№ 4.

1479, апреля 30. Посольство от великого князя Ивана Васильевича к царю Менгли-Гирею с Иваном Белаго: поздравление с тем, что царю снова удалось занять юрт своего отца; благодарность за предложение возобновить прежний союз и обещание, в случае нечастия с царем, поддержать его. Упрек крымскому вельможе Имянеку за вероломство с московским послом, [15] и просьба быть по-прежнему благосклонным к великому князю (Д. Кр. № 4. № 1, стр. 34-39).

I. Лета 87, апреля 30, поехал Иванчина Белого ко царю к Менли-Гирею, к Ази-Гирееву сыну.

А се говорити Иванче царю Менли-Гирею, Ази-Гирееву сыну.

Князь велики челом бьет.— Князь велики велел тобе говорити: прислал еси ко мне своих людей, Алача да Сырпяка, и ярлыки свои с ними прислал еси, а в ярлыке писал еси, и люди ми твои сказали твое здоровье, что Бог тобя помиловал, на отца твоего месте и на твоем юрте осподарем учинил. И яз, слышев твое здоровье, тому есми обрадовался.— Князь велики велел тобе говорити, чтобы еси пожаловал, не подръжал собе на сердце о том: хотел есми послати своего доброво человека твое здоровье видети с добрыми поминками; ино на Литву проезда нет, а полем пути истомны. И государь мой послал меня своего паробка здоровия твоего видети. А даст Бог как буду у своего осподаря, и государь мой к тебе пошлет своего доброго человека с добрыми поминки.— Князь велики велел тобе говорити: писал еси ко мне в своих ярлыкех и словом ми говорили твои люди о том, что еси как пожаловал меня, братом и другом собе учинил, и правду мне дал, так и ныне жалуешь, на том стоишь, и вперед хочешь жаловати, братство свое и любовь ко мне и свыше хочешь полнити. И ты бы пожаловал, как еси слово свое мне молвил, по тому бы еси жаловал; а яз как на чем тобе по своей вере молвил, на том и стою, и вперед аж даст Бог и до живота хочю на том стояти; а добру есми твоему везде рад. — Князь велики велел говорити: писал еси ко мне в своих ярлыцех с своим человеком с Алачем о своем недруге о царе о Зенебеке, чтобы мне твоего для дела к собе его взяти. И яз его к собе взял и истому есми своей земле учинил тобя для, и вперед есми хотел его у собя држати твоего для дела.

А се говорити Иванче царю наедине. Князь велики велел тобе говорити: писал еси ко мне в ярлыке в своем и словом ми от тобя Сырпяк говорил о том: каково по грехом придет твое неверемя, и мне бы твоя истома подняти. Ино яз добру твоему везде рад, чтобы дал Бог ты здоров был на отца своего месте на своем юрте. А коли по грехом придет каково твое неверемя, и яз истому твою подойму на своей голове.

А вспросит царь Иванчи о том: зачем на Литву проезда нет? И Иванче молвити так: твой, господине, человек от тобя проехал на Литовскую землю тайно; а как отведали то, что к моему осподарю твой [16] человек проехал на Литовскую землю, ино, господине, нынеча в Литовской земли по всем местам стерегут того, чтобы осподаря моего великого князя человек не проехал к тобе.— А учнет царь посла своего посылати к великому князю; ино говорити о том: как пожаловал царь, великого князя братом и другом собе учинил и правду на том дал, по тому бы и жаловал, посла бы своего послал без пошлин.

А услышит Иванча, что царь переменился, а поимают язык, да отведают того, что царь переменился, будет не Менли-Гирей на царстве, и Иванче ся воротити назад.

II. А се говорити Имянеку. Князь велики велел тобе говорити: Менли-Гирей царь пожаловал, меня братом и другом собе учинил, что другу другом быти, а недругу недругом быти; а ты нам дружбу свою учинил, дело еси наше у царя делал и правду еси ко мне с царем учинил; и приказал еси ко мне с моим боярином с Микитою и с своим человеком с Кудашом братство и дружбу свою, чтобы нам с тобою в братстве и в дружбе быти по тому же, как отец мой князь велики был с тобою в братстве и в дружбе и добра еси нашего хотел смотрити. И яз по цареву жалованью, по его ярлыку и по его правде, да и по твоей правде и по твоему приказу, послал есми к царю своего боярина Олексея: над царем пак Божия воля пришла, и мой боярин попал к тобе в руки, и где бы ти, поминая отца моего братство и дружбу к. собе, да и свой ко мне приказ, как еси хотел мне братство и дружбу свою чинити и по своей правде, и тобе было моего боярина и от иных сторон поберечи. Ино от тобя над моим боярином сила великая ся учинила: что с ним было моих поминков, то все у него пограбили, да и его живот весь пограбили, и людей моих и гостей, которые с ним были, всех переграбили, сами толко сухими головами до меня дошли, а иных и продали. Ино есми от тобя такова дела не чаял. Нынеча пак есми послал к царю своего толмачя Иванчю здоровия его видети; и ты бы, по преднему своему приказу и по своей правде, дружбу свою нам чинил, дела бы еси нашего у царя берегл. А яз к тобе хочю дружбу свою держати.