1482, мая 14. Посольство от великого князя Ивана Васильевича к царю Менли-Гирею с Михаилом Васильевичем Кутузовым: великий князь, по просьбе царя, держит и не выпускает от себя его брата, царя Нурдовлата; а царь бы также позаботился о деле великого князя, шерть к королю сложил, и его земли, подольские и киевские места, непременно нынешним летом воевал (Д. Кр. № 1, стр. 77-83).

Лета 90, Михайлово Кутузова посольство к царю к Менли-Гирею, к Ази-Гирееву сыну. А поехал с Москвы маия 14.

Память Михайлу Васильеву сыну Кутузову. Как дасть Бог приехав в Орду, ино, не ходя к царю к Менли-Гирею, да видетися с Юрьем с Шестаком; а любо послати к Юрью о том, чтобы Юрьи шел к царю наперед, да сказал бы царю, что Михайлу быти у царя, наперед о здоровье спросити его от великого князя, да с поминком. А речь ему правити от великого князя наедине. А захотят царевы Нурдовлатовы люди с Михайлом вместе итти к царю к Менли-Гирею, ино Михайлу им с собой вместе не велети ходити к царю; всхотят к царю пойти наперед Михайла, и они наперед идут, а любо бы после Михайла шли к царю, а вместе с ними Михайлу к царю не ити. А как Михайлу пришед к царю, ино от великого князя царю челом ударити: князь велики Иван челом бьет. Да спросити о здоровие: князь велики послал видети твое здоровие, волного человека. Да подати поминок.

А речь правити царю назавтрее, наедине. А се речь. Князь велики велел тобе говорити: приказывал еси к своему брату, к Нурдовлату царю, а звал еси его к собе: а ко мне еси приказывал, чтобы мне его к тобе пустити. И яз, по твоему приказу, отпустил был его к тобе сее весны. А за тем ты ко мне прислал ярлыки свои с своим человеком с Сарыкою о своих делех, да и о своем брате о Нурдовлате царе. И яз, твоего для дела, не отпустил его; и он к тобе послал людей своих. И осподарь мой князь велики велел тобе то сказати.— Князь велики велел тобе говорити: пожаловал еси меня, братом и другом собе учинил, другу другом быти, а недругу недругом быти; а на короля именем тобе быти со мною заодин; а будешь с королем [33] и в докончяние и тобе королю шерть сложити; а на том еси пожаловал, свое крепкое слово мне молвил и правду дал и ярлыки дал. — Князь велики велел тобе говорити: посылал есмь к королю своих послов о любви и докончянье. И король ко мне присылал своего посла Богдана после того, как есми к тебе отпустил твоих послов и своего боярина Юрья послал. А любви и докончаниа король со мною не хочет; а которые мои городы и волости и земли мои за собою держит, а того мне не отдаст.— Князь велики велел тобе говорити: и ты бы пожаловал, как еси мне на чем свое крепкое слово молвил и ярлыки дал, по тому бы еси и жаловал, чтобы еси шерть королю сложил, да и рать бы еси свою на него послал. А яз тобе челом бью. А на чем есми тобе молвил и правду дал, на том и стою, а добра твоего везде хочю смотрити.

А взмолвит царь так: яз с королем помирился по великого князя приказу, что ко мне приказал о том с своим боярином с Тимофеем. И Михайлу говорити так: осподарь мой князь велики того к тобе с Тимофеем не приказывал; а коли бы к тобе о том с Тимофеем приказал, и он бы тобе его не выдавал.

А учнет царь говорити о том: с королем межи нас написано в докончание так, что нам не обослався роты не сложити; а яз о том с королем обошлюся. И Михайлу говорити так: о том меня осподарь мой князь велики не послал к тобе, чтобы тобе с королем обсылатися; а бьет тобе челом государь мой по твоему крепкому слову и по ярлыку, что тобе другу его другом быти, а недругу недругом быти, а на короля именем тебе с ним быти заодин; а будешь с королем и в докончанье, а каково будет моему государю великому князю с королем дело, и тобе королю шерть сложити. И ты бы пожаловал, по своему крепкому слову и по ярлыку, шерть королю сложил, да и рать бы еси свою на него послал. А осподарь мой челом бьет.

А учнет царь говорити о том: как ми нынеча на короля рать свою посылати? Именек от меня выбежал к моим недругом, да наводит на меня моих недругов; а люди у меня в розни. И Михайлу говорити так: будет ти, господине, нынеча нелзе болшие рати послати на короля, и ты бы пожаловал послал людей своих, сколко будет пригоже, а осподарю бы еси моему правду свою явил.

А учнет царь говорити о том: князь велики ко мне приказал, чтобы яз королю шерть сложил да и рать свою на него послал. И яз королю шерть сложу да и рать свою на него пошлю; а князь бы велики моего дела поберег, чтобы брата моего Нурдовлата царя держал у себя. И Михайлу говорити так: осподарь мой князь велики и сперва взял к [34] собе твою братью Нурдовлата царя и Айдара, твоего для дела; а осподарю моему корысти в них мало; а и нынечя держит их у собя и истому своей земле чинит, тобя деля твоего для дела. А ты бы пожаловал, по своему крепкому слову и по ярлыком осподарю моему правил; а осподарь мой и вперед добра твоего везде хочет смотрити и дела твоего беречи, сколко ему Бог поможет.

Да о том говорити царю накрепко, чтобы пожаловал, по своему крепкому слову и по ярлыком, великому князю правил, чтобы королю шерть сложил, да и рать бы свою на него послал. И имется царь шерть королю сложити да и рать свою послати на Литовскую землю, и Михайлу того дождати, чтобы царь перед ним послал к королю шерть сложити да и рать бы свою послал на Литовскую землю перед ним, хотя будет и долго тамо лежати, а того ждати. А великому князю послати Юрью и Михайлу русина, кого будет пригож, да татар с ним, колко будет пригож, наперед с тем, кого царь учнет посылати к королю шерти складывати, и кого в головах учнет наряжати ратью на Литовскую землю. А как учнет царь посылати рать свою на Литовскую землю, ино Михайлу говорити царю о том, чтобы пожаловал царь послал рать свою на Подольскую землю, или на Киевские места.

А вспросит царь Михайла о Именеке: у великого князя бывал ли кто от Именека человек его? И Михайлу говорити так: приехали, господине, от государя моего великого князя люди из Орды, да и Ординцы с ними; а сказывают осподаря моего люди, что деи Именекову человеку часа того быти за ними к моему осподарю к великому князю.

Список с грамоты. Такова грамота пошла с Михайлом с Кутузовым к Юрью к Шестаку. От великого князя Ивана Васильевича Юрью Ивановичю Шестаку. Послал есми к царю к Менли-Гирею Михайла Васильевича сына Кутузова. И что тамо учнет мое дело делати Михайло, и ты бы с ним мое дело делал заодин.