№ 85.

1502, сентабря 12. Грамоты к великому князю Ивану Васильевичу из Крыма. Царь извещает, что еще до получения грамот великого князя он, воротившись в Крым, отправил двоих своих сыновей с ордою воевать Литовскую землю, и вообще все будет сделано согласно желаниям великого киязя. Заболотский подтверждает все, что пишет царь и сообщает вести: Стефан, воевода волошский, желает точно знать, какое положение его дочери в Москве, и отнял ли великий князь у своего внука великое [430] княжение. Голохвастова с посольством ограбили на Дону (Д. Кр. № 2. стр. 948-954).

I. Лета 7011, сентября 12, сю грамоту привезли от Менли-Гирея царя великого князя татарове Тевекель да Резан; а от Олексея Заболотского другую грамоту.

А се царева грамота. Менли-Гиреево слово. Великому князю Ивану, брату моему, поклон. К нашему слузе к Арвану прикошевав, Кадышом зоут, слугу своего с грамотою прислал еси. А в той печатной грамоте писал еси: с Суунчою, слугою своим, боярина Федора послал еси; а в ярлыке писал еси к нам ты, брат мой, недруга Шиг-Ахметя царя розгонял, великого царя деда нашего Орду взял еси; а нынеча даст Бог как к собе поздорову пойдем, нам и тебе недруг Литовская вотчина, рать свою отпущу, молвил еси, на Олександра на короля. А ты брат мой князь великий Иван на Литовскую вотчину рать свою посылай, молвя, писал еси. А те радостные вести слышев, велми обрадовался есми, молвя, с челобитием писав грамоту послал еси. А яз сына своего князя Дмитриа в головах с великою ратью на Литовскую вотчину на Смоленеск послал есми. И нынеча у царя, у брата у моего, прошенье то стоит: волной человек, сам в головах на конь бы всел, или всех царевичев в головах ратью на конь бы велел всести; а от Лутцка бы шли на Киев; а наша бы рать с твоею ратью условились; а мой бы боярин, Алексей Заболотцкой с ратью вместе на конь бы всел, молвя, писал еси. И яз царь, брат твой, как воротився, с коня ссел, по твоему брата моего приказу, рать свою борзо на конь посадив, два свои сына послал есми, Фетя-Гирея да Бурнаш-Гирея в головах, и всех уланов и князей, мурзы, вместе прикошевав, девяносто тысячь рати послал есми и уланов двадесять осмый день на конь всели и поехали. И от тебя, от брата нашего, приехали наши слуги, Арвана да Кадыш, августа в осмый день; и твою грамоту как есми увидел, с своим ярлыком слугу своего за ними гонцом послал есми. А в ярлыке в своем писал есми: от великого князя, от брата от моего, мой слуга Арвана приехал, а с печатною грамотою с казаки, Кадышом зоут татарине, приехал. А просити послал, слово то стоит: Иван князь, брат наш, своего сына князя Дмитриа в головах с великою ратью на Смоленеск послал, и нынеча вы рать свою на Литовскую вотчину посылайте, молвя, просити послал; и нынеча яз вас того деля на конь посадив послал есми, с одное стороны на Киев пойдите, а с другие стороны на Луческ пойдите, да и Вилны и Троки дойдите, а с великого князя Ивановым брата моего с сыном, князем с Дмитрием, условитеся. А будет далече, условитись нелзя, и [431] вы Литовской вотчине крепко недружбу доведите и воюйте и разорите, а моля Бога, сколко дела делайте недругу недружбу крепко доведите, молвя, крепко приказал есми. А слуга твой Алексей Заболотцкой нам бил челом: князь велики мне велел тебе говорити: со царевыми детми вместе после рати поедем, молвя, и на конь был сел, хотел ехати. И яз молвил: коли наша рать пойдет, и князь велики нам велел борзо весть послати, молвя, приказал; и ты езд свой отстави, великому князю борзо весть пошлем, а ты у меня стой. Молвя, его есми не пустил. И нынеча борзо и спешно к тебе о рати о своей весть Тевекеля да Рязана и сей ярлык писав послал есми; после того Арвану да Кадыша отпущаю. А Шахзаде ты послал грамоту, и Кадыш ту повезл; а как оттолева поедем, и яз борзо отпущу. А к Стефану воеводе о твоих людех и о твоих мастерех человека хотел послати; от тебя от брата моего Кадыш приехал и грамоты твои привезл. И яз своему человеку дав те грамоты, к Стефану воеводе послал. И кои к Стефану воеводе грамоты посланы, Стефану воеводе даст. А к двема послом твоим, Дмитрию да Митрофану, кои посланы грамоты, и как ты, молвя, приказал, по твоему слову, от Стефана воеводы тайно дай, молвя, наказав послал есми. И тот твой слуга послом даст тайно, и как доспеете, борзо ко мне тех взяв приведите, молвя, добрых многих людей кошевав, послал есми, так ведай. Толко бы нам от Стефановы воеводины вотчины вышли, оттолева к нам добры здоровы дошли бы, дорога чиста, так ведай. Да еще Суунчуя кошевав, отпущу, молвил еси, болшого своего посла: ино недруг далече, дорога чиста, наперед зимы отпусти. И коли болшого своего посла с Суунчюем учнешь отпускати, десять казаков наперед перед ними отпусти; и мы против людей отпустив, возмем их. И о том деле сесь ярлык взяв, повезли Тевекель да Рязан, и с ними из уст слово молвя приказал есми, так ведай. Молвя, с синим нишаном, жиковинною печатью ярлык послал есми, лета девять сот осмаго, августа месеца в третьенадцатой день, в середу. Писана на месте на Сарае. Да к боярину к твоему к Олексею Заболотцкому грамоты послал еси: что яз тебе молвя из уст словом приказал есми, и ты то слово до царя доведи, молвил еси. И тот нам сколко молвя посланых речей довел, и бил челом, и нам велми на сердце радость пришла, так ведай.

II. А се грамота Олексеева Заболотцкого.

Государю великому князю Ивану Васильевичю всеа Руси холоп твой Олексеец Заболотцкой челом биет. Что еси, государь, прислал своих казаков Кадыша Сабашова с товарищи с своими грамотами и с поминки ко царю, — и Кадыш, государь, дал Бог твоим государевым [432] здоровьем приехал ко царю поздорову со всем; да и царев человек Арвана с ними приехал же, да и грамоту, государь, твою и поминок царю передо мною отдал. А в грамоте твоей, государь, пишет, чтобы царь сам всел на конь со всеми своими детми да со всеми с своими людми, а пошол бы ратью на Литовского землю, или бы детей своих послал всех. И яз, государь, царю говорил, чтобы царь сам всел на конь со всеми своими детми и со всеми своими людми, или бы детей своих послал болших. И царь, государь, сам не пошол, ни детей своих болших не послал, а послал, государь, царь детей своих дву сынов, царевичя Бетти-Кириа да Бурнаша со всеми своими людми на Литовского землю еще до твоей, государь, присылки, до Кадышова приезда за три дни; а рать их, государь, пошда со Госпожина заговейна; а сбиралась, государь, рать на Белой Воде да на Синей. А царевичи, государь, сами пошли перед Госпожиным днем во вторник, а Кадыш, государь, перед Госпожиным днем в пятницу. И царь, государь, назавтрее послал в субботу с твоей грамоты список за своими детми, а велел им, государь, поитти на те места по своей грамоте и по твоему приказу; а приказал им, государь, а велел им с твоим сыном со князем с Дмитрием. А яз, государь, просился у царя за царевичи, и царь меня, государь, за царевичи не отпустил. А что еси, государь, прислал с Кадышем свои грамоты в Волохи к Стефану и к своим послом, а велел еси, государь, о том царю говорити, чтобы царь послал в Волохи с теми твоими грамотами и по твоих послов по Дмитриа с товарищи; а яз, государь, царю еще тогды говорил, как царь приехал к себе в Орду, чтобы царь послал в Волохи по твоих послов по Дмитриа с товарищи; и царь, государь, тогды не послал за тем, а ждал, государь, вести от тебя с Москвы. А нынеча, государь, царь послал в Волохи с твоими грамотами к Стефану к воеводе, да и к послом, да и по твоих послов; а приказал, государь, те грамоты дати твоим послом тайно, чтобы тех грамот не ведал никто. Сказывал, государь, царь: писал ко мне Стефан воевода: отпиши ко мне, в животе ли будут моя дочь и внук? И яз, государь, царю отвечал: дал Бог, государь, добры здоровы.

А как, государь, Арвана приехал с Москвы, и царь, государь, опять сказывал: писал ко мне Стефан воевода: к тебе от великого князя послы ездят и гонци гоняют часто; отведывай ми, отнял лы будет у моего внука князь велики великое княженье Московское и дал ли сыну своему, великому князю Василью, великое княжение Московское? Да и Орвана ми сказывал, что дей князь великий у своего внука великое княженье Московское отнял, да дал сыну своему великому князю Василью. И яз, государь, царю молвил: будет, государь, тебе Орвана омякнувся [433] сказывал про великого князя сына; дал, государь, князь велики сыну своему, великому князю Василью, великое княженье на Великом Новегороде. А что еси, государь, велел к себе отписати про Ши-Ахметя царя и про волошского и про турского и про кафинского и про литовского, — и про Ши-Ахметя, государь, кажут, что ныне на усть Камы, а людей с ним кажут тысячи четыре, а улусов с ним кажут есть же, да немного. А про волошского, государь, кажут у себя в Волосех, а не валчит ни с кем. А про турецкого, государь, кажут, что у себя во Царегороде, а валчит нынеча с мисюрским, да с угорским; да с шихом. А кафинской, государь, салтан присылал ко царю к Менли-Гирею посла своего просити людей, а валчит с Черкасы. И царь ему, государь, людей не дал, а отвечал его послу: послал есми детей своих со всеми своими людми на своего недруга на Литовского. А про Литовского, государь, царь сказывал, что сам в Кракове, а рать свою послал к Смоленску, а самому, сказывает царь, нейти; а лятцкой силы сказывает собрал немного, а стоит во Лвове. А Олешу, государь, Голохвастова да и Алакоза и всех гостей на Дону на переволоке ограбили; да Олеша, государь, и Алакоз, да с ними пять человек утекли в Азов, да и в Кафу, государь, Олеша пришел один; а Алакоз, государь, остался в Азове, а дожидается того, чтобы ему у кого своей рухдяди что познати. А толмача, государь, у подьячего и Копыла и иных многих людей поимали и с собою повели; а иные, государь, кажут поутекли назад, а иных побили; а грабили их, государь, кажут Азтороканцы. А сказывал, государь, тот татарин крымской, которой был с Иваном с Мамоновым сее весны на Москве, да и в руках, государь, кажет он у них был, да утекл. А Кадыша, государь, царь отпустил в Кафу по Оспожине дни на третей день в середу. А казаков, государь, твоих царь отпустил, Тювекеля да Рязана с товарищи, на четвертой, день по Оспожине дни, в четверг, на святых мученик Флора и Лавра.