[Благосл]овлен[и]е (Утраченные и не поддающиеся прочтению места восстановлены по аналогии с № 2.) от владыкы, поклонъ от по[са]д[ни]ка [Ми]хаила, и от [т]ысяцьскаго Кондрата, и [от] вс[е]хъ соцьскыхъ, и [от] всехъ старЪишихъ, (Здесь и далее буква «ять» передается как заглавный «твердый знак» — Ingvar.) и от всего Новагорода къ князю Ярославу. На семь ти, княже, хрьстъ цЪлов[а]ти, на цЪмъ то цЪловал[ъ хрьстъ] отець твои Ярославъ. Держати ти Новъ[гор]одъ по пошлинЪ, како держалъ отець твои. Грамотъ ти, княже, не посужати. А мужа ти без вины волости не лишати. А бес посадника ти, княже, волостии не роздавати, ни грамотъ даяти. А волостии ти, княже, новгородьскыхъ своими мужи не держати, нъ держати мужи новгородьскыми; а даръ от техъ волост[ии] имати. А се волости новгородьскые: Волокъ съ всеми волостьми, а держати ти сво[и тивунъ на половинЪ, а но[в]городець на половинЪ въ всеи волости Волоцьскои; а в Торожку, княже, держати тивунъ на своей чясти, а новгородець на своей чясти; а Городець, княже, далъ Дмитрии съ новгородци Иванку, а того ти, княже, не отъяти. А се волости новгородьскые: Бежиче, Городець, М[еле]чя, Шипино, Егна, Вологда, Заволоцье, Колоперемь, Тре, Перемь, Югра, Печера; а ты волости дьржати мужи новгородьскыми; а даръ от нихъ имати. А свiньи ти бити за 60 верстъ от города. (А свiньи. . . города вписано другими чернилами и другой рукой, на оставленном нарочно чистом месте.) А [10] закладниковъ ти, княже, не приимати, [ни] твоей княгыни, ни тво[и]мъ бояромъ; н[и с]е[лъ ти] держати по Новгородьскои волости, ни твоей княгыни, ни бояромъ твоимъ, ни твоимъ дворяномъ; ни свободъ ставити по Новгородьскои волости. А и Суждальскои ти земле Новагорода не рядити, ни волостии ти не роздавати. А на Озвадо ти, княже, ездити лЪтЪ звери гонитъ. А в Русу не ехати, ехати ти в Русу на третиюю зиму. А в Ладогу, княже, ехати на третиее [л]Ъто. А осетрьнику твоему ездити в Ладогу по отца твоего грамоте. А куда пошл[о] судии твоему ездити по волости, ехат[и и]мъ межень по ПетровЪ [д]ни. А что твои брать отъялъ былъ пожне у Новагорода, а того ти, княже, отступитися: что новгородцевъ, то новгородьцемъ; а что пошло князю, а то княже. А выводъ ти, княже, въ всеи волости Новогородьскои не надобе. А дворяномъ твоимъ, княже, ходити по пошлинЪ, како пошло исперва. А от новгородьця и от новоторжьця у мыта имати от воза по 2 векши и от хмелна короба. А за Волок ти своего мужа не слатi, слати новгородца. (А за Волок. . . новгородца вписано; см. с. 9, прим. 2.) На томъ ти на всемь хрьстъ цЪловати по любъви, безъ всякого извета, въ правьду, при нашихъ послехъ.