№ 15.

1486, августа 3. Грамоты великого князя Ивана Васильевича в Крым к царю Менгли-Гирею и к боярину Семену Борисовичу, отправленные по поводу отпуска из Москвы крымских послов, чтобы царь воевал против общих врагов. Роспись поминков, посланных к царю и его родственникам (Д. Кр. № 1, стр. 132-137).

Лета 94, августа 3, отпущены с Москвы. Сякова грамота послана во царю в Менли-Гирею с великого князя татары с Резяком, да с [55] его братом с Курманом с Васильевскими татары. А поехали со царевым с Менли-Гиреевым человеком вместе с Акымбердеем, с Собак дувановым зятем.

Менли-Гирею царю князь велики Иван, брат твой, челом бьет. Прислал еси ко мне своего человека Акымбердея и ярлыки свои; а в ярлыкех писал еси и словом еси ко мне приказал с Акымбердеем: как еси на чем мне свое крепкое слово молвил и правду дал, на том и стоишь; а с вопчим нашим недругом, с своим да и с моим, с королем с Казимиром, не миришся. Да писал еси ко мне в своем ярлыке, что король в Орду человека послал, а ведет к тобе Муртазу и Седехмата царей, твоих недругов да и моих, а хочет с ними миритися крепко. И коли так делает, а тех наших недругов ведет к собе, ино ведь то явно ведет их на твое лихо да и на мое. Да и то еси ко мне писал в своем ярлыке и словом еси ко мне приказывал с своим человеком с Акимбердеем: толко Орда будет не близко, и тобе, опроче короля, иного дела нет. И ты бы пожаловал, по тому по своему слову так и делал; а и вперед бы еси с вопчим нашим недругом, с своим да и с моим, с королем с Казимиром не мирился, а был бы еси с нами по своей правде и по своим ярлыком на короля на Казимира заодин; также и на Ахматовых детей царевых и на всех наших вопчих недругов, на твоих и на моих, с нами бы еси был заодин. А что есми к тобе приказал с твоими послы и с своим боярином с Семеном о тех делех и о иных делех, и ты бы пожаловал по тому и делал; а как еси мне на чем свое крепкое слово молвил и правду дал и ярлыки дал о всех делех, на том бы еси и стоял; и яз на чем тобе молвил и правду дал о всех делех, на том и стою, а на вопчего нашего недруга, на твоего и на моего, на Казимира короля по своей правде есми с тобою заодин; также и на Охматовых детей царевых и на всех наших вопчих недругов с тобою есми один человек; а другу твоему друг есми, а недругу твоему недруг; а добра твоего аж даст Бог везде хочю смотрити и до живота. А тобе челом бью.— Да писал еси ко мне о портищах о рысьих, да о белке о деланой, да о соболех о черных, да о шубах о куньих: ино то к нам летом не идет, а приходит то в нам зимою; и что у нас нынеча было, и яз в тобе послал с своими людми, с Резяком да с Курманом: шубу черева рысьи голу, да 3 соболи черные, да шубу хребты белилны голу, да шубу кунью голу; а даст Бог вперед что у нас будет, ино то будет перед тобою же.

А се такова грамота послана в Крым в Семену в Борисовичю с Резяком же да с Курманом, да и список с тое грамоты, которая царю [56] послана От великого князя Ивана Васильевича всеа Русии Семену Борисовичю. Прислал ко мне . Менли-Гирей царь своего человека Акимбердея и ярлыки свои с моими людми вместе, которых ты ко мне послал с своею грамотою. И яз противу тех речей послал ко царю к Менли-Гирею свою грамоту с своими людми, с Резяком да с Курманом, а к тебе есми список послал за своею печатью с тое грамоты, которую есми грамоту ко царю послал; а приказал есми ко царю челобитие с Резяком, да и о здоровьи есми велел спросити царя, и поминок подати, и грамоту свою велел есми ему подати царю. И как приедут к тобе мои люди, и ты бы шел ко царю, а им бы еси велел с собою. итти ко царю, да велел бы еси Резаку от меня царю челом ударити, и о здоровьи спросити царя, и поминок от меня подати, и грамоту бы еси мою велел ему подати царю перед собою. А ты бы, высмотрив собе тот список, которой есми к тобе послал со царевы грамоты, да говорил бы еси царю и речми наедине потомуж, как в моей грамоте писано ко царю; да и царю бы еси молвил, чтобы мою грамоту велел собе прочести наедине ж. А те бы еси мои дела да и иные дела, что есми с тобою приказал ко царю, делал бы еси по моему наказу, а моего бы еси дела берегл о всем, как тя Бог вразумит. А что ся тамо учнет делати и каковы тамо вести будут о ординском деле и о турском и о волошском и о литовском, и ты бы меня без вести не держал. А что есми послал ко царю и ко князем поминков, и яз к тобе запись послал, и ты бы велел Резяку роздати поминки по тому списку. Да писал ко мне Менли-Гирей царь в ярлыке в своем о запросе о трех портищах рысьих черев, да о трех тысячах белки деланой, да о 5 соболех о черных, да о трех шубах о куньих: и ты бы царю говорил, что к нам то летом не идет, а приходит то к нам зимою; и что у нас нынеча было, и яз к нему послал с своими людми, с Резяком да с Курманом: шубу черева рысьи голу, да три соболи черные, да шубу хребты белилны голу, да шубу кунью голу; а дает Бог вперед что у нас будет, ино то будет перед царем. А ты бы еси сказал царю о запросе том наперед наедине: вместе ли с поминки велит собе то явити, или после поминков. А как то привезут к тобе, и ты бы то велел оправити, чтобы не измято несено ко царю.

Царю Менли-Гирею карабелник; а царице его, Едегеревы дочери Зизивудове, карабелник. А царевичю, брату цареву, калге Ямгурчею, карабелник.

А детем царевым, Ахмет-Кирею да Махмет-Кирею, по золотому. А князем Бурашу, что на Азикине месте, да Довлетеку, да Янкувату, да [57] Кирей-Сииту, цтю цареву, да Бере улану, да Собак дувану, да Хозяшу, да Туйпару, осмерым, по золотому. А в запрос царю шуба черева рысьи гола, да шуба кунья гола, да шуба хребты белилны гола, да три соболи черны.