1487, июня 12. Посольство от великого князя Ивана Васильевича к царю Менгли-Гирею с Грибцом Ивановым Клементьевым: по требованию царя, великий князь послал его брата, Нурдовлата царя, воевать Орду Муртозы и Седехмата; царь бы с общим врагом с королем не мирился, и над его послами, приехавшими в Крым, какую знает недружбу, такую бы и учинил (Д. Кр. № 1, стр. 142-145).

I. Лет 95, июня 12, поехал с Москвы.

А се говорити Грибцу Иванову сыну Клементьева от великого князя царю Менли-Гирею. Брат твой князь велики Иван велел челом ударити.. Князь велики велел видети твое здоровье, волного человека. А опосле того поминок подати.

А се речь говорити наедине. Князь велики велел тобе говорити: писал еси ко мне в своих ярлыкех и словом еси ко мне приказал с своим человеком с Газикою, как еси мне на чем свое крепкое слово молвил и правду дал, на том и стоишь, по тому и делаешь; и яз тобе о том челом бью.— Князь велики велел тобе говорити: а после того нынеча писал еси ко мне в своих ярлыкех и словом еси ко мне [60] приказал с своим человеком с Саксарыем о том, что Муртоза и Седехмат цари идут на тобя, а наводит их вопчей наш недруг король; и мне бы на их Орду рать своя послати.— Князь велики велел тобе говорити: и яз послал брата твоего Нурдовлата царя со всеми с его людми и своих людей с ним, а приказал есми ему так: пойдут на тобя Муртоза и Седехмат цари, и он бы пошол на их Орду, а делал бы дело, сколко ему Бог поможет. А как есми тобе на чем молвил и правду дал, на том и стою, другу твоему друг есми, а недругу твоему недруг есми, а с тобою есми один человек на всякого твоего недруга, и вперед аж даст Бог и до живота хочю на том стояти, а добра твоего везде хочю смотрити и дело твое делати, сколко ми Бог поможет.— Князь велики велел тобе говорити: а какими делы на меня пойдут Муртоза и Седехмат цари, и ты бы пожаловал, по своему крепкому слову, на их Орду пошел, а делал бы еси дело, сколко ти Бог поможет.— Князь велики велел тобе говорити: а что еси к нам приказывал и в ярлыкех писал о миру с королем, ино ведаешь сам, король как тобе недруг, так нам недруг, и ты бы с королем не мирился; а как еси нам на чем молвил и правду дал, на том бы еси и стоял, другу бы еси моему друг был, а недругу бы еси моему недруг был, а был бы еси со мною заодин на всякого моего недруга.— Князь велики велел тобе говорити: а что еси ко мне приказывал о послех о королевых, что еси королевых послов поимал; ино король вопчей наш недруг, твой недруг да и мой; ино ведаешь сам, как над его послы учинити.

II. А после того назавтрее, или на третей день, молвити царю Менли-Гирею. Князь велики к тобе приказал: каково твое дело будет с Муртозою и с Седехматом со цари, и ты бы меня без вести не держал о всем.

А по сему списку выговоривши царю речи все, да и список царю дати тех речей, а молвити так: чего, господине, буду не исправил которых речей, ино восе список.— Да беречи Грибцу того накрепко, чтобы Менли-Гирей царь с королем не мирился.

А вспросит царь Грибца о том: князь велики что ко мне приказал о королевых послех, что ми велел над ними учинити? И Грибцу молвити так: ведаешь, господине, сам о королевых послех, как ти недругу недружба своя учинити.

А какими делы пойдут на великого князя Муртоза и Седехмат цари, и Грибцу говорити царю Менли-Гирею, чтобы царь пожаловал, по своему крепкому слову и по ярлыком, сам всел на конь со всеми с своими людми, да пошел бы на их Орду. [61]

А учнет Менли-Гирей царь к великому князю посылати своего человека с вестми; и Грибцу послати к великому князю со царевым человеком с Менли-Гиреевым великого князя татар человека два или три, да отписати к великому князю о тамошних вестех о всех: о ординском деле, и о турском, и о волошском, и о Литве, и о послех о королевых и о всем о тамошнем деле. А не пошлет Менли-Гирей царь к великому князю своего человека, и Грибцу послати к великому князю с тамошними вестми великого князя татар человеки три или четыре, да отписати к великому князю тамошние вести все и о всем о тамошнем деле.

А сесь список памятной Грибцу держати собе, а царю его не давати ни иному никому от собя не отдавати.