VII.

Две договорные взаимные Грамоты Князя Георгия (Юрья) Дмитриевича Галицкого и сына его Князя Дмитрия меньшего, с Великим Князем ВАСИЛИЕМ ВАСИЛИЕВИЧЕМ, с братом своим Князем Константином Дмитриевичем, с племянниками своими Князем Иваном и Князем Михайлом Андреевичами, и с Боровским Князем Василием Ярославичем: о бытии им в мире и согласии; о непринимании в дружбу ушедших от него детей его больших, Князя Василия и Князя Дмитрия (Шемяки) Юрьевичей; о возвращении ему Великому Князю не токмо Великого Княжения Московского со всеми принадлежностями, но и города Дмитрова, на котором он имел из Орды ярлыки от Хана; о управлении всякому своими землями, о возвращении грабежа и пленников, взятых во время бывшего между ими несогласия; о дани, судах, долгах, и проч.— Писаны 1433 года.

Первая.

А на семъ на всемъ, брате старейший Князь Великий ВАСИЛЕЙ ВАСИЛЬЕВИЧЬ, целуй ко мне крестъ къ своему брату молодшому Князю Юрью Дмитриевичю и къ моему сыну Князю Дмитрею меншому, и съ нашимъ братомъ молодшимъ Княземъ Костянтиномъ Дмитриевичемъ, и съ моими братаничи Княземъ Иваномъ и со Княземъ Михайломъ Андреевичи, и со Княземъ Васильемъ Ярославичемъ: имети ми тобя Великого Князя собе братомъ старейшимъ, а брату нашему молодшему Князю Костянтину Дмитриевичю имети ему меня собе братомъ старейшимъ, а Князю Ивану да Князю Михайлу Андреевичемъ имети имъ меня собе дядею, а Князю Василью Ярославичю имети ему меня себе дядею жо. А добра вамъ мне хотети везде во всемъ где бы ни было; а что вамъ слышавъ о моемъ добре или о лисе отъ кого бы ни было, а то вы мне поведати въ правду, безъ примышленья. А кто будетъ тобе Князю Великому другъ, то и мне другъ; а кто тобе недругъ, то и мне недругъ. А не канчивати ми безъ васъ ни съ кемъ; а хотя буду съ кемъ въ целованьи, и мне къ нему целованье сложити: а вамъ также безъ моего веданья не канчивати ни съ кемъ. А держати ми тобя Великого Князя собе въ старишиньстве; а тобе мене держати въ братстве и во чести, безъ обиды. А детей ми своихъ болшихъ Князя Василья да Князя Дмитрея не приимати и до своего жывота, ни моему сыну меншому Князю Дмитрею не приимати ихъ; а тебе ихъ также не приимати. А чемъ тобе благословилъ Отець твой Князь Великий Василей Дмитриевичь своею отчиною въ Москве, и Коломною съ волостми, и всемъ Великимъ Княженьемъ, и Муромомъ съ волостми, и Козельскомъ съ месты, и иными своими примыслы; также что отчина брата нашего молодшего Княжа Петрова Дмитриевича, Дмитровъ со всеми волостми: того ми всего подъ тобою подъ Великимъ Княземъ блюсти, а не обидети, ни въступатися, ни моему сыну Князю Дмитрею меншому. А что есмь взялъ Царевъ ярлыкъ 1 на Дмитровъ, и тотъ ми ярлыкъ тобе дати. Также что [110] вотчина брата нашего молодшего Княжа Костянтинова Дмитриевича, и братаничевъ моихъ вотчина Княжа Иванова да Княжа Михайлова Ондреевичевъ, и Княжа Васильева Ярославича дедина и вотчина; и мне того подъ ними всего блюсти, а не обидети, ни въступатися, ни моему сыну Князю Дмитрею меншому. А чемъ мя благословилъ Дедъ твой Князь Великий Дмитрий Ивановичь, а мой Отець, въ Москве и въ станехъ въ Московьскихъ, также и пути въ станехъ въ Московьскихъ, какъ ся есмь розделилъ съ твоимъ Отцомъ съ Великимъ Княземъ, а съ своимъ братомъ, и Звенигородомъ съ волостми, и Галичемъ съ волостми, и селы въ Великомъ Княженьи; или что собе примышлю, или что ми ся еси нынеча отъступилъ Сурожыка, да Лучиньского, да Шепковы, и Шачебала и Ликурги, или что ми ся еси отъступилъ изъ Великого Княженья Костромьскихъ волостей, Андомы, Кореги, Борку, Березовца съ Залесьемъ, да Шыленги; или что ми ся еси отъступилъ Бежыцьского верха и съ путми и съ селы и слободами, опрочь техъ местъ, что еси подавалъ изъ Бежыцьского верху брату нашему молодшему Князю Костянтину Дмитриевичю, да опрочь селъ Ивановыхъ Дмитриевича, что еси у него взялъ въ своей вине; а иныхъ ти селъ въ Бежыцьскомъ версе не держати, а отъступилъ ми ся еси и моему сыну Князю Дмитрею меншому техъ всехъ местъ въ вотчину и въ вуделъ: а того вамъ всего подо мною и подъ моимъ сыномъ подо Княземъ подъ Дмитреемъ подъ меншимъ блюсти, а не обидети, ни въступатися. А Бежыцьской ми верхъ ведати по старине по тому, какъ былъ за тобою за Великимъ Княземъ: а у кого будутъ въ Бежыцьскомъ версе грамоты жаловалныи Отца твоего Великого Князя, или твои у Бояръ или на слободы, или у иного у кого; и въ техъ грамотахъ воленъ язъ Князь Юрьи Дмитриевичь, кого какъ хочю жаловати. А жити ти въ Москве со мною и съ моимъ сыномъ со Княземъ съ Дмитриемъ, какъ есмь жилъ съ твоимъ Отцомъ съ Великимъ Княземъ, а съ своимъ братомъ. А дань и ямъ давати ми съ своей отчины изъ Звенигорода съ волостми, изъ Галичя съ волостми по давному, какъ есмь давалъ твоему Отцу Великому Князю; а зъ Бежыцьского верха и съ Костромьскихъ волостей давати ми дань и ямъ по тому розводу, какъ переже того давали дань и ямъ въ твою казну. А знати Орда тобе Великому Князю, а мне Орды не знати никоторыми делы: а переменитъ Богъ Орду, не имешъ давати Татаромъ, а коли учнешъ имати дань съ своей отчины съ Великого Княженья себе, и мне тогды съ своего удела имати дань собе. А коли ти будетъ самому всести на конь противъ своего недруга, или ти будетъ брата нашего молодшего послати Князя Костянтина Дмитриевича, и мне послати сына своего съ своими людми; а коли пошлешъ братаничевъ моихъ, или своихъ Воеводъ, и мне послати съ ними своихъ Воеводъ съ своими людми; а где ти будетъ надобе послати на свою службу сына моего, и сыну моему пойти безъ ослушанья съ моими людми. А кто иметъ служити мне Князю Юрью Дмитриевичю, а жывучи въ твоей отчине въ Великомъ Княженьи, а будетъ ти слати исъ техъ городовъ на свою службу, где те жывутъ, и мне слати съ теми людми своего Воеводу съ твоимъ Воеводою. А кто иметъ мою отчину обидети, и тобе мене боронити. А въ Литву ти у мене помочи не имати; а къ тобе ми не ездити. А кто иметъ жити вашихъ Бояръ и слугъ въ моей отчине, и техъ ми блюсти какъ и своихъ: а кто иметъ жити моихъ Бояръ и слугъ въ вашихъ отчинахъ и въ Великомъ Княженьи, и вамъ ихъ блюсти какъ и своихъ. А Бояромъ и слугамъ межи насъ волнымъ воля; а городная осада, где хто жыветъ, тому туто и сидети, опрочь путныхъ Бояръ. А Князей ми твоихъ служебныхъ съ вотчинами въ службу собе не приимати; а которыи Князи мне имутъ [111] служити, и имъ въ вотчину свою не въступатися, а вотчины лишены. А которыи суды судилъ язъ Князь Юрьи Дмитриевичь сидя на Москве, а техъ ти судовъ моихъ не посужати. А что ся учинило въ нашемъ розмирьи, что поимана твоя казна Великого Князя и твоее матери Великие Княгини, или поклажеи ваши, или Бояръ твоихъ поклажеи, или и нятцовъ твоихъ поклажеи, и что будетъ меня того дошло, и мне то отъдати по сему целованью; а что и нятци твои на поруце подаваны, или на нихъ кабалы поиманы, и мне съ нихъ велети порука свести, а кабалы имъ подавати. А что мои люди грабили Бояръ твоихъ, или и нятцовъ твоихъ, или людей твоихъ опрочь бою, ино то отъдати, а не отъдадутъ, ино тому судъ и исправа, опроче сьестного. А что будутъ поклажеи моихъ Бояръ, Семеновы Федоровича, или иныхъ Бояръ моихъ, и что того тобе дошло Великого Князя, и тобе то отъдати по сему целованью. А что будутъ твои Бояре и твои люди имали и грабили моихъ Бояръ и слугъ, въ первое наше розмирье, и имъ то отъдати, а не отъдадутъ, а на то судъ и исправа. А что Князь Василей Ярославичъ ималъ мою вотчину или люди его грабили мою вотчину, а на то судъ и исправа. А что еси платилъ въ Орде за мою отчину за Звенигородъ и за Галичь два выхода и съ распанами, а о томъ ми съ тобою розчестися; и чего ся не оточту, и мне то тобе подняти те выходы. А суженое, положеное, заемное, поручное, кабалное по исправе дати, а холопа, робу, долъжника, поручника, беглеца, татя, розбойника по исправе выдати. А обидному всему межи насъ судъ и исправа; а о чемъ ся судьи наши сопрутъ, ини собе третьего изберутъ въ нашей отчине въ Великомъ Княженьи, а исъ земли вонъ на третей ся не зовутъ. А что есмь занялъ у гостей и у суконьниковъ шесть сотъ рублевъ, да заплатилъ есмь въ твой долгъ въ Ординьской Резепъ-Хозе, да Абипу въ кабалы, и на кабалахъ есмь то серебро подписалъ: и тобе съ мене тотъ долгъ ту шесть сотъ рублевъ сняти, а съ теми гостьми ведатися тобе опрочь мене самому, а мне тобе техъ сказати, у кого есмь го серебро заимывалъ. А на семъ на всемъ, брате старейший Князь Великий ВАСИЛЕЙ ВАСИЛЬЕВИЧЬ, целовалъ еси ко мне крестъ къ своему брату молодшему Князю Юрью Дмитриевичю и къ моему сыну Князю Дмитрею меншому, и съ нашимъ братомъ молодшимъ Княземъ Костянтиномъ Дмитриевичемъ, и съ моими братаничи со Княземъ Иваномъ и со Княземъ Михайломъ Андреевичи, и со Княземъ Васильемъ Ярославичемъ, по любви въ правду, безо всякия хитрости. +

1. Т. е. Грамота, каковые давали Ордынские Цари Князьям Российским на владение каким-нибудь городом.

Вторая.

+ А на семъ на всемъ, брате молодшый Князь Юрьи Дмитриевичь, целуй ко мне крестъ къ своему брату старейшому къ Великому Князю ВАСИЛЬЮ ВАСИЛЬЕВИЧЮ и съ своимъ сыномъ съ Княземъ Дмитреемъ меншимъ, и къ нашему брату молодшему Князю Костянтину Дмитриевичю, и къ моему брату молодшому Князю Ивану Андреевичю и къ нашимъ братаничамъ Князю Михайлу Андреевичю и Князю Василью Ярославичю: имети ти мене Князя Великого собе братомъ старейшимъ, а брата нашего молодшого Князя Костянтина Дмитриевича имети ти собе братомъ молодшимъ, а Князя Ивана да Князя Михайла Андреевичевъ имети ти собе братаничи, а Князя Василья Ярославича имети ти собе братаничемъ жо. А добра ти намъ хотети везде во всемъ, где бы ни было; а что ти слышевъ о нашемъ добре или о лисе, то ти мне поведати въ правду безъ примыщлениа: а намъ также тобе добра хотети [112] везде во всемъ, где бы не было; а что намъ слышевъ о твоемъ добре или о лисе отъ кого бы ни было, и намъ тобе поведати въ правду безъ примышлениа. А кто будетъ мне Князю Великому другъ, то и тебе другъ; а кто будетъ мне недругъ, то и тебе недругъ. А не канчивати ти безъ насъ ни съ кемъ; а хотя будешъ съ кемъ въ целование, и тебе къ нему целование сложыти: а намъ также безъ твоего веданиа не канчивати ни съ кемъ. А держати ти имене Великого Князя себе въ старишиньстве; а мне тебе держати въ братстве и во чти, безъ обиды. А детей ти своихъ болшыхъ Князя Василья да Князя Дмитрея не приимати до своего живота, ни твоему сыну Князю Дмитрею меньшому не приимати ихъ; а мне ихъ такжо не приимати. А чемъ мене благословилъ Отець мой Князь Великы Василей Дмитриевичь своею вотчиною въ Москве, и Коломною съ волостьми, и всемъ Великымъ Княженьемъ, и Муромомъ съ волостьми, и Козельскомъ съ месты, и иными своими примыслы; также что была отчина брата нашего молодшого Княжа Петрова Дмитриевича Дмитровъ со всеми волостьми: того ти всего подо мною подъ Великымъ Княземъ блюсти, а не обидети, ни въступатися, ни твоему сыну Князю Дмитрею меншому. А что еси взялъ Царевъ ярлыкъ на Дмитровъ, и тотъ ти мне ярлыкъ дати. Также что вотчина брата нашего молодшого Княжа Костянтинова Дмитриевича, и братаничевъ твоихъ вотчина Княжа Иванова да Княжа Михайлова Андреевичевъ, и Княжа Васильева Ярославича дедина и вотчина: и тобе того подъ ними всего блюсти, а не обидети, ни въступатися, ни твоему сыну Князю Дмитрею меншому. А чемъ благословилъ Дедъ мой Князь Великы Дмитрей Ивановичь, а твой Отець, тебя Князя Юрья Дмитриевича въ Москве и въ станехъ Московьскыхъ, также и пути въ станехъ Московьскыхъ, какъ ся еси розделилъ съ моимъ Отцемъ съ Великымъ Княземъ, и Звенигородомъ съ волостьми, и Галичемъ съ волостьми, и селы въ Великомъ Княженье; или что собе примыслишь; или что ти ся есмь нынича отступилъ Сурожыка, да Лучиньского, да Шепковы, и Шачобала и Ликургы; или что ти ся есмь отступилъ изъ Великого Княженья Костромъскыхъ волостей, Андомы, Корегы, Борку, Березовца съ Залесьемъ, да Шиленгы: или что ти ся есмь отступилъ Бежыского верха и съ путми и съ селы и съ слободами, опрочь техъ местъ, что есмь подавалъ изъ Бежыского верху брату своему Князю Костянтину Дмитриевичю, да опрочь селъ Ивановыхъ Дмытриевича, что есмь у него взялъ въ своей вине; а иныхъ ми селъ въ Бежыскомъ версе не держати, а отступился есмь тебе и твоему сыну Князю Дмитрею меншому техъ всехъ местъ въ вотчину и въ вуделъ: а того намъ всего подъ тобою и подъ твоимъ сыномъ подо Княземъ подъ Дмитреемъ подъ меншимъ блюсти, а не обидети, ни въступатися. А Бежиской ти верхъ ведати по старине, по тому, какъ былъ за мною за Великымъ Княземъ: а у кого будутъ въ Бежискомъ версе грамоты жаловалные Отца моего Великого Князя, или мои у Бояръ, или на слободы, или у иного у кого; и въ техъ грамотахъ воленъ ты, брате мой Князь Юрьи Дмитриевичь, кого какъ хочешъ жаловати. А жити намъ въ Москве съ тобою и съ твоимъ сыномъ съ Княземъ Дмитреемъ меншимъ, какъ еси жилъ съ моимъ Отцемъ съ Великымъ Княземъ, а съ своимъ братомъ. А дань и ямъ давати ти съ своее вотчины изъ Звенигорода и съ волостьми и изъ Галича съ волостьми по давному, какъ еси давалъ моему Отцу Великому Князю; а изъ Бежиского верха и съ Костромъскыхъ волостей давати ти дань и ямъ по тому розводу, какъ переже того давали дань и ямъ въ мою казну. А Орда знати мне Князю Великому, а тобе Орды не знати никакже: а переменитъ Богъ Орду, не иму давати Татаромъ, и коли почну имати дань съ своее вотчины съ Великого Княженья себе, и [113] тобе тогды имати съ своего удела дань собе. А коли ми будетъ самому всести на конь противъ своего недруга, или ми брата своего послати Князя Костянтина Дмитриевича, и тебе послати сына своего съ своими людми; а коли пошлю братаничевъ твоихъ, или своихъ Воеводъ, и тобе послати съ ними своихъ Воеводъ, съ своми людми; а где ми будетъ надобе послати на свою службу твоего сына, и твоему сыну пойти безъ ослушаниа съ твоими людми. А кто иметъ служити Бояръ тобе Князю Юрью Дмитриевичю, а живучи въ моей вотчине въ Великомъ Княженье, а будетъ ми слати исъ техъ городовъ па свою службу, где те живутъ, и тобе слати съ теми людми своего Воеводу съ моими Воеводами. А кто иметъ твою вотчину обидети, и мне тобе боронити. А въ Литву ми у тобе помочи не имати, а ко мне ти не ездити. А кто иметъ жити нашихъ Бояръ и слугъ въ твоей вотчине, и тобе ихъ блюсти какъ и своихъ: а кто иметъ жити твоихъ Бояръ и слугъ въ нашей вотчине и въ Великомъ Княженье, и намъ ихъ блюсти какъ и своихъ. А Бояромъ и слугамъ межы насъ волнымъ воля; а городная осада, где кто живетъ, тому туто и седети, опрочь путныхъ Бояръ. А Князей ти моихъ служебныхъ съ отчинами собе въ службу не приимати; а которые Князи имутъ тебе служыти, и имъ въ вотчину въ свою не въступатися, вотчины лишены. А которые суды судилъ еси седя на Москве, а техъ ми судовъ твоихъ не посужати. А что ся учинило въ нашемъ розмирье, что поимана моя казна Великого Князя и моее матери Великые Княгини, или поклажее наши, или Бояръ моихъ иоклажее, или и нятцовъ моихъ поклажее, и что будетъ тобя того дошло, и тобе то отдати по сему целованию; а что и нятци мои на поруце подаваны, или на нихъ кабалы поиманы, и тобе съ нихъ велети порука свести, а кабалы имъ подавати. А что твои люди грабили Бояръ моихъ, или нятцовъ моихъ, или людей моихъ опрочь бою, ино имъ то отдати; а не отдадутъ, ино тому судъ и исправа, опрочь съестного. А что будутъ поклажеи твоихъ Бояръ, Семеновы Федоровича, или иныхъ Бояръ твоихъ мене дошло Великого Князя, и мне то отдати по сему целованию. А что будутъ мои Бояре и мои люди имали и грабили твоихъ Бояръ или слугъ въ первое наше розмирие, ино имъ то отдати; а не отдатутъ, а на то судъ и исправа. А что будетъ Князь Василей Ярославичь ималъ твою вотчину, или люди его грабили твою вотчину, а на то судъ и исправа. А что есмь платилъ въ Орде за твою вотчину за Звенигородъ и за Галичь два выхода и съ распанами, а о томъ намъ съ тобою розъчестися; и чего ся не оточтешъ, и тобе то мне подняти те выходы. А суженое, положеное, заемное, поручное, кабалное по исправе дати; а холопа, робу, долъжника, поручника, беглеца, татя, розбойника по исправе выдати. А обидному всему межы насъ судъ и исправа; а о чемъ ся судьи нашы сопрутъ, ине себе изберутъ третьего въ нашей вотчине въ Великомъ Княженье, а изъ земли вонъ на третей ся не зовутъ. А что, сказывашъ, занялъ еси у гостей и у суконниковъ шесть сотъ рублевъ, да заплатилъ еси, сказывашъ, мой долгъ Ординской Резепъ-Хозе, да Абипу въ кабалы, и на кабалахъ, сказывашъ, то серебро еси подписалъ: и мне съ тобе тотъ долгъ ту шесть сотъ рублевъ сняти, а съ теми гостьми ведатися мне опрочь тобе самому; а тебе мне техъ сказати, у кого есь то серебро заимовалъ. А на семъ на всемъ, брате молодший Князь Юрьи Дмитриевичь, целуй ко мне крестъ къ своему брату старейшому къ Великому Князю ВАСИЛЬЮ ВАСИЛЬЕВИЧЮ и съ своимъ сыномъ со Княземъ съ Дмитриемъ съ меньшимъ, и къ нашому брату молодшому Князю Костянтину Дмитриевичю, и къ моему брату молодшому Князю Ивану Андреевичю, [114] и къ нашимъ братаничемъ Князю Михайлу Андреевичю и ко Князю Василью Ярославичю, по любви въ правду, безъ всякыя хытрости.

К сим двум, вместе сшитым, Грамотам привешены пять восковых печатей, из коих на трех никакого изображения видеть не можно.

(Перепечатано из С. Г. Г. и Д., т. I, №№ 49-50, стр. 99-104.)