1500, октабря 7. Список речей и наказ, посланный от великого князя к Ивану Григорьевичу Мамонову, взамен посланного 29 сентября и измененный значительно против прежнего, вследствие полученных перед этим известий из Крыма: великий князь благодарит царя за деятельную помощь против Александра литовского; объясняет, что послать свои войска теперь к Киеву не может по причине зимы, а отправит их весною к Смоленску; а сам бы царь, или его дети, шел к Киеву и по той стороне Днепра (Д, Крымск., № 2, стр. 772-781).

I. И князь велики послал в Колугу к Ивану к Мамонову Михайла Плещеева (с) списки, а с ним послал подьячего Третиака Неупокоева, а велел ему те списки Ивану Мамонову дати. А которые списки привез к Ивану Алексеец подьячей, и те списки велел князь велики Михайлу у Ивана у Мамонова взяти да к себе привезти. Да с Михайлом послал дву татаринов до Колуги, Кадыша Абашова да Мокшу, поговорити с [336] Игнатом с Созоновым о дорозе, куде будет Ивану ехати лутче от Олексина к Перекопи, да и своя им дорога сказати, куде ныне ехали от Перекопи к Москве. Да Ивана Мамонова отпустя в Олексин, ехати Михайлу из Колуги к Москве. А поехал Михайло в Колугу с списки октября 7 день.

А се таковы списки посланы в Колугу с Михайлом с Плещеевым к Ивану к Мамонову.

Память Ивану Григорьеву сыну Мамонову. Как дасть Бог приехав в Перекопь, и ему, не ходя к Менли-Гирею ко царю, да видетися со князем с Иваном с Кубенским. И как у себя велит царь Ивану быти, и Ивану идти ко царю со князем с Иваном. Да первое Ивану от великого князя царю челом ударити, а молвити: брат твой князь велики Иван велел тобе челом ударити. Князь велики велел твое здоровие видети. Да поминок подати. А опосле поминка речь говорити.

Князь велики велел тобе говорити: что еси прислал ко мне с моим боярином со князем с Семеном своего посла Ази-Халеля, а с ним в грамотах в своих писал еси к нам, да и словом ми от тебя говорил твой посол Ази Халель и мой боярин князь Семен, чтобы тебе с великим князем Александром с литовским мир взяти; а какова с ним миру хочешь, и ты к нам про то в своих грамотах писал; а посол твой Ази Халель и список нам тому дал, какова с ним миру хочешь.— Князь велики велел тобе говорити: и мы к великому князю Александру посылали с тем, какова ты с ним миру хочешь. И князь велики Александр к нам отказал что такова с тобою миру не хочет, какова миру ты с ним хочешь. И мы к тебе с твоими послы с Казимером да с Ази Халелем приказали, да и с своим послом со князем с Иваном есмя к тебе наказали: коли с тобою князь велики Александр миру не хочет, а с нашими недруги с Ахматовыми детми съсылается, наводит их на нас; а которые послы Ахматовых детей и ныне у нево, и он тех послов в Орду отпущает, да и своих послов к ним посылает, а в своем слове не стоит, что к нам приказывал, с тобою миру хотел. И коли с тобою с нашим братом миру не хочет, ино и яз с ним миру не хочю тебя деля, а хочю с тобою с своим братом по своей правде на нево быти заодин. И пришлет к тебе князь велики Александр о миру, и ты бы с ним миру не имал; а кого к тебе пришлет, и ты бы того изымал. А как дасть Бог нам с Литовским свое дело делати, и мы с тобою с своим братом сошлемся. Так есмя к тебе приказали с твоими послы, да и своим послом.— Князь велики велел тобе говорити: и как есмя к тебе твоих послов да и своего посла отпустили, и князь велики [337] Александр присылал к нам своих послов, маршалка своего Станислава Петряшковича Кишку, и писаря своего Федка Толстого с тем же, что с тобою такова миру не хочет, какова ты с ним миру хочешь. И мы к нему и отказали с его послы: коли с тобою с нашим братом миру не хочет, ино и нам с ним миру нет; а что межи нас с ним правда была, и мы ему ту свою правду сложили и ратны есмя с ним учинилися, да уповаа на Бога и воевод есмя своих с своею ратью на его землю послали; и воеводам нашим с его воеводами и бой был. И милосердием Божиим, воеводы наши его воевод побили, а иных его воевод многих да и людей многих поимав к нам прислали, и многие городы его наши воеводы взяли, а панов его и наместников поимав к нам прислали, а на тех городех наших наместников посажали. Также и князи руские, которые ему служили, от него к нам приехали служити и з городы и с землями, которые они дръжат. А мы к тебе и послали были с тою вестыо, что есмя послали воевод своих на Литовскуго землю: ино на поле ординских было людей много, проехати было нелзе. То бы тебе нашему брату ведомо было.— Князь велики велел тобе говорити: а ныне прислал еси ко мне свою грамоту с нашими людми с Кадышом с Обашовым да с Кудашем; а в грамоте в своей писал еси к нам, да и боярин наш князь Иван писал к нам в своей грамоте, что на великого князя Александрову землю послал еси ратью детей своих. И как еси ту рать свою отпустил, ино к тебе от великого князя Александра гонец пригонил, а привез к тебе от него грамоту верющюю за его печатию, да список по руски, по которому тебе от великого князя Александра речь говорил; и ты ту грамоту и тот список ко мне прислал. Да писал еси в своей грамоте, что к тебе с теми грамотами гонца прислал, а в Орду посла послал же, твои люди его видели в Азове; и ты, со мною не сослався, миру с великим князем Александром не хочешь взяти.— Князь велики велел тобе говорити: ино то брат наш делаешь гораздо, что на своем слове и на своей правде стоишь; как еси нам свое слово молвил и правду учинил, по тому нам и правишь. И ты бы и вперед как еси нам свое крепкое слово молвил и правду учинил, на том бы еси и стоял, другу бы еси моему друг был, а недругу недруг, а на Ахматовых детей и на Литовского был бы еси со мною заодин. А мы как на чем тебе своему брату свое слово молвили и правду чинили, на том и стоим, другу есми твоему друг, а недругу недруг, а на Ахматовых детей и на Литовского с тобою есми заодин.- Князь велики велел тобе говорити: да писал еси ко мне в той же в своей грамоте, чтобы мне к Киеву послати воевод своих, а ты сам хочешь быти под Киевым; и мне бы к тебе весть послати с [338] сроком, на которой день тебе быти под Киевым, да и нашим воеводам.— Князь велики велел тобе говорити: ино ныне зимою нашей рати нелзе быти к Киеву того деля, что наша рать все лето была в Литовской земле по тем местом, куде итти к Киеву: ино ныне туто корму нет, вытравлено и выграблено; и мы оже дасть Бог на того на своего и на твоего недруга на великого князя Александрову землю отселе шлем своих воевод со многими людми по первом пути, как снег падет, к Смоленску и к иным местом к литовским, и хотим своему и твоему недругу недружбу чинити, сколко нам Бог поможет. А ты бы нашь брат оттоле на того на своего и на моего недруга сам на конь всел и ратью пошол к Киеву и к иным местом к литовским; а за какими делы сам не всядешь на конь, и ты бы детей своих отпустил со всеми с своими людми на его землю и недружбу бы еси ему свою чинил, сколко тебе Бог пособит. А что к тебе гонца своего прислал Берендея, и ты бы его к нему не отпущал; а иного кого к тебе пришлет князь велики Александр о миру, и ты бы с ним миру не имал, а был бы еси со мною на него заодин; а кого к тебе пришлет, и ты бы того к нему не отпущал.— Князь велики велел тобе говорити: послал есми к волошьскому воеводе к Стефану своего диака земьского Микиту, а с ним послал есми к воеводе его человека Петра; и ты бы с ними послал своих людей нас для, а велел бы еси их допровадити до Стефана, воеводы волошского. Также и назад к нам пойдет тот наш диак Микита, и кого к нам пошлет Стефан воевода своего человека с ним вместе, и ты бы их велел до нас допровадити нас для.— Князь велики велел тобе говорити: писал еси ко мне в своей грамоте с своим человеком с Кутушом, чтобы ми к тебе послати платие. И мне было ныне к тебе нелзе послати, занже на поле многие дюди ординские; а что у нас будет, ино ож дасть Бог перед тобою будет; а ныне послал со мною к тебе сорок соболей.— Князь велики велел тобе говорити: да писал еси в своей грамоте, что твои люди у моих людей здесе на Москве денги заимовали, здесе имали московские денги, а там было им давати отманские денги; и твои люди не хотят моим людем тех денег платить по тому, как у них заимовали. И ты бы своим людем те денги мои(м) людем велел платити истинну да половину росту.— Князь велики велел тобе говорити: писал еси ко мне, в своей грамоте с нашим человеком с Кадышом с Абашовым, что наших послов и гостей Азовские казаки на поле пограбили, и ты про то с Шигзодою с кафинским говорил. И ты бы и ныне о том говорил накрепко, чтобы головы велел отпустити без окупа, а рухлядь бы сыскав велел отдати, а лихих бы веле(л) казнити, чтобы вперед того не было. Да чтобы еси у салтана взял грамоту: коли которого посла к [339] тебе пошлем Доном на Азов, ино бы в Азове и в Кафе пошлинники его тое рухляди, которую пошлем к тебе, ни пословы бы рухляди не розвязывали, ни смотрили, ни пошлин бы не имали; да ту бы еси грамоту прислал ко мне.

II. Память Ивану Мамонову. Говорити ему царю Менли-Гирею накрепко, чтобы царь однолично пошол на Литовскую землю ратью, или бы детей своих послал. А шол бы царь, или его дети, к Киеву, или к Слутцку, и к Турову, и к Пинску, и к Меньску, того деля, чтобы как недругу гораздо недружба довести. И пойдет царь сам на Литовскую землю, а Ивану велит с собою итти, и Ивану со царем итти, от того ся ему не отговаривати. А пошлет его царь с детми, и Ивану и с детми итти. А князя Ивана Кубенского отпустит царь, и ему итти к великому князю; а не отпустит, а велит ему ждати до весны, и ему не итти. А к великому князю князю Ивану и Ивану отпустить ныне людей, а отписати с ними о всем о тамошнем деле, о турском, где ныне и что его дело, да и о волошском, как ныне с угорским и с полским королем послу было Стефанову воеводинину быти у Менли-Гирея: был ли тот посол и с чем приезжал; о всем о том отписати к великому князю.

Да память Ивану. Вспросит его царь: с которово дни князь велики посылает своих воевод на Литовскую землю? И Ивану молвити: на первом, господине, пути, как снег падет, государь наш шлет своих воевод со многими людми. А и ныне, господине, оттовселе из государя нашего земель воюют Литовского землю: отселе, господине, князь Семен Стародубской и князь Василей Шемячичь и великого князя воеводы с ними воюют Литовскую землю; а князь Семен, господине, Ивановичь Белской из своей вотчины воюет Литовскую землю; а братаничи государя нашего из своей отчины посылают своих воевод воевати Литовские земли; а из Новгородские земли и изо Псковские люди государя нашего воюют Литовскую землю. Да сказати Ивану царю, которые князи и с которыми городы приехали к великому князю служити, да и воеводы великого князя которые городы литовские поимали за великого князя.

А досталь тех памятей все писано по тому, слово в слово, каковы вез Олексейко подьячей к Ивану к Мамонову.