Договорная Грамота (в копии) Великого Князя ВАСИЛИЯ ДМИТРИЕВИЧА, Князя Володимера Андреевича, и Князей Юрья, Андрея и Петра Дмитриевичей с Великим Князем Рязанским Феодором Ольговичем: о бытии им в дружбе и согласии; о непосылке ему Рязанскому Князю в Орду своих Послов, без общего их согласия; о управлении всякому своими землями, также Мещерскими, Татарскими и Мордовскими; о принятии ему Князю Рязанскому в дружбу и любовь Новосильских и Торуских Князей, и Литовского Великого Князя Витовта, о возвращении обоюдных пленников; о судах, расправах, пошлинах и мытах.— Писана при Митрополите Киприяне 6911 (от Рождества Христова 1402) года, Ноября 25.

По благословлению отца нашего Кипреяна Митрополита Киевьского и всея Руси. На семъ, брате молодший Князь Великий Федоръ Олъговичь, целуй ко мне крестъ къ своему брату старишему Князю Великому ВАСИЛЬЮ ДМИТРЕЕВИЧЮ, и къ моей братьи молодшой ко Князю Володимеру Ондреевичю и Князю Юрью Дмитреевичю, и къ нашей братье меньшей ко Князю Андрею Дмитреевичю и ко Князю Петру Дмитреевичю. Имети ти меня собе братомъ старейшимъ, а братью мою молодшюю Князя Володимера Ондреевича и Князя Юрья Дмитреевича имети собе братьею, а меньшюю нашу братью Князя Андрея Дмитреевича и Князя Петра Дмитреевича имети ти собе братьею молодшею. А добра ти намъ хотети во всемъ, где бы ни было; что ти слышавъ о нашемъ добре или о лисе отъ крестьянина ли, или отъ поганина, то ти намъ поведати въ правду, безъ примышленья. А быти ти съ нами везде за одинъ по думе, какъ будеть годно, безъ хитрости; а где будешь хотя послалъ на наше лихо, а тамо ти отъслати, а не пристати ти къ Татаромъ ни которою хитростью. А будеть ти Киличея послати въ Орду, и что съ нимъ пошлешь, или хъ тобе Посолъ Татарьской придетъ, и тобе того почтити крестьяньского деля добра, а то тобе не въ измену; а коли имешь Киличея слати въ Орду, и то ти намъ явити. А что ти слышевъ отъ Орды, а то ти намъ поведати, а вести ти намъ отъсылати: а отдалится отъ насъ Орда, тобе съ нами учинити по думе. А вотчины ти нашое Московьской и Коломны, и всехъ волостей Московьскихъ и Коломеньскихъ, что потягло къ Москве и къ Коломне по реку по Оку, и всего моего Великого Княженья подъ нами не обидети, ни въступатися никоторою хитростью. А межи насъ розделъ земле по реку по Оку, отъ Коломны въ верхъ по Оце на Московьской стороне, Поченъ, Новый городокъ, Лужа, Верея, Боровескъ, иная места Рязаньская, которая ни будеть на той стороне, то къ Москве; а на низъ по реце по Оце по реку по Тьсну, отъ усть Тьсны въ верхъ по Тьсне, что на Московьской стороне, то къ Москве; а что на Резаньской стороне, то къ Резани. А что Володимерьское порубежье, а тому какъ было при нашихъ Прадедехъ, при Великомъ Князи при Иване Даниловиче, и при нашемъ Дяде при Великомъ Князе Иване Ивановиче, и при нашомъ Отце при Великомь Князе Дмитреи Ивановиче, и при твоемъ Прадеде при Великомъ Князе Иване Ярославиче, при твоемъ Дяде Иване Ивановиче, и при твоемъ Дяде при Великомъ Князе Иване Олександровиче, и при твоемъ Отце Олге Ивановиче. А что Рязаньское на Рязаньской [105] стороне за Окою, что доселе тягло къ Москве, Поченъ, Лопасна, уездъ Мъстиславль, Жадене городище, Дубокъ, Жадемль, Продничи съ месты, какъ ся отступили Князи Торусьские Федоръ Славичь ¹, та места къ Рязани. А въ Тулци и въ Берести не въступатися мне Князю Великому Василью Дмитреевичю, и моей братье Князю Володимеру Андреевичю и Князю Юрью Дмитреевичю, и меньшей нашей братье не въступатися; такоже мне Князю Великому Василью Дмитреевичю, и моей братье Князю Володимеру Ондреевичю и Князю Юрью Дмитреевичю, и меньшей нашей братье въ землю въ Рязаньскую и во Князи въ Рязаньские не въступатися. А со Княземъ съ Великымъ съ Иваномъ Володимеровичемъ взяти любовь по давнымъ грамотамъ. А что ся учинитъ межы васъ какова обида, и вамъ отъслати своихъ Бояръ, ини учинятъ исправу; а о чемъ ся сопрутъ, ино имъ третей Митрополитъ: а кого Митрополитъ обинитъ, ино обидное отдати; а не отдасть, ино мне Князю Великому Василью Дмитреевичю отправити, а то ми не въ измену, такоже на обе стороне. А со Княземъ съ Семеномъ съ Романовичемъ съ Новосильскимъ и съ, съ Торускыми Князи такоже взяти ти любовь по давнымъ грамотамъ; а жити ти съ ними безъ обиды, занеже те Князи со мною одинъ человекъ. А что ся учинитъ межи васъ по любви слово о земли или о воде, или о инномъ о чемъ, и вамъ отъслати Бояръ, ини соехавъся, да учинятъ исправу; а о чемъ сопрятся, ини едутъ на третей, кого себе изберутъ: а на кого помолвитъ третей, и виноватой отдасть; а не отдасть, и правой пошлетъ къ Великому Князю Василью Дмитреевичю, и Князь Великы пошлетъ къ виноватому въ первые, и въ другие и въ третьие; а не послушаетъ виноватый и Князя Великого Василья Дмитреевича, а не отъдасть, Князю Великому исправити, а целованья не сложити, а то ему не въ измену. А коли позоутся на третей, а кого себе изобравъ, а въ то время рать на того будеть, кого позоутъ, или куды будеть самъ пошолъ ратью, или у кого будеть Посолъ Татарьской въ земле, инъ затемъ не поедетъ на третей, въ томъ ему вины нетъ; а возмутъ на него грамоту въ то время, та грамота не въ грамоту: а позоутся изнова на третей, какъ ся утишитъ, да учинитъ исправу изнова; а мне Князю Великому Василью Дмитреевичю не правити того, что учинило въ то время замятное. А что Мещерьская места, что будеть купилъ Отець твой Князь Великы Олегъ Ивановичь, или вы, или ваши Бояря, въ та места тобе Князю Великому Федору Олговичю не въступатися, ни твоимъ Бояромъ; а земля къ Мещере по давному, а порубежье Мещерьскимъ землямъ, какъ было при Великомъ Князе Иване Ярославиче, и при Князи Олександре Уковиче. А что будеть Отець нашъ Князь Великы Дмитрей Ивановичь отоималъ Татарьская места и Мордовьска места, а ци переменитъ Богъ Татаръ, и та места мне Князю Великому Василью Дмитреевичю: а что будеть отнялъ Отець твой Князь Великы Олегъ Ивановичь Татарьския места и Мордовьския, а та тобе и есть. А что Отець твой Олегъ Ивановичь воевалъ Коломну въ наше нелюбье и иная места, что нашей отчине, взято что на нятцехъ, то отдати, а чего не взято, того не взяти; а съ поручьниковъ порука и целованье свести; а что грабежъ, тому погребъ. А что была рать Отца моего Великого Князя Дмитрея Ивановича въ твоей вотчине, при твоемъ Отци при Великомъ Князи Олги Ивановиче, и брата моего Княже Володимерова рать была, и Княже Романова Новосильского и Князей Торускихъ, намъ отпустити полонъ весь; а что взято на полоняницехъ, а то намъ отдати, а [106] порука и целование свести, а грабежу всему погребъ; или что будеть въ моей отчине того полону, коли была рать Отца моего Великого Князя Дмитрея Ивановича на Скорнищеве у города, и тотъ мой полонъ отпустити: а тобе такоже нашъ полонъ отпустити весь, и тотъ полонъ, что у Татарьские рати ушолъ; а будеть въ твоей отчине техъ людей, зъ Дону которые шли, и техъ ти всехъ отпустити. А судъ вопчи межи насъ по приставленью Отца моего Великого Князя Дмитрея Ивановича: а которыхъ делъ не искали при Отце моемъ при Великомъ Князи Дмитрее Ивановиче, пристава не было, за поруку не данъ, тому погребъ; а хто за порукою и за приставомъ былъ, тому судъ; а которые дела суженые, или поле ся не коньчяло, а то коньчяти. А намъ Княземъ Великимъ въ суды вопчие не въступатися: а судьямъ нашимъ сести судити, целовавъ крестъ въ правду, по целованью, какъ судили Отца твоего судьи Олга Ивановича со Отца моего судьями Князя Великого Дмитрея Ивановича. А что ся учинитъ межи насъ наше дело Князей Великыхъ, и намъ отъслати Бояръ, и зьехавъся учинятъ изправу; а чего не могутъ управити, о чемъ ся сопрятъ, ини едутъ на третей: а на кого помолвитъ третей, и виноватый передъ правымъ поклонитца, а взятое отдасть; а не отдастъ, ино у него отняти, а то не въ измену. А рати не замышляти; а третей межи насъ хто хочетъ, тотъ воименуетъ три Князи крестьяньские: а на комъ ищутъ, тотъ себе изъберетъ изъ трехъ одиного; а судьи наши вопчии о чемь сопрутся, ино имъ третей по томужъ. А суженого не посужати; а суженое, положеное, поручьное отдати по исправе; холопа, робу, должника, поручьника, татя, разбойника, душогубца, рубежьника выдати по исправе отъ века. А пошлина зъ беглеца съ семьи 2 алътына, а съ одинца алътынъ. А мыты ны держати старые пошлые, которые были при нашихъ Дедехъ и при нашихъ Дядехъ; а новыхъ намъ мытовъ не замышляти, ни пошлинъ; а мыта съ воза и въ городехъ и всехъ пошлинъ деньга, а съ пешеходца мыта нетъ; а иныхъ всехъ пошлинъ съ рубля алътынъ, а съ лодьи съ доски по алътыну, а съ струга съ набои два алътына, а безъ набои деньга; а Князей Великихъ лодьи пошлинъ нетъ. А вывода намъ и рубежа не замышляти; а Боярамь и слугамъ межи насъ вольнымъ воля. А что ся будеть учинилося межи насъ въ перемирье обида, и межи Князя Великого Ивана, и межи Князя Романа и межи Князей Торускихъ, то отправити и по первой грамоте по перемирной. А въсхочетъ съ тобою тесть мой Князь Великы Витофтъ любви, ино тобе съ нимъ взяти любовь, со мною по думе, какъ будеть годно. А на всемъ на семъ, брате молодший Князь Великы Федоръ Ольговичъ, целуи ко мне крестъ своему брату старешому Великому Князю ВАСИЛЬЮ ДМИТРЕЕВИЧЮ, и къ моей братьи молотшой ко Князю Володимеру Андреевичю и Князю Юрью Дмитреевичю, и меньшей нашей братье ко Князю Петру Дмитреевичю, по любви въ правъду, безъ хитрости. А писана на Москве, въ лето 6000 9-сотъ первое надесять, Индикта 11, месяца Ноября въ 25 день.

В заглавии Грамоты сей написано:

Грамота Князя Великого Василья Дмитреевича со Княземъ съ Федоромъ съ Олговичемъ Рязанскимъ новая

(Перепечатано из С. Г. Г. и Д., I, № 36, стр. 65-68).

Комментарии

1. В сих двух словах, по видимому, описка; должно быть: Федору Святославичю, как в предыдущей грамоте под № 32 упоминается.