1490, октября 28. Посольство от великого князя Ивана Васильевича к царю Менгли-Гирею с боярином Василием Васильевичем Ромодановским: великий князь извещает царя о военных действиях, бывших летом в степи, и обещает на будущее лето снова послать своих Татар под Орду Ахматовых детей; извещает также о своем союзе с нагайскими мурзами. Наказы князю Ромодановскому: заботится, чтобы царь воевал или Орду Ахматовых детей, или королевских земли, жить в Крыму до следующей осени и извещать великого князя о всех ордынских делах (Дела Крымские, № 1, стр. 196-216).

Лета 99, княжо Васильево Васильевича Ромодановского посолство ко царю к Менли-Гирею. А поехал с Москвы октября 28.

А се говорити князю Василью Васильевичю Ромодановскому от великого князя Менли-Гирею. Брат твой князь велики Иван велел тобе челом ударити. Князь велики велел видети твое здоровье. Да поминки подати.

А после того речь говорити, как царь велит собе говорити, перед князми ли, наедине ли.— Князь велики велел тобе говорити: с весны рано посылал есми Сатылгана царевича и уланов и князей и Русь с ним твоего для дела под Орду, а приказал есми ему так, чтобы из-под Орды с поля не ходил без моего слова и до зимы; а велел есми к тобе весть послати, как бы нам Бог дал с обеих сторон твоим и моим недругом, Ахматовым детем царевым, недружба учинити. И царевичь по моему слову и весть к тобе послал, да от тебя вести не дождал, а пошел к собе без моего веданиа: ино то царевичь учинил молодою мыслью; а уланы и князи не гораздо учинили, что ему так думали.— Князь велики велел тобе говорити: приказал еси ко мне с Кадышом и с Кучменем, чтобы мне велети царевичю опять под Орду идти твоего для дела: ино Кадыш и Кучмень приехали ко мне от тобя поздо, зима уж пришла, ино ужь под Орду нелзе итти.— Князь велики велел тобе говорити: а что есми к тобе писал в своей грамоте с своим человеком с Грибцем, что было и Магмет-Аминевым царевым казанского людем быти под Ордою твоего для дела: ино сего лета у Магмет Аминя царя близко были его недрузи Нагаи, ино за тем Магмед Аминевы царевы люди под Ордою не были. — Князь велики велел тобе говорити: а даст Бог на весне рано Сатылгана царевича и уланов и князей да и Русь многих людей пошлю [99] под Орду, а прикажу аж даст Бог твоего дела беречи накрепко, что бы с поля не ходил и до зимы; а пойдуть на тобя цари Ахматовы дети, и он бы у них на хребте был, а дело бы делал, сколко ему Бог поможет, как бы нам дал Бог с обоих сторон своим недругом Ахматовым детем, недружба учинити. А к Магмед Аминю царю к казанскому прикажу, чтобы на весне свою рать послал под Орду твоего для дела; а хочю аж даст Бог твоего добра смотрити и дела твоего беречи, как нам Бог поможет.— Князь велики велел тобе говорити: присылали ко мне Муса мырза с братьею своего человека Семена Багатыря, а хотят со мною одиначитися на наших на вопчих недругов, на Ахматовых детей на царевых, чтобы мне с ними заодин быти на них, а они со мною хотят на них быти заодин. И яз к Мусе мырзе и к его братье того деля своего человека послал с их человеком с Семеном с Багатырем вместе, а хочю с ними аж даст Бог содиначитися на тех наших на вопчих недругов. А как у меня будет от Мусы мурзы и от его братьи наш человек да их люди, а каково будет дело, и яз к тобе весть пошлю.— Князь велики велел тобе говорити: как есми тобе на чем молвил и правду дал, на том и стою, другу твоему есми друг, а недругу твоему есми недруг; а на царей, на Ахматовых детей, и на короля с тобою есми один человек. А ты на чем мне молвил и правду дал, на том бы еси и стоял, моему бы еси другу друг был, а недругу бы еси моему недруг был; а на царей бы еси, на Ахматовых детей, и на короля со мною был один человек.

А се говорити царю назавтрее, или на третей день наедине. Князь велики велел тобе говорити: прислал еси ко мне свою грамоту с своим человеком с Кутушом, а писал еси о своем брате о Издемире о царевиче да о своем братаниче о Девлеше о царевиче, что выбежали от турского к твоим да и к моим недругом, к Ахматовым детем ко царевым; и будет тобе надобе, чтобы те царевичи у твоих недругов у Ахматовых детей не были, и яз твоего для дела пошлю их звати к собе, чтобы поехали ко мне.— Князь велики велел тобе говорити: послом нашим межи нас проходити истомно; и ты бы поуправил дорогу, чтобы моему послу путь был чист на Азов, да на Кафу, без тамги и без всех пошлин.

Да после всех речей, как будет пригоже, молвити царю наедине же. Господарь мой князь велики велел тобе сказати: сказывал ми Мусин мырзин человек Семен Богатырь, что деи Муса мырза хотел к тебе послати своего человека, а хочет деи с тобою содиначитися на тех на наших на вопчих недругов, на Ахматовых детей на царевых. [100]

II. Да сказати князю Василью Менли-Гирею царю, что князь велики к его брату к Издемирю царевичю да к братаничю его к Девлешу царевичю и грамоты свои послал, чтобы к нему поехали; а те грамоты сказати князю Василью у собя. И вьзвелит Менли-Гирей царь грамоты великого князя к тем царевичем послати, и князю Василью послати к ним грамоты великого князя. Будет лзе ехати к тем царевичем с теми грамотами великого князя Татаром, и князю Василью из тех Татар, которые с ним посланы провожати его, послати к тем царевичем с великого князя грамотами, кого будет пригож; а будет нелзе великого князя Татаром ехати к тем царевичем с теми грамотами, а будет Менли-Гирею царю пригож своих людей послати с великого князя грамотами к тем царевичем, и Менли-Гирей царь с своими людми пошлет те грамоты. А будет и Менли-Гиреевым царевым людем нелзе ехати к тем царевичем с великого князя грамотами, а будет с кем пригоже с торговыми людми с Татары послати те грамоты, ино с торговыми людми с Татары те грамоты послати.

А се таковы грамоты послал князь велики ко царевичем, к Издемирю, Кази-Гирееву сыну, да к Девлешу, к Довлетяр царевичеву сыну, Кази-Гирееву внуку, татарским писмом, Абляз бакшеева писма. А се списки переведены с татарского писма:

От великого князя Ивана Уздемирю царевичю. Отець твой Ази-Гирей с нами был в дружбе, а братья твои Нурдовлат царь и Менли-Гирей царь с нами в дружбе и в братстве. Нынеча слышели есмя, что в чюжом юрте стоишь, а конь твой потен; и мы, поминая к собе отца твоего дружбу да и братьи твоей Нурдовлатову цареву и Менли-Гирееву цареву дружбу и братство, тобе хотим дружбу свою чинити: похочешь у нас опочива, и ты к нам поеди, а мы тобе в своей земли опочив учиним и добро свое, как даст Бог, хотим тобе чинити. А которые твои люди с тобою приедуть, и мы тебя деля тех твоих людей хотим жаловати. Сю свою грамоту с своею печатью послали есмя.

От великого князя Ивана Давлешу царевичю. Дед твой Ази-Гирей царь с нами был в дружбе, а дяди твои Нурдовлат царь и Менли-Гирей царь с нами в дружбе и в братстве. Нынеча слышели есмя, что в чюжом юрте стоишь, а конь твой потен; и мы, поминая к собе деда твоего дружбу и дядь твоих, Нурдовлатову цареву да Менли-Гирееву цареву дружбу и братьство, тобе хотим свою дружбу чинити: похочешь у нас опочива, и ты к нам поеди, а мы тобе в своей земле опочив учиним и добро свое, как даст Бог, хотим тобе чинити. А которые твои люди с тобою приедут, и мы тобя деля тех твоих людей хотим жаловати. Сю свою грамоту с своею печатью послали есмя. [101]

III. Память князю Василью. Как выговоривши царю речи, все посолство, да и список царю дати тех речей и все посолство, а молвити так: чего, господине, буду не исправил которых речей, ино восе список. Да список дати с посолства, а собе противень оставити.

А учнет царь говорити о том: Сатылган царевичь ходил под Орду, да не учинил ничего. И князю Василью говорити: о том господарь мой к тобе и в посолстве со мною наказывал, что царевичь учиниль то молодою мыслью, а уланы и князи учинили негораздо, что ему так думали; а вперед господарь мой накажет царевичю о том накрепко, велит твоего дела беречи и делати, сколко Бог поможет. А ныне которые люди с царевичем были под Ордою, и они улусы и головы имали, а делали дело сколко могли.

А какими делы цари, Ахматовы дети, пойдут на великого князя, и князю Василью говорити Менли-Гирею о том, чтобы по своей правде, как на чем великому князю молвил и правду дал, чтобы пошел на Орду. А за какими делы Менли-Гирей царь сам не пойдет на Орду, и князю Василью говорити царю, чтобы послал на Орду сына да брата с своими людми. Да о том говорити накрепко, чтобы Менли-Гирей царь пошел на Орду, или сына да брата своего послал на Орду с своими людми. А какими делы не пойдет Менли-Гирей царь на Орду и сына и брата своего не пошлет с своими людми, и князю Василью говорити о том, чтобы царь на короля пошел на его землю. А пойдет Менли-Гирей царь на Орду, или сына да брата своего пошлет, а князю Василью велит с собою итти на Орду, или с своим сыном и с братом, и князю Василью итти. А не пойдет царь на Орду, ни сына ни брата своего не пошлет, а пойдет на Литовскую землю, а князю Василью велит с собою итти, а цари Ахматовы дети пойдут на великого князя,— и князю Василью итти со царем на Литовскую землю. А взмолвит царь о том: послы ездят к великому князю от короля, и князь велики не помиритлися с королем? И князю Василью молвити так: послы, господине, к осподарю к нашему к великому князю ездят от короля о обидных делех, а миру осподарю нашему великому князю с королем нет. Да беречи князю Василью накрепко того, чтобы Менли-Гирей царь с королем не мирился, ни канчивал. А учнет Менли-Гирей царь князя Василья отпущати к великому князю на весне, ино на весне оттоле из Крыма не ездити, а беречи дела великого князя по великого князя наказу. А хотя и на лете учнет царь отпущати князя Василья, а учнут цари, Ахматовы дети, кочевати межи Дону и Крыма, и князю Василью не ехати ж к великому князю оттоле из Крыма, а отвечивати царю тем: недрузи, господине, ваши, цари Ахматовы дети, кочюют по сей стороне Дону близко [102] осподаря нашего великого князя земле, и мне как проехати к своему осподарю? А ещо ми, господине, приказал осподарь мой князь велики беречи того: какими делы цари Ахматовы дети пойдут на моего осподаря на великого князя, и ты бы на Орду пошел; а за какими делы на Орду не пойдешь, и ты бы на короля пошел на его землю; а мне осподарь мой князь велики велел то видети. Да толко Орда учнет кочевати межу Дону и Крыма, и князю Василью однолично оттоле из Крыма не ехати ни с весны, ни в лете, а великого князя обсылати о всем о тамошнем деле. А которые Татарове проводят князя Василья ко царю Менли-Гирею, а не захотят Татарове зимовати у князя у Василия в Перекопи, и князю Василью тех Татар отпустити, а к великому князю с ними отписати про Орду, каково будет дело Менли-Гиреево царево со цари с Ахматовыми детми. Да и о турском, да и о волошском, да и о короле о польском, да и о всем о тамошнем деле отписати. А которые Татарове, 6 человек, посланы со князем с Васильем, которым у него быти, а каково дело поновится тамо у Менли-Гиреа у царя про Орду после тех Татар, которые князя Василья провожали на зиме сей, или на весне, и князю Василью из тех шти человек дву Татаринов послати к великому князю о всем о тамошнем деле. А Менли-Гирею царю сказати, что к великому князю шлет, и Менли-Гирей бы царь к великому князю свою грамоту послал с ними отписавши о тамошнем деле. А захочет царь и своего человека послати с ними к великому князю, и он пошлет. А поновится после того каково дело про Орду, и князю Василью посылати с вестми к великому князю из тех четырех человек, которые у него останутся; а великого князя без вести не держати обо всем. А Менли-Гирею царю сказывати: коли учнет посылати к великому князю, и Менли-Гирей бы царь к великому князю послал с ними свои грамоты; а захочет с ними и своего человека послати, и он и своего человека пошлет. А вспросит царь князя Василья о том: что к великому князю из Нагай от царя посол пришол, а от Мусы и от Ямгурчея люди их пришли? И князю Василью молвити так: осподарь мой князь велики к тобе меня уже отпустил; ино ко осподару к нашему к великому князю от царя Абелек Именека из Нагай посол пришел, а от мурз от Мусы и от Ямгурчея люди их пришли. А слышел есми у своего господаря у великого князя, что прислали к нему о дружбе и о единачстве.

IV. А се говорити князю Василью от великого князя Амгурчею царевичю. Князь велики велел тобе говорити: приказывал еси ко мне с моим боярином с Дмитреем и с своим человеком с Курденичем, что нам дружбу свою чинишь и дела нашего бережешь и вперед хочешь [103] нам дружбу свою чинити. И ты бы и вперед нам дружбу свою чинил и дела нашего берегл; а мы, как наперед сего тобе свою дружбу чинили, так и вперед аж дасть Бог хотим тобе свою дружбу чинити. А что еси ко мне приказывал о пансыре, да и о том, что сына женишь, и нам бы к тобе что послати, и мы к тобе пансыри послали наперед сего с твоим человеком с Курденичем; а ныне есмя к тобе послали. Да явити поминки обои, что в списке написаны.

А се говорити Махмет-Кирею царевичю, Менли-Гирееву сыну цареву. Князь велики велел тобе говорити: писал еси ко мне в своей грамоте и словом еси ко мне приказывал с своим человеком с Белтрюком, что нам дружбу свою чинишь и вперед хочешь нам свою дружбу чинити и дела нашего беречи. И ты бы и вперед нам свою дружбу чинил и дела нашего берегл; а мы к тобе аж даст Бог хотим свою любовь держати.

А се говорити Бурашу князю, Именекову сыну. Князь велики велел тобе говорити: приказывал еси ко мне с моим боярином с Дмитреем и в грамоте в своей писал, что нашего добра смотришь и дела нашего бережешь, и вперед хочешь нашего добра смотрити и дела нашего беречи. И ты бы и вперед нашего добра смотрил и дела нашего берегл; а мы как наперед сего к тобе свое добро держали, так и ныне аж даст Бог хотим к тобе свое добро держати.

А се говорити Довлетек мырзе, Именекову сыну. Князь велики велел тобе говорити: приказывал еси к нам с моим боярином с Дмитреем и в грамоте в своей писал, что нашего добра смотришь и дела нашего бережешь и вперед хочешь нашего добра смотрити и дела нашего беречи. И ты бы и вперед нашего добра смотрил и дела нашего берегл; а мы как наперед сего к тобе свое добро держали, так и нынеча аж дасть Бог хотим к тобе свое добро держати. А что еси к нам приказывал о том, что еси сам женился, а сына еси своего женил, и нам бы к тобе послати в пособь,— и мы к тобе послали. Да явити поминки обои, что в списке написаны.

А се говорити Янкуват мырзе Мангиту. Князь велики велел тобе говорити: приказывал еси ко мне с моим боярином с Дмитреем, что наше добро к себе памятуешь, а хочешь нам свою дружбу чинити, где ни будешь.— Князь велики велел тобе говорити: и ныне слышели есмя, что еси с своего юрта пришел к нашему брату к Менли-Гирею царю. И мы по первому своему добру и вперед аж даст Бог хотим к тобе свое добро держати; а ты бы нам свою дружбу чинил, где ни будешь. Да явити поминки.

А се говорити Нур-салтан царице, Менли-Гирееве цареве Темиреве [104] дочери. Князь велики велел тобе говорити: писала еси ко мне в своей грамоте и словом еси ко мне приказала своим человеком с Тюгулеком, что нам добро свое чинишь и добра нашего смотришь. И ты бы нам и вперед свое добро чинила и добра нашего смотрила; а мы как наперед сего тебе свое добро чинили, так и вперед аж даст Бог хотим тобе свое добро чинити. Да как отдав поминки обои царице Темиреве дочери, ино после того спустя дни с три или с четыре, говорити от великого князя царице Темиреве дочери. Князь велики велел тобе говорити: приказывал есми к тобе с своим человеком с Грибцем о зерне о жемчюжном, что у тебя зерно жемчюжное велико хорошо, Тахтамышевское царево. И ты к нам отписала в своей грамоте: ялася еси то зерно прислати к нам с своим человеком; и ты бы того зерна мне не заборонила, к нам бы еси то зерно прислала. А что будет тобе у нас надобе, и мы того не бороним.