1483, марта 19. Посольство от великого Князя Ивана Васильевича к царю Менгли-Гирею с боярином Князем Иваном Володимировичем Лыко-Оболенским: благодарность за твердость в союзе против врагов; совет отпустить к царю Айдару ею жену и сына. Речи к князю Именеку, чтобы он заботился у царя о делах великого князя (Д. Кр. № 1, стр. 84-90).

I. Лета 91, княжо Иваново Лыково посольство ко царю к Менли-Гирею, к Ази-Гирееву сыну. А поехал с Москвы марта 19. [35]

Правити посольство князю Ивану Володимеровичю от великого князя к царю Менгли-Гирею. Князь велики Иван челом бьет. Князь велики послал видети твое здоровие, волного человека.

Князь велики велел тобе говорити: пожаловал еси, братом и другом собе меня учинил, и правду еси мне дал другу моему другом быти, а недругу недругом быти; а мне твоему другу другом быти, а недругу недругом быти; и ты как молвил свое крепкое слово, по тому то дело и полнишь. И яз тобе о том челом бью.— Князь велики велел тобе говорити: а и вперед бы еси пожаловал, на чем еси мне свое слово молвил и правду дал и ярлыки дал, на том бы еси и стоял, другу бы еси моему другом был, а недругу недруг; и яз на чем тобе молвил и правду дал, на том и стою, и вперед аж дасть Бог и до живота хочю на том стояти, другу есми твоему друг, а недругу недруг, и добра твоего везде хочю смотрити.

А се говорити царю назавтрее наедине. Князь велики велел тобе говорити: в ярлыкех твоих написано и правда межи нас учинилася на том, другу другом быти, а недругу недругом быти; а быти нам с тобою заодин на всякого недруга. И ты бы пожаловал, на той правде стоял, другу бы еси моему друг был, а недругу недруг, а с королем бы еси не канчивал. А яз как на чем тобе молвил, так по той по своей правде твоему есми другу друг, а недругу недруг. Каково будет мне дело с королем, и яз тобя без вести не держу. — Князь велики велел тобе говорити: прислал еси ко мне ярлык свой и словом еси ко мне приказал с своим человеком с Кудобереем о своей братье о царех, чтобы мне твоего дела поберечи, чтобы твоему делу порухи не было. Ино есми и наперед сего берег твоего дела, а твою братью царей взял есми к собе твоего для дела, а держу их у собя и истому своей земле чиню тобя для. А и нынеча и вперед аж даст Бог дела твоего хочю беречи и добра твоего смотрити, сколко ми Бог поможет.

Да после тех дел, на другой день или на третей, говорити царю о том наедине жо. Князь велики велел тобе говорити: брат твой Айдар царь присылал ко мне о том, чтобы ему послати по жену по свою да по сына. И яз, берегучи твоего дела, велел есми ему послати по жену и по сына; и он и послал грамоту свою к своей жене. Ино моя мысль такова: пригоже ти к нему жену его и сына отпустити своего для дела. И будет ти то надобе, и ты бы к нему отпустил жену его и сына.

Да ту грамоту цареву Айдарову явити царю Менли-Гирею; возмет ее к собе, ино ему дати, а велит Айдарове царице отдати, ино к ней оттослати та грамота с толмачем с Иванчею. [36]

А учнет говорити царь о том: ко мне князь велики приказал, чтобы яз с королем не канчивал; а князь велики так не помирит ли ся с королем? И князю Ивану говорити так: осподарь мой князь велики к тобе приказал, чтобы еси пожаловал, на своем слове стоял, на чем еси ему молвил, другу бы еси его друг был, а недругу недруг. А осподарь мой на чем тобе молвил, на том и стоит, твоему другу друг, а недругу недруг; а каково будет ему с королем дело, и он тобя без вести не держит.

А взмолвит царь так: в ярлыке написано меж нас с великим князем, что нам быти заодин и на Ахмата царя; ино Ахмата нынечя нет; а на его месте которой будет царь, а на того князь велики со мною как? И князю Ивану молвити так: написано, господине, в ярлыце, что вам с моим государем быти заодин на всякого своего недруга. И осподарь мой князь велики на том и стоит, на всякого недруга с тобою один человек.

А учнет говорити царь о своем брате о Нурдовлате царе, и князю Ивану говорити так: осподарь мой князь велики, берегучи твоего деда, и взял к собе твою братью царей Нурдовлата и Айдара; да и нынечя твоего деда бережет и вперед хочет беречи, сколко ему Бог поможет.

А будет князю Ивану тамо весть полная, что король пойдет на великого князя, ино говорити царю о том, чтобы царь пожаловал, по своему крепкому слову и по ярлыку, пошол на королеву землю.— Да то памятовати князю Ивану: учнет царь посла своего посылати к великому князю, ино говорити о том: как пожаловал царь великого князя, братом и другом собе учинил, и правду на том дал, по тому бы и жаловал, посла бы своего послал без пошлин.

II. А се князю Ивану говорити к князю Именеку. Князь велики велел тобе говорити: сказывал ми мой боярин Юрьи Шестак, что зовешь меня собе недругом; ино что моя недружба к тобе, опроче добра отца нашего великого князя да и нашего? Коли еси был у нашего отца, и отец наш да и мы тобе добро свое чинили. А как еси почал быти на своем месте у царя в жалованье, и мы к тобе добро ж свое чинили, а ты нам дружбу свою чинил. Ино и нынечя, как еси нам наперед того дружбу свою чинил, так бы еси и нынечя нам дружбу свою чинил, а дела бы еси нашего у царя берегл. А мы как наперед того, так и ныне к тобе хотим добро свое держати.— Да как погладит ту речь Именек, ино ему говорити от великого князя о том. Князь велики велел тобе говорити: царь пожаловал, братом и другом собе меня учинил, а быти нам с ним на всякого недруга заодин, и правду мне царь на том дал; а ты с царем ко мне правду учинил. Царь пак [37] на чем мне свое слово молвил, по тому то дело и полнит. И ты бы и вперед нашего дела берегл у царя, на чем мне царь свое крепкое слово молвил, на том бы и стоял; да и ты на чем свое слово мне молвил со царем, на том бы еси и стоял; а дела бы еси нашего у царя берегл; а яз на чем царю молвил, на том и стою.

А се список с грамоты. Такову грамоту Айдар царь послал к своей жене со князем с Иваном с Лыком. От Айдара Бараш салтану поклон. Познают то: Бог на роду на челе написал тобе мне женою быти, а яз тобе муж был от тебя съсель далече зашел есми; а нынечя последнем веце в пяти днех кто будет, кто не будет, с своим ли мужем в одном месте хочю быти, так мола. И ты братье своей гораздо добив челом, сюда приеди навсяко, безпереводно, как ся грамота дойдет; еще меня похочешь, и ты приеди. Молвя, с коневою тамгою грамоту послал есми. А еще одно слово есть: сама приедешь, и ты и Данияла с собою ж взем привези.