву Ж.

35. Яже (ст.-слав.) — их же.

36. Икона — здесь: рисунок.

37. Пловцы — моряки, матросы.

38. Резання — резьба.

39. Вертоград — сад.

40. Фиаменги — фламанцы.

41. Дидаскал — учитель (от греч. didaskaloV).

Текст воспроизведен по изданию: Странствования Василья Григоровича-Барского по святым местам Востока с 1723 по 1747 г. Ч. 1-2. СПб. 1885-1886.

© текст - Барсуков Н. 1885-86
© сетевая версия - Тhietmar. 2006
© OCR - Мурдасов А. 2006
© дизайн - Войтехович А. 2001 

Мы приносим свою благодарность
А. Е. Кулакову за помощь в получении текста.