1485, июля 31. Посылка от великого князя Ивана Васильевича к царю Менгли-Гирею гонца Шемерденя Умачева: великий князь не отправил к царю знатного посла потому, что в степи везде кочуют враги, против которых великий князь воюет (Д. Кр. № 1, стр. 108-110).

Лета 93, июля 31, отпущен с Москвы. А се говорити Шемерденю Умачеву сыну от великого князя царю Менли-Гирею.

Князь велики Иван челом бьет. Князь велики послал видети твое здоровье, волного человека. Князь велики велел тобе говорити: хотел есми к тобе послати своего доброго человека видети твое здоровье. Ино промеж нас ходят наши недруги, твои и мои, и мы за тем не послали, проехати нелзе.

А вспросит царь о своем после: зачем князь велики моего посла не отпустил? Ино молвити так: за тем, господине, не отпустил: писал еси в ярлыце своем к осподарю нашому к великому князю, чтобы до вести до твоее посла твоего к тобе не отпущал.

Князь велики велел тобе сказати: были осподаря нашого великого князя люди под Ордою, да попали им в руки твои люди; и осподарь наш князь велики тех твоих людей к тобе послал.

А о сем князь велики словом приказал Шемердюню, что спросит, его царь о людех, послал ли князь велики людей под Орду? а в запись ему не велел того записать. А взмолвит царь о том: князь велики слышел мое дело, что Муртоза царь и Седехмат со мною немирны; и князь велики послал ли своих людей под Орду? Ино молвити так: осподарь наш князь велики как послышев то, и он часа того послал под Орду уланов и князей и казаков всех, колко их есть в его земле; а добра твоего везде смотрит. [45]

А се такова грамота послана с Шемерденем к хозе Асану. Божьею милостью, велики осподарь Русские земли, велики князь Иван Васильевич, царь всеа Руси, Володимерьски, и Московски, и Новогородски, и Псковски, и Югорьски, и Вятски, и Пермьски, и иных, хозе Асану. Приказывал еси ко мне с моим послом со князем с Васильем, что был у царя у Менли-Гирея и грамоту еси ко мне свою писал, что еси по нашому наказу добыл лалов и яхонтов дорогих и жемчюгу доброго; да и то еси к нам писал, что хочешь у нас с тем быти сам. И ты бы к нам поехал, а то бы еси привезл к нам сам. А даст Бог будешь у .нас, а что к нам привезешь, и мы цену свыше заплатив, да сверх своим жалованием хотим тобя жаловати. А однолично бы еси был у нас на сем пути.