№ 21.

1489, сентября 6. Грамоты великого Князя Ивана Васильевича в Крым: 1) к царю Менгли-Гирею: хотя царь и просит отпустить к нему своего брата Нурдовлата царя, но великий князь покуда не отпускает и не советует царю брать его к себе, потому что не ручается, чтобы не случилось с царем чего дурного от Нурдовлата; 2) к жиду Захарию, таманскому князю, с приглашением приехать в Москву (Д. Кр. № 1, стр. 178-184).

I. Лета 98, сентября 6, сякову грамоту послал князь велики к Менли-Гирею ко царю с своими татары, с Иваном с Карчеевым сыном да с Черевчеем, татарским писмом; а писал Абляз Бакшей. А поехали с Исмеиль уланом да с Аксарыем вместе, со царевыми людми с Менли-Гиреевыми.

Брату моему Менли-Гирею царю велики князь Иван челом бьет. Прислал еси во мне с моим боярином с Дмитреем своих послов Бердовлетя да Хозяша и свои грамоты. А в грамотах в своих писал еси и свое слово ко мне приказал еси с Бердовлетем и с Хозяшем и с моим боярином: как еси нам на чем молвил и правду учинил, на том и стоишь, и вперед хочешь свое братство и дружбу полно чинити; а яз тебе на чем молвил и правду дал, на том и стою, и вперед, как дасть Бог, добра нашего прибывало. А что еси писал к нам в своих грамотах и словом мне от тобя говорили Бердовлет да Хозяш о твоем брате о Нурдовлате о царе, как бы твоему брату Нурдовлату царю у тобя быти, а вам бы соединачитися на своих недругов, да и грамоту свою о том деле к своему брату к Нурдовлату царю прислал еси. А говорили мне Бердовлет да Хозяш так, как бы мне брата твоего Нурдовлата царя к правде привести и укрепити, как бы он под тобою царства не хотел, а покладываешь то дело на нас, какова будет о том деле наша мысль: пригоже ли [76] брату твоему Нурдовлату царю у тобя быть? Ино тобе ведомо из старины, от дед и от отцов ваших: на одном юрте два осподаря бывали ли? А где и бывали будут два осподаря на одном юрте, ино которое добро меж их было? А брата твоего Нурдовлата царя, как ми укрепити? Здесе мне и правду даст, как бы ему под тобою царства не хотети; а коли он тамо будет с тобою вместе, и мне по чему ведати, что будет у него в мысли? Ведаешь сам, с Нурдовлатом со царем одного отца дети вы, а опосле отца вашего Ази-Гирея царя колко лет брат твой Нурдовлат на царстве был, а те же люди ему служили, которые ныне у тобя Ино почему ведати, у всех ли у твоих людей одна мысль, все ли тобя хотят на твоем осподарьстве, или которые захотят брата твоего Нурдовлата царя на том юрте; и какими делы будет межи вами рознь с братом с твоим с Нурдовлатом со царем, ино твоему делу тогды которое добро будет? А то к тобе пишу потому как есмя с тобою в братьстве и в дружбе, как у нас в мысли есть, и яз к тобе свою мысль писал; а твоя как будет мысль о том деле, и ты к нам свою мысль отпиши не мотчая. А ныне есми о том деле и брату твоему Нурдовлату царю не говорил и грамоты твоей не велел есми ещо ему дати, доколе к нам свою мысль отпишешь. А за тем есми и Бердовлетя и Хозяша к тобе не отпустил и своего боярина не послал; а восхочеш к собе брата своего Нурдовлата царя, чтобы с тобою вместе был, а взвериш ему, и ты к нам отпиши, и мы к тобе брата твоего Нурдовлата царя отпустим. А что еси к нам писал в своих грамотах, как бы нам потомити улусы Муртозины и Седехматовы, твоих и моих недругов; и мы и наперед сего то дело делали, сколко было лзе, а и вперед, как дасть Бог, хотим твоим и своим недругом недружбу чинити, сколко Бог поможет. А что еси писал к нам в своей грамоте о Мустофине сыне о Мамышаке о царевиче, что нашим людем в руки попал, и нам бы тобя деля его пожаловати; и мы тобя деля его пожаловали и к тобе его отпущаем.

Память Ивану Карчееву сыну. Как дасть Бог будет у Менли-Гирея царя и грамоту от великого князя подасть царю, ино после того назавтрее, или на третей день, молвити от великого князя Менли-Гирею царю: брат твой, господине, князь велики к тобе приказал: был у нас паробок, Данилком зовут, селянин, а сказал твою бологодеть с собою; а ты к нам писал грамоту свою, что тот Данилко твой паробок, а послал его о своем надобье. И мы, тобя деля, с того Данилка тамги и пошлин никоторых не велели взяти. А вспросит царь Ивана Карчеева: сколко было тамги и пошлин взяти с того Данилка? Ино [77] сказати: взяти было у того Данилка пошлин сто алтын да сорок алтын.

II. Да с ними ж вместе послал князь велики к Захарье, ко князю к таманскому, Мичюру Доманова, москвитина; а послал с ним к Захарье, к таманскому князю, грамоту свою, и речь с ним приказал. А царевым Менли-Гиреевым людем да и великого князя татаром, Ивану да Черевчею, того неведомо, что Мичюра послал к Захарье, князю в таманьскому. А Данилко селянин, что живет в Кафе, поехал с Мичюрою ж вместе.

А се такову грамоту послал князь велики к таманскому князю с Мичюрою. Иоан, Божиею милостью, велики господарь всеа Руси, Володимерски, и Московски, и Новгородски, и Псковски, и Тферски, и Югорски, и Вятски, и Пермьски и иных, Захарье, князю таманскому. Что от нас учнет тобе говорити наш человек Микифор, и ты бы ему верил, то есть наши речи. А писан на Москве, в лето 6998, месяца сентября 6.

Память Микифору Мичюре Доманову. Говорити Захарье, князю таманьскому: господарь наш всеа Руси велел тобе говорити: приказывал еси к нам, что хочешь к нам ехати служити, и ты бы к нам поехал, а мы твоей службы хотим и жаловати тобя хотим. Да приказал еси к нам, чтобы нам к тобе послати своих людей встречю, с кем бы тобе до нас доехати. И мы аж дасть Бог своих людей к тобе пошлем на весне, а велели есмя своим людем ждати тобя на усть Миюша и на Тайгане, и ты бы в том месте наших людей наежжал. А срок аж дасть Бог нашим людем быти в том месте на усть Миюша и на Тайгане 4 недели по Велице дни; а какими делы не поспеют на тот срок наши люди в том месте быти, или ты за чем не успееш к нашим людем на тот срок быти, ино и другой срок на том месте вам быти на Троицин день; а и так за чем не поспеется, ино третей срок, Петров день, вам с нашими людми сьехатися на том месте на Миюше и на Тайгане.