XIV.

Две договорные 1 взаимные Грамоты Государя и Великого Князя ВАСИЛИЯ ИОАННОВИЧА, и сына его Великого Князя Ивана Васильевича, с братомъ его Князем Юрьем Ивановичем: о бытии им в вечном союзе и дружбе; о извещении Государя о всех разглашениях, касающихся до его прибытка или ущерба; о управлении каждому своими землями по учиненному отцом их разделу, о непокупке и незакладывании с обеих сторон во владении другого вотчин; о ведании Орды Государю, и о даче Князю Юрью для Ордынского выхода дани; о судах и расправах — за подписанием Московского Митрополита Даниила. — Писаны 24 Августа 1531 года.

Первая.

Милостию Божиею и пречистые его Матери, и по благословению отца нашего Данила Митрополита всеа Русии, и по нашей любви. На семъ на всемъ, брате молодшей Князь Юрьи Ивановичь, целуй ко мне крестъ къ своему Господину и брату старейшему къ Великому Князю ВАСИЛЬЮ ИВАНОВИЧУ всеа Руси, и къ моему сыну къ Ивану: имети ти меня Великого Князя собе Господиномъ и братомъ старейшимъ, а сыну моему Ивану и нашымъ детемъ хотети тобе добра во всемъ; а мне тобя имети собе братомъ молодшимъ. А меня ти Великого Князя, и моего сына Ивана, и нашихъ детей, и нашы Великие Княжства, Володимерское, Московское, и Новгородцкое, и Псковское, и Смоленское и Тферское, чемъ [143] благословилъ меня отецъ нашъ Князь Великий по тому, какъ мне въ своей духовной грамоте написалъ, и что мне Богъ далъ, держати честно и грозно безъ обиды. А хотети ти мне Великому Князю Василью, и моему сыну Ивану, и нашымъ детемъ добра везде во всемъ и до живота; и быти ти со мною съ Великимъ Княземъ, и съ моимъ сыномъ съ Иваномъ, и съ нашими детми везде за одинъ и до живота на всякого нашего недруга, и твоимъ детемъ. А кто будетъ мне Великому Князю Василью, и моему сыну Ивану, и нашымъ детемъ другъ, тотъ и тобе другъ; а кто будетъ мне Великому Князю, и моему сыну Ивану, и нашымъ детемъ недругъ, тотъ и тобе недругъ. А съ кемъ будешъ ты въ целованье, и тобе тому целованье сложити; а и впередъ тобе, опричь меня Великого Князя и моего сына Князя Ивана, въ целованье ш съ кемъ не быти. А что ти слышевъ о нашемъ добре, и о моемъ сыне о Иванове добре, и о нашыхъ детехъ добре или о лихе отъ Крестьянина, или отъ Литвина, или отъ иноверца, отъ кого ни буди: то ти мне и моему сыну Ивану, и нашымъ детемъ поведати въ правду, безъ примышлениа. А намъ тобя жаловати, и держати въ братстве и въ любви и во чти безъ обиды, и печаловатися тобою и твоею отчиною. А чемъ меня, брате, благословилъ отецъ нашъ Князь Великий Иванъ Васильевичь всеа Русии своею отчиною Москвою и всеми Великими Княжствы, Володимерскимъ, и Московскимъ, и Новымъ городомъ и всею Новгородцкою землею, и Псковомъ и всею Псковскою землею, и Великимъ Княжствомъ Тферскимъ; и что ми далъ Богъ отчину нашу Смоленескъ, и Рязанское Великое Княжство и иные места; или что собе впередъ примыслимъ: и тобе того подо мною подъ Великимъ Княземъ, и подъ моимъ сыномъ Иваномъ, и подъ нашыми детми блюсти и не обидити, ни вступатися ни во что, и не подъискивати тобе подо мною, и подъ моимъ сыномъ Иваномъ, и подъ нашыми детми техъ нашихъ Великихъ Княжствъ, чемъ меня благословилъ отецъ нашъ, и что мне далъ Богъ. А чемъ, брате, благословилъ тобя отецъ нашъ Князь Великий въ Москве, и что отецъ нашъ Князь Велики благословилъ тобя городы и волостми: и мне Великому Князю, и моему сыну Ивану, и нашымъ детемъ того всего по тому, какъ отецъ нашъ Князь Великий тобе въ своей духовной грамоте написалъ, подъ тобою и подъ твоими детми блюсти и не обидити, ни въступатися. А придетъ Божиа воля, возметъ Богъ тебя моего брата: и мне Великому Князю Василью, и моему сыну Ивану, и нашымъ детемъ въ Москве и всее твоей отчины по тому, какъ тобя благословилъ отецъ нашъ Князь Велики Иванъ, и въ своей духовной грамоте написалъ, подъ твоею Княгинею и подъ твоими детми блюсти и не обидити, ни въступатися, и печаловатися намъ твоею Княгинею и твоими детми. А придетъ Божья воля, возметъ Богъ меня Великого Князя, а благословлю сына своего Ивана своими Великими Княжствы: и тобе сына моего Ивана держати въ мое место своего Господина и брата старейшего; а Великихъ ти Княжствъ подъ нимъ, и подъ моею Великою Княгинею, и подъ нашыми детми блюсти и не обидити, ни въступатися, ни подъискивати никакими делы, никоторою хитростью; а быти ти съ моимъ сыномъ Иваномъ, и съ моею Великою Княгинею, и съ нашыми детми везде за одинъ. А селъ ти въ нашыхъ государьствехъ въ Великихъ Княжствехъ во всехъ не держати ни купити, ни закладней не держати; а мне Великому Князю, и моему сыну Ивану, и нашымъ детемъ въ твоей отчине селъ не держати ни купити, ни закладней не держати. А Орды ведати и знати мне Великому Князю и моему сыну Ивану, а тобе Ордъ не знати; а въ выходы ти въ Ордыньские, и въ Крымъ, и въ Азсторокань, и въ Казань, и въ Царевичевъ городокъ, и въ иные Цари и въ Царевичи, которые будутъ у меня въ земле и у моего сына [144] Ивана, и во все Татарские проторы давати ти мне и моему сыну Ивану со всее своей отчины по тому, какъ отецъ нашъ Князь Велики въ своей духовной грамоте написалъ: а коли мы въ выходы въ Ордыньские и въ Татарские проторы не дадимъ, и намъ и у тебя не взяти. А где язъ Князь Великий всяду на конь самъ или мой сынъ Иванъ, и тобе съ нами пойтти; а где тобя пошлемъ, и тобе пойтти безъ ослушанья; а где пошлемъ своихъ Воеводъ, и тобе съ нашими Воеводами послати своего Воеводу съ своими людми. А Князей ти, брате, служебныхъ съ вотчинами не приимати; а Бояромъ и детемъ Боярскимъ и слугамъ промежъ насъ волнымъ воля. А кто, брате, нашыхъ Бояръ и детей Боярскихъ и слугъ иметъ жити въ твоей отчине, и тобе ихъ блюсти какъ и своихъ; а кто, брате, твоихъ Бояръ и детей Боярскихъ и слугъ иметъ жити въ нашыхъ государствехъ въ Великихъ Княжствехъ, въ моемъ и въ сына моего въ Ивановыхъ, и намъ ихъ блюсти какъ и своихъ. А кто которому Князю служитъ, где бы ни жилъ, съ темъ ему ехати, которому служитъ. А даному, положенному, холопу, робе отъ века судъ; а татя и беглеца по исправе выдати; а заемному и поручному, и всему обидному межи насъ судъ безъ перевода; а судьямъ нашымъ третей волной. А что есми напередъ сего, по благословенью и по повеленью отца своего Великого Князя Ивана Васильевича всеа Русии, целовали межъ собя крестъ, и грамоты докончалные межи насъ съ тобою есть: и ты, брате молодшей Князь Юрьи Ивановичь, целуй ко мне крестъ къ своему брату старейшему къ Великому Князю ВАСИЛЬЮ ИВАНОВИЧУ всеа Русии, и къ моему сыну къ Ивану, по любви, въ правду безъ всякие хитрости, на томъ на всемъ, какъ въ сей нашей докончалной грамоте писано, правити тобе намъ по первому крестному целованью, и по сему крестному целованью и до своего живота. Писана на Москве, лета *** тритцать девятаго, Августа въ кд день (то есть 7039, от Рожд. Хр. 1531 года, Августа 24 дня).

На подлинной подписано:

Божиею милостию смиренный Данилъ Митрополитъ всеа Руссии.

Вторая.

Милостию Божиею и пречистые его Матери, и по благословению отца нашего Данила Митрополита всеа Русии, и по нашей любви. На семъ на всемъ, Господине и брате старейший Князь Великий ВАСИЛЕЙ ИВАНОВИЧЬ всеа Русии, целуй ко мне крестъ къ своему брату молодшему ко Князю Юрью Ивановичу 2: имети ти, Господине, меня собе братомъ молодшимъ; а мне, Господине, имети тобя своего Господина Великого Князя братомъ старейшимъ, а сыну твоему Князю Ивану и вашимъ детемъ хотети добра во всемъ. А тобя ми, Господине, Великого Князя, и твои Великие Княжства, Володимерское, и Московское, и Новгородцкое, и Псковское, Смоленское, Тферское, чемъ Господине благословилъ тобя отецъ нашъ Князь Великий по тому, какъ тобе въ своей духовной грамоте писалъ, и что тобе далъ Богъ, держати честно и грозно безъ обиды. А хотети ми тобе своему [145] Господину Великому Князю Василью, и твоему сыну Князю Ивану, и вашимъ детемъ добра везде во всемъ и до живота; и быти ми съ тобою съ Великимъ Княземъ, и съ твоимъ сыномъ со Княземъ съ Иваномъ, и съ вашими детми везде за одинъ и до живота на всякого вашего недруга, и моимъ детемъ. А кто, Господине, будетъ тобе Великому Князю Василью, и твоему сыну Князю Ивану, и вашимъ детемъ другъ, тотъ и мне другъ; а кто, Господине, будетъ тобе Великому Князю, и твоему сыну Князю Ивану, и вашимъ детемъ недругъ, тотъ и мне недругъ. А съ кемъ буду язъ Князь Юрьи въ целованье, и мне тому целованье сложити; а и впередъ мне, опричь тобя Великого Князя и твоего сына Князя Ивана, въ целованье ни съ кемъ не быти. А что ми слышевъ о вашемъ добре, и о сына твоего Княжъ Иванове добре, и о вашихъ детехъ добре или о лихе отъ Хрестьянина, или отъ Литвина, или отъ иноверца, отъ кого ни буди: то ми тебе и твоему сыну Князю Ивану, и вашимъ детемъ сказати въ правду, безъ примышленья. А вамъ, Господине, меня жаловати, и держати въ братъстве и въ любви и во чти безъ обиды, и печаловатися мною и моею отчиною. А чемъ тя, Господине, благословилъ отецъ нашъ Князь Великий Иванъ Васильевичь всеа Русии своею отчиною Москвою и всеми Великими Княжствы, Володимерскимъ, и Московскимъ, и Новымъ городомъ и всею Новгородскою землею, и Псковомъ и всею Псковскою землею, и Великимъ Княжствомъ Тферскимъ; и что тобе далъ Богъ твою отчину Смоленескъ, и Рязаньское Великое Княжство, и иные места; или что собе впередъ примыслите: и мне того подъ тобою подъ Великимъ Княземъ, и подъ твоимъ сыномъ подъ Княземъ Иваномъ, и подъ вашими детми блюсти и не обидити, и не въступатися ни во что, и не подъискивати того подъ тобою, и подъ твоимъ сыномъ подо Княземъ Иваномъ, и подъ вашыми детми техъ вашихъ Великихъ Княжствъ. А чемъ, Господине, благословилъ меня отецъ нашъ Князь Великий въ Москве; и что, Господине, отецъ нашъ Князь Великий благословилъ меня городы и волостьми: и тобе, Господине, Великому Князю, и твоему сыну Князю Ивану, и вашимъ детемъ того всего по тому, какъ отецъ нашъ Князь Великий мне въ своей духовной грамоте написалъ, подо мною и подъ моими детми блюсти и не обидити, ни вступатися. А придетъ Божиа воля, возметъ Богъ тобя моего Господина Великого Князя, а благословишъ сына своего Князя Ивана своими Великими Княжствы: и мне, Господине, держати сына твоего Князя Ивана въ твое место своего Господина и брата старейшего; а Великихъ ми, Господине, Княжствъ подъ нимъ, и подъ твоею Великою Княгинею, и подъ вашими детми блюсти и не обидити, ни въступатися, ни подъискивати никакими делы, никоторою хитростью; а быти ми, Господине, съ твоимъ сыномъ со Княземъ съ Иваномъ, и съ твоею Великою Княгинею, и съ вашими детми везде за одинъ. А придетъ Божья воля, возметъ Богъ меня: и тобе моему Господину Великому Князю Василью, и твоему сыну Князю Ивану, и вашимъ детемъ въ Москве и всее моее отчины по тому, какъ меня благословилъ отецъ нашъ Князь Великий Иванъ, и въ своей духовной грамоте написалъ, подъ моею Княгинею и подъ моими детми блюсти и не обидити, ни вступатися, и печаловатися вамъ моею Княгинею и моими детми. А селъ ми въ вашихъ государствехъ въ Великихъ Княжствахъ во всехъ не держати ни купити, ни закладней не держати; а тобе, Господине, Великому Князю, и сыну твоему Князю Ивану, и вашимъ детемъ въ моей отчине селъ не держати ни купити, ни закладней не держати. А Орды, Господине, ведати и знати тебе Великому Князю и сыну твоему Князю Ивану, а мне Ордъ не знати; а въ выходы ми, Господине, въ Ординьские, и въ Крымъ, и въ Азсторокань, и въ Казань, и въ [146] Царевичевъ городокъ, и въ иные Цари и въ Царевичи, которые будутъ у тебя въ земле и у твоего сына у Князя у Ивана, и во все Татарские проторы давати ми тобе и твоему сыну Князю Ивану со всее моее отчины по тому, какъ отецъ нашъ Князь Великий въ своей духовной грамоте написалъ: а коли, Господине, въ выходы въ Ордыньские и въ Татарские проторы не дадите, и вамъ и у меня не взяти. А где, Господине, ты Князь Великий всядешъ на конь самъ или твой сынъ Князь Иванъ, и мне, Господине, съ вами пойти; а где, Господине, меня пошлете, и мне пойтти безъ ослушанья; а где, Господине, пошлете своихъ Воеводъ, и мне съ вашими Воеводами послати своего Воеводу съ своими людми. А Князей ми, Господине, служебныхъ съ вотчинами не приимити; а Бояромъ и детемъ Боярскимъ и слугамъ промежъ насъ волнымъ воля. А кто, Господине, вашихъ Бояръ и детей Боярскихъ и слугъ иметъ жити въ моей отчине; и мне ихъ блюсти какъ и своихъ: а кто, Господине, моихъ Бояръ и детей Боярскихъ и слугъ иметъ жити въ вашихъ государствехъ въ Великихъ Княжствехъ, въ твоихъ и въ сына твоего во Княжъ Иванове; и вамъ, Господине, ихъ блюсти какъ и своихъ. А кто которому Князю служитъ, где бы ни жилъ, съ темъ ему ехати, которому служитъ. А даному, положеному, холопу, робе отъ века судъ, а татя и беглеца по исправе выдати; а заемному и поручному, и всему обидному межи насъ судъ безъ перевода; а судьямъ нашымъ третей волной. А что есмя, Господине, напередъ сего, по благословению и по повеленью отца своего Великого Князя Ивана Васильевича всеа Русии, целовали межи собя крестъ, и грамоты докончалные межи насъ съ тобою есть: и ты, Господине и брате старейший Князь Велики ВАСИЛЕЙ ИВАНОВИЧЬ всеа Русии, целуй ко мне крестъ къ своему брату молодшему ко Князю къ Юрью къ Ивановичу по любви, въ правду безъ всякие хитрости, на томъ на всемъ, какъ въ сей нашей докончалной грамоте писано, правити тобе намъ по первому крестному целованью, и по сему крестному целованью и до своего живота. Писана на Москве, лета *** тритцать девятаго, Августа въ кд день (то есть 7039, отъ Рожд. Хр. 1531 года, Августа 24).

На подлинной подписано:

Божиею милостию смиренный Данилъ Митрополитъ всеа Русии.

К сим двум, вместе сшитым, Грамотам привешены на шелковых малиновых снурках две восковые печати.

(Перепечатано из С. Г. Г. и Д., т. I, №№ 160-161, стр. 443-448).


Комментарии

1. Великий Князь ВАСИЛИЙ ИОАННОВИЧ, обрадованный рождением (25 Августа 1530 года) первородного своего сына Великого Князя Иоанна Васильевича, рассудил учинить с братом своим Князем Юрьем Ивановичем сию договорную грамоту, дабы сей во все его владения Российского государства никак не вступался; но жил бы с ним Великим Князем и с сыном его единодушно.

2. Князь Георгий Иоаннович (Дмитровский), вскоре после кончины брата своего Великого Князя ВАСИЛИЯ ИОАННОВИЧА, и по вступлении на Российский престол сына его Вел. Кн. Иоанна Василиевича, быв подозреваем в домогательстве престола, 7 Декабря 1533 года взят под стражу, и томясь под строгим присмотром в той самой темнице, где некогда содержан был нещастный племянник его Кн. Дмитрий Иоаннович, 3 Августа 1536 года скончался, и погребен, в Москов. Архангельском Соборе.