Neue Seite 68

[От Р. Х. 1583] Другая грамота ко Государю от Короля с Богданом Воейковым.

От Великого Государя Стефана Божьею милостию Короля Польского и Великого Князя Литовского, Руского, Пруского, Жемоитского, Мазоветского, Киевского, Волынского, Подлясского, Лифлянского, Седмиградского и иных Божьею милостию Великому Государю и Великому [172] Князю Ивану Васильевичу всея Руссии, Владимерскому, Московскому, Новгородскому, Казанскому, Астраханскому, Псковскому, Тверскому, Югорскому, Пермскому, Вятскому, Болгарскому и иных: писал еси к нам с Посланником твоим с Богданом Борисовичем Воейковым, припоминаючи нам мирное меж нами постановленье, штожь з обу сторон мест не поседати, и новых городов не ставити в тых десяти летах, а в тот час, як наши Послы великие Воевода Браславский, Князь Януш Збарашский и с товарищи у тебе были, Воевода Витебский, Староста Велижский Пан Станислав Пац на усть Межи реки от города от Велижа за тридцат верст вверх по Двине город поставил, ино иж тот город Воевода Витебский Пан Станислав Пац з воли и росказанья нашего поставил, а ты до нас о том через Послы свои великие Дворянина твоего и Наместника Коширского Князя Дмитрия Петровича Елецкого с товарищи наказал, чтоб мы его сметать велели, и мы тот город на усть Межи реки тогожь часу сметати есмо велели, и Воевода Витебский Пан Станислав Пац к нам отписал, штожь тот город вжо сметан, и будет ли до того часу еще не сметан, и мы его безо всякого мешканья заразом сметати велим, нижли што к нам пишешь в той же грамоте своей, якобы тот город [173] в твоей земле поставлена и Воевода Витебский Пан Станислав Пац твоею землею Торопецким уездом владеет в Торопецкий и в Лутский уезд присылает твоих людей, грабить велит и убивать, и многие задоры от Воеводы Витебского твоим людем делаются, ино тая земля, где город был поставлен на усть Межи реки, есть наша, к нашему городу к Велижу, а не твоя, бо город Велиж у перемирных грамотах у обоех, и в нашей и в твоей, у нашу сторону написан зо всеми землями и границами, штоку не муя, лежало, як ты тот город Велиж держал, и як мы его взяли и отыскали, кгдыжь перед тым и Велиж и Торопец Витебская земля была к городу Витебску, а Великие Луки, Смоленск и зо всеми городами, пригородки з волостьми и з землями извеков ку Великому Князству Литовскому были, и недавных часов за предков наших Королей их милости Польских и Великих Князей Литовских предки твои Князи Великие Московские от Великого Князства Литовского оторвали и посели, ведже иж Послы наши и твои постановили, ку перемирных грамотах есть описано, штожь з обу сторон Судей на границу Велижскую и Торопецкую, также и на иншие местца о рубежах и спорных землях выслати было, и мы по тому Судей наших на первый день месяца Маия в року [174] теперешнем осьмидесят третьем высылали, и Судьи наши там на границу выехавши, двенадцать дней Судей твоих ожидали, а ты Судей твоих ку тому сроку не выслал, за чем наши не дождавши тых Судей твоих, опять назад ся вернули, а Судьи твои и по ся места на границу не выезжали, а теперь люди твои на многих украйных местцах людем нашим великие кривды и шкоды чинят и через границы наши за рубеж в наши земли переходят и вступаются, и земли волости Микулинское владают, которая и в теперешних и в старых перемирных листех зо всим в нашу сторону к Великому Князству Литовскому написана, и тыб в границы наши Велижские, Усвятские и Озерыские и в села Микулинские ничем уступоватись не велел, и людем своим за рубеж и через границы наши в земли наши Велижские, усвятские, Озерыские и в села Никулинские приходити, шкод и убытков чинити и уступоватися заказал, бо есть люди твои за рубеж и через границы наши в кгрунты и волости наши, которыми есмо город Велиж, город Усвят и иншие городы взяли и отыскали, вступоватися и уезжати будут, наши Воеводове и Старостове убойные бороняти их мусят, а похочешь ли ты Судей своих на розграниченье тых кгрунтов межи города нашего Велижа и на иные местца пенные и земли [175] спорные выслати, стерегучи того, чтоб з обе стороны промеж людей наших и твоих кривда и грабежи не деялися, але штоб люди нации и твои украинные з обу двух сторон в покою и в згоде жили, а меж нами Великими Государьми Хрестьянскими малыми речьми доброго дела и покою не порушили, и тыб о том нам ознаймил, а мы по томужь з стороны нашие Судей наших на успокоенье и ограниченье о пенных и о спорных кгрунтех и землях вышлем, а будет ли люди наши в твои власные кгрунты и села Лутского Торопецкого и Невельского уезду мимо перемирные грамоты приходили, людей твоих переимали и переграбили, и мы того выведатися, и таковых самовольных людей зыскати, и людем твоим справедливость и управу учинити велим, а што пишешь к нам, штожь из Лифляндских городов достального наряду и запасов хлебных и по ся места людем твоим не отдано, и нам бы тот наряд и хлебные запасы з Лифлянских городов отдати велети, ино писали к нам Наместники и Державцы наших городов земли Лифляндское, ттожь весь наряд и запасы хлебные, которые тебе належати имели, вжо отдали, а только тые наряды на городах земли Лифлянские зостали, которые с договору Послов наших и твоих на городех Лифлянских [176] зостатися мели, а будут ли которые запасы хлебные за недостатком подвод с городов Лифлянских не выпроважены, и тыб к нам знати дал, и список тых запасов к нам прислал, сколько ещо тых запасов на которых городех зостало, а мы тые запасы и досталь тебе отдати велим, и вывезши з городов наших позволим, а иж тежь люди твои выходячи з земли Лифлянские, многие грабежи, шкоды и убытки людем нашим починили, также и тым людем нашим, которые з договору Послов наших и твоих городы людем твоим здавали, а иных некоторых и на смерть убили, о чом есмя и перво сего до тебе писати велели, и тыб тых виноватых, также шкоды и грабежи зыскати, и людем нашим поворочти, справедливость и управу учинить велел не пооднократ, теж вжо писали есмо до тебе и речью через наши Послы великие и Гонцы, также и через твои Послы и Гонцы теж частокрот наказывали есмо о которых подданных наших купцов именовите Зенова Зарецкого да Лукаша Мамонова да Никипора Никитина и наших купцов подданных наших, которых товары многие до казны твоей взяты, а заплаты и нагороды до того часу нетолько не учинены, але теж и гды есмо через Гонца нашего Миколая Бурзу милость наша до тебе писали, и речью наказали, Диак твой Ондрей Щелкалов [177] реестр, або список, который с казны твоей Зинов Зарецкий меле, взявши, вернути его не хотел, тыб тым людем нашим купецким Зинову Зарецкому и Лукашу Мамонову, также иным всим за товары их, до казны твоее побраные, заплату и нагороду учинить велел по томужь, что люди твои Сысойко Павлов сын Смольянин остал винен румму пинязей подданному нашему Зинову Зарецкому по списку своему, и иншие некоторые люди твои, и тыб с них Зинову Зарецкому справедливость и управу учинити велел, якобы подданные наши от тебе самого и от людей твоих на том собе не виненны не шкодовали, когдыжь то меж Государьми Крестьянскими не ведется, абы Великий Государь у чужих людей торговых маетности и товары до казны своей взявши, платити не мел, чому и меж нами не пригож быти, абы люди наши купецкие от тебе самого и от людей твоих шкоду и убыток меть мели, а што об иных делех нам наказал еси речью через Посланника твоего Богдана Воейкова, и велел ему говорити, ино мы тому зрозумевши, другий лист наш о том до тебе через Посланника твоего Богдана Борисовича отписати есмо велели, которого отпустили есмя к тебе не здерживаючи. Писана в Стольном городе нашем у Кракове лета от Рождества Господа и Бога нашего Иисуса [178] Христа тысеча пять сот семьдесят третьего, месяца Августа третьего дня, Королевства нашего року оьсмого.

Текст воспроизведен по изданию: Древняя российская вивлиофика, Часть XII. М. 1789