1480, апреля 16. Посольство от великого князя Ивана Васильевича к царю Менгли-Гирею с боярином князем Иваном Ивановичем Звенцом, для [17] заключения договора о союзе на общих неприятелей, царя Ахмата и короля Казимира; проекты ярлыка, какой следует непременно получить от царя Менгли-Гирея об этом союзе. Грамота великого князя Царю с обещанием всячески поддерживать последнего в случае потери им отцовского юрта. Просьба великого князя к царю и князю Именеку о пропуске его человека к Стефану, воеводе волошскому; посольские речи к Стефану волошскому о том, что великий князь согласен взят его дочь за своего сына. Речи великого князя князю Именеку, чтобы он хлопотал у царя о твердости союза на общих неприятелей (Д. Кр. № 1, стр. 39-59).

I. Лета 88, отпущен с Москвы князь Иван Звенец месеца апреля 16.

А се говорити князю Ивану Ивановичю Звенцю царю Менли-Гирею, Ази-Гирееву сыну.

Князь велики Иван челом бьет. Князь велики послал видети твое здоровие, волного человека.— Князь велики велел тобе говорити: пожаловал еси, братом и другом собе меня учинил еси, другу другом быти, а недругу недругом быти, и ярлык еси пожаловал дал и шерть еси ко мне на том учинил с своими уланы и со князьми. — Князь велики велел тобе говорити: прислал еси ко мне своих послов, Темешь улана да Лухбердея дувана, и ярлыки свои с ними прислал еси. А в ярлыкех в своих писал еси и словом ми говорили твои послы, что еси как пожаловал, меня братом и другом собе учинил, и ярлык шертной дал и правду мне дал с своими уланы и с князьми, так ныне по первому своему ярлыку и по своей правде жалуешь, на том и стоишь, и вперед хочешь жаловати, братство свое и любовь ко мне хочешь полнити, другу моему хочешь другом быти, а недругу недругом быти. И ты бы пожаловал, как еси свое слово мне молвил, по тому бы еси и жаловал; а яз как на чем тобе молвил и правду дал, на том и стою, и вперед аж дасть Бог и до живота хочю на том стояти, а твоему другу есми друг, а недругу недруг, а добра твоего везде хочю смотрити.— Князь велики велел тобе говорити: и наперед сего приказывал еси ко мне и в ярлыкех своих писал еси о своем недрузе о Зенебеке о царе, чтобы мне твоего для дела к собе его взяти. И яз его к собе взял и держал есми его у собя и истому есми своей земли чинил тобя деля.— Князь велики велел тобе говорити: нынеча еси ко мне ярлык свой прислал да и с своими послы еси приказал и с моим человеком с Иванчею о своей братье о царех о Нурдовлате да о Айдаре, что недруг твой король взял их к собе и держал их в своей земли на Киеве, а на твое лихо; и мне бы твоего для дела оттоле их к собе [18] взяти. И яз их к собе взял твоего для дела, а держу их у собя и истому своей земле и своим людем чиню тобя деля. — Князь велики велел тобе говорити: и говорили ми от тобя твои послы, да и с моим еси человеком с Иванчею ко мне приказал, чтобы яз на твоего недруга на Ахмата царя был с тобою заодин, а тобе со мною быти на него заодин: коли пойдет на тобя Ахмат царь, и мне бы царевичев своих отпустити на Орду; а на меня пойдет Ахмат царь, и тобе самому всести на конь, да на него пойти, или брата своего отпустити с своими людми. И яз с тобою на Ахмата царя один человек: коли пойдет на тобя Ахмат царь, и яз царевичев своих отпущу на Орду; а пойдет на меня Ахмат царь, и ты бы на него пошел, или брата своего отпустил с своими людми; такжо бы еси и на вопчяго нашего недруга на короля был со мною заодин, а яз с тобою на него заодин. А пожаловал бы еси, на том мне по первому своему ярлыку и по первой шерти крепкое свое слово молвил с своими уланы и со князьми, да и ярлык бы еси свой пожаловал дал по списку. А яз как на чем тобе молвил, так по той по своей правде с тобою заодин, и как ми Бог поможет.

Да как отделав все дела, ино князю Ивану говорити царю о том. Князь велики велел тобе говорити: правда учинилася межи тобя и меня, и ярлык еси пожаловал шертной дал. А в ярлыке в шертном написано так: кто твои люди повоюют моих людей без твоего ведания, а прийдут к тебе, ино тех казнити, а взятое отдати, а головы без откупа отдати. Осенесь пак твои люди приходили на мою украйну и головы поимали; и ты бы пожаловал, по своей правде, велел те головы все сыскав отдати моему боярину, а тех бы еси лихих велел показнити, чтобы вперед так не чинили. А что твои люди попали в руки моим людем, которые приходили на мою украйну, и яз тобя для тех людей не велел побити и к тобе есми их отпустил.

Да о том говорити князю Именеку, да просити на то ярлыка по списку. А учнет царь говорити так: ярлык есми шертной брату своему великому князю дал и правду есмя на том ярлыке межи собя с великим князем учинили, что другу другом быти, а недругу недругом быти. И яз ныне по тому ярлыку и на той правде стою: другу есми его друг, а недругу недруг. Ино иной ярлык на то о чем писати? — И князю Ивану о том говорити так: то, господине, свое жалование к моему государю к великому князю в ярлыкех своих писал еси и с послы еси с своими приказал, что еси как пожаловал, на чем свое крепкое слово молвил моему осподарю и правду дал с своими уланы и со князьми, на том и ныне стоишь, другу его хочешь другом быти, а недругу [19] недругом быти. И осподарь мой князь велики тобе и о том челом бьет, чтобы еси по тому по своему по первому ярлыку и по первой своей шерти жаловал; а осподарь мой как тобе на чем молвил и правду дал, на том и стоит. А о Ахмате царе приказал еси имянем к моему государю к великому князю с своими послы, да и с его человеком с Иванчею, чтобы с тобою осподарь мой на Ахмата царя был заодин; также еси и о короле имянем приказал к моему осподарю, что король взял к собе твою братью да держал их у собя на твое лихо, и король тебе недруг же. И государь мой князь велики, покрепляючи того, хочет у тобя на то опришнего ярлыка, что вам быти заодин на тех на вопчих ваших недругов, а по той же по передней вашей правде, а не изнова шерти у тобя на том хочет. А с послы с твоими осподарь мой князь велики говорил о том ярлыке и список им являл, и они ялися за то, что тобе ярлык дати по тому списку осподарю моему великому князю, по передней по вашей правде.

Да о том говорити накрепко, чтобы царь дал по списку. И учнет царь ярлык давати, а станет о той строце, что написано в списке так: «а пойдет царь Ахмат на тебя на моего брата на великого князя, и мне Менли-Гирею царю на Ахмата царя пойти, или брата своего отпустити с своими людми». А захочет то слово написати в ярлык так: «пойдет Ахмат царь на тобя на моего брата на великого князя, и мне Менли-Гирею царю на Орду пойти, или брата своего пустити с своими людми»,— ино молвити так: коли, господине, на Орду пойдешь, то на него же пойдешь; а хочешь, господине, в ярлыке так написати: «коли на моего осподаря Ахмат царь пойдет, и тобе тогды на Орду пойти, или брата послати с своими людми»,— и ты, господине, так и вели написати в ярлык. Да взяти ярлык по другому списку слово в слово. А учнут которые строки писати в ярлык не по списку, ино не по списку ярлыка не имати.

А взмолвит царь о том, чтобы брат мой князь велики послов своих к моему недругу ко царю Ахмату не посылал. И князю Ивану то отговаривати, а говорити так: осподарь мой князь велики как тебе на чем молвил и правду дал, на том и стоит, а на твоего недруга с тобою один человек. А послов своих осподарю моему к Ахмату-царю как не посылати? или его послам к моему осподарю как не ходити? осподаря моего земля с ним на одном поле, ино тому немощно быти, чтобы меж их послом не ходити. Да за то князю Ивану не иматся, чтобы послу великого князя к Ахмату царю не ходити.

А учинится тамо весть князю Ивану Звенцу, что Ахмат царь на сей стороне Волги, а покочюет под Русь, а хотя и ярлыка ещо не даст Менли-Гирей царь, ино князю Ивану о том говорити царю [20] Менли-Гирею, чтобы по своему жалованью и по своей правде и как к великому князю приказывал с своими послы и с его человеком с Иванчею, что на Ахмата царя с великим князем один человек, и он бы пожаловал, на Ахмата царя пошол, или брата своего отпустил с своими людми. Да о том говорити князю Именеку: коли Ахмат царь покочюет под Русь, и он бы дружбу свою великому князю чинил, а царю бы говорил, чтобы царь пожаловал пошел на Ахмата царя, или брата своего отпустил с своими людми; а не пойдет Менли-Гирей царь и брата с людми не отпустит на Орду, ино о том говорити, чтобы на Литовскую землю пошол, или брата отпустил с людми. Да о том говорити и князю Именеку. А будет Ахмат царь за Волгою, ино о том и не говорити, ни о царю, ни князю Именеку.

Да то памятовати князю Ивану. Учнет царь посылати посла своего к великому князю, ино говорити о том: как пожаловал царь великого князя братом и другом собе учинил и правду на том дал; по тому бы и жаловал, посла бы своего послал без пошлин.

II. А се списки, по тому ярлыка просити у царя. Наперед по первому списку просити ярлыка. А не даст по первому списку, ино по другому списку ярлык взяти.

Первой список. Менли-Гиреево слово брату моему, великому князю Ивану. Промеж нас братство и дружба учинилася, другу другом быти, а недругу недругом быти; а на том есми тобе крепкое слово молвя, ярлык дал и шерть есми тобе на том учинил с своими уланы и со князми, а ты мне правду дал. И яз пак по первому своему ярлыку, по своей шерти, другу твоему друг, а недругу твоему недруг; а ты по своей правде моему другу друг, а недругу моему недруг. А на Ахмата царя быти нам с тобою заодин: коли пойдет на меня царь Ахмат, и тобе моему брату великому князю Ивану царевичев твоих отпустити на Орду с уланы и со князми. А пойдет на тобя Ахмат царь, и мне Менли-Гирею царю на Ахмата царя пойти, или брата своего отпустити с своими людми. Также и на короля, на вопчего своего недруга, быти нам с тобою заодин: коли ты, на короля пойдешь, или пошлешь, и мне на него пойти и на его землю; или король пойдет на тобя на моего брата на великого князя, или пошлет, и мне также на короля и на его землю пойти. А буду и в шерти с королем, а тобе моему брату великому князю каково дело будет с королем, и мне королю шерть сложити, а быти ми на него с тобою заодин. А на том на всем, как писано в сем ярлыце, яз, Менли-Гирей царь с своими уланы и со князми, по первому ярлыку и по первой шерти, крепкое свое слово тобе есмя молвили от [21] детей и до внучат, в прок, правды деля. С нишаном ярлык послал есми.

Другой список. Менли-Гиреево слово брату моему, великому князю Ивану. Промежи нас братство и дружба учинилася, другу другом быти, а недругу недругом быти; а на том есми тобе крепкое слово молвя, ярлык дал, и шерть есми на том тобе учинил с своими уланы и со князми; а ты мне правду дал. Яз пак по первому своему ярлыку и по своей шерти другу твоему друг, а недругу твоему недруг; а ты по своей правде моему другу друг, а недругу моему недруг. А на Ахмата царя быти нам с тобою заодин: коли пойдет на меня царь Ахмат, и тобе моему брату, великому князю Ивану, царевичев своих отпустити на Орду с уланы и со князми; а пойдет на тобя Ахмат царь, и мне Менли-Гирею царю на Орду пойти, или брата своего отпустити с своими людми. Также и на короля, на вопчего своего недруга, быти нам с тобою заодин: коли ты на короля пойдешь, или пошлешь, и мне на него пойти и на его землю; или король пойдет на тобя на моего брата на великого князя, или пошлет, и мне также на короля пойти и на его землю. А буду и в шерти с королем, а тобе моему брату великому князю каково дело будет с королем, и мне королю шерть сложити, а быти ми на него с тобою заодин. А на том на всем, как писано в сем ярлыце, яз Менли-Гирей царь с своими уланы и со князми, по первому ярлыку и по первой шерти, крепкое свое слово тобе есмя молвили от детей и до внучат, в прок, правды деля. С нишаном ярлык послал есми.

III. Память князю Ивану Звенцу. Как отговорив болшие речи царю, ино после того на четвертой ли день, на пятой ли, ити ко царю с Лухбердей дуваном, да говорити ему от великого князя речи наедине.

Князь велики велел тобе говорити: прислал еси ко мне ярлык свой и словом еси ко мне приказал со Лухбердей дуваном, да и с моим еси человеком с Иванчею приказал о том: по грехом каково дело станется о юрте отца твоего царя, и тобе бы ко мне прийти в мою землю, а мне бы твоя истома подняти; да и грамота бы ми свою на том. тобе послати, по твоему списку написавши с крепостию. Ино яз добру твоему везде рад, чтобы дал Бог ты здоров был на отца своего месте на своем юрте; а то бы твое лихое дело несъсталося. А коли, по грехом, състанется таково твое дело, останешь своего юрта, а придешь к нам, и яз истому твою подойму и добра твоего хочю смотрити. А каковы еси у меня грамоты хотел, и яз такову грамоту по твоему списку написавши, к тобе послал с своею печатью. [22]

Да изговоривши ту речь царю, тутож ему дати грамота великого князя с золотою печатью. А се список с грамоты, такова грамота послана ко царю с золотою печатью:

Дай, Господи, тобе лихо не было, брату моему Менли-Гирею царю. А нешто ти ся състанет каково дело, в юрте отца твоего царя дело будет, а приедешь ко мне к великому князю Ивану, к брату своему, собою почен в головах, от меня от великого князя и от сына и от братии и от великих князей и от добрых бояр тобе царю, брату, и твоему брату и твоим детем и великим князем и добрым слугам никакова ми вам лиха не учинити, доброволно приедешь, доброволно куды восхочешь пойти — пойдешь; а нам тебя не держати. А сколко сила моя имет, печаловати ми ся царева отца твоего места, Орды досягати, надеяся на Бога, печаль свою учиню, другу друг, а недругу недруг буду. А опроче сех слов, и на коне учиню по той правде, как есми тобе по своей вере молвил и крест целовал. Так молвя из своих уст, сю крепкую грамоту с золотою своею печатью дал есми.

А учнет царь говорити о том, что в той грамоте в великого князя в крепостной не написано запрещения, как царь в своем списке писал. И князю Ивану то отговаривати так: тех, господине, слов по христьянскому закону немошно молвити, чтобы, господине, за те слова христьянину убиту быти, а молвити того нелзе. А осподарь мой князь велики с тобою в правде молвя тобе свое слово, по своей вере, на всем добре и крест на том целовал. Ино, господине, во христьяньском законе тое правды, крестного целования, выше нет; и осподарь мой по той по своей правде и нынеча тобе молвил и в грамоте в своей ту крепость написал; и ты бы, господине, собе на сердце того не держал, что моему осподарю лиха твоего хотети, везде добру твоему осподарь мой рад.

IV. А после тех речей на завътрее, или на третей день, говорити князю Ивану от великого князя речь царю о том. Князь велики велел тобе говорити: присылал ко мне Стефан, воевода волошски, о деле; и яз к нему посылал своего человека молодого. И ты бы пожаловал меня деля, велел до Стефана до воеводы того моего человека допровадити. А ко мне Стефан воевода с моим человеком пошлет кого своего человека, а придет тот человек к моему боярину ко князю к Ивану к Звенцу к тобе в Орду, и ты бы пожаловал отпустил его ко мне с моим боярином. А яз тебе челом бью.

Да о том говорити князю Именеку, чтобы о том деле царю говорил, да и сам бы дружбу свою великому князю чинил, чтобы царь велел, [23] да и он, великого князя человека до волошского воеводы допровадити. Да как имется царь, да и князь Именек, велят великого князя человека допровадити до волошского воеводы, ино князю Ивану Звенцу отпустити к волошскому княгинина Федкина человека не мотчая, да велети ему говорити от княгини от Федки воеводе волошскому речь, как ему приказано, да учинити ему срок, как ему из Волохов быти к нему в Орду, чтобы его заехал туто в Орде.

Да приказати князю Ивану княгинину Федкину человеку о том: учнет волошской воевода посылати к великому князю своего человека с ним, а однова учнет говорити о том, как его человеку назад от великого князя до него дойти; ино велети княгинину Федкину человеку молвити так: толко, господине, пошли своего человека доброго к великому князю, а князь велики велит до тебя твоего человека допровадити.

А се говорити княгинину человеку Федкину от Федки воеводе волошскому Стефану. Княжа Семенова Юрьевича княгини Федка велела тобе говорити: что еси присылал к моему брату, ко князю к Михайлу Александровичю, и к моему сестричичю, ко князю к Ивану Юрьевичю, о том, что мне бити челом великой княгине Марие, чтобы печаловалася сыну своему великому князю Ивану, чтобы князь велики взял за своего сына за великого князя твою дочку. И яз великой княгине била челом и великая княгини жаловала и печаловалася сыну своему великому князю. И князь велики пожаловал, за своего сына твою дочку хочет взяти. И великая княгини и князь велики велели приказати к тобе, чтобы еси с тем делом со всем прислал к великому князю своего человека доброго; и яз тогды приказала к своему брату, ко князю Михайлу о том, чтобы послал к тобе князь Михайло, чтобы ты прислал в великому князю своего доброго человека с тем делом со всем; и от тех мест и до сех мест о том деле к великому князю своего еси человека доброго не присылывал, ни к нам еси не отказывал.— Княгини Федка велела тобе говорити: яз и нынеча тебе приказываю, по передней твоей присылке, как еси приказывал к моему брату ко князю к Михайлу и ко мне. И всхочешь то дело делати, чтобы князь велики за своего сына твою дочку взял, и ты бы к великому князю прислал своего человека доброго с тем делом со всем. А нынеча великого князя боярин князь Иван Звенец в Орде у царя у Менли-Гирея; и ты бы того своего человека прислал к Звенцу, а он его там ждет, и тот твой человек вместе с Звенцом будет у великого князя.

V. А се говорити князю Именеку. Князь велики велел тобе говорити: Менли-Гирей царь пожаловал меня, братом и другом собе учинил, [24] и ярлык свой дал, и правду ко мне учинил с своими уланы и со князми, что другу другом быти, а недругу недругом быти. А ты нам дружбу свою чинил, дело еси наше у царя делал, и правду еси ко мне со царем учинил. Нынеча пак царь ко мне прислал послов своих, Темешь улана да Лухбердея дувана; а ты своего человека прислал. А приказал ко мне царь с своими послы, да и ты ко мне приказал с своим человеком, что как пожаловал меня царь, братом и другом собе учинил, и ярлык дал и правду ко мне учинил с своими уланы и со князми, так и ныне жалует, на том и стоит, и вперед хочет жаловати, братство свое и любовь ко мне хочет полнити. А ты также ко мне приказал, что на той на своей правде стоишь, на чем еси ко мне со царем правду учинил; а мне бы на своей правде стояти, на чем яз царю правду дал. Ино яз как на чем молвил царю и правду дал, на том и стою. Царь пак ко мне приказал, да и ты, о цареве брате о Нурдовлате да о Айдаре о царех, чтобы мне царева для дела к собе их взяти. И яз их к собе взял, а держу их у собя и истому своей земле и своим людем чиню, царева для дела. Да приказал ко мне царь, да и ты о том, чтобы яз с Менли-Гиреем на Ахмата царя да и на короля был заодин. Ино яз, по своей правде, с Менли-Гиреем царем один человек и на Ахмата царя и на короля; а царь бы пожаловал, по своей правде, со мною был заодин на Ахмата царя и на вопчего нашого недруга короля. А нынеча есми послал ко царю своего боярина князя Ивана; и ты бы, по передней по своей правде и по своему приказу, дружбу свою нам чинил, а у царя бы еси нашо дело делал. А яз аж даст Бог и вперед хочю к тобе свою дружбу держати.

VI. Память князю Ивану Звенцу. Что княгини Федка к волошскому воеводе послала своего человека с грамотою с верющою и с речми, и какими делы того человека княгинина Федкина имет тамо немощь, ино князю Ивану, взявши у того у княгинина человека грамоту верющую княгинину Федкину, да и запись ту, как ему речи приказаны говорити, да послати с тем к волошскому дьяка Сухово, а велети дьяку то сказати Стефану, воеводе волошскому, что княгини Федка послала к нему с тем своего человека, и он принемогл; да та грамота верющая велети подати воеводе волошскому от княгини от Федки, да и речь от нее велети говорити, как записано в записи.