IX.

Две договорные взаимные Грамоты Великого Князя Тверского Бориса Александровича и сына его Князя Михайла Борисовича, и братей его Князя Дмитрия Юрьевича и Князя Ивана Юрьевича, с Великим Князем ВАСИЛИЕМ ВАСИЛИЕВИЧЕМ и с его детьми: о бытии им в дружбе и согласии, о управлении всякому своими землями, о взаимном вспоможении противу неприятелей, а особливо противу Литвы, Поляков, Немцов и Татар, о непринятии им в союз ни Можайского Князя Ивана, ни сына Князя Шемяки Ивана, о дани, судах, мытах, пошлинах и проч.— за подписанием Московского Митрополита Ионы.— Писаны около 1451 года.

Первая.

+ Божьею милостью и пречистые его Богоматери, и по благословенью отца нашего Ионы Митрополита Киевъского и всея Руси. На семъ на всемъ, брате Князь Велики ВАСИЛЕЙ ВАСИЛЪЕВИЧЪ, целуй ко мне крестъ къ своему брату къ Великому Князю Борису Александровичю, и съ своимъ сыномъ съ Великимъ Княземъ Иваномъ Васильевичемъ, и съ своимъ сыномъ съ Княземъ съ Юрьемъ Васильевичемъ, и къ моему сыну къ Князю Михайлу Борисовичю, и съ своими детми съ меншими и къ моимъ детемъ, кого ми еще Богъ дастъ, и къ моей братье молодшей къ Князю Дмитрею Юрьевичу и къ Князю Ивану Юрьевичу, и къ меншей къ моей братье: добра вы намъ хотети во всемъ въ Орде и на Руси безъ хитрости; а што вамъ слышевъ о нашемъ лихе что намъ на пакость, или о добре, то вы намъ поведати въ правду безъ примышления. А ци имутъ насъ сваживати Татарове, а учнутъ вамъ давати домъ святого Спаса, а нашю отчину Великое Княженье Тферь и Кашинъ: и вамъ ся, брате, не имати за домъ святого Спаса и за нашю отчину [117] за Великое Княженье, тобе Великому Князю Василью подо мною подъ Великимъ Княземь Борисомъ, и твоимъ детемъ Великому Князю Ивану и Князю Юрью, и подъ моимъ сыномъ подъ Княземъ подъ Михайломъ, ни меншимъ твоимъ детемъ и подъ моими детми, кого ми Богъ дастъ, ни подъ моею братьею молодшею подъ Княземъ Дмитреемъ Юрьевичемъ и подъ Княземъ Иваномъ Юрьвичемъ, ни вашимъ внучятомъ ни подъ моею братьею меншею. А которые земли и воды потягли къ нашей отчине ко Тфери и къ Кашину при моемъ пращуре при Великомъ Князю Михайле Ярославиче, и при моемъ прапрадеде при Великомъ Князю Александре Мыхайловиче, и при Князи Костянтине и при Князи Василье Михайловичехъ, и при моемъ прадеде при Великомъ Князи Михайле Александровиче, и при моемъ деде при Великомъ Князи Иване Михайловиче, и при моемъ отци при Великомъ Князи Александре Ивановиче, и при мне при Великомъ Князи Борисе Александровиче: того вы, брате, подо мною подъ Великимъ Княземъ Борисомъ Александровичемъ не искати тобе и твоимъ детемъ, ни подъ моими детми, ни подъ моею братьею молодшею подъ Княземъ Дмитреемъ Юрьевичемъ и подъ Княземъ Иваномъ Юрьевичемъ, и подъ нашею братьею меншею, и подъ нашими братаничи и подъ внучяты; а быти намъ, брате, на Татаръ, и на Ляхи, и на Литву и на Немци за одинъ, и на всякого нашего недруга. А што отъ тебе отступилъ Князь Иванъ Можайской, да Княжь Дмитреевъ сынъ Шемякинъ Князь Иванъ, или которой ти иный братъ згрубитъ: и мне Великому Князю Борису и моимъ детемъ, и братье моей молодшей къ собе ихъ не приимати; а быти намъ съ тобою на нихъ за одинъ и съ твоими детми. Такожъ, брате, которой мой братъ молодшей и изъ меншии моее братьи згрубятъ мне Великому Князю Борису Александровичю, и моему сыну Князю Михайлу, и меншимъ моимъ детемъ, кого ми Богъ дастъ: и тобе Великому Князю Василью, и твоимъ детемъ Великому Князю Ивану и Князю Юрью, и меншимъ твоимъ детемъ техъ вамъ къ себе не приимати; а быти вамъ со мною съ Великимъ Княземъ Борисомъ и съ моими детми на техъ за одинъ. А ци, брате, по грехомъ пойдетъ на насъ Царь ратью, или рать Татарьская; и тебе, брате, намъ помочь послати въ правду безъ хитрости: а пойдутъ, брате, на насъ Литва, или Ляхове, или Немци; и тебе, брате, къ намъ на помочь самому всести на конь и съ своею братьею молодшею въ правду безъ хитрости. А которой ти братъ надобе оставити себе на стороже, и тобе его оставити, а кормъ взяти, а но користоватися ни чемъ. А на кого будетъ пеня давная и въ ратное веремя, того не имати, ни искати на обе стороны. А къ Орде ти, брате, и ко Царю путь чистъ, и твоимъ детемъ и внучятомъ, и твоимъ людемъ. А што судилъ Киприянъ Митрополитъ судей нашихъ опчихъ Полукарпа, и Михайла, и Ивана и Климянтеа, или што судили судьи наши опчии, и грамоты подавали, и што будетъ взято, то взято; а што будетъ не взято, а то есмя погренули, и грамоты техъ судовъ подрали; а кто выложитъ техъ судовъ грамоты, ино ихъ подрати же. А рубежъ Тфери и Кашину, какъ было при моемъ пращуре при Великомъ Князи Михайле Ярославиче, и при моемъ прапрадеде при Великомъ Князи Александре Михайловиче, и при Князи Костянтине и при Князи Василье Михайловичехъ, и при моемъ прадеде при Великомъ Князи Михайле Александровиче, и при моемъ деде при Великомъ Князи Иване Михайловиче, и при моемъ отце при Великомъ Князи Александре Ивановиче, и при мне при Великомъ Князи Борисе Александровиче, што потягло къ Тфери и къ Кашину. А съ Новымъ ми городомъ жити по старине, какъ было при вашемъ прапрадеде при Великомъ Князи Иване Даниловиче, и при Великомъ [118] Князи Семене Ивановиче, и при вашемъ прадеде при Великомъ Князи Иване Ивановиче, и при вашемъ деде при Великомъ Князи Дмитрее Ивановиче, и при твоемъ отци при Великомъ Князи Василье Дмитреевиче, и при тебе при Великомъ Князи Василье Васильевиче; такъ же и при моемъ прапрадеде при Великомъ Князи Александре Михайловиче, какъ жилъ безъ Великого Княженья, и при Князи Костянтине и при Князи Василье Михайловичехъ, и при моемъ прадеде при Великомъ Князи Михайле Александровиче, и при моемъ деде при Великомъ Князи Иване Михайловиче, и при моемъ отци при Великомъ Князи Александре Ивановиче, и при мне при Великомъ Князи Борисе Александровиче. А которые земли и воды отошли отъ нашие отчины Тфери и Кашина отъ Великого Княженья при твоемъ отци при Великомъ Князи Василье Дмитреевиче, и при тебе при Великомъ Князи Василье Васильевиче, а при моемъ деде при Великомъ Князи Иване Михайловиче, и при моемъ отци при Великомъ Князи Александре Ивановиче, и при мне при Великомъ Князи Борисе Александровиче: а темъ, брате, землямъ и водамъ судъ и исправа на обе стороны. А новыхъ вы мытовъ не замышляти, а на старыхъ мытехъ имати пошлины съ воза денга, а костокъ съ человека денга же; а поедетъ на версе съ торговлею, ино денга же; а кто ся промытитъ, ино съ воза промыты 6 алтынъ, а заповеди 6 алтынъ, колко бы возовъ ни было; а промыта то, кто обьедетъ мытъ; а проедетъ мытъ, а мытника у завора не будетъ, ино промыты нетъ; а състижетъ его мытникъ, инъ возметъ свой мытъ, а промыты и заповеди нетъ. А съ лодьи пошлина съ доски по два алтына, а болши того пошлинъ нетъ, а съ струга алтынъ; а тамги и осминичего отъ рубля алтынъ; а тамга и осминичее взяти, аже иметъ торговати; а поедетъ мимо, инъ знаетъ свой мытъ да костъки, а боле того пошлинъ нетъ; а поедетъ безъ торговли, ино съ того мыта нетъ и пошлинъ. А межи насъ людемъ нашимъ и гостемъ путь чистъ безъ рубежа; а кто учинитъ рубежъ и выводъ, рубещика и выводщика по исправе выдати. А обидному всему межи насъ судъ опчей отъ того веремени, какъ твой дедъ Князь Велики Дмитрей Ивановичь къ Богу отшелъ; а межи насъ судити судъ опчей людемъ старешимъ, целовавъ крестъ. А суженого не посужати; а татя, розбойника, грабежника, душегубца где имутъ, туто судятъ; а иметь ся просити на изводъ, ино его на изводъ пустити, а холопу, робе, даному, положеному, заемному, поручному, земли и воде отъ века судъ. А кто иметъ холопа или должника, а поставитъ передъ Волостелемъ, въ томъ ему вины нетъ; а выведетъ изъ волости, а передъ Волостелемъ не поставитъ, въ томъ ему вина. А холопъ и роба почнетъ ся тягати съ осподаремъ, а пошлеться на правду, а не будетъ по холопе и по робе поруки, ино ихъ выдати осподарю; а по должнике не будетъ поруки, ино его обинити; а пошлины съ семьи три алтына, а зъ головы алтынъ; а кой ся не иметъ тягати, съ того пошлины нетъ. А кто моихъ Князей служебныхъ къ тебе отъедетъ, въ техъ ти отчину не въступатися, кого ми Богъ поручилъ, ни твоимъ детемъ, ни твоей братье молодшей. А Бояромъ и слугамъ межи насъ волнымъ воля; а домы имъ свои ведати, а намъ ся въ нихъ не въступати. А судомъ и данью потянуть по земле и по воде; а на холопехъ дани не имати, на которыхъ ключники целуютъ; а которыхъ Бояръ и слугъ села, а имутъ жити въ вашей отчине, взяти вы на нихъ дань и судъ, какъ и на своихъ. А закладневъ вы, брате, въ дому святого Спаса и въ моей отчине въ Великомъ Княженье во Тфери и въ Кашине не дръжати; а людей вы нашихъ Тферичь и Кашинцовъ блюсти какъ и своихъ. А отъиметъ Богъ которого изъ насъ; и вамъ, брате, печаловатися нашими Княинями и нашими детми. А на семъ на всемъ, брате Князь [119] Велики ВАСИЛЕЙ ВАСИЛЬЕВИЧЪ, целуй ко мне крестъ къ своему брату къ Великому Князю Борису Александровичю, и съ своимъ сыномъ съ Великимъ Княземъ Иваномъ Васильевичемъ, и съ своимъ сыномъ со Княземъ Юрьемъ Васильевичемъ, и къ моему сыну къ Князю къ Михайлу къ Борисовичю, и съ своими детми съ меншими, и къ моимъ детемъ, кого ми Богъ дастъ, и къ моей братье къ молодшей къ Князю Дмитрею Юрьевичю и Князю къ Ивану Юрьевичю, и къ меншей моей братье, по любви въ правду, безъ хитрости. А сего намъ целованья не сложити, а правити; а се намъ докончанье и нашимъ детемъ, и нашей братье молодшей и меншей, и нашимъ внучятомъ и ихъ детемъ.

На подлинной подписано:

Смирены Иона Архиеп. Кие. всея Руси.

Вторая.

+ Божьею милостью и пречистые его Богоматери, и по благословенью отца нашего Ионы Митрополита Киевъского и всея Руси. На семъ на всемъ, брате Князь Велики Борисъ Александровичь, целуй ко мне крестъ къ своему брату къ Великому Князю ВАСИЛЬЮ ВАСИЛЬЕВИЧЮ, и къ моему сыну Великому Князю Ивану Васильевичю, и къ моему сыну Князю Юрью Васильевичю, и съ своимъ сыномъ со Княземъ съ Михайломъ зъ Борисовичемъ, и къ меньшымъ къ моимъ детемъ, и съ своею братьею молодшею со Княземъ зъ Дмитреемъ съ Юрьевичемъ и съ Княземъ Иваномъ Юрьевичемъ, и съ меньшею съ вашею братьею: добра вы намъ хотети во всемъ въ Орде и на Руси безъ хитрости; а что ти слышевъ о нашемъ добре и о лисе что намъ на пакость, то вы намъ поведати въ правду безъ примышленья. А ци имутъ насъ сважывати Татарове, а учнуть вамъ давати нашу вотчину Великое Княженье Москву и Новъгородъ Велики: и вамъ ся, брате, не имати за нашу вотчину за Великое Княженье за Москву и за Велики Новъгородъ подо мною подъ Великимъ Княземъ Васильемъ Васильевичемъ, и подъ моими детьми Великимъ Княземъ Иваномъ и подъ Княземъ Юрьемъ, и подъ меньшыми моими детьми, ни твоей братье молодшей Князю Дмитрею Юрьевичю и Князю Ивану Юрьевичю, ни вашей братье меньшей, ни подъ нашыми внучяты. А которые земли и воды потягли къ нашей отчине къ Великому Княженью къ Москве и къ Новугороду при моемъ пращуре при Великомъ Князе Иване Даниловиче, и при моемъ прадеде при Великомъ Князе Иване Ивановиче, и при моемъ деде при Великомъ Князе Дмитреи Ивановиче, и при моемъ отце при Великомъ Князе Василье Дмитреевиче, и при мне при Великомъ Князе Василье Васильевиче: того вы, брате, подо мною подъ Великимъ Княземъ не искати, ни подъ моими детьми Великимъ Княземъ Иваномъ ни подъ Княземъ Юрьемъ, ни твоему сыну Князю Михайлу, и подъ моими меньшыми детьми, ни твоимъ детемъ, кого ти еще Богъ дастъ, пи твоей братье молодшей Князю Дмитрею Юрьевичю и Князю Ивану Юрьевичю, ни подъ нашыми внучяты, ни вашей братьи меньшей; а быти намъ, брате, на Татаръ, и па Ляхи, и на Литву и на Немци за одинъ, и на всякого на нашего недруга. А что отъ мене отступилъ Князь Иванъ Можайской, да Княжъ Дмитреевъ сынъ Шемякинъ Князь Иванъ, или которой ми иной братъ мой згрубитъ: и тобе Великому Князю Борису и твоему сыну Князю Михайлу, и твоей братье молодшей къ собе ихъ не приимати; а быти вамъ на нихъ со мною за одинъ и съ моими детьми. Также, брате, которой твой братъ [120] молодшей и изъ меньшые твоей братьи згрубитъ тобе Великому Князю Борису и твоему сыну Князю Михайлу, и меньшымъ твоимъ детемъ, кого ти еще Богъ дастъ: и мне Великому Князю Василью, и моимъ детемъ Великому Князю Ивану и Князю Юрью, и меньшымъ моимъ детемъ быти намъ съ тобою съ Великимъ Княземъ Борисомъ и съ твоими детьми на техъ за одинъ, а техъ намъ къ собе не приимати. А ци, брате, по грехомъ пойдетъ на насъ Царь ратью, или рать Татарьская; и тобе, брате, намъ помочь послати въ правду безъ хитрости: а пойдутъ, брате, на насъ Литва, или Ляхи, или Немци; и тобе, брате, къ намъ на помочь самому всести на конь и съ своими детьми, и съ своею братьею молодшею въ правду безъ хитрости. А которой ти братъ надобе оставити на сторожу, и тобе его оставити, а кормъ взяти, а не корыстоватися ни чемъ. А на кого будетъ пеня давная и въ ратное веремя, того не имати, ни искати на обе стороны. А къ Орде ти, брате, и ко Царю путь чистъ, и твоимъ детемъ и внучятомъ, и вашымъ людемъ. А что судилъ Кипреянъ Митрополитъ судей нашыхъ обчихъ Полукарпа и Михайла, и Ивана и Клементья, или что судили судьи нашы обчии, и грамоты подавали, и что будетъ взято, то взято; а что будетъ не взято, то есмя погренули, и грамоты техъ судовъ подрали; а хто выложытъ техъ судовъ грамоты, ино ихъ подрати же. А рубежъ межы насъ Москве и Новугороду, какъ было при моемъ пращуре при Великомъ Князе Иване Даниловиче, и при моемъ прадеде при Великомъ Князе Иване Ивановиче, и при моемъ деде при Великомъ Князе Дмитрее Ивановиче, и при моемъ отце при Великомъ Князе Василье Дмитреевиче, и при мне при Великомъ Князе Василье Васильевиче, что потягло къ Великому Княженью къ нашей отчине къ Москве. А съ Новымъ ти городомъ жыти по старике, какъ было при вашыхъ пращурехъ при Великомъ Князи Михайле Ярославиче, и при твоемъ прапрадеде при Великомъ Князе Александре Михайловиче, и при Князи Костянтине и при Князе Василье Михайловичехъ, и при твоемъ прадеде при Великомъ Князе Михайле Александровиче, и при твоемъ деде при Великомъ Князе Иване Михайловиче, и при твоемъ отце при Великомъ Князе Александре Ивановиче, и при тобе при Великомъ Князе Борисе Александровиче. А которые земли и воды отошли отъ нашые отчины отъ Великого Княженья отъ Москвы и отъ Великого Новагорода при моемъ отце Великомъ Князе Василье Дмитреевиче, и при мне при Великомъ Князе Василье Васильевиче, а при твоемъ деде при Великомъ Князе Иване Михайловиче, и при твоемъ отце при Великомъ Князе Александре Ивановиче, и при тобе при Великомъ Князе Борисе Александровиче: и темъ, брате, землямъ и водамъ судъ и исправа на обе стороне. А новыхъ мытовъ не замышляти, а на старыхъ мытехъ имати пошлина съ воза денга, а костокъ съ человека денга же; а поедетъ на верьсе съ торговлею, ино мыта денга же; а хто ся промытитъ, ино промыты съ воза шесть алтынъ, а заповеди шесть же алтынъ, одинаколь бы возовъ ни было; а промыта то, где обьедетъ мытъ; а проедетъ мытъ, а мытника у завора нс будетъ, ино мыта и промыты нетъ; а състижетъ его мытникъ, и онъ возметъ свой мытъ, а промыты и заповеди нетъ. А съ лодьи пошлинъ съ доски по два алтына, а боле того пошлинъ нетъ, а съ струга алтынъ всехъ пошлинъ; а тамги и осмьничего отъ рубля алтынъ; а тамга и осмьничее взяти, аже иметъ торговати; а поедетъ мимо, и онъ знаетъ мытъ да костки, а боле того пошлинъ нетъ; а поедетъ безъ торговли, ино съ того мыта и пошлинъ нетъ. А межы нась людемъ нашымъ и гостемъ путь чистъ безъ рубежа; а хто учинитъ рубежъ или выводъ, и рубежщыка и выводчыка [121] выдати по исправе. А обидному всему межы насъ судъ обчей отъ того веремяни, какъ мой дедъ Князь Велики Дмитрей Ивановичь къ Богу отшелъ; а межы насъ судити судъ обчей людемъ старешымъ, целовавъ крестъ. А суженого не посужати; а татя, розбойника, грабежника, душегубца где имутъ, тутъ судятъ; а иметца просити на изводъ, ино его на изводъ пустити; а холопу, робе, даному, положеному, заемному, поручному, земле воде отъ века судъ. А хто иметъ холопа или должника, а поставитъ передъ Волостелемъ, въ томъ ему вины нетъ; а выведетъ изъ волости, а не поставитъ передъ Волостелемъ, въ томъ ему вина. А холопъ или роба почнутца тягати съ осподаремъ, а пошлетца на правду, а не будетъ по холопе или по робе поруки, ино его выдати осподарю; а по должнике не будетъ поруки, ино его обинити; а пошлинъ съ семьи три алтыны, а зъ головы алтынъ; а хто ся не иметъ тягати, съ того пошлины нетъ. А хто моихъ Князей отъедетъ къ тобе служебныхъ, и въ техъ ти вотчины не въступатися, кого ми Богъ поручилъ, ни твоимъ детемъ, ни твоей братье молодшей, ни меньшей твоей братье. А Бояромъ и слугамъ межы насъ волнымъ воля; а домы имъ свои ведати, а намъ ся въ нихъ не въступати. А судомъ и данью потянути по земле и по воде; а на холопехъ дани не имати, на которыхъ ключники целуютъ; а которыхъ Бояръ и слугъ села, а имутъ жыти въ вашей вотчине, взяти на нихъ дань и судъ какъ и на своихъ. А закладней вы, брате, въ нашей отчине въ Великомъ Княженье въ Московскомъ и въ Новегороде не держати; а людей вы нашыхъ Москвитина и Новогородца блюсти какъ и своихъ. А отойметъ Богъ которого изъ насъ; и вамъ, брате, печяловатися по нашемъ жывоте нашыми Княгинями и нашыми детьми. А на семъ на всемъ, брате Князь Велики Борисъ Александровичь, целуй ко мне крестъ къ моему брату къ Великому Князю ВАСИЛЬЮ ВАСИЛЬЕВИЧЮ, и къ моему сыну Великому Князю Ивану Васильевичю, и къ моему сыну Князю Юрью Васильевичю, и съ своимъ сыномъ съ Княземъ съ Михайломъ зъ Борисовичемъ, и къ меньшымъ къ моимъ детемъ, и съ своею братьею молодшею со Княземъ зъ Дмитреемъ съ Юрьевичемъ и со Княземъ съ Иваномъ съ Юрьевичемъ, и съ меньшею съ вашею братьею, по любви въ правду, безъ хитрости. А сего намъ целованья не сложыти, а правити; а се намъ доконьчянье и нашымъ детемъ, и нашымъ внучятомъ и ихъ детемъ.

На подлинной подписано:

Смирены Иона Архиеп. Кие. всея Руси.

К сим двум, вместе сшитым, Грамотам привешены на красных шелковых снурках две восковые печати.

На обороте последней Грамоты написано:

Докончалная Тферская новая Князя Бориса Александровича со Княземъ Васильемъ Васильевичемъ.

(Перепечатано из С. Г. Г.и Д., т. I, №№ 76-77, стр. 171-176).