78

1474 г. января 13. — Договорная грамота Великого Новгорода и Пскова с епископом юрьевским о перемирии на 30 лет

Список XVI в.; озаглавлен: Перемирие межи Псковомъ, Великимъ Новагородомъ а межи Дерптомъ. ЦГАДА, Литовская Метрика, Книга записей, VI, лл. 264—266 (печатается по этому списку; другой список там же, IV, лл. 477—479).

Сборник Муханова, № 19 (по второму списку); АЗР, № 69 (по первому списку).

Основание датировки: дата заключения мира на вече в Пскове (ПСРЛ, т. IV, с. 249).

Милостью божьею, стояниемъ светыя СофЪи (В списке: святого СофЪя.) промудрости божьи, и стояньемъ святыя жывоначальныя троица, и здоровьемъ господина нашого и государа нашого великого князя Ивана Васильевича, цара всея Руси, и здоровъемъ господина нашого и государа нашого великого князя Ивана Ивановича, цара всея Руси. Што государы нашы и государы благоверныи великии князи рускии и цары прислали воеводу своего, князя Даниля Дмитровича, со многими князми и бояры, въ домъ светыя жывоначалная Троица, у свою отъчыну, у Великии Псковъ, боронити своее отъчыны Великого Новагорода и Пскова, обидъ своихъ поискати на немъцохъ на юрьевцохъ, своихъ данеи, и старыхъ данеи, своихъ залоговъ, и новгородскихъ старынъ, и псковъскихъ обидъ и старынъ. И прыслаша чесныи бискупъ юръевъскии, и посадники юръевъские, и вси юръевцы пословъ своихъ, Ивана Мексе, земского боярына, и другого Ивана Боброва, юръевъского ратьмана, и добиша чоломъ господину князю Данилю Дмитреевичу, воеводе благоверныхъ великихъ князеи рускихъ цареи, и наместнику благоверъныхъ великихъ князеи русъкихъ цареи, князю псковъскому Ярославу Васильевичу, и воеводе Великого Новагорода у Великомъ Пскове, посаднику новгородскому ФомЪ Анъдреевичу, и послу Великого Новагорода Онъкифу Васильевичу, и всему Великому Новугороду, и посадникомъ псковъскимъ, и всему Великому Пскову, и прыконъчаша миръ на тридцать (В списке: на трыдвадцать) летъ таковъ. Што светыи божьи церкви у ЮрьевЪ у Рускомъ конъцы и рускии конецъ, а то честному бискупу юръевъскому, и посадникомъ юръевъскимъ, и всемъ юръевъцомъ держати чисто, по старыне и по крестному целованью, и ни обидити. А дани благоверныхъ великихъ князеи рускихъ цареи, старыи залоги, а то чесному бискупу юръевъскому за осмъ летъ отъдати в тотъ часъ, по крестъному целованью; а сего веремени, благовернымъ великимъ княземъ рускимъ царемъ на чесномъ бискупе юръевъскомъ дань своя имати, по старынЪ, по тому крестному целованью. А новгородскому послу и гостю по Юръевъскои земли путь чыстъ на Юръевъ, со всякимъ [134] товаромъ, водою и горою, и на Рыгу, и къ Колывани, и на Ругодево, по старыне и по крестъному целованью. А промежы Пъскова и Юръевцовъ земли и воде по старыи рубежъ. А Великое озеро ловити псковичомъ, ловити к своему берегу, а за озеро Великое псковичомъ ловити не ездити на юръевъскую сторону; а по грехомъ станеться изнеможенье, ветромъ занесетъ псковъского ловца на юръевъскую сторону, ино въ томъ пени нетъ. Такъжо и немъцомъ, озеро Великое немцомъ ловити къ своему берегу, а за озеро Великое ловити не езъдити на пъсковъскую сторону; а по грехомъ станеть изнеможенье, занесеть ветръ немецкого ловъца на псковъскую сторону, ино в томъ пени нетъ. А хто учнеть наступатисе на чужую землю или на воду съ которое стороны, ино тому человЪку жывота не дати на обе стороне. А псковъскому послу и гостю по Юръевьскои земли путь чистъ, горою и водою, на Юръевъ, и на Рыгу, и къ Колывани, и на Ругодиво, и на Матерую реку, добровольно ездити и на вси юръевъские городы и во всю Юръевьскую землю, со всякимъ товаромъ, по старыне, и всякии товаръ псковичомъ на розницу продати добровольно или вместе. А на Юръеве псковичомъ добровольно всякимъ товаромъ торъговати зъ рыжаны, и съ колыванъчаны, и съ ругодевцы, со всякимъ гостемъ, по старынЪ и по крестному целованью. А колоду на обе стороне отложыхомъ, и гостинца отъ того не имати. А толмачомъ юръевъскимъ гостинъца не имати отъ толъкованья у псковъского посла. А которыи гость, с которое стороны, зъ дороги звернеть, не зная пути заблудить, ино в томъ диву нетъ на обе стороне, и товара в него про то не грабити, и путь ему вказати по суседнему делу, на обе стороне. А дрова псковичомъ имати подъ Юръевымъ, по старыне и по крестному целованью, добровольно. Такъже и юръевъскому послу и гостю по псковъскои земли ко Пъскову путь чыстъ, горою и водою, или к Новугороду едуть, по Псковскои земли и по Новгородскои, и назадъ отъехати, горою и водою путь чыстъ, по крестному целованью, по старыне. И в НовегородЪ юръевъскому гостю всякимъ товаромъ торъговати добровольно, по старыне, и во ПъсковЪ юръевъскому гостю всякимъ товаромъ торъговати добровольно, по старынЪ. А корчмою, пивомъ немецкому гостю уво ПсковЪ не торъговати, а опрочъ корчмы и пива всякии товаръ ко Пъскову добровольно возити, по старыне, на обе стороне. А где на порубежъи с которое стороны вчыниться татьба, или порубъ, или грабежъ, или голову убъють, или иная какова пеня вчынитъца, ино о томъ послы послати и справы просити трежды, на обе стороне, по крестному целованью; дадуть чому исправу, ино бог даи такъ, а не дадутъ исправы с которое стороны, ино за свое взяти на рубежы; а миру о томъ не рушыти, а посла и гостя въ томъ не порубати никоторою нужою. А за татя и за розбоиника не стояти на обе стороне, по крестному целованью. А кому с кимъ супълетка естъ о торговли, или о суде, или о поруце, или о иномъ о какомъ деле с которое стороны, тому исправа давати на обе [135] стороне, по крестному целованью. А новгородцомъ и псковичомъ судити немъчына, какъ и своего, право, безъ хитрости, своею пошлиною, по крестъному целованью; а немъцомъ судити новгородца и пъсковитина своею пошлиною, какъ и своего немъчина, право, безъ хитрости, по крестъному целованью. А юръевцомъ новгородцовъ во пъсковьскомъ деле не порубати; такъже и псковичъ юръевъцомъ не порубати въ новгородскомъ деле никоторою нужою. А воскъ юръевцомъ колупати не помногу, по старыне, по крестному целованью. А вещое псковичомъ у юръевъцовъ, у гостеи, имати отъ меха по четьверътъце, а отъ сколового веса по денъзе; а юръевцомъ въ псковъскихъ купцовъ весчое имати отъ меха по любецкому, а отъ скалового веса имати по чотыры любецкихъ, по крестному целованью. А по князи мистре чесному бискупу юръевъскому, и посадникомъ юръевъскимъ, и всимъ юръевцомъ не пособляти противъ псковичъ, и людеи своихъ не поддавати мистру на помочь, и беглецовъ изъ мистровы державы у юръевъскую державу не прыимати, по крестъному целованью. А сеи миръ новгородцомъ и псковичомъ и юръевъцомъ на трыдцать летъ издеръжати, по крестъному целованью, безъ хитрости, на обе стороне, и грамотъ миръныхъ не отсылати въ та лета. А коли тые лета отыидуть, ино намъ жыти в старомъ миру, а воины не възнати с обу сторонъ. А коли будеть нелюбовъ Великому Новугороду и Пскову до юръевъского бискупа, и до юръевъскихъ посадниковъ, и до всихъ юръевцовъ будеть нелюбье или мне чесному бискупу юръевъскому, и посадникомъ юръевъскимъ, и всимъ юръевцомъ будеть нелюбъе до Великого Новагорода и до Пскова, ино намъ миръ отъказати, а потомъ, алижъ месяцъ проидетъ, чотыры недели, на обе стороны, тожъ воеватися. А в томъ месяцы послу ездити на обе стороны, безо всякое пакости, а посла не порубати ни въ великомъ деле, ни в маломъ, по крестному целованью.

А на сеи грамоте и на семъ миру руку далъ и печать свою прыложылъ я князь Данилей Дмитреевичъ, воевода благоверъныхъ великихъ князеи рускихъ цареи, и наместникъ благоверныхъ великихъ князеи рускихъ цареи, я князь псковъскии Ярославъ Васильевичъ руку далъ и печать свою прыложылъ. А воевода Великого Новагорода, посадникъ новгородскии Фома Анъдреевичъ, а посолъ Великого Новагорода Онъкипа Васильевичъ крестъ поцеловали за Великии Новгородъ и за всю Новгородскую державу и печать Великого Новагорода прыложыти. А въво Пъскове крестъ поцеловали посадники псковъскии степенныи Алексеи Васильевичъ а Микита Ларывоновичъ, и всемъ людемъ добрымъ крестъ целовати за въвесь Великии Псковъ, и за вси псковьскии городы, и за всю Псковъскую державу и печать прыложыти светое жывоначалъное Троица. А чесному бискупу юръевъскому рука дати и печать прыложити за вси юръевъскии городы; а посадникомъ юръевъскимъ крестъ целовати и всимъ добрымъ людемъ [136] за всю Юръевъскую державу и печать прыложыти юръевъская. Послы юръевъскии во Пскове крестъ целовали Иванъ земскии боярынъ Мексеи и другии Иванъ Бобровъ, юръевъскии ратьманъ. А кто не въчнетъ крестного целованья правити, ино на того богъ и крестъное целованье, и моръ, и голодъ, и огонь, и мечъ. А конъчанъ миръ сеи во Пъскове, в лето 6982. А въ Юръеве крестъ целовали послы псковъскии, Анъдреи Семеновичъ Лублевъ да Кура Олекъсеевичъ Шемятовъ.