№ 13.

1486, марта 28 — сентябрь. Посольство от великого князя Ивана Васильевича к царю Менгли-Гирею с боярином Семеном Борисовичем: царь стоял бы по прежнему твердо в союзе на общих врагов; благодарит царя, что он освободил из рук Турок посла великого князя Федора; узнал бы царь, на каких условиях турецкий султан хочет быть в дружбе с великим князем; запретил бы царь своим людям грабит людей великого князя, даже таких, которые ездят с послами; крымским вельможам говорить чтобы они берегли у царя дело великого князя, а он им также будет добро делать. Наказы о покупке яхонтов и лал, и о других делах.— Ответ царя Менгли-Гирея на посольские речи Семена Борисовича (Д. Кр. № 1, стр. 111-126),

I. Лета 94, марта 23, отпущен с Москвы в четверг в великой. Правити посолство Семену Борисовичю от великого князя царю Менли-Гирею. Князь велики Ириш челом бьет. Князь велики послал видети твое здоровье, волного человека.

Князь велики велел тобе говорити: прислал еси ко мне своих послов, Азику улана да Ураз хозю Азея, и ярлыки свои с ними прислал еси; а в ярлыкех в своих писал еси и словом еси ко мне приказал с своими послы и с моим боярином со князем с Васильем: как еси на чем мне свое крепкое слово молвил и правду учинил и ярлыки дал, другу другом быти, а недругу недругом быти, по тому и жалуешь, на том и стоишь. И яз тобе челом бью.— Князь велики [46] велел тобе говорити: а и вперед бы еси пожаловал, по своей правде и по своим ярлыком мне полнил, другу бы еси моему друг был, а недругу моему недруг был; а яз как тебе молвил и правду дал, на том и стою, другу есми твоему друг, а недругу твоему недруг; а добра твоего аж даст Бог везде хочю смотрити.

А се говорити Семену назавтрее царю Менли-Гирею наодине. Князь великий велел тобе говорити: прислал еси ко мне своего человека Шихшевал улана и ярлык свой с ним прислал еси. А в ярлыке писал еси и словом еси мне приказывал с своим человеком с Шихшевал уланом, что король, недруг наш вопчей, твой недруг да и мой, хотел на тобя ити. А которых еси своих людей ко мне был послал киевскою дорогою, и король тех твоих людей поимати велел. — Князь велики велел тобе говорити: и ты ко мне писал в своем ярлыке и словом еси ко мне приказал о том, что идет на тобя король; и мне бы королю крепко недружба своя учинити. Ино есми на чем тобе молвил и правду дал, на том и стою: другу твоему есми друг, а недругу твоему недруг; а на короля есми, на вопчего нашего недруга, с тобою один человек, и на всякого твоего недруга. А пойдет на тобя король, и яз, моля Бога, на короля иду; а дело твое да и свое делаю, как ми Бог поможет. - Князь велики велел тобе говорити: а ты нам на чем молвил и правду учинил и ярлыки дал, на том бы еси и стоял, другу бы еси моему друг был, а недругу бы еси моему недруг был; а на короля бы еси, на вопчего нашего недруга, со мною был один человек, и на всякого моего недруга; а с королем бы еси миру не имал и не канчивал. А пойдет на меня король, и ты бы на короля пошел. А на чем еси нам молвил, по тому бы еси нам и полнил; а яз на чем тобе молвил, на том и стою; а добра твоего аж даст Бог везде хочю смотрити и до живота.— Князь велики велел тобе говорити: говорил ми от тобя твой человек Шихшевал улан о том: будут на сей стороне Волги Муртоза и Седехмат цари; а какими делы пойдут на тобя, и мне бы брата твоего Нурдовлата царя и уланов и князей и казаков всех отпустити под Орду. Ино и летось, коли с тобою были немирны цари Муртоза и Седехмат, и как есми послышол то, и яз посылал под Орду уланов и князей и казаков всех, колко их ни есть в моей земле. И они под Ордою были все лето и делали сколко могли. А нынеча какими делы пойдут на тобя те цари, и яз брата твоего Нурдовлата царя отпущу под Орду и уланов и князей и казаков всех, что их в моей земли ни есть; а дела твоего везде берегу, как и своего дела. А какими делы пойдут на меня Муртаза и Седехмат [47] цари, и ты бы пожаловал на них пошел, или брата своего послал с своими людми.

А се говорити после болшего посолства назавтрее, или на третей день. Князь велики велел тобе говорити: мой человек Федор попал был салтану турскому в руки и с своими товарищи и с теми людми, которые с ним Фрязове к нам шли на наше имя. И ты нас деля того нашего человека Федора и с теми людми у турского взял и к нам отпустил; и яз тобе о том челом бью. А что еси к осподарю к моему, к великому князю, писал в своем ярлыке, а сказываешь, что еси пашам золотые дал от тех людей; и осподарь мой князь велики к тебе послал золотые со мною.— Князь велики велел тобе говорити: а что еси у собя оставил одного Фрязина, Онтоном зовут, что к нам жо шол с моим человеком с Федором, и ты бы того Фрязина к нам отпустил.— Князь велики велел тобе говорити: что мой человек Федор был в руках и у салтана у турского, ино тому моему человеку Федору говорили паши болшие осподаря своего салтановым словом турского, что салтан турской хочет со мною дружбы. И ты бы меня деля поотведал того, каковы дружбы со мною хочет турской, да ко мне бы еси о том отказал с моим боярином с Семеном.

А се говорити после всех дел спустя ден пять, или шесть. Князь велики велел тобе говорити: посылал еси своего царевича Мустофара и своих людей провожати своего посла Азику улана и моего боярина князя Василья. И твой дуван Лухбердей пограбил моего торговца Костю Могучева, а взял у него вьюк с товаром и свел с собою, да иное отослал тое рухляди к моему боярину ко князю к Василью, а лутшую рухлядь всю у собя оставил. Ино ты посылаешь своих людей провожати своего посла и моего боярина, берегучи своего дела и моего; а яз отселе также посылаю своих людей провожати твоего посла и своего боярина, берегучи твоего дела и своего; и твой люди моих людей грабят. Ино пригоже ли так? И яз нынеча того своего торговца Костю послал к тебе, и ты бы ему то взятое все велел отдати, а вперед бы еси своим людем заказал, чтобы от них над моими людми так не было.— Князь велики велел тобе говорити: наш торговец Ивашко Жеглов был за морем, да пришел из заморья в твою Орду, да тут его в животе не стало в твоей Орде; и он живот свой приказал нашемуж человеку Оноску Юрцову, духовную грамоту написал о своем животе, да дал ту духовную тому ж Юрцову. Ино деи твой человек Халель ордобазарец тот живот у него весь поимал силно, и духовную грамоту у него взял; а сказывал деи твой человек, Халель, что тот его живот весь поимал на тобя. Ино здесе у того у моего человека у [48] Ивашка у Жоглова род, племя, и послал есми к тобе брата его Мишка Жоглова; и ты бы велел того моего человека Ивашков Жоглова живот весь отдати брату его Мишку Жоглову нас для.

А учнет говорити царь о том: яз к великому князю приказывал своим человеком с Шихшевал уланом и в ярлыке в своем писал, чтобы князь велики на короля пошел; и князь велики о чем на короля не пошел? И Семену говорити так: писал еси, господине, в своем ярлыце к осподарю к нашему к великому князю так: пойдет на тобя король, и осподарю бы нашему великому князю на короля пойти. Ино осподарь наш князь велики делал по твоему ярлыку; а на чем тобе молвил осподарь, наш князь велики, на том и стоит, на короля с тобою один человек и на всякого твоего недруга. А пойдет на тобя король, и осподарь наш князь велики, моля Бога, на короля идет; а дело твое да и свое делает, как ему Бог поможет.

А взмолвит царь о том: ко мне князь велики приказывает, чтобы яз с королем не мирился; а князь велики пак не помирит ли ся с королем? И Семену говорити так: осподарю моему великому князю с королем миру нет. А к тобе приказал, чтобы еси пожаловал, по своему крепкому слову и по своим ярлыком, осподарю моему великому князю полнил, на короля бы еси был с ним один человек и на всякого на его недруга; а с королем бы еси не мирился, ни канчивал.

Да того Семену беречи накрепко, чтобы царь с королем не мирился, ни канчивал.

А взмолвит царь о том: князь велики с королем послы ссылается. Ино молвити так: послы меж их ездят о мелких делех о порубежных; а гладости никоторые и миру осподарю нашему великому князю с королем нет.

И взмолвит царь о том: приказал ли ко мне князь велики о том с тобою, чтобы ми своих людей послати на королеву землю? И Семену молвити так: приказал, господине, к тобе осподарь мой князь велики со мною, чтобы еси пожаловал послал своих людей на королеву землю, занеж король тебе недруг и осподарю моему недруг; ино бы недруг ваш чем истомнее, тем бы лутши. А осподаря нашего великого князя люди безпрестанно емлют королеву землю.

А взмолвит царь о том: король мне недруг, да и великому князю; и яз на короля иду. А князь велики идет ли на короля? И Семену говорити так: всхочешь, господине, свое дело делати, пойдешь на короля, ино велми добро; а осподаря моего о том обошлешь, и осподарь мой князь велики с тобою один человек на короля; а твое дело да и свое делает, как ему Бог поможет. [49]

А вспросит царь о том: зачем князь велики моих послов, Азику улана и Ураз-Хозю, ко мне долго не отпустит? Ино молвити так: писал еси в ярлыце в своем ко осподарю к нашему к великому князю, чтобы до вести до твоей послов твоих к тебе не отпущал; и осподарь мой затем их долго не отпустил.

А будет Семену тамо весть, что король пойдет на великого князя, ино говорити царю о том, чтобы царь пожаловал, по своему крепкому слову и по ярлыку, пошел на королеву землю. А учинится Семену тамо весть про то: будут цари ординские болшие Орды великому князю немирны, а пойдут на великого князя; ино говорити царю о том, чтобы царь пожаловал, по своему крепкому слову и по ярлыку, пошел на Орду. А учнет говорити царь о том: а пойдут на меня цари Муртоза и Седехмат, и князь велики как им недружбу свою учинит? И Семену говорити так: осподарь мой князь велики на чем тобе молвил, по тому и делает; и летось коли с тобою были немирны цари Муртоза и Седехмат, и осподарь мой как послышел то, и он посылал под Орду уланов и князей и казаков всех, колко их ни есть в его земле, и они под Ордою были все лето и делали сколко могли. А нынеча коли будет таково дело, а пойдут на тобя те цари, и осподарь мой князь велики брата твоего, Нурдовлата царя отпустит под Орду, и уланов и князей и казаков всех, что ни есть в его земле; а дела твоего осподарь мой бережет и добра твоего везде смотрит.

Да то памятовати Семену. Учнет царь посла своего посылати к великому князю, ино говорити царю о том, чтобы с послом лишних людей не было.— А взмолвит царь о том: о чем князь велики Лухбердей дувану поминка не послал? И Семену говорити так: затем осподарь мой князь велики поминка не послал Лухбердей дувану, что жалованья его не помнит, а людей его грабит.

II. А се говорити царевичю Ямгурчею. Князь велики велел тобе говорити, чтобы еси у царя, у брата своего, промеж нас дела нашего берегл, а нам бы еси дружбу свою чинил; а мы аж даст Бог тобе хотим дружбу свою чинити.

А се говорити князю Бурашу, Именекову сыну. Князь велики велел тобе говорити: отец твой и дяди твои нам дружбу свою чинили и дела нашего берегли, а мы им свое добро чинили. И ты бы нам дружбу свою чинил и дела бы еси нашего берегл; а мы аж даст Бог хотим тобе свое добро чинити.

А се говорити Довлетек мырзе, Именекову сыну. Князь велики [50] велел тобе говорити: сказывал ми мой боярин князь Василей, что нашево дела бережешь, а нам дружбу свою чинишь; и ты бы и вперед нам дружбу свою чинил и дела бы еси нашего берегл; а мы аж даст Бог хотим тобе свое добро чинити.

А се говорити Янкуват мырзе. Князь велики велел тобе говорити: слышел есми, что царева Менли-Гиреева добра смотриш. И ты бы и вперед царева добра смотрил, а нам бы еси дружбу свою чинил; а мы аж даст Бог хотим тобе свое добро чинити.

Да молвити Кокосю жидовину от великого князя. Князь велики велел тобе молвити: как еси наперед того нам служил и добра нашего смотрил, и ты бы и ныне нам служил; а мы аж даст Бог хотим тобя жаловати.

Да хози Асану молвити от великого князя. Князь велики велел тобе молвити: приказывал еси к нам, что еси на наше имя добыл лады и яхонты дорогие и жемчюг доброй,— и ты бы у нас был, а то бы еси к нам привезл; а мы аж даст Бог хотим тебя и свыше жаловати. Будет ти пак зачем у нас нелзе быти самому, и ты бы к нам то прислал, и мы велим то поплатити, да и свыше жалованье свое тобе учиним.

Память Семену Борисовичю. Похочет царь сам пойти воевати на Литовскую землю, а Семена захочет с собою поняти, и Семену у него отговариватися. А почнет царь свой ход откладывати, Семенова деля отговора, и Семену с ним пойти, а не отговариватися. А пойдет король на великого князя, и Семену о том царю говорити, чтобы царь сам всел на конь да пошел на Литовскую землю воевати; а самому Семену тогды о своем ходу не отговариватися, а со царем пойти.

Да взяти у Курчьбулат улана да у Кыскачя Семену четыре человеки, опричь Кадыша проводника Янгыровсково, а оставити их у собя в Перекопи вестей для. И каковы будут вести от болшие Орды, или про турского царя, и Семену с теми вестми к великому князю отпустити дву человек; а о вестех о всех послати ему с ними своя грамота, а дву человек ещо у собя оставити. И после того поновятся каковы вести, и Семену и тех дву человек отпустити с теми вестми к великому князю с своею ж грамотою. А похочет царь послати с теми людми о вестех своего человека, и Семену того царю не отговаривати. А похочет царь послати воевати Литовские земли, или сам пойти, а всхотят итти в Путивлю, или на Северу, и Семену говорити, чтобы царь послал воевати, или сам пошел на Подолье, или на киевские места.

Память Семену Борисовичю. Чтобы еси однолично не прозапамятовал того: молвил бы еси от меня хозе Асану: что будет у него мойские [50] лалы и яхонты дорогие и жемчюг доброй, и он бы однолично у меня был сам, а то бы с собою привезл.

III. Ответ царев Менли-Гиреев, взят у Семена у Борисовича, лета 95, сентября, как поехал из Крыма.

Что ми еси правил посолство от моего брата, от великого князя Ивана, о том деле, чтобы ми с королем не миритца, ни канчивати; ино однолично, как есми молвил с своим братом, с великим князем с Иваном, свое крепкое слово, и яз с королем не мирюся, ни канчиваю; а на чем есми молвил своему брату, на том хочю стояти и до своего живота. А что ми еси говорил о Литовской войне, ино ныне мя дело зашло, того ми делати нельзе; а на то есми дело готов, а на зиме сам сяду на конь, а Орды ся уже не блюду. А что ми еси говорил о том: пойдут на великого князя цари, и мне бы сести на конь, а итти на Орду. И пойдут на великого князя цари, и яз на то дело готов, сам сяду на конь, а на Орду иду, или брата своего отпущу со всеми своими людми. А пойдут цари на меня, и князь бы велики отпустил на царей брата моего Мердовлата царя со всеми с его людми.

А что ми еси говорил о турском салтане, какой дружбы с великим князем хочет; ино турской потому хочет дружбы и братства, как яз с великим князем живу. А что Федору паши говорили от турского, а то говорили сь его слова; а ныне есми о том деле в турскому послал человека своего; и как мой тот человек во мне придет от турского с человеком или с грамотою, и яз часа того со всем с тем пошлю за тобою человека своего в великому князю. А что ми еси говорил о Косте на Люхбердея, и яз то дело обыскал: Лухбердей того дела не токлъся; а которые то дело делали, а те нынеча в Орде. А что ярлык кладешь мой, что есми послал за князем за Васильем, ино то по тому ярлыку то до меня дошло, то у меня; а нынеча есми одолжал, дати ми нечего, и тот бы человек подождал, докуль мои люди придут из заморья, и яз ему заплачю. А не всхочет ждати, и он во мне опять будет, и яз ему заплачю. А что ми еси говорил о Жоглове, ино то у нас майтамал идет; а то нам идет с турским по половинам, ино то взяли турского люди да и мой человек. А в ту пору пришла на нас скорбь велика, и мы тогды не то одно покинули и свои есмя животы пометали; а и мати ся моя в ту пору утеряла, а нам было тогды до своих голов.