XV.

Духовная Грамота (в копии) Князя Юрия Василиевича 1: о разделе, по смерти его, движимого и недвижимого имения матери своей Княгине Марье, братьям: Великому Князю ИОАННУ ВАСИЛИЕВИЧУ, Князю Андрею, Князю Борису и Князю Андрею меньшому, и сестре Княгине Рязанской Анне; о даче некоторых волостей по разным монастырям и церквам, и о уплате долгов некоторым Боярам и монастырям.— Писана 1472 года.

+ Во имя Отца и Сына и святаго Духа. Се язъ рабъ Божий Юрий пишу грамоту душевную своимъ целымъ умомъ, кому ми что дати, или у кого ми что взяти. Дати ми Володимеру Григориевичю триста рублевъ и восмьдесятъ рублевъ да полтину, да ............... положилъ есмь у Володимера въ томъ серебре заклада чепь золоту четыре гривенки да полчетверта золотника, да поясъ золотъ на червчате тясме полпяты гривенки да шесть золотникъ, да поясъ золотъ на сине тясме пять гривенокъ, да поясъ золотъ невеликъ на червчате тясме две [70] гривенки да шесть золотникъ, да чару золоту две гривенки безъ полудевята золотника, да ковшъ золотъ гривенка да полтора золотника, да ковшъ серебренъ съ венцемъ восмь гривенокъ да полпята золотника, да ковшъ серебрянъ четыре гривенки безъ полупята золотника, да кубокъ серебрянъ на чешую битъ пять гривенокъ да четыре золотники, да кубокъ серебрянъ на косые грани битъ пять гривенокъ безъ семи золотникъ. Дати ми Григорию Василиеву Глебову семьдесятъ рублевъ; дати ми Григорию Бобыне тритцать рублевъ; дати ми Ондрею Шихову тритцать рублевъ, а мой у него поставъ Ипской 2 светлозеленъ; дати ми Ивану Ивановичю пятдесятъ рублевъ; дати ми Ивану Ощере пятдесятъ рублевъ; дати ми Олешку Старкову пятдесятъ рублевъ; дати ми въ Можайску Якушу Брагину, да Семенку Пролубихину, да Федку Шишке дватцать рублевъ; дати ми Пескишеву пять рублевъ; дати ми въ Дмитрове Роспопе Данилу десять рублевъ; дати ми Селянину пять рублевъ; дати ми Васюку Старцеву пять рублевъ; дати ми Демиду Шудебову пять рублевъ; дати ми Ивану Шудебову пять рублевъ; дати ми Миките Костянтинову пять рублевъ; дати ми на Высокое въ Серпоховъ Архимандриту Игнатью монастырского серебра двенатцать рублевъ; дати ми Григорию Морозову десять рублевъ. Да взялъ есмь у Петра у Игнатиева конь серъ, цена ему десять рублевъ; и мати бы моя Великаа Княгини пожаловала дала за тотъ конь къ Троице въ Сергиевъ монастырь по Петре по Игнатиеве десять рублевъ. А что мя благословила моя Осподарыни баба моа Великаа Княгини София своимъ селцемъ Семчинскимъ и зъ дворы зъ городскими, да волостию Гжелею, да селы Московскими, да Коломенскими, да Юриевскими, да Костромскими, да Вологодскими: и язъ даю изъ техъ изъ своихъ селъ своей Осподарыни матери своей Великой Княгине Гжелю со всеми деревнями, да село Шипилово со всемъ, чемъ мя благословилъ Осподарь мой отець мой Князь Великий. А Господину своему Великому Князю даю свое селце Семчинское и зъ дворы зъ городскими и съ Лужниковымъ, да селце Семеновъское, да Воробиевское зъ деревнями; а на Костроме даю своемужъ Господину Великому Князю Качалово зъ деревнями. А сыну его Князю Ивану даю село свое Мячково, да другое Мячково, что за рекою, да Лодыгинское, да Тяжино и зъ деревнями. А брату своему Князю Андрею даю село свое Турабиевское, да селце Пиногорь, да селце Скомовское, да селце Беляницинское со всемъ съ темъ, какъ было при моей бабе Великой Княгине; а возметъ Богъ брата моего Князя Андреа, и мати моа Великаа Княгини те села дастъ по моей душе и по брата моего душе. А брату моему Князю Борису даю свое село Шадрино, да на Коломне свое село Кривцово съ пожнями и съ водами, со всемъ, какъ было при моей бабе Великой Княгине. А что мои села на Вологде Говоровъские и Янгосарские и Масленицские,. а те даю своему брату Князю Андрею меншему. А сестре своей Великой Княгине Рязанской Анне даю манисто, чемъ мя благословила баба моа Великаа Княгини София. А къ живоначалнои Троице въ Сергиевъ монастырь даю свое село Кучку, да деревенку съ хлебомъ, что въ земле, опрочь стоячего хлеба, да и зъ животиною; а что въ томъ селе и въ деревенке серебра на людехъ, ино того серебра половина великой Троице, а другаа половина темъ христианомъ, на коихъ то серебро. А къ Спасу въ Суздаль даю свое село Федорино городище съ хлебомъ, что въ земле, опрочь стоячего хлеба, да и съ животиною; а что въ томъ селе серебра на людехъ, ино того серебра половина великому Спасу, а другаа половина [71] темъ христианомъ, на коихъ то серебро. А на Симоново къ Пречистой даю свое село Велино и зъ деревнями и съ хлебомъ, что въ земле, опрочь стоячего хлеба, да и зъ животиною; а что въ томъ селе серебра на людехъ, ино того серебра половина Пречистой, а другаа половина темъ христианомъ, на коихъ то серебро. А къ Спасу въ Ондрониково даю свое село Березници съ хлебомъ, что въ земле, опрочь стоячего хлеба, да и зъ животиною; а что въ томъ селе серебра на людехъ, ино того серебра половина великому Спасу, а другаа половина темъ христианомъ, на коихъ то серебро. А къ Архангелу на площадь даю свое село по своемъ деде и по отци, и по своей души, и по всемъ по своемъ роду, Марчюково зъ деревнями и съ луги и съ пожнями и съ озеры, со всемъ съ темъ, какъ было при моей бабе Великой Княгине, и съ хлебомъ, что въ земле, опрочь стоячего хлеба, и зъ животиною; а что въ томъ селе и въ деревняхъ серебра на людехъ, ино того серебра половина великому Архангелу, а другаа половина темъ христианомъ, на коихъ то серебро. А къ великому Възнесению даю по своей бабе Великой Княгине Софии и по себе свое село Петровъское со всемъ съ темъ, какъ было при моеи бабе Великой Княгине, и съ хлебомъ, что въ земли, опрочь стоячего хлеба, и зъ животиною; а что серебра въ томъ селе на людехъ, ино того серебра половина великому Възнесению, а другаа половина темъ христианомъ, на коихъ то серебро. А къ Богоявлению на Голутвино даю свое село Рожекъ, да Маливку съ луги и съ лесы, и съ перевесии и съ ловищи, со всемъ съ темъ, какъ было при моей бабе Великой Княгине; а что серебра въ техъ селцехъ на людехъ, ино того серебра половина Богоявлению, а другаа половина темъ христианомъ, на коихъ то серебро. А къ Пречистой на Высокое въ Серпоховъ даю свое селце Ивановское Новосилцева свою куплю. А въ Боровескъ къ Пречистой въ Пафнутиевъ монастырь даю свое село Бронниче и зъ деревнями и съ луги и съ пожнями, и съ озеры, и что съ нему потягло, со всемъ, какъ было при моей бабе Великой Княгине, и съ хлебомъ, что въ земли, опрочь стоячего хлеба, и зъ животиною; а что въ томъ селе и въ деревняхъ серебра на людехъ, ино того серебро половина Пречистой, а другаа половина темъ христианомъ, на коихъ то серебро. А къ Николе на Песношъ даю село свое Юриково въ Юриеве и съ хлебомъ, что въ земли, опрочь стоячего хлеба, и зъ животиною; а что въ томъ селе серебра на людехъ, ино того серебра половина великому Николе, а другаа половина темъ христианомъ, на коихъ то серебро. А къ Борису Глебу даю свое село Новое, что есмь купилъ у Троици въ Сергееве монастыри, и съ хлебомъ, что въ земли; а что въ томъ селе и въ деревняхъ серебра на людехъ, ино того серебра половина Борису Глебу, а другая половина темъ христианомъ, на коихъ то серебро. А къ Пречистой на пустынку даю свое село Вындово, да Пятинскую деревню; а на Стромылю даю свое село Олексино и съ хлебомъ, что въ земли, опрочь стоячего хлеба, и зъ животиною; а что въ томъ селе серебра на людехъ, ино того серебра половина Пречистой, а другая половина темъ христианомъ, на коихъ то серебро. А къ Благовещению на Кержачь даю свое село Радково и съ хлебомъ, что въ земли, опрочь стоячего хлеба, и зъ животиною; а что въ томъ селе серебра на людехъ, ино того серебра половина къ Благовещению, а другаа половина темъ христианомъ, на коихъ то серебро. А къ Пречистой въ Кириловъ даю свое село Ушаково и съ серебромъ и съ хлебомъ, что въ земле, опрочь стоячего хлеба, со всемъ съ темъ, какъ было за моею бабою Великою Княгинею; а что въ томъ селе и въ деревняхъ серебра на людехъ, ино того серебра половина Пречистой, а другаа половина серебра темъ [72] христианомъ, на коихъ то серебро. А что мои села въ моей отчине въ Дмитрове, и въ Можайску, и въ Медыни, и въ Серпохове и на Хотуни, или кои есмь села далъ своей Осподарыни матери своей Великой Княгине, или что есмь далъ своему Господину Великому Князю, да его сыну Князю Ивану, или которые есмь села подавалъ братии своей молодшей: и мати моя Великаа Княгини, и мой Господинъ Князь Великий возметъ исъ техъ селъ изо всехъ половину серебра, да роздастъ по моеи души, а другую половину серебра отдастъ темъ христианомъ, на коихъ то серебро. А которые села подавалъ есмь по монастыремъ церквемъ Божиимъ съ хлебомъ и зъ животиною и съ серебромъ: и моя Осподарыни мати Великаа Княгини, и Господинъ мой Князь Великий въ те села и въ хлебъ и въ животину и въ серебро не въступаются ни чемъ. А что мой дворъ внутри города, да Ивановское место Старкова, что противу моего двора, чемъ мя благословила баба моя Великаа Княгини: и тотъ дворъ и Ивановъское место моей Осподарыни матери моей Великой Княгине со всемъ съ темъ, какъ было при моей бабе Великой Княгине; а Моравиевской садъ материжъ моей Великой Княгине. А что мое место Ваганково, да и дворъ на Ваганкове месте, чемъ мя благословила баба моа Великаа Княгини: а то место и дворъ Господину моему Князю Великому, опрочь того места, что есмь тогожъ места Ваганкова далъ великому Николе въ домъ на Песношъ. А что есмь селце выменилъ у Олексея у Обобурова Григориевское Колычева противу Семчинского селца, а то Господину же моему Великому Князю; а променилъ есмь ему на Хотуни селце Кравцовское, да пустошъ Видениевскую. А что мои люди ключники и посельские, и все приказные люди, которые мой приказъ ведали, и те все на слободу; въ те люди моа Осподарыни мати Великаа Княгини и Господинъ мой Князь Великий не въступаются ни чемъ. А что моего хлеба заемного въ людехъ, а тотъ хлебъ темъ и есть, за кемъ что будетъ того хлеба; а что мои хлебъ стоячей въ техъ селехъ, кои есмь села подавалъ матери своей Великой Княгине, и Господину своему Великому Князю, и сыну его Князю Ивану, и братии своеи молодшеи, или кои есмь села подавалъ по монастыремъ: и тотъ хлебъ весь стоячей мати моа Великаа Княгини велитъ продати, да роздати по мне. Также и кои села въ моей отчине въ Дмитрове, и въ Можайску, и въ Медыни, и въ Серпохове и на Хотуни, и что въ техъ селехъ хлеба стоячего: и мати моа также тотъ хлебъ велитъ продати, да велитъ роздати по мнежъ. А что моихъ портъ, или которая иная рухлядь: а то ведаетъ Богъ, да моа мати Великаа Княгини, себе ли возметъ, по мне ли роздастъ. А что мой долгъ остался на мне: и моя Осподарыни мати Великаа Княгини и Господинъ мои Князь Великий возмутъ дань съ моее вотчины, да моимъ должникомъ заплатятъ мой долгъ; а закладъ мой у Володимера выкупятъ, и мати моа Великаа Княгини тотъ закладъ велитъ роздати по мнежъ. А приказываю свою душу своеи Осподарыни матери своей Великой Княгине, да Господину своему Великому Князю, душу свою помянути и долгъ свой заплатити. А хто сию мою духовную рушитъ, судится со мною предъ Богомъ. А у грамоты седели: господинъ мой живоначалные Троици Сергиева монастыря отець мой духовной Игуменъ Спиридоней, да Бояринъ мой Иванъ Микитичь, да Бояринъ мой Василей Феодоровичь Велиаминовъ, да Иванъ Василиевичь Ощера А грамоту духовную писалъ диакъ мой Васюкъ Долматовъ, а запечаталъ есмь своею печатию.

На обороте Грамоты написано:

Списокъ зъ духовные грамоты Князя Юрья Васильевичя Дмитровского.

(Перепечатано изъ С. Г. Г. и Д., т. I, № 96, стр. 230-233).


Комментарии

1. Сей Князь, вторый брат Великого Князя ИОАННА ВАСИЛИЕВИЧА, возвращаясь из похода против Ахмета Хана Татарского большой Орды, тяжко занемог, и 1472 Сентября 12 числа, на 32 году от рождения своего, скончался в Москве бездетен, и въ Архангельском Соборе погребен.

2. Чаятельно Испанской или Иперской.