1500, сентября 29. Список речей царю и наказа, посланных от великого князя к Ивану Григорьевичу Мамонову, взамен прежде данного ему списка речей, и наказа ¹ (Д. Крымск. № 2, стр. 746-755).

I. И к великому князю пришла весть изо Мченска от князя от Ивана от Белевского, что на поле многие люди Татарове, а их вотчину, на Белевские места, на украины приходили немногие люди. И князь велики послал за Иваном за Мамоновым, а велел ему лежати в Колузе. И лета седмь тысячь 9-го, сентября 29, послал князь велики к Ивану в Колугу Олексейка подьячего, а велел ему дождатися Кутуша, татарина Менли-Гиреева, да ехати на Дбрянеск, да ко князю к Василью к Шемячичю. А что Ивану дан список, по чему ему царю речь говорити, да список памятной, и те списки велено у него взяти; а с Олексейком к нему послан иной список, по чему ему царю речь говорити, да и памятной список.

А се список. Память Ивану Григорьеву сыну Мамонову. Как дасть Бог приехав в Перекопь, и ему, не ходя к Менли-Гирею ко царю, да видетись со князем с Иваном с Кубенским. И как у себя велит [325] царь Ивану быти, и Ивану итти ко царю со князем с Иваном. Да первое Ивану от великого князя царю челом ударити, а молвити: брат твой князь велики Иван велел тобе челом ударити. Князь велики велел твое здоровье видети. Да поминок подати. А опосле поминка речь говорити. Князь велики велел тобе говорити: что еси прислал ко мне с моим боярином со князем с Семеном своего посла Ази Халеля, а с ним в грамотах в своих писал еси к нам да и словом ми от тебя говорил твой посол Ази Халель и мой боярин князь Семен, чтобы тебе с великим князем Александром с литовским мир взяти; а какова с ним миру хочешь, и ты к нам про то в своих грамотах писал; а посол твой Ази Халель и список нам тому дал, какова с ним миру хочешь.— Князь велики велел тобе говорити: и мы к великому князю Александру посылали с тем, какова ты с ним миру хочешь. И князь велики Александр к нам отказал, что такова с тобою миру не хочет, какова миру ты с ним хочешь. И мы к тебе с твоими послы с Казимером да с Ази Халелем приказали, да и с своим послом с Иваном есмя к тебе наказали: коли с тобою князь велики Александр миру не хочет, а с нашими недруги, с Ахматовыми детми, ссылается, наводит их на нас; а которые послы Ахматовых детей и ныне у него, и он тех послов в Орду отпущает да и своих послов к ним посылает, а в своем слове не стоит, что к нам приказывал, с тобою миру хотел. И коли с тобою с нашим братом миру не хочет, ино и яз с ним миру не хочю тебе деля; а хочю с тобою с своим братом по своей правде на него быти заодин. И пришлет к тебе князь велики Александр о миру, и ты бы с ним миру не имал; а кого к тебе пришлет, и ты бы того изымал. Как дасть Бог нам с Литовским свое дело делати, и мы с тобою с своим братом сошлемся; так есмя к тебе приказали с твоими послы да и своим послом.— Князь велики велел тобе говорити: и как есмя к тебе твоих послов да и своего посла отпустили, и князь велики Александр присылал к нам своих послов, маршалка своего Станислава Петряшковича Кишку и писаря своего Федка Толстово с тем же, что с тобою такова миру не хочет, какова ты с ним миру хочешь. И мы к нему и отказали с его послы: коли с тобою с нашим братом миру нет, ино и нам с ним миру нет; а что межи нас с ним правда была, и мы ему ту свою правду сложили и ратны есмя с ним учинились, да уповаа на Бога, и воевод есмя своих с своею ратью на его землю послали; и воеводам нашим с его воеводами и бой был, и, милосердием Божьим, воеводы наши его воевод побили, а иных его воевод многих да и людей многих поимав к нам прислали, и многие городы его наши воеводы взяли, а панов его и [326] наместников поимав к нам прислали, а на тех городех наших наместников посадили. Также и князи русские, которые ему служили, от него к нам приехали и з городы и з землями, которые они дръжат. А мы к тебе послали были с тою вестью, что есмя посылали воевод своих на Литовскую землю, ино на поле ординских людей было много, проехати было нелзе; а ныне, уповаа на Бога, и детей своих хотим слати со многими людми на того на своего недруга на Литовского землю. То бы тебе нашему брату ведомо было.— Князь велики велел тобе говорити: и ты бы по своей правде, как еси нам свое крепкое слово молвил и правду учинил, на том бы еси и стоял, чтобы еси на того на своего и на моего недруга, на великого князя Александра Литовского землю сам на конь всел и ратью пошол. А за каким делом сам не всядешь на конь, и ты брата своего да и детей своих отпустил со всеми с своими людми на его землю и недружбу бы еси ему свою чинил, сколко тебе Бог пособит. А и пришлет к тебе Литовской о миру, и ты бы с ним миру не имал, а был бы еси со мною на него заодин. А на чем есмя тебе своему брату молвили и правду учинили, на том и стоим, другу есми твоему друг, а недругу недруг, а на Ахматовых детей и на Литовского с тобою есми заодин. А ты как нам на чем свое слово молвил и правду дал, на том бы еси и стоял, другу бы еси моему друг был, а недругу недруг, а на Ахматовых детей и на Литовского был бы еси со мною заодин.— Князь велики велел тебе говорити: послал есми к волошскому воеводе к Стефану своего диака земского Никиту, а с ним послал есми к воеводе его человека Петра. И ты бы с ними послал своих людей нас для, а велел бы еси их допровадити до Стефана воеводы волошского. Также и назад к нам поедет тот наш диак Никита, и кого к нам пошлет своего человека Стефан воевода с ним вместе, и ты бы их велел допровадити, нас для.

III. Память Ивану Мамонову. Говорити ему царю Менли-Гирею накрепко, чтобы царь однолично пошол на Литовскую землю ратью, или бы брата своего да и детей своих послал. А шел бы царь, или его дети, к Киеву, или к Слутцку, и к Турову, и к Пинску, и к Меньску, того деля, чтобы как недругу гораздо недружба довести. И пойдет царь сам на Литовскую землю, а Ивану велит с собою итти, и Ивану со царем итти, от того ся ему не отговаривати. А пошлет его царь с братом с своим и детми, и Ивану с братом и с детми итти; а князя бы Ивана тогды царь отпустил к великому князю. А вспросит царь: как хочет князь велики детей своих отпустити, с которово дни? И ему сказати, что хочет отпускати по первой пороше. Да свазати Ивану царю: которые князи и с [327] которыми городы приехали к великому князю служити, да и воеводы великого князя которые городы литовские поимали за великого князя. Да молвити Ивану от великого князя царю, чтобы царь сам не ходил ни детей своих не посылал, да и людем бы своим всем приказал, чтобы не ходили воевати по сей стороне Днепра к Путивлю, и к Чернигову, и к Рылску, и к Новому городку к Северскому, и к Стародубу, и к Гомью, и к Любечю, к Трубецку, и ко Дбрянску, и ко Мченску: милосердием Божьим, те городы и земля нынеча наша.

Да память Ивану. Беречи ему того накрепко, чтобы Менли-Гирей царь с великим князем с литовским не мирился, ни канчивал. А кого князь велики Александр своих людей ко царю пришлет, и он бы их к нему не отпускал, а своих бы людей к нему не посылал. И взмолвит царь: приказал ко мне князь велики с тобою, чтобы яз с великим князем Александром с литовским не помирился; а князь велики с литовским без нашего ведома не помиритлися? И Ивану молвити: государь наш ныне с Литовским без твоего ведома не помирится. А и придет царь, или его брат и дети, воевав Литовскую землю, и Ивану царю говорити, чтобы людей своих посылал воевати Литовские земли. А которые его люди придут воевав, и он бы опять моих людей посылал воевати, чтобы его люди завсе были в Литовской земле. Да самому Ивану от Менли-Гирея ото царя не ехати к великому князю без великого князя велениа, а беречи ему великога князя дела по великого князя наказу.

Да память Ивану. Молвити ему князю Ивану, да и к Ондрею к Лабенку приказати, чтобы на Киев не ходили; а и на Путивль будет итти, ино нолни опытав. А похотят перекопские послы итти на Азов Доном вверх, и Ондрею с ними итти на весне, как лед пройдет. А не пойдут полем турские послы, ино летом Доном вверх не ходити, ити ему полем с послы ли с турскими, без послов ли.

Да память Ивану. Сказати ему царю которые городы поимали воеводы великого князя и которые городы здались великому князю великого князя Литовского: город Путивль, Дбрянеск, Радогощь, Почап, Попова Гора, Мченеск, Серпееск, Дорогобуж, Опаков, Дроков, Мглин, Торопець. А князь Семен княж Иванов сын Андреевича приехал с городы с Черниговым, с Стародубом, да с Гомьем, да с Любечем. А князь Василей княж Иванов сын Дмитреевича Шемячичь приехал с городы с Рыльском, да с Новым городком с Северским и со многими волостми. А Трубецкие князи с городом с Трубецком и с волостми. А Масалские князи с городом с Масалском и с волостми. А князь Семен Иванович Белской с своею вотчиною. А на бою изьманы великого князя [328] Александровы воеводы: князь Костянтин Острожской, Григорей Остикович маршалок, Лютавар маршалок, Миколай Юрьев сын Глебова, Миколай Юрьев сын Зиновьева, Дрюцкие князи. А опроче того многие люди именистые изыманы, а многие люди именистые побиты. Да панов его изыман Станислав Барташевич, наместник дбрянской, да князь Богдан Глинской, наместник путивльской, да Кмита, да Жеребятич, да иные его наместники и многие люди поималы, которые были по тем городом.

Да сказати Ивану царю то, что князь велики рано был его отпустил; ино было ему нелзе ехати того деля, что ординские люди на поле, и они лежали в Колузе на украине.— Да молвити Ивану от великого князя царю. Князь велики велел тобе говорити: писал еси ко мне в своей грамоте своим человеком с Кутушом, чтобы ми к тебе послати платие; и мне было ныне к тебе нелзе послати, занже на поле многие люди ординские; а что у нас будет, ино оже дасть Бог перед тобою будет, а ныне послал со мною тебе сорок соболей.— Князь велики велел тобе говорити, чтобы еси у кафинского салтана взял грамоту: коли которово посла пошлем к тебе Доном на Азов, ино в Азове и в Кафе пошлинники его тое рухляди, которую пошлем к тебе, ни пословы рухляди не розвязывали, ни смотрили, ни пошлин бы не имали; да ту бы еси грамоту прислал ко мне, занже послом нашим ходити истомно и бы им ходити Доном. Да, писал еси в своей грамоте, что твои люди у моих людей здесе на Москве денги займовали: здесе имали московские денги, а там было им давати атманские денги; и твои люди не хотят моим людем тех денег платить по тому, как у них займовали; и ты бы своим людем те денги моим людем велел платить истину, да половину росту.

Комментарии

1. Изменения незначительные, сделанные вследствие событий, совершившихся в августе и сентябре 1500 года.