VIII.

Духовная Грамота Великого Князя ВАСИЛИЯ ДИМИТРИЕВИЧА (первая): о учинении наследникомъ Великого Княжения сына своего Ивана Васильевича, и о разделе движимого и недвижимого имения ему Князю Ивану и своей Княгине Софие Витовтовне.— Писана около 1406 года.

Во имя Отца и Сына и святого (Духа 1). Се язъ грешный худый рабъ Божий ВАСИЛЕИ пишу грамоту душевную въ своемъ смысле, добръ, здоровъ; даю рядъ своему сыну Князю Ивану и своей Княгине. Благословляю сына своего Князя Ивана своею отчиною третью Москвы, своимъ жеребьемъ, и съ пошлинами и съ путьми и зъ бортью, и съ Василцевымъ стомъ, и Добрятинскимъ селомъ и зъ бортью, и численыхъ людей треть, чемъ мя въ Москве благословилъ Отець мой, какъ писано въ душевной грамоте Отца моего Великого Князя, да Коломною съ всеми волостми и съ селы и съ бортью и съ путьми и со всеми пошлинами; а волости Коломенские: Похряне, Городна, Кочема, Каневъ, Маковець, Левичинъ, Песочна, деревни Скулневъ, Брашева съ Иванемъ и съ Гвоздною и съ селцемъ, Устьмерска, Комаревъ, да Радокинъ съ берегомъ, Раменъка, Мещерка, Крутинки, Мезыня, Гжеля. А Княгине своей даю исъ Коломенскихъ волостей Брашеву, да [24] Устьмерску; а отведетъ Богъ матерь мою, ино по матери моие животе Песочна моей же Княгине: а исъ селъ ей матери моие Малино со всеми деревнями; а исъ Коломеньскихъ же изъ моихъ селъ моей Княгине Оглоблино и со всеми деревнями и съ Ольхомъ, да Колычевское и съ Змеевскимъ, да Ивановское Василъевича въ Левичине и съ Чюхистова землею и со всеми прикупы, да Гжеля со всеми деревнями, што къ ней потягло. А што села Княгининские пошлые, то ее и есть; а ведаетъ те села пошлые Княгининские дотоле Княгини моя, доколе дастъ Богъ женится сынъ мой, а потомъ ина дастъ те села сына моего Княгине, своей сносе, которые были издавна за Княгинями. А изъ Московскихъ селъ сыну моему Князю Ивану: село Островское и съ Орининскимъ и съ Григорьевскимъ Фаустова, и съ Костянтиновскимъ, и съ Жирошкинымъ и со всеми деревнями, и съ Малаховскимъ, да лугъ великий противу города за рекою. А Княгине моей изъ Московскихъ селъ: село мое Починокъ со всеми деревнями, да селце Хвостовское у города и съ луги, што къ нему потягло. А што мой примыслъ, а то даю Княгине же своей: Ухтюшку куплю свою, да Фоминские села Дьяконовы, да Федоровские села Свибловские на Устюзе и въ Отводномъ, и на Сяме, и въ Ростове, и въ Бежицскомъ версе Максимовское съ деревнями, и въ Переяславле Весьское и съ Родивоновскимъ и со всеми деревнями, и на Москве село Буйловское и съ Олексеевьскою деревнею, да село Тимофеевское на Яузе, и въ Юрьеве Чагино, да Савельевское, да Иворово, да Карабузино; а въ Новегороде Непейцино, и все села Федоровские Свибловьские со всемъ, што къ нимъ потягло; да што есмъ выменилъ у своие матери села въ Юрьеве, Фроловское и съ Ольхомъ, да Петровское, да Богородицское, да Олексинское, и што къ нимъ потягло, а въ Новегороде въ Нижнемъ Алачинские села, да Мангачь. А исъ техъ волостей и съ селъ, што есмъ писалъ Княгине своей, хто ся иметъ жаловати на Волостелей, или на тиуновъ, или на посельскихъ, или на доводщиковъ, то судитъ Княгини моя, или кому прикажетъ; а сыну моему Князю въ те суды не вступатися. А переменитъ Богъ Татаръ, и Княгини моя емлетъ съ техъ волостей и съ селъ дань себе; а сыну моему Князю Ивану такъже въ ту дань не вступатися. А коли придетъ дань или ямъ, и Княгини моя дастъ съ техъ волостей и съ селъ по розочту, што ся иметъ: а те волости и села Княгине моей до ее живота; а по ее животе, ипо те волости и села сыну моему Князю Ивану. А што ее примыслъ, въ томъ волна, по душе ли дастъ, сыну ли дастъ; да къ тому ей даю вопришнину два села въ Юриеве Богородицское да Олексинское, въ техъ дву селехъ такъже волна, по душе ли дастъ, сыну ли дастъ. А дастъ Богъ сыну моему Князю Ивану Княженье Великое держати, ипо Княгине моей исъ Переяславля Кинела; а отведетъ Богъ матерь мою, ино Юлъка Княгине же моей, да Доброе село, да въ Володимере Ондреевское село: а исъ Костромы ей волость Нерехта; а отведетъ Богъ матерь мою, ино Иледамъ да Комела Княгине моеи, а Нерехта сыну моему Князю Ивану. А дастъ Богъ сыну моему Князю Ивану держати Новъгородъ Нижний да Муромъ, ино Княгине моей изъ Новагорода половина пошлинъ Новгородскихъ, да Курмышь со всеми селы и зъ бортью и съ путми и съ пошлинами, и со всемъ, што къ нему потягло, и съ Алгашемъ; а изъ Мурома ей селце. А сына своего Князя Ивана благословляю иконою Парамшина дела съ чепью, чепь съ каменьемъ, што мя благословилъ Отець мой Князь Великий; да даю ему поясъ золотъ съ каменьемъ, што мя благословилъ Отець же мой Князь Великий, да другий поясъ золотъ съ каменьемъ же, што есмъ самъ сковалъ, да шапка золота, да бармы; а исъ судовъ ему коропка сердоничная, да ковшь золотъ съ лаломъ да съ женчюги. А опроче [25] того, што есть казны моие и всего моего живота, то все ведаетъ моя Княгини; половину дастъ по душе по моей, а друга половина ей. А брата своего и сына благословляю Князя Костянтина, даю ему въ уделъ Тошню да Устюжну, по душевной грамоте Отца нашего Великого Князя. А хто моихъ казначеевъ, или тиуновъ, или дьяки прибытокъ мой ведали, или посельскии, или ключники, или хто холоповъ моихъ купленыхъ, или што есмъ у Федора у Свибла отоималъ, техъ всехъ пущаю на слободу и съ женами и съ детми, не надобны моему сыну и моей Княгине; а Княгине моей те люди, што есмъ ей подавалъ при своемъ животе, и грамоты полные техъ людей у нее. А ты, сынъ мой Князь Иванъ, держи матерь свою во чти и въ матерстве, какъ Богъ реклъ; а мое благословенье на тобе. А о своемъ сыне и о своей Княгине покладаю на Бозе, и на своемъ Дяде на Князи на Володимере Ондреевиче, и на своей братьи на Князи на Ондрее Дмитреевиче и на Князи на Петре Дмитреевиче, по докончанью, какъ ся имутъ печаловатися. А у сее грамоты были мои Бояре: Князь Юрьи Ивановичь, Костянтинъ Дмитреевичь, Дмитрей Афинеевичь, Иванъ Дмитреевичь, Володимеръ ......, Иванъ Федоровичь, Федоръ Федоровичь. А сю грамоту писалъ...........

К сей Грамоте привешена на красном шелковом снурке серебреная позолоченная печать.

(Перепечатано из С. Г. Г. и Д., т. I, № 39, стр. 72-74).


Комментарии

1. Сие слово в подлиннике пропущено.