№ 99.

1504, сентябрь — октябрь. Грамоты к великому князю Ивану Васильевичу от нагайского мурзы Ямгурчея и его жены, о том, что нагайские мурзы желают быть с великим князем в союзе, другу другом, а недругу недругом. Ответ великого князя, что и он также желает быть с нагайскими мурзами в союзе, но только с тем условием, чтобы нагайские и астраханские люди отстали от своих грабежей; перечень поминков, которые посылает великий князь в Нагаи (Д. Нагайские, № 1, стр. 33 об.—35 об.).

I. Лета 7013, сентября, приехал к великому князю из Ногай от Емгурчея князя человек его Семен с грамотою.

А се грамота. Дяде нашему, великому князю Ивану, от Ямгурчея от князя поклон. После того слово то стоит. С тобою есмя которые речи говаривали, и яз на братстве стою, об одном своем дитяте и в дружбе и в братстве будучи, сыном мы ся учинили, а отцем ты ся учинил; то одно дитя мне еси дал, и яз твоему другу друг, а недругу недруг стою, да от тех мест и в дружбе и в братстве стою. А еще с твоим послом своего человека послал был есми, и он рознемогся и опять к нам назад пришол. Да мое дитя Каракуш и боле меня твое дитя стоит, и ты тому одному человеку пожаловал, свое дитя за него дал, да еще и нынеча то свое дитя как побережешь, ты ведаешь. Твое здоровье полное отведати, с тяжелым поклоном, с лехким поминком, Семеном зовут, слугу своего послал есми.

А се такова грамота жены Емгурчеевы. От Махмут царевы дочери от царевны, великому князю Ивану поклон. После того слово то стоит. Ямгурчеева княжая жона стою, а с тобою в братстве стоим, и твое здоровье полно отведати с тяжелым поклоном, а с лехким поминком, Кудайкулом зовут, слугу своего послала есми.

II. И окт. 3, князь велики Емгурчеева человека Семена отпустил. А что ему словом говорил Дмитрий Володимеров от великого князя, и то князь велики и в грамоте в своей к Емгурчею писал. А словом сам князь велики на отпуске говорил Семену. Семен! Что еси к нам привез грамоту от Емгурчея князя, да и словом еси нам которые речи говорил, и мы тебе те речи велели говорити, да и свои речи к Емгурчею мырзе наказали казначею своему Дмитрию; и что тебе казначей наш говорил, и то наши слова. Да и грамоту свою с тобою к Емгурчею [537] посылаем, и те речи Емгурчею скажи, и грамоту нашу до него довези. Да молви от нас Емгурчею мырзе, что как на чем нам молвил, на том бы и стоял, другу бы моему друг был, а недругу недруг. Да приказал с ним князь великий к Емгурчею поклон.

А се такову грамоту послал князь велики с Семеном к Емгурчею князю.

Великого князя Иваново слово Емгурчею князю. Слово наше то: присылал еси к нам своего князя Уедаша з грамотами и с речми; а в грамотах своих к нам писал еси и словом нам от тебя твой князь Уедаш говорил о дружбе, да и о твоем дитяти, и люди бы наши ваших людей не воевали; а ты хочешь другу нашему друг быти, а недругу недруг, а вашим людем наших людей не воевати. И мы твоего слова не оставили, учинили есмя так, как ты князь писал в своих грамотах и с своим князем приказывал. И своего посла Якова к тебе есмя посылали; и твое было слово нашему послу Якову таково, что есми другу нашему друг, а недругу недруг и до живота, и вашим людем наших людей нигде не воевати. Ино мы оное весны послали к Менли-Гирею царю посла своего Ивана Микитина сына Беклемишова, и ваши люди на поле его пограбили. А сее осени ваши ж люди, Шихим мырзины Мусина сына приходили на нашу украину да нашу украину воевали, а те мырзы у тебя в твоей воле. Да ваши ж люди Азтороканцы сего лета наших людей рыболовей на Волзе побили и пограбили: ино пригоже ли ся так делает от ваших людей нашим людем через твои грамоты и через твое слово? А ныне прислал еси к нам своего человека Семена з грамотою, а в грамоте в своей к нам писал еси, да и словом нам от тебя твой человек Семен говорил, что как на чем еси нам молвил, на том и стоишь, другу еси нашему друг, а недругу недруг. И ты бы, по своему слову и по своим грамотам, и ныне другу нашему друг был, а недругу недруг, а тех бы еси своих людей ко(и) наших людей воевали и на наши украины приходили, да и Азтороканцев, кои наших людей рыболовей на Волзе побили и пограбили, велел показнити, а грабеж бы еси наших людей велел отдати, и головы взятые наших людей велел без окупа отпустити, и вперед бы еси своим людем да и Азтороканцем заказал накрепко, чтобы нашим людем и нашим украинам лиха никакова не чинили, чтобы другу и недругу было что слышети. А не уймутся ваши люди Азтороканци, а учнут наших людей где приходити, ино нам, ож дасть Бог, своих людей от Азтороканцов боронити, как нам Бог пособит. А к тебе ныне послали есмя с твоим человеком с Семеном поминков: кречат да сукно ипское рудожолто, да сукно ипское червчято, да сукно лунское багрово, да постав сукна новогонской, да зуб рыбей. А [538] жене твоей, царевне Довлет салтане, сукно ипское червчато. Да сын мой князь велики Василей послал тебе кречат, да сукно червчато ипское, да зуб рыбей. А своего человека не послали есмя ныне к тебе за зимою. А хотим того, чтобы меж нас прочнаа дружба вперед была и люди бы наши меж нас ходили здравие нашего видети. Писан на Москве. А лето в ней писано татарское девять сот десятое мышье лето. А печать у грамоты великого князя болшаа.

А царицыну Карагушину человеку Кудайкулу на отпуске говорил: Кудайкул! Молви от нас Карагуш царице, чтобы наше добро к себе памятовала и дела бы нашего межь меня и отца своего Емгурчеа берегла, что как на чем нам отец ее молвил, на том бы и стоял, другу бы нашему друг был, а недругу недруг. Да приказал к ней поклон.

А князь великий Василей приказал с ним Карагуш царице поклон же.

А поехал Семен с Москвы в неделю, окт. 6. А послан проводити его Сенка толмачь. А отпуск Семенов у Дмитриа у Володимерова о проводу и о корму.