1487, октября 23. Посольство от великого князя Ивана Васильевича к царю Менгли-Гирею с боярином Дмитрием Васильевичем Шеиным: Муртоза царь прислал к Нурдовлату царю ярлык, приглашая его к себе в Орду; великий же князь этот ярлык Нурдовлату царю не дал, а посылает его к царю Менгли-Гирею; Нурдовлата царя также нельзя отпустить и прямо в Крым, потому что от этого будет дурно царю Менгли-Гирею. Просить Шеину царя проводить угорского посла до его государя и предложить царю быть в дружбе с угорским королем против общего врага, короля Казимира. Наказы Шеину — побуждать царя непременно воевать Орду, или королевские земли; как вести переговоры и что говорить царю и крымским вельможам об этих делах. Списки ярлыков царя Муртозы к великому князю и царю Нурдовлату. Грамота великого князя к жиду Захару. (Д. Кр. № 1, стр. 148-169).

I. Лета 96, Дмитреево Васильевича Шеина посолство ко царю к Менли-Гирею. А поехал с Москвы октября 23.

Правити посолство Дмитрею Васильевичю Шеину от великого князя Менли-Гирею царю, Ази-Гирееву сыну. Князь велики Иван, брат твой, велел челом ударити. Князь велики велел видети твое здоровье, волного человека.

Князь велики велел тобе говорити: приказал еси во мне с своим послом с Тевекель уланом и с Лухбердей дуваном и с моим [63] боярином с Семеном; и после того писал еси ко мне в своих ярлыкех и словом еси приказывал с твоим человеком с Газикою и с иными с своими людми: как еси мне на чем свое крепко слово молвил и правду дал, на том и стоишь, по тому и делаешь; а яз тобе о том челом бью.

А се говорити царю наедине того ж ли дни, назавтрее ли, как велит. Князь велики велел тобе говорити: писал еси ко мне и наперед сего в ярлыкех в своих, и ныне еси ко мне писал и словом еси ко мне приказал с своим человеком с Аксарыем и с моим человеком с Грибцом, что твои недрузи, да и мои недрузи, Муртоза и Седехмат цари пришли на тобя; и мне бы брата твоего Нурдовлата царя и своих людей послати на их Орду. И яз и переж сего лета посылал есми брата твоего Нурдовлата царя и своих людей на Орду, и были все лето под Ордою и делали дело, как им было мочно. А и ныне брата твоего Нурдовлата царя да и своих людей шлю на Орду. Да и к казанскому царю к Магмет-Аминю пошлю, чтобы свою рать послал, а дело твое аж дасть Бог хочю делати, сколко ми Бог поможет.— Князь велики велел тобе говорити: а пойдут на меня Муртоза и Седехмат цари, и ты бы, по своей правде, на их Орду пошел. А пойдет на меня король, и ты бы на короля пошел на его землю.— Князь велики велел тобе говорити: писал еси ко мне во своих ярлыкех и словом еси ко мне приказывал, что с своим недругом, да и с моим недругом, с Казимиром королем не миришся, а посла его поимав держишь у собя. И ты бы и вперед, как еси нам на чем молвил и правду дал, на том бы еси и стоял, другу бы еси моему друг был, а недругу бы еси моему недруг был, а с королем бы еси, с своим недругом да и с моим, не мирился, ни канчивал, а был бы еси со мною на него да и на всех наших недругов заодин. А яз как на чем тобе молвил и правду дал, на том и стою, твоему другу друг есми, а недругу твоему недруг. А на Муртозу и на Седехмата на царей да и на короля, на вопчих наших недругов, с тобою есми один человек; а дело твое аж дасть Бог хочю делати, сколко ми Бог поможет.— Князь велики велел тобе говорити: Муртоза царь прислал к твоему брату к Нурдовлату царю своего человека Шихбаглула, а с ним прислал ярлык свой, а зовет брата твоего Нурдовлата царя к собе на тобя, а ко мне другой ярлык прислал, чтобы мне брата твоего Нурдовлата царя к нему отпустити. И яз, берегучи твоего дела, того есми Муртозина царева человека не отпустил к твоему брату к Нурдовлату царю; а те есми ярлыки Муртозины царевы у него взял да послал к тобе. А как есми тобе молвил и правду дал, так по тому и берегу твоего дела, и [64] вперед аж дасть Бог и до живота хочю дела твоего беречи и добра твоего смотрити. Да тут и дати царю Менгли-Гирею те ярлыки Муртозины царевы.

Князь велики велел тобе говорыти: а что еси прислал ярлык свой к своему брату Нурдовлату царю, а зовешь его к собе, чтобы вам о своем юрте стати заодин против своих недругов; да и ко мне еси писал, чтобы и мне к нему о том свое слово приказати. Ино Муртоза царь брата твоего Нурдовлата царя зовет к собе на твое лихо. И яз того деля к твоему брату к Нурдовлату царю твоего ярлыка не послал, ни своего слова о том к нему не приказал, берегучи твоего дела.— Князь велики велел тобе говорити: а что еси писал ко мне в ярлыке в своем о своем брате о Айдаре о царе, что король хочет послати выкрадывати его у меня из моей земли. Ино яз твоего для дела Айдара царя держу у собя в крепости, а твоего дела берегу накрепко, сколко ми Бог поможет.— Князь велики велел тобе говорити: Маттиаш, король угорский, с нами в дружбе и в братстве, а на короля Казимира, на нашего недруга, с нами один человек, и люди наши межи нас ходят межи нас по нашей дружбе и по братьству. А нынеча король угорски прислал во мне с моим человеком своего человека; и яз мышлю то, чтобы ми того королева человека угорского к тобе отпустити, а тобе бы от собя его допровадити до его осподаря до короля до угорского. И будет ти мощно, меня деля, того королева человека угорского пропровадити к его осподарю к королю угорскому через турецкого землю, или до Стефана воеводы волошского, и ты бы во мне о том отказал.— Князь велики велел тобе говорити: сказывал ми тот жо королев человек угорского, что деи еси приказывал в Матиашу, к королю в угорскому, о дружбе и о братстве. И похочешь с ним дружбы и братьства, и ты ко мне откажи, и мы тобя учиним с ним в дружбе и в братстве по тому, как мы с ним в дружбе и в братстве.— Князь велики велел тобе говорити: приказывали есмя к тобе, чтобы еси отведал о том, каковы дружбы хочет с нами салтан турской? И ты к нам отказал, что еси о том деле послал к турскому своего человека; а как приедет к тобе твой человек от турского, и ты ялся нас с тем обослати, да и до сех мест еси нам о том ведома не учинил. И ты бы нам ведомо учинил, что к тебе турской отказал о том деле, каковы с нами дружбы хочет?

Да после всех дел, говорити царю о том. Князь велики велел тобе говорити: писал еси во мне ярлык свой о Бабашихове человеце о Тевекеле. Ино тот человек Тевекель приехал к нам с Бахтияр уланом да с Мангушом; а Бахтеяр улан и Мангуш приехали к [65] нам от нашего недруга от Алягама от царя; а ведаешь сам, каков нам недруг был Алягам царь. Божьею пак волею, Алягам царь и те его люди нам впали в руки, а тот Тевекель назывался Казанцом, пословым человеком; но коли ты у нас его просишь, а зовешь его Бабашиховым человеком, и мы тебя деля того Тевекеля и сь его рухлядью со всем отпустили к тобе и отдали есмя его твоему послу Тевекель улану да Лухбердей дувану.— Князь велики велел тобе говорити: приказывал есми к тобе о Костиных кунах, и к тобе есми того своего человека Костю посылал; и ты ко мне писал ярлык свой, что Костя, не дождався, прочь поехал, и мне бы опять его к тобе послати; а писал еси так, как приедет Костя, ино куны его готовы. И нынеча тот мой человек Костя послал в свое место по те куны своего товарыща Гришу Семенова сына Спячко, и ты бы велел те Костины куны отдати тому Грише, чтобы мой человек безлеп не погибл.— А что еси ко мне писал в ярлыке в своем о Лухбердей дуване, чтобы ми тобя деля на сердце на него не держати, и яз тобя деля его пожаловал.

II. Память Дмитрею: как выговоривши царю речи все посолство, да и список царю дати тех речей все посольство, а молвити так: чего, господине, буду неисправил которых речей, ино восе список.— Да как учнет царь Дмитрея отпущати к великому князю и своего посла с ним, и Дмитрею молвити царю о том, чтобы с послом лишних людей не было.

А учнет царь Менли-Гирей говорити так: приказывал есми к своему брату к великому князю, чтобы послал на Орду брата моего Нурдовлата царя и своих людей, и он о чем не послал? И Дмитрею говорити так: посылал, господине, осподарь мой князь велики брата твоего Нурдовлата царя и своих людей на Орду; как послышел, что ваши недрузи Муртоза и Седехмат цари идут на тобя, и он тогды ж чяса того послал на Орду.

А взмолвит царь так: ходили, да не учинили ничево. И Дмитрею говорити так: недрузи, господине, ваши, Муртоза и Седехмат цари, из Орды не бывали, шли с Ордою и с улусы своими вместе, и брату твоему, господине, Нурдовлату царю как было притти на Орду, коли сами цари в Орде со всеми с своими людми? А были, господине, под Ордою брат твой и великого князя люди все лето и улусы имали и дело делали, сколко им было мочно; а и ныне осподарь мой князь велики брата твоего Нурдовлата царя да и своих людей шлет на Орду, да и к казанскому царю к Ма(гме)т Аминю хотел послати чяса того, чтобы свою [66] рать послал на твоих недругов. А дело твое осподарь мой князь велики аж дасть Бог хочет делати, сколко ему Бог поможет.

А учнет царь говорити о том: на зиме ли сей князь велики пошлет брата моего Нурдовлата царя и своих людей на Орду, или на весне хочет послати? И Дмитрею говорити так: хотел, господине, осподарь мой князь велики по брата по твоего по Нурдовлата по царя послати часа того, а хотел, господине, о том с твоим братом говорити: будет брату твоему на зиме сей лзе ити и на Орду, и он на зиме ж сей хотел его послати на Орду и своих людей с ним. Будет пак на зиме сей нелзе итти, и осподарь мой князь велики аж даст Бог на весне рано пошлет брата твоего Нурдовлата царя и своих людей на Орду, а дело твое сердечно хочет делати, сколко ему Бог поможет.

А вспросит царь Дмитрея: к казанскому царю к Магмет Аминю послал ли князь велики о том, чтобы свою рать послал на наших недругов? И Дмитрею молвити так: хотел, господине, послати о том чяса того ко царю к казанскому.

А какими делы Муртоза и Седехмат цари пойдут на великого князя, и Дмитрею говорити Менгли-Гирею царю о том, чтобы, по своей правде и по ярлыку, как на чем великому князю правду дал и ярлык дал, чтобы пошол на Орду; а сам не пойдет, и он бы брата своего послал с своими людми на Орду. Да о том говорити накрепко, чтобы Менли-Гирей царь пошол на Орду, или брата своего послал с своими людми. А какими делы не пойдет Менли-Гирей царь на Орду и брата своего не пошлет с своими людми, и Дмитрею говорити о том, чтобы царь на короля пошел на его землю.

А пойдет Менли-Гирей царь на Орду, или брата своего пошлет, а Дмитрею велит с собою итти на Орду, или с своим братом, и Дмитрею итти; а не пойдете царь на Орду, ни брата своего не пошлет, а пойдет на Литовскую землю, а Дмитрею велит с собою итти, а Муртоза и Седехмат цари пойдут на великого князя, и Дмитрею итти с царем на Литовскую землю. А пойдут Муртоза и Седехмат цари за Волгу, а на великого князя не пойдут, а Менли-Гирей царь захочет пойти на Литовскую землю, а Дмитрею велит с собою пойти, и Дмитрею от того отговариватися; а не отговорится и за тем будет царю нейти на Литовскую землю, и Дмитрию со царем пойти на Литовскую землю.

А взмолвит царь о том: послы ездят у великому князю от короля, и князь велики не помирит ли ся с королем? И Дмитрею молвити так: послы, господине, ко осподарю нашему к великому князю от короля ездят о том, что осподаря нашего люди емлют королеву землю со всех сторон, и нынеча приездил ко осподарю к [67] нашему к великому князю от короля посол о том, что осподаря нашего слуги, Одоевские князи, княжи Семеновы дети, имали королеву землю, а миру осподарю нашему с королем нет.

Да беречи Дмитрею накрепко того, чтобы Менли-Гирей царь с королем не мирился, ни канчивал. А взмолвит царь: королев посол у меня изыман, и князь велики что ко мне приказал о после королеве? И Дмитрею молвити так: король, господине, как тебе недруг, так моему осподарю недруг; ино что недругу досаднее, так лутчи.

А вспросит царь о том: Муртазин царев ярлык был ли у моего брата Нурдовлата царя? И Дмитрею молвити: не был. господине, тот ярлык у твоего брата у Нурдовлата у царя, ни тот Муртазин царев человек у него не был, с кем те ярлыки пришли.

А учнет Менли-Гирей царь Дмитрея отпущати к великому князю на весне, ино на весне оттоле из Крыма не ездити, а беречи дела великого князя по великого князя наказу. А хотя и на лете учнет отпущати Дмитрея, а учнут Муртоза и Седихмат цари кочевати межи Дону и Крыма, и Дмитрею не ехати ж к великому князю оттоле из Крыма, а отвечивати царю тем: недрузи, господине, ваши, Муртоза и Седехмат цари, кочюют по сей стороне Дону, близко осподаря нашего великого князя земли, и мне как проехати к своему осподарю? А ещо ми, господине, приказал государь мой князь велики беречи того: какими делы Муртоза и Седехмат цари пойдут на моего осподаря на великого князя, и ти бы на Орду пошел; а за какими делы на Орду не пойдешь и ты бы на короля пошел на его землю; а мне осподарь мой князь велики велел то видети. Да толко Орда учнет кочевати межи Дону и Крыма, и Дмитрею однолично оттоле из Крыма не ехати ни с весны ни в лете, а великого князя обсылати о всем о тамошнем деле. А пойдет Орда за Дон, да прелезши Дон учнет кочевати к Волзе, а учнет царь Менли-Гирей Дмитрея отпущати к великому князю, и Дмитрею тогды ехати к великому князю.

А вспросит Менли-Гирей царь о том: отпустит ли ко мне князь велики брата моего Нурдовлата царя? И Дмитрею молвити так: чтобы, господине, твоему делу было помощно, и осподарь бы мой князь велики не молви брата твоего Нурдовлата царя и казанского бы царя Магмет Аминя к тобе отпустил.

III. А се говорити царевичю Ямгурчею. Князь велики велел тобе говорити, чтобы еси у царя у брата у своего промеж нас дела нашего берегл, а нам бы еси дружбу свою чинил; а мы аж даст Бог тобе хотим дружбу свою чинити. [68]

А се говорити князю Барашу, Именекову сыну. Князь велики велел тобе говорити, чтобы еси нам дружбу свою чинил, а дела бы еси нашего берегл; а мы аж даст Бог хотим тобе свое добро чинити.

А се говорити Довлетек мырзе, Именекову сыну. Князь велики велел тобе говорити, чтобы еси нам дружбу свою чинил, а дела бы еси нашего берегл; а мы аж даст Бог хотим тобе свое добро чинити.

А се говорити Шакуват мырзе. Князь велики велел тобе говорити: слышел есми, что еси пришел к Менли-Гирею ко царю и ты бы царева Менли-Гиреева добра смотрил, а нам бы еси дружбу свою чинил; а мы аж дасть Бог хотим тобе свое добро чинити.

А се говорити Янкуват-мурзе. Князь велики велел тобе говорити, чтобы еси нам дружбу свою чинил, а промежи царя и меня добра бы еси нашего смотрил; а мы аж даст Бог хотим тобе свое добро чинити.

Да уланом и князем Дмитрею поклонитися от великого князя, которым князь велики поминок послал.

Да молвити от великого князя Бердовлету, да Собак дувану, да Хозяшу. Князь велики велел вам молвити, чтобы бы есте промеж царя и меня дела нашего берегли, а нам бы есте служили; а мы, как держим к вам свое жалованье, так и вперед аж даст Бог хотим к вам свое жалованье держати.

IV. А се списки с ярлыков со царевых с Муртозиных Ахматова сына, чтобы Муртоза царь прислал ярлыки к великому князю и к Нурдовлату ко царю с своим человеком с Шихбаглулом, лета деветьдесять пятого, августа, коли к великому князю пришли послы от Муртозы царя, Хозомбердей, а от Седехмата царя Ботуй; и князь велики того Муртозина царева человека Шихбаглула и ярлыка царева Муртозина к Нурдовлату к царю не послал, а послал тот ярлык да и свой ярлык, что к нему царь Муртоза прислал о том же деле, и он те оба ярлыка послал ко царю к Менли-Гирею с своим послом с Дмитреем с Шеиным, лета 96, октября.

Муртозино слово Ивану. Сведомо буди, что тот Нурдовлат царь от отца моего до сех мест со мною в любви был; опосле того пак с Менли-Гиреем были есмя правду свою учинили, и Менли-Гирей в той правде не устоял, после того опять против того собе нашол, таково ж пак ся над ним стало; а нынечя Менли-Гирей нам недруг, в его место Нурдовлата царя учиним, молвя, надею держим. А нынечя сем путем у тобя Нурдовлата царя просити, Шихбаглулом зовут, слугу своего послал есми, и сесь Шихбаглул доедет сего Нурдовлата царя, кое [69] бы ти его к нам отпустити, за то не постой; а жоны бы его и дети у тобя были, коли Бог помилует, тот юрт ему даст, и он их у тобя после того тогды добром возмет. Менли-Гирей царь тобе друг учинился, а Нурдовлат царь ведь тобе не недруг жо, нам тот пригож, и ты сего пусти, нынечя его не заборони к нам отпустити. Молвя, ярлык послал есми.

Брат мой Нурдовлат царь. Дай, Господи, твое осподарство у тобя было, они бы твои вперед были на многие лета. Ближней еси нам брат святой и милосердой и прямой ведомой еси, промеж всех добр правдою праведен, а величьством еси велик и ко всем тщивець еси и приветлив. Милосердой государь, ты на сем свете вере еси нашей подпора, бесерменем и бесерменьству нашему помочь; ты еси и закону наказатель, милосердого Бога милостью истинной еси прямой осподарь. Ино, брате Нурдовлат царь, велика бы и счястна была твоя держава до второго пришествия, Магатметевы деля молитвы и учеников его. А после сего добра и похвалы, сведомо бы тобе то было, что из старины и до сех мест с вами мы одного отца дети есмя были. Правда, так есть после пак того прилучей таков сстался, предние наши о кости о лодыжном мозгу юрта деля своего розбранилися, да того деля промеж их много лиха и нелюбви было; а опосле того опять то лихо от себя отложили, и кои потоки кровью текли, те опять межь их молоком протекли, а тот бранной огонь любовною водою угасили, а с вашим юртом наш юрт как бы один учинил, кой на Божей покой пошол святой Ахмат царь. И как ся были уж есмя умирили, и тот бранной огонь опять зажог брат твой Менли-Гирей царь, а право свое порушил, а нам не по мере силу учинил был; ино сотворитель всей вселенней Господь Бог то лихо на него оборотил: сколко над ним дел ссталось, то тебе сведомо. А нынечя отець мой Ахмат царь, милосердие Божие над ним было, он был то нам в прок учинил, а мы пак братья твои инако учинити того у нас на мысли нет; а кто будет лих, тому противу Бог самому отдаст нам верным. Про твое величество, своего брата, что ты живешь промеж неверных, непригож ся видит так. Сем случяем величеству твоему тяжелой поклон с легким поминком, Шихбаглулом зовут, слугу своего послал есми. А ещо сесь Шихбаглул доедет до твоего величества, лице твое увидит, и что будут у тобя твои тайные речи, и ты те речи про свое величество и здоровье с Шихбаглулом ко мне прикажи, нас собе в любви держа. Нечто из тое из поганые земли избыти захочешь мысль твоа будет, ино яз к Ивану с тем жо Шихбаглулом о том же грамоту свою послал есми; а восе пак нечто не всхочешь, мысли твоей не будет, и ты где ни будешь, [70] там бы еси здоров был, а нас в братстве не забывай. Молвив, грамоту послал есми, лета 891 писана.

V. Сяков список дан Дмитрею памяти для. А се, которых людей переимали в Орде, Илеман, Оуз, царев Муртазин человек, Челман Аталыков брат, а тот брат его Челман Аталык цареву Муртозину дочерь кормит. Да Хозюмбердей, того Челман Аталыков сын, Муртозин жо человек царев. Да Камбарали и Касым мырзин человек, а сын Кульяконов, Абу Асанов брат; Абу, Асан у Темиря князи были болшие. Да Салтанаик мырзин человек, Баубек Омирев сын, Иким Субуев, Багатырев брат, Сарайские тысечи роду. Да Китай Киреев человек, да Улат хозя Бердишиков сын, а брат Чигирь Багатырев.

А се ехати с Дмитреем ис Шеиным татаром; а проводити им Дмитрея в Перекопь в Орду: из Ростунова Шамарда Умачев сын, да Тулуш, Тевекелев брат, да Асман да Неболса, да Мерег Хозя, да Сююндюк. А из Щитова от Машейковых товарыщов Мамыш, да Карачюра, да Киинчий. А с Коломны Давыдов брат Кутай да сын его. А с Коломны ж Васильевских татар, Чигиревых товарищов, Резяк да Булгак, да Довлетек, да Шикчя да Неболса Кобяковы дети. А из Левичина Токмас да Давид. А из слободы Бурундук. А из Суражи Кабайрачевских татар Козелак, да Орозяк, да Исенек, да Тонкач. А из Берендеева Темеш, да Неболса, да Мансырь. А из Ижва Темешов сын Мерег хозя, да брат его Пронос, да Оруске Орозов, да Чигирь Ямгурчеев сын, да Карачюра Осанов. А княжих Михайловских татар Асман да Меглешеик, да Баклаш, да Тонкач. А как проводят те татарове Дмитрея в Орду, и Дмитрею дати им воля, а выбрати из них человеки три или четыре. Да как опочинут конем, и Дмитрею их отпустити к великому князю с тамошними вестми, а послати с ними Дмитрею к великому князю грамоту, а описати о всем о тамошнем деле, каково будет царево Менли-Гиреево дело со цари с Муртозою и с Седехматом, и где ныне Муртоза и Седехмат учнут зимовати, и воюют ли литовское, головы емлют ли опричь корму, и помагает ли турской Менли-Гирею, людей своих прислал ли в Кафу на помочь, и где ныне сам турской, в Белегороде есть ли люди прибылые, Турки воюют ли королеву землю или Волохов, каковое дело с королем или с волошским; о всем о том Дмитрею отписати с ними к великому князю, да и словом наказати. А остатися у Дмитрея татаром в Перекопи на лежанье, вестей для, десяти человеком. А се имяна их: Кадышу [71] Абашеву сыну, да Кудашу, да другому Кудашю Шемекину сыну, да Кожюху, да Насырю Молнину сыну, да Икишу, да Мокшую Усеймову сыну, да Афызу, да Корману, да Усеину. А опосле тех татар, которых отпустит Дмитрей к великому князю, как под весну каковы вести поновятся, и Дмитрею отпустити к великому князю с теми вестми из тех десяти человек, которым с ним велено зимовати, человека два или три. А послати с ними Дмитрею к великому князю своя грамота, да и словом с ними наказати о всем о тамошнем деле; а иных ему тех татар, их товарищов, ещо оставити у собя, и каковы вести ни поновятся опосле того, и Дмитрею о всем о тамошнем деле великого князя без вести не держати. А коли ни учнет Дмитрей к великому князю татар отпускати, и ему о том царю сказывати: отпускаю, господине, к своему к государю к великому князю его людей, и ты с ними что наказываешь к своему брату к великому князю? занже осподарь наш, князь велики приказал к тобе, чтобы еси его о всем без вести не дръжал. А похочет царь к великому князю послати с ними своего человека, и Дмитрею того не отговаривати кого пошлет.

VI. А се сякова грамота послана к Захарье к Скарье к жидовину с Митею с Нардуковым с подьячим, лета 96, охтября, с Дмитреем с Шеиным вместе.

Божиею милостию, господарь Русские земли, великий князь Иван Васильевич, царь всея Руси, Володимерски, и Московски, и Новогородски, и Псковски, и Тферски, и Югорски, и Вятски, и Пермски и иных, Захарье евреянину. Писал еси до нас с нашим человеком с Сенкою с Хозниковым о том, чтобы тобе у нас быти. И ты бы у нас был; а как будешь у нас, ож даст Бог, наше жалованье к собе увидишь; а похочешь нам служити, и мы тебя жаловати хотим; а не похочешь у нас быти, а всхочешь от нас опять в свою землю поехати, и мы тебя отпустим доброволно, не издержав. А писана на Москве, месяца охтября 18.