1500, августа 11. Посольство от великого князя Ивана Васильевича к царю Менгли-Гирею с Иваном Григорьевичем Мамоновым: так как великий князь Александр не хочет с царем миру на условиях последнего, то московский великий князь для царя объявив литовскому войну, войска его разбил и захватил многие города; поэтому царь не мирился бы с литовским, а шел бы на его земли войною; да шел бы за Днепр [315] к Слуцку, к Пинску, а к Чернигову и Рыльску не ходил, потому что эти города теперь уже принадлежат великому князю (Д. Крымск. № 2, стр. 726-737).

I. Лета 7000 осмаго, августа 11 день, послал князь велики в Перекопь к Менли-Гирею ко царю посолством Ивана Григорьева сына Мамонова, а с ним послал Илью толмача, да подьячего Бориса Белово, да татар.

Память Ивану Григорьеву сыну Мамонову. Как даст Бог приехав в Перекопь, ино ему, не ходя к Менли-Гирею ко царю, да видетися со князем с Иваном с Кубенским. И как у себя велит царь Ивану быти, и Ивану итти ко царю со князем с Иваном. Да первое Ивану от великого князя царю челом ударити, а молвити: брат твой князь велики Иван велел тобе челом ударити. Князь велики велел твое здоровье видети. Да поминок подати.

А после поминка речь говорити. Князь велики велел тобе говорити: что еси прислал ко мне с моим боярином, со князем с Семеном, своего посла Ази Халеля, а с ним в грамотах в своих писал еси к нам, да и словом ми от тебя говорил твой посол Ази Халель, а мой боярин князь Семен, чтобы тебе с великим князем Александром с литовским мир взять; а какова с ним миру хочешь, и ты к нам про то в своих грамотах писал; а посол твой Ази Халель и список нам тому дал, какова с ним миру хочешь.— Князь велики велел тобе говорити: и мы к великому князю Александру посылали с тем, какова ты с ним миру хочешь; и князь велики Александр к нам отказал, что такова с тобою миру не хочет, какова миру ты с ним хочешь. И мы к тебе с твоими послы, с Казимером да и с Ази Халелем приказали, да и с своим послом со князем с Иваном есмя к тебе наказали: коли с тобою князь велики Александр миру не хочет, а с нашими недруги с Ахматовыми детми ссылается, наводит их на нас. А которые послы Ахматовых детей и ныне у него, и он тех послов в орду отпущает, да и своих послов к ним посылает, а в своем слове не стоит, что к нам приказывал, с тобою миру хотел; и коли с тобою с нашим братом миру не хочет, ино и яз с ним миру не хочю тебя деля, а хочю с тобою с своим братом, по своей правде, на него быти заодин. И пришлет к тебе князь велики Александр о миру, и ты бы с ним миру не имал; а кого к тебе пришлет и ты бы того изымал. А как дасть Бог нам с Литовским свое дело делати, и мы с тобою, с своим братом, сошлемся. Так есмя к тебе приказали с твоими послы да и с своим послом.— Князь велики велел тобе [316] говорити: и как есмя к тебе твоих послов да и своего посла отпустили, и князь велики Александр присылал к нам своих послов, маршалка своего Станислава Петряшковича Кишку и писаря своего Федка Толстаго, с тем же, что с тобою такова миру не хочет, какова ты с ним миру хочешь. И мы к нему и отказали с его послы: коли с тобою с нашим братом миру не хочет, ино и нам с ним миру нет; а что межы нас с ним правда была, и мы ему ту свою правду сложили и ратны есмя с ним учинились; да уповаа на Бога, и воевод есмя своих с своею ратью на его землю послали, и воеводам нашим с его воеводами и бой был. И милосердием Божиим, воеводы наши его воевод побили, а иных его воевод многих да и людей многих поимав к нам прислали, и многие городы его наши воеводы взяли, а панов его и намесников поимав к нам прислали, а на тех городех наших намесников посажали. Также и князи руские, которые ему служили, от него к нам приехали служити и с городы и с землями, которые они дръжат, а воеводы наши и ныне в его земле. И мы, положа упование на Бога, и детей своих отпущаем на его землю, а и сами, оже дасть Бог, хотим всести на конь на того нашего недруга. То бы тебе нашему брату ведомо было.— Князь велики велел тобе говорити: и ты бы, по своей правде, как еси нам свое крепкое слово молвил и правду учинил, на том бы еси и стоял, чтобы еси на того на своего и на моего недруга, на великого князя Александра литовского землю сам на конь всел и ратью пошол и недружбу бы еси ему свою чинил, сколко тебе Бог пособит. А и пришлет к тебе Литовской о миру, и ты бы с ним миру не имал, а был бы еси со мною на него заодин. А на чем есмя тебе своему брату молвили и правду учинили, на том и стоим, другу есми твоему друг, а недругу недруг, а на Ахматовых детей и на Литовского с тобою есми заодин. А ты как на чем нам свое слово молвил и правду дал, на том бы еси и стоял, другу бы еси моему друг был, а недругу недруг, а на Ахматовых детей и на Литовского был бы еси со мною заодин.— Князь велики велел тобе говорити: послал есми к волошскому воеводе к Стефану своего диака земского Микиту, а с ним послал есми к воеводе его человека Петра; и ты бы с ними послал своих людей нас для, а велел бы еси их допровадити до Стефана, воеводы волошского. Также и назад к нам поедет тот наш диак Микита, и кого к нам пошлет своего человека Стефан воевода с ним вместе, и ты бы их велел до нас допровадити, нас для.

II. Память Ивану Мамонову. Говорити ему царю Менли-Гирею накрепко, чтобы царь однолично пошол на Литовскую землю ратью; а шол [317] бы царь к Слуцку и к Турову и к Пинску и к Меньску того деля, чтобы как недругу гораздо недружба довести. А отселе великого князя воеводы в Литовской земле, ино царю помочь; а оттоле, ино царь великого князя воеводам помочь. А какими делы царь сам не пойдет на Литовскую землю, и Ивану царю говорити, чтобы послал брата своего с людми да и детей своих на Литовскую землю. И пойдет царь сам на Литовскую землю, а Ивану велит с собою итти, и Ивану со царем итти, от того ся ему не отговаривати. А пошлет его царь с детми, и Ивану и с детми ити; а князя бы Ивана Кубенского тогды царь отпустил к великому князю. Да молвити Ивану царю: воеводы, господине, ныне государя нашего с людми в Литовской земле; и ты бы, господине, приказал своим людем: где съедутся со государя нашего людми, ино бы от твоих людей государя нашего людем лиха никоторово не было. А где будет пригож дело делати твоим людем со государя нашего людми, и они бы делали заодин. А государь наш, господине, приказал своим воеводам; где съедутся с твоими людми государя нашего люди, ино твоим людем от государя нашего людей лиха никоторово не будет. А где будет пригоже государя нашего людем с твоими людми дело делати, и они с твоими людми дело делают заодин. Да сказати Ивану царю которые князи и с которыми городы приехали к великому князю служити, да и воеводы великого князя которые городы Литовские поимали за великого князя. Да молвити ему от великого князя царю, чтобы царь приказал своим детем да и всем своим людем, чтобы не ходили воевати к Чернигову и к Рылску и к Новомугородку Северскому: милосердием Божиим, те городы и земля нынеча наша.

Да паметь Ивану. Беречи ему того накрепко, чтобы Менли-Гирей царь с великим князем с литовским не мирился, ни канчивал. А кого князь велики Александр своих людей ко царю пришлет, и он бы их к нему не отпущал, а своих бы людей к нему не посылал. И взмолвит царь: приказал ко мне князь велики с тобою, чтобы яз с великим князем Александром с литовским не помирился; а князь велики с Литовским без нашего ведома не помиритлися? И Ивану молвити: государь наш, господине, ныне с Литовским без твоего ведома никоторыми делы не помирится. А и придет царь, или его дети, воевав Литовскую землю, и Ивану царю говорити, чтобы людей своих посылал воевати Литовские земли; а которые его люди придут воевав, и он бы опять своих людей посылал воевати, чтобы его люди завсе были в Литовской земле. Да самому Ивану от Менли-Гирея от царя не ехати к великому князю без великого князя веления, а беречи ему великого князя дела по великого князя наказу. [318]

Да память Ивану. Послати ему в Кафу к Ондрею к Лапенку, а велети ему молвити: учнет его салтан отпущати к великому князю, а с ним пошлет своего посла, или отца его посол будет к великому князю, а велит им ехати на Киев,— и Андрею на Киев не ехати, а ехати им полем. А не поедут полем турецкие послы, и Ондрею говорити салтану, чтобы его да и своих послов отпустил на Азов, а из Азова Доном вверх. А не всхочет отца своего посла и своего посла отпустить с Ондреем полем или Доном за тем, что нелзе на Киев ехати, а учнут Андрея отпускати без своих послов, и Ондрею салтану говорити: приказал, господине, ко мне государь мой с своим послом с Иваном, которого прислал ко царю к Менли-Гирею, не велел мне, господине, на Киев государь мой ити того деля, что ныне завоевался с Литовским. И государь мой, господине, велел мне от себя вести ждати; и ты бы, господине, ныне велел мне у себя побыти, доколе ко мне от государя от моего весть будет; а как, господине, от государя от моего ко мне весть будет, а прикажет ко мне куде велит к себе ехати, и мы туде едем. А не взвелит ему салтан у себя быти, а учнет его отпускати, и Андрею с Кубенским ити полем или Доном вверх.

Да память Ивану. Сказати ему царю которые городы поимали воеводы великого князя и которые городы здались великому князю великого князя Литовского города: Брянск, город Мченеск, город Серпееск, город Дорогобуж, город Опаков, город Почап, город Радогощы и иные городы и волости. А князь Семен княж Иванов сын Андреевича приехал с городы: с Черниговым, с Стародубом, да с Гомьем, да с Любичем. А князь Василей княж Иванов сын Дмитреевича Шемячичь приехал с городы: с Рылском, да с Новымгородком с Северским и со многими волостями. А Трубецкие князи с городом с Трубецком и с волостми. А Масалские князи с городом с Масалском и с волостми. А князь Семен Иванович Белской с своею отчиною. А на бою изыманы великого князя Александровы воеводы князь Костянтин Острожской; Григорей Остикович, маршалок; Лютавар, маршалок; Миколай Юрьев сын Глебова, Миколай Юрьев сын Зиновьева; Дрюцкие князи; Масалские князи. А опроче того, многие люди именистые поиманы; а многие люди именистые побиты; а пан его изыман Станислав Барташевичь, намесник добрянской; да и иные его намесники поиманы, которые были по тем городом.

III. А се говорити Ивану Нур-салтан царице, Темиреве дочери. Князь великй Иван велел тобе поклонитися. Князь велики велел твое здоровье видети. Князь велики велел тобе говорити, чтобы еси у царя у [319] Менли-Гирея, у нашего брата, промежи нас нашего дела берегла и дело бы еси наше делала, а нам бы еси дружбу свою чинила. А мы оже дасть Бог тебе хотим свою дружбу чинити.

А се говорити Ивану Ямгурчею царевичю. Князь велики Иван велел тобе поклонитися. Князь велики велел тобе говорити, чтобы еси у царя у Менли-Гирея, у брата своего, промежи нас нашего дела берег и дело бы еси наше делал, а нам бы еси дружбу свою чинил. А мы оже дасть Бог тебе хотим свою дружбу чинити.

А се говорити Ивану Махмет-Гирею царевичю, Менли-Гирееву сыну цареву. Князь велики велел тобе поклонитись. Князь велики велел тобе говорити, чтобы еси у своего отца, у царя Менли-Гирея, промежи нас нашего дела берег и дело бы еси наше делал, а нам бы еси дружбу свою чинил. А мы оже дасть Бог тебе хотим свою дружбу чинити.— А другому сыну Менли-Гирееву, Ахмет-Гирею царевичю, Ивану от великого князя поклонитися, да та ж речь молвити.

А се говорити Барашу, Еменекову сыну. Князь велики велел тобе говорити, чтобы еси у царя у Менли-Гирея, у брата нашего, промежи нас нашего дела берег и дело бы еси наше делал, а нам бы еси дружбу свою чинил. А мы оже дасть Бог хотим тебе свое добро чинити.

А се говорити от великого князя Довлетек мурзе. Князь велики велел тобе поклонитися. Князь велики велел тобе говорити: как еси наперед сего промежы нас со царем нашего дела берег, так бы еси и ныне нашего дела берег и дело бы еси наше делал, а нам бы еси дружбу свою чинил. А мы оже дасть Бог тебе хотим свою дружбу чинити.

Паметь Ивану Мамонову. Что послал князь велики в Венецею Дмитрея Ларева да и Митрофана Карачарова, а нечто приидут при нем в Перекопь Дмитрей и Митрофан, и которые с ними будут мастеры пойдут на великого князя имя, — и Ивану от великого князя Менли-Гирею царю молвити, чтобы Дмитрея и Митрофана и тех людей, которые с ними пойдут мастеры на великого князя имя, отпустил к великому князю, а велел бы их своим людем проводити до великого князя. А и не придут при нем в Перекопь, и Ивану от великого князя Менли-Гирею царю молвити, чтобы их велел проводити своим людем до великого князя.

Да память Ивану. Молвити ему от великого князя князю Ивану Кубенскому: что ему даны списки посолства, и будут те у него списки утерялись, и нынеча к нему таковы же списки посланы с Иваном; и князь бы Иван по тем списком царю выговорил речи все. А что которые речи ко царю приказаны о жалобах, и князю Ивану о тех царю речех [320] выговарити ж. А учинит царь о котором деле управу, ино велми добро; а не учинит управы, ино князю Ивану о том добре не пристояти; а пристояти и говорити князю Ивану с Иваном царю накрепко, чтобы пошол на Литовскую землю. А будут у князя у Ивана те списки не утерялись, и царю те речи говорил, и Ивану князю Ивану тех списков и не давати, а привезти их к великому князю назад.