№ 55.

1498, апреля 29. Посольство от великого князя Ивана Васильевича к царю Менгли-Гирею с Борисом Челищевым: великий князь как прежде обещал царю, так и теперь в своей правде стоит, другу друг, а недругу недруг — на Ахматовых детей, и если Александр Литовский их наводит на царя,— то и на Литовского один человек; извещает, по какому случаю теперь на Казани царем Абдул-Летиф; да велел бы царь проводить его посла к Стефану волошскому (Д. Крымск. № 1, стр. 536-546).

I. Лета 7006, месяца апреля 29 день, послан посолством в Перекопь к Менли-Гирею ко царю Борис Челищов; а с ним послан в толмачех Борис Малой Марков, да в подьячих Борисов сын Тарханов Микита.

А се правити посолство от великого князя Менли-Гирею царю Борису Феодорову сыну Челищова. Брат твой князь велики Иван велел тебе челом ударити. Князь велики велел твое здоровье видети. А опосле того поминок подати да речь говорити. Князь велики велел тебе [250] говорити: прислал еси ко мне с моим боярином с Михайлом своего человека Махметя с градмотами; а в грамоте в своей писал еси, что князь велики Александр литовской посылал своих послов в Орду к нашим недругом к Ахматовым детем к Шиг-Ахметю и к Муртозе, а ведет их на тебя; и нам бы на том и стояти, на чем есмя тебе свое слово молвили и правду учинили, другу твоему другом быти, а недругу недругом; а ты наш брат как нам свое слово молвил и правду учинил, на том хочешь и стояти, другу нашему другом быти, а недругу недругом.— Князь велики велел тебе говорити: ино яз, как на чем тебе свое слово молвил и правду учинил, на том и стою, другу есми твоему друг, а недругу недруг, а на Ахматовых детей с тобою есми один человек: пойдут на тебя наши недрузи Ахматовы дети, и мы, по своей правде, на Орду пошлем братанича твоего Саталгана царевича со всеми уланы и со князми и со всеми казаки, да и руских воевод с своею ратью с ним пошлем, и велим им дело делати, сколко им Бог поможет; да из Казани велим Абдыл-Летифу свою рать послати.— Князь велики велел тебе говорити: а пойдут на меня наши недрузи Ахматовы дети, и ты бы, по своей правде, как еси нам молвил, с нами на них был заодин, пошол бы еси на их Орду и дело бы еси делал, сколко тебе Бог пособит.— Князь велики велел тебе говорити: а о литовском о великом князе Александре приказывал есми к тебе: помиришся с ним, ино велми добро, а не помиришся с ним, и нам с тобою о том сослатися да учинити по думе, как нам будет пригож с ним свое дело делати. Ино и ныне помирится с тобою князь велики Александр, и ты бы нам ведомо учинил; а не помирится с тобою, и ты бы нам ведомо же учинил, и мы с тобою с своим братом на нево и ныне заодин; а на чем есми тебе молвил и правду учинил, и как межи нас в грамотах записано, на том и ныне стою, другу есми твоему друг, а недругу недруг, а на всякого недруга и на литовского с тобою есми заодин, а добра твоего ож даст Бог хочю смотрити и дела твоего беречи и до живота; а ты как на чем мне свое крепкое слово молвил и правду учинил и как межи нас в грамотах записано, на том бы еси и стоял, другу бы еси моему друг был, а недругу недруг, а на всякого недруга был бы еси со мною заодин и дела бы еси нашего во всем берегл.— Князь велики велел тебе говорити: послали есмя до Стефана, воеводы волошского, посла своего Феодора Алексеева; и ты бы того нашего посла велел проводити своим людем до Стефана, воеводы волошского, нас для; также и назад от Стефана воеводы тот наш посол к нам пойдет, и которые воеводины люди с ним к нам пойдут, и ты бы их велел проводити нас для, докуды будет [251] пригож, как бы до нас дошли.— Князь велики велел тебе говорити: писал еси ко мне в своей грамоте со Абдыл-Летифовым со царевичевым слугою с Яндербышем о Махмет-Амине о царе; ино Махмет-Аминево царево дело так ссталося: как пришол на него шибанской царь Мамук, и Махметь-Аминь царь, не поверя своим людем, к нам приехал, и мы ему в своей земле городы подавали и дружбу свою ему чиним, и вперед оже даст Бог хотим ему дружбу свою чинити и свыше. А на казанском юрте, Божьим изволением, царем учинили есмя Абдыл-Летифа царевича. Тебе бы то брату моему ведомо было.

II. А се говорити от великого князя Борису Нур-салтан царице, Темиреве дочери. Князь велики Иван велел тебе поклонитись. Князь велики велел твое здоровье видети. Да поминок подати. Да опосле поминка речь говорити. Князь велики велел тебе говорити: писала еси ко мне в своей грамоте со Абдыл-Летифовым человеком с Яндербышом о своем сыне о Магмед-Амине, о царе о казанском; ино сына твоего Махмет-Аминево царево дело так ссталося: как пришол на него шибанской царь Мамук, и сын твой Магмед-Аминь царь, не поверя своим людем, к нам приехал; и мы ему в своей земле городы подавали и дружбу свою ему чиним, и вперед ож даст Бог хотим ему дружбу свою чинити и свыше. А на казанском юрте, Божиим изволением, царем учинили есмя сына твоего Абдыл-Летифа царевича; тебе бы то ведомо было.— Князь велики велел тебе говорити: как еси нам наперед сего дружбу и братство свое чинила и дела нашего берегла, так бы еси и вперед нам дружбу и братство свое чинила и дела бы еси нашего промежи царя и меня берегла; а мы как наперед сего тебе дружбу свою чинили, так и вперед ож даст Бог хотим тебе свою дружбу чинити..

А се говорити Борису Ямгурчею царевичю. Князь велики Иван велел тебе поклонитися. Князь велики велел тебе говорити: как еси нам наперед сего дружбу свою чинил и добра нашего смотрил и дела нашего берег, так бы еси и вперед к нам дружбу свою держал и добра бы еси нашего промежи царя и меня смотрил и дела нашего берег; а мы как наперед сего тебе дружбу свою чинили, так и вперед оже даст Бог хотим тебе дружбу свою чинити.

А се говорити Борису Махмет-Гирею царевичю, Менли-Гирееву сыну цареву. Князь велики велел тебе поклонитися. Князь велики велел тебе говорити: как еси нам наперед сего дружбу свою чинил и добра нашего промежи отца своего царя да и меня смотрил и дела нашего берег, так бы еси и вперед к нам дружбу свою чинил и добра бы еси нашего промежи отца своего царя да и меня смотрил и дела нашего берег; а мы [252] как наперед сего тебе дружбу свою чинили, так и вперед ож даст Бог хотим тебе дружбу свою чинити.

А другому сыну Менли-Гирееву, Ахмет-Гирею царевичю, Борису поклонитися, да та ж речь молвити.

А третьему и четвертому сьшу Менли-Гирееву от великого князя Борису поклонитись, да та ж речь молвити.

А се говорити Борису от великого князя Барашу князю, Еменекову сыну. Князь велики Иван велел тебе поклонитись. Князь велики велел тебе говорити: как еси наперед сего промежи царя и меня добра нашего смотрил и дела нашего берег, так бы еси и вперед нашего добра смотрил и дела нашего берег; а мы как наперед сего к тебе свое добро держали, так и вперед ож даст Бог хотим к тебе свое добро держати.

III. Память Борису. Говорити ему царю, чтобы Федца не издержав отпустил к Волохом, а послал бы с ним своих людей проводити его его до Волох; а Борису дожидати Федца из Волох туто в Перекопи. А учнет царь Бориса отпущати не дождав Федца из Волох, и ему не ехати, а говорити ему царю: государь мой, господине, велел мне здесе у тебя дождатися своего посла из Волох; а тебе, господине, будет надобе о котором деле послати к своему брату к великому князю, ино, господине, здесе есть со мною великого князя люди, и ты с великого князя людми и своего человека пошли к брату к своему к великому князю. А взмолвит царь: князь велики Александр литовский со мною немирен, а хочет ити на меня. И Борису говорити царю: брат твой, господине, князь велики со мною к тебе приказал: помиришся с литовским, и ты бы ему ведомо учинил; а не помиришся с ним, и ты бы ему ведомо ж учинил. И коли, господине, с тобою литовской немирен, и ты, господине, пошли с тем к брату к своему, к великому князю, своего человека, а яз с ним пошлю государя своего татар; и государь наш, господине, на чем тебе своему брату свое слово молвил, на том и ныне стоит, другу твоему друг, а недругу недруг, а на литовского с тобою заодин. А как твой человек у государя нашего будет, и государь наш, господине, твое дело и свое делает, сколко ему Бог пособит. А будет Борису весть про то, что цари Ахматовы покочюют к великого князя земли, и Борису говорити Менли-Гирею царю, чтобы по своей правде, как на чем великому князю молвил и правду дал, чтобы пошол на Орду. А какими делы Менли-Гирей царь сам не пойдет на Орду, и Борису говорити, чтобы послал на Орду сына да брата с своими людми. Да о том говорити накрепко, чтобы Менли-Гирей царь пошол на Орду, или сына да брата своего послал на Орду с своими людми. [253]

Да память Борису. Как ож даст Бог царь отпустит из Перекопи Федца к Волохом, и ему к великому князю послати татар человека два, или три, с грамотою; а царю ему то сказати. И похочет к великому князю человека послати, ино велми добро; а и не пошлет царь своего человека к великому князю, и Борису таки послати человека два, или три, татар к великому князю с грамотою; а отписати Борису к великому князю, в которой день поедет Федец к Волохом и кого с ним царь пошлет своих людей к Волохом. Да и о том ему отписати, каков будет тамо слух про Орду про болшую, и каково дело Менли-Гиреево с великим князем с литовским, и каков слух про Стефана, воеводу волошского, каково его дело с великим князем литовским и с королем полским, турской ему пособляет ли. Да и о всем о тамошнем деле, каково будет дело, отписати к великому князю.