№ 20.

1487, октября — 1498, март. Грамота жида Захария, таманского князя, к великому князю Ивану Васильевичу с Богданом армянином: на дороге к великому князю Стефан волошский ограбил и мучил Захария; он же верный слуга [72] великого князя желает к нему идти служить со всем родом. Ответ великого князя жиду Захарию; грамоты к боярину Шеину — просить царя, чтобы он приказал своим Татарам проводить Захария до великого князя. Ответ царя Менгли-Гирея и царицы Нур-Салтан на посольство Шеина (Д. Кр. № 1, стр. 170-178).

I. Лета 96, охтября. Сякова грамота латынским писмом пришла с Богданом с арменином от таманского князя от Захарьи; а Богдан арменин приехал из Крыма с Грибцом с Клементьевым вместе.

Честнейший осподарь. О сем токмо писах вскоре, занже верую, яко веси, что есмь писал дотоле 2 грамоты: одну отселе, а другую от Кафы. Ныне же посылаю сего человека к осподарьствию твоему; токмо да повесть моих бед прошлых, как есь слышел, что шол есмь наитти осподарьствия твоего, и на пути меня Степан воевода ограбил да и мучили мя, толко что не до конца, также мя отпустил нагово, и тово рад есмь, не мог итти к осподарьствию твоему, но и назад есмь хотел воротитися. Ныне же есмь свободен, якоже выше рех, послати сего человека к осподарьствию твоему. Да аще осподарьствие твое всхощет приати единого слугу, аки мене, есмь хотящь и готов, токмо слышанья ради великих доброго, и хвалу юже имееши по всей земли. И молюся отолце осподарьствию твоему, да всхочешь послати единого своего человека к мне своему слузе, и яз учиню, егоже прикажешь. Да о сем посмотри, как всхочет осподарствие твое да прииду, с всем ли своим домом, или ныне преже мне единому с некими малыми людми, и все, егоже прикажешь с своим рабом, то учиню. Веселья же ради сердцю моему дому, скажешь свою мысль о всем том, иже осподарьствие твое всхощет учинити; взвелишь же, да яз приеду с некими малыми людми наитти тя, то учиню велми хотя, токмо молюся, пришли ми своего человека, да возмогу уведати твою мысль, а полно един токмо бы кто нам путь знал с сем нашим человеком. А о всем, его же взмогу, надобье осподарьствию твоему по сем странам есмь в твоем приказе, аки твой истинной слуга, в всех твоих. А наипаче истиннее уверишся от сего нашего человека истиннаго. В Конарио, лета 1487, июня 8. Раб твой Захарья Гуил Гурсис. А на подписи пишет: наяснейшему и величайшему господу, господу князю великому московскому.

Лета 96, марта. Сякова грамота пошла с Богданом с арменином к таманьскому князю к За(ха)рье: Божиею милостью, осподарь Руские земли, великий князь Иван Васильевич, царь всеа Руси, Володимерьский, и Московский, и Новгородский, и Псковский, и Тферский, и Югорский, и Вятский, и Пермьский, и иных, Захарье, князю таманскому. Присылал [73] еси к нам бити челом о том, что хочешь к нам ехати служити. И нам бы тебя пожаловати, службы твоей к собе похотети. И ты бы к нам поехал служити, а мы аж даст Бог хотим тебя жаловати. А писан на Москве, в лето 6996, месяца марта 18.

Сякова грамота к Дмитрею к Шеину пошла с Богданом же с арменином. От великого князя Ивана Васильевича всеа Руси, Дмитрею Васильевичю. Присылал к нам бити челом Захарья, князь таманской, о том, чтобы нам его пожаловати, службы его к собе похотети. И яз его пожаловал, велел есми ему к собе ехати служити. А послал есми свою грамоту к Менли-Гирею ко царю с Богданом с арменином, чтобы Менли-Гирей царь меня деля послал в Черкасы к тому Захарьи своих дву человек, которые знают от Черкас полем к Москве, а велел бы тем своим людем того Захарью таманского князя из Черкас проводити до меня, и кого Менли-Гирей царь пошлет в Черкасы своих людей к тому Захарьи, и ты бы с теми со царевыми людми послал моего татарина, которого пригоже, чтобы с ними вместе того Захарью проводил до меня ¹.

II. А се ответ царя Менли-Гирея против посолства великого князя Дмитрею Шеину. Что ми еси от моего брата, от великого князя, в посолстве правил, и я то все слышел; а приказываю о всем к своему брату к великому князю с своими послы с Бердоулетем да с Хозяшем, а тебе маленко наказываю же. Яз в шерти великому князю, брату своему, стою крепко, другу есми его друг, а недругу недруг; а со цари с Муртозою и с Шидахматом и с Казимиром с королем не мирюся, а везде есми на них и на всякого недруга с братом своим с великим князем один человек. А что брат мой князь великий посылал под Орду брата моего Мердовлата царя, ино то чинит велми гораздо. А что Муртоза царь послал ярлык свой к брату к моему к Мердовлату царю, а зовет его к собе, а к брату к моему к великому князю послал Муртоза другой ярлык, чтобы его брат мой князь велики к нему отпустил, и брат мой князь велики, не допуская ярлыка до Мердовлата, да и свой ярлык прислал ко мне оба вместе,— и яз те ярлыки видел, откажу Бог дасть о том к своему брату к великому князю своими послы. А что брат мой князь велики моего брата Мердоулата царя ко мне не отпустил, ни ярлыка моего к нему не послал, и яз нынеча своими послы к своему брату к великому князю словце маленко [74] приказываю; ежо увидят мои послы в одном месте Мердоулата с великим князем, ини и молвят от мене словце о том брату моему великому князю; а не увидят их вместе, ини и не молвят. А что брат мой князь велики приказывал ко мне, что брата моего Айдара царя держит в крепости, берегучи моего дела, а король рекши хочет послать его выкрасти; ино брат мой князь велики не впервее ко мне приказывает о том, что его крепит моего для дела; ино Айдар где нибуди у великого князя, у короля ли, мне от него нет никоторого страху, что ми может учинити. А что брат мой князь велики приказывал, чтобы мне королева человека угорьского мочно пропровадити до его осподаря через волошского ли землю, через турского ли землю; а коли тот человек до меня дойдет, ино его мочно пропровадити через волошского землю, а через турского землю нелзе. А что брат мой князь велики приказывал, что хочет мене с угорьским королем учинити в дружбе и в братстве, а тот король и сам ко мне присылает, хотячи со мною дружбы и братства. А что брат мой князь велики приказывал ко мне, что бых яз отведал: каковы дружбы хочет с ним салтан турецкой, и яз то отведал; турецково слово таково: коли князь велики тобе Мен(ли)-Гирею друг да брат, и яз потомуж хочю с ним быти в дружбе и в братстве. А прикажу еще о том к брату своему великому князю своими послы, чтобы к турскому послал, и о том зауморщины бы его людем не было, а надеюся, что зауморщину оставит. А что брат мой князь велики отпустил ко мне Бабашихова человека Тевикеля и с рухлядью, ино то мне ведомо, учинил брат мой гораздо мене деля. А что брат мой князь велики приказывал ко мне о Костиных кунах, ино тот долг и сегодни остался за мною, дати ми нечего, нынечя есмь изотшал, а коли у меня Бог даст в руках что будет, и яз тогды заплачю.

III. Се списочки привез Дмитрей же Шеин.

А коли поехал Янкуват в Орду к Седехмату, толды прислал к Дмитрею человека своего Малымбирдея, а молвит так: пришли ко мне Бориса толмачя. И Борис толмач, приехавши от Янкувата, сказывал Янкуватовы речи: Янкуват тобе велел говорити, чтобы еси говорил князю великому, как держал князь дядю нашего Темиря, а мы нынеча на том же юрте; а сверх того ин бысь со мною леты розчел: будет он меня старее, и он мне болшой брат; и яз его моложе, ино яз меншой брат. А поминок его за честь до меня дошел; а дасть Бог пришлю к нему человека своего Малымбердея, а где нибуду, тут есми его человек.

Царица приказывала к великому князю, Темирева дочи; послала в [75] Казань к сыну своему, к Магмгет Аминю царю, своего человека Усеина, чтобы князь велики пожаловал, того человека отпустил в Казань не издержав. Да и к Махмет Аминю царю бы пожаловал приказал, чтобы царь того человека отпустил из Казани не издержав. А о сыне о своем о Абдыл Летип салтане приказала в великому князю: здесь ему Менли-Гирей царь отець; а коли его к тобе пошлю, то ведает Бог, да ты ему и отець.

Комментарии

1. Здесь на особом листке написано: С сего списка посолственного отправлена копия в высокий кабинет, при доношении ассесора Семена Иванова, декабря 13 дня, 1739.