1495, мая 3. Посылкл гонцов с грамотою великого князя Ивана Васильевича к царю Менгли-Гирею: великий князь извещает, что он с литовским великим князем Александром помирился и дочь за него выдал; до сих пор не отпускал к царю его гонцов и своих, потому что нельзя было степью проехать и ныне посылает их на землю своего зятя на Киев. Грамота к Малечкину: возвращался бы назад через Киев; царю говорил бы, что великий князь по прежнему другу его друг, а недругу недруг. Наказы гонцам великаго князя, как ехать через Литовские земли (Д. Крымск. № 1, стр. 447-461).

I. Лета 7003, маиа в 3 день, отпустил князь велики в Перекопь к Менли-Гирею ко царю его людей, Мереку да Кулдербыша с товарыщи, а с ними послал к Менли-Гирею ко царю своих людей с грамотами, Кадыша да Кожуха с товарыщи. А поехали на Колугу, да на Воротынеск, да на Дьбрянеск, да на Киев, да на Черкасци. А послал князь велики проводити их до Дьбрянска подьячего Юшка Андреева; а до Черкасец послал князь велики проводити их Игната Созонова.

А се такова грамота послана к Менли-Гирею к царю с Кадышом. Вседржителя Бога волею, храброй еси и умной государь, брат мой Менли-Гирей царь, Бог бы государьство твое свыше учинил. Иоан, Божиею милостью государь всеа Руси, един правой вотчич и дедич, и иным многим землям северным и восточным государь, величеству твоему брата нашего слово наше то. Что еси прислал к нам своего человека Мереку нашего здоровья видети, а свое здоровье нам сказати, и мы, слышев твое здоровье брата нашего, обрадовалися есмя. А что писал еси к нам с Мерекою в своих грамотах: как еси нам на чем молвил, на том и стоишь, другу еси моему друг, а недругу недруг. А что пишешь, которое еси дело делал с нашим недругом с литовским, да и вперед хотел делати, и зачем то твое дело не делалося,— и мы то слышели. И с Костянтином, с нашим боярином, и с Кулдербышом тож есми к нам приказывал. А нынеча таково дело ссталося: присылал к нам князь велики Александр литовской своих послов, просячи нас, чтобы нам с ним помиритися, и дочерь бы нам свою за него дать. И мы с [213] ним помирилися, и дочерь есмя свою за него дали, тобе бы брату нашему то ведомо было. А яз как на чем тебе молвил и правду учинил, и как межи нас в грамотах записано, на том и ныне стою, другу есми твоему друг, а недругу недруг, а добра твоего оже дасть Бог хочю смотрити и дела твоего беречи и до живота. А ты как на чем мне свое крепкое слово молвил и правду учинил, и как межи нас в грамотах записано, на том бы и стоял, другу бы еси моему друг был, а недругу недруг, и дела бы нашего во всем берег. А Кулдербыша да и своего человека оного лета хотели есмя рано с весны к тебе отпустити, ино на поле людей было много; а и твой человек Мерека и наши люди от ординских людей пограблены к нам пришли, и мы и Мереки к тебе летось не отпустили, да и своего человека не послали за тем жо, что людей было много на поле. А ныне твоих людей, Мереку и Кулдербыша, да и своих людей к тебе отпустили есмя через зятя своего землю. А как учнешь к нам отпускати к нам нашего боярина Костянтина да и своего посла к нам с ним вместе слати, и ты бы своему послу да и нашему боярину Костянтину велел ехати к нам через зятя нашего землю на Киев. А и грамоту есми зятя своего, великого князя Александра, послал к своему боярину к Костянтину, что твоим людем с нашим боярином доброволно к нам ехати через его землю.

II. А се грамота послана к Костянтину к Малечкину с Кадышом жо. От великого князя Ивана Васильевича всеа Руси Косте Малечкину. Присылал ко мне князь велики Александр литовской своих послов, просячи нас, чтобы нам с ним помиритися и дочерь бы нам свою за него дати. И яз с ним помирился и дочерь есми свою за него дал. А ко царю к Менли-Гирею послал есми свою грамоту, а с тое грамоты послал есми к тебе список. И почнет царь тебе говорити: чего деля князь велики помирился с великим князем Александром с литовским? И ты бы ему отвечивал: яз, господине, того не ведаю, чего деля будет помирился; а ко мне государь мой писал в своей грамоте: на чем тебе молвил и правду учинил, на том и ныне стоит, другу твоему друг, а недругу недруг. А ты, господине, на чем государю моему молвил, и правду учинил, на том бы еси и стоял, другу бы еси его друг был, а недругу недруг. Да послал есми к тебе грамоту зятя своего великого князя Александрову, что тебе да и послу Менли-Гирееву доброволно через его землю ехати ко мне. И учнет царь посылати посла своего ко мне с тобою вместе, и ты бы царю говорил, чтобы послал посла своего с тобою через зятя нашего землю на Киев. А нечто не взверит царь зятя нашего грамоте, посла своего с тобою через зятя нашего землю не [214] пошлет, а учнет посылати своего посла полем, и ты бы сам с его послом пошол полем, а рухлядь и людей своих отпустил бы еси с зятя нашего листом на его землю. А будет тебе весть про то, что цари Болшие Орды, Ахматовы дети, учнут кочевати на том поле межи Дону и Днепра, и хоти бы царь и учал тебя отпускати, и ты бы ко мне не ездил, а говорил бы еси царю: пойдут наши недрузи, Ахматовы дети, на мою землю, и он бы по своей правде пошол на их Орду и дело бы делал, как ему Бог пособит; а пойдут на него Ахматовы дети, и яз на чем ему молвил, на том и стою, Саталгана царевича и уланов и князей да и русскую рать с ним и казанскую пошлю на Орду и дело его хочю делати, сколко ми Бог пособит. А будет Орда далече у Волги, не учнет кочевати межи Дону и Днепра, а учнет царь тебя ко мне отпускати, и ты бы ко мне поехал. Да что есми велел тебя вспросити Кафинского или манкупского баши о грамоте, что есми послал к Менли-Гирею ко царю, а велел есми ему послати ту грамоту к турскому, и Менли-Гирей царь отослал ли ее к турскому, дошла ли до него та моя грамота, и что его ко мне ответ? и будешь о том не вспрашивал, и ты бы вспросил тех жо баш о той грамоте, как будет пригоже. Да писал ко мне царь с Мерекою, а сказывает, отслал к турскому ту мою грамоту, да ещо к нему ответ не бывал. А в Кафу летось пришол от турского посол, и он чаял с тем послом ответа противу моей грамоты; и ты бы и царя вспросил о том, что ответ турского противу тое моей грамоты? Да чтобы еси с Кадышом сам шол ко царю, перед тобою бы царю от мене грамоту и поминок подал. Да писал ко мне царь с Мерекою о портищех о собольих и о горностайных и о белинных и о соболех и о рысех, и что яз к нему ныне послал с Кадышом, и яз тому послал к тебе список, и ты бы перед собою велел царю то отдати. А сее бы еси моей грамоты царю не являл.

III. А се такова память дана Кадышу да Кожуху.

Память Кадышу да Кожуху. Как приедут в Черкасци, и как их отпустят из Черкасец, и им взяти у Игната пропускная грамота великого князя Александра, да везти им та грамота к Костянтину Малечкину. А как оже даст Бог приедут в Перекопь, и им наперед ити к Костянтину к Малечкину, да от великого князя ему поклонитися, да грамота подати, да с Костянтином ити ко царю к Менли-Гирею, да от великого князя царю челобитье правити и поминок и грамота подати. А о запросных поминкех, что с ними посланы, Костянтин бы вспросил царя, как царь велит к себе принести те поминки, ино тогды к нему нести. [215]

Да такова память дана подьячему Юшку Ондрееву да Игнату Созонову. Память Юшку да Игнату Созонову. Как оже даст Бог приедут во Дбрянеск, и Юшку и Игнату ко дбрянскому наместнику ити ко князю к Феодору, да от великого князя ему Юшку поклонитися, да грамота подати; а Игнату Созонову подати лист князю Феодору великого князя Александра; да явити Игнату князю Феодору пропускная грамота великого князя Александра, а от себя ее не давати. Да говорити им князю Феодору, чтобы им пристава дал; а как им даст пристава и отпустит их изо Дьбрянска, и Юшку ехати с тем к великому князю, а Игнату Созонову ехати с великого князя людми и с Менли-Гиреевыми до Черкасец; а где в которых городех захотят имати мыт и пошлины на великого князя людех, которых послал к Менли-Гирею и на Менли-Гиреевых людех, на Мереке и на Кулдербыше с товарыщи, и Игнату о том говорити, чтобы на великого князя людех и на Менли-Гиреевых мыта и пошлин никаких не велели имати; а на торговых людех всхотят имати мыт и пошлины, ино за тех не говорити, торговые бы люди мыт и пошлины платили. А как приедут в Черкасци и кто поедет из Черкасец провожати великого князя людей и Менли-Гиреевых до Тавани, и Игнату и из Черкасец с тем поехати к великому князю. А лист великого князя Александра пропускной дати ему Кадышу да Кожуху, чтобы его везли к Костянтину к Малечкину.

А се такова грамота послана к дьбрянскому наместнику князю Феодору Ивановичю с Юшком с подьячим.

Иоан, Божиею милостью государь всеа Руси и велики князь Володимерский, и Московский, и Новогородский, и Псковский, и Тферский, и Югорский, и Пръмский и Блъгарский и иных, дьбрянскому наместнику князю Феодору Ивановичю. Послали есмя к Менли-Гирею, ко царю перекопскому, своих людей, Кадыша Обашова, да Кожуха Карчеева, да Бегиша Шадыкина, да Зяндербыша, да с ними три паробки, а всех их семь человек; да с ними вместе отпустили есмя к Менли-Гирею ко царю его людей Мереку и Кулдербыша с товарыщи, а всех Менли-Гиреевых людей, которые от него к нам приездили с грамотами, 11 человек. Да с ними ж вместе царевы Менли-Гиреевы торговые люди, которые приездили с Мерекою и с Кулдербышом, а всех их 30 и 3 человека, да Азямлян и Армен и Фряз 7 человек. А с ними послали есмя проводити их до Дьбрянска дворянина нашего Юшка, а до Киева и до Черкасец послали с ними дворянина нашего Игната Созонова. А которой свой лист дал нам брат наш и зять, князь велики Александр, что тем нашим людем доброволно ехати через его землю, и мы тот лист послали с дворянином с нашим с Игнатом Созоновым; а которой свой лист затвореной послал [216] к тебе, и мы тот лист послали к тебе с дворянином нашим с Юшком. И ты бы по тем листом брата и зятя нашего великого князя Александра, тех наших людей и Менли-Гиреевых пропустил и пристава им дал; а как им пристава дашь и отпустишь их изо Дьбрянска, и ты бы с тем отпустил к нам дворянина нашего Юшка. А которых есмя людей своих и Менли-Гиреевых и торговых людей отпустили к Менли-Гирею ко царю, и мы тем людем всем дали список по имяном, за своею печатью, дворянину нашему Игнату Созонову, сколко их всех , поехало.

А се таков список дан Игнату Созонову, за печатью. Лета 7003, апреля, отпустил князь велики в Перекопь к Менли-Гирею ко царю своих людей, Кадыша, да Кожуха, да Бегиша, да Зяндербыша, да с ними их 3 человеки, Байрамшик да Зяньсуфа да Чюрачик, а всех 7 человек; да с ними ж отпустил в Перекопь Менли-Гиреевых царевых людей Мереку, да Кулдербыша, Довлетьяра, да Урусека, да Хозя Алея, да Бурнака, да Бочу, да Абдыла, да Идыл Хозю да Кареку, да Темеша, а всех их 11 человек. Да отпущены с ними Менли-Гиреевы ж царевы торговые люди, которые приездили с Мерекою и с Кулдербышом: Дауд, да Тахир, да Мулкоман, да Ахы, да Бабаали, да Мамаш, да Магамет, да Кул-Урус, да Бухтусуфуй, да Кузабердей, да Мамалай, да Исан Хозя, да Кулач Афыз, да Кадыбердей, да Садырь, да Шереф, да Ойсул, да Сейфулла, да Шугур, да Карачюра, да Тана, да Кул-Урус, да Тевекель, да Бочюк, да Исмаиль, да Апак, да Шавал, да Азигурман, да Адына, да Кутугечь, да Мона, да Оман, да Магамет Азямлянин, и всех тех 33 человеки; да Азямляне ж: Шагабедин, да Мубарык, а Фряз Яков, да Иван, Онтон, да у Якова человек, да Арменин Серкиз, да у него человек, и тех 7 человек; а всех их 58 человек. Да с ними ж отпущен Янчюра.

А се наказал князь велики и словом Кадьшу да Кожуху, а запись им не дана. Как оже даст Бог приедут на Киев, и им пытати вежливо, как бы незнакомисто: где ныне царев сын Ойдаров? И будет на Киеве, а нелзе будет им к нему ити, и им ити к нему тайно, чтобы того не ведал никто. Да молвити им Айдарову сыну: похочешь ехати ко государю к нашему к великому князю, и государь наш князь велики хочет тебя жаловати, да и твоего отца хочет жаловати; и ты бы к нему поехал. А как приедут в Канев, и им тайно ити к Уздемирю царевичю, да говорити с ним наодине ж, а молвити: присылали есте к нашему государю к великому князю, чтобы вам к нему ехати. И князь велики послал был к вам свои грамоты, чтобы есте к нему поехали, а он вас жаловати хочет, и те грамоты до вас не дошли; и [217] ты ныне похочешь ехати к нашему государю к великому князю, и ты бы поехал, а государь наш тебя жаловати хочет.