1484, марта 14. Посольство от великого князя Ивана Васильевича к царю Менгли-Гирею с боярином князем Василием Ивановичем Ноздроватовым: благодарность за твердость союза против короля; царя Нурдовлата великий князь не отпускает от себя, берегучи дело, царя Менгли-Гирея; некоторым крымским вельможам не посылаются поминки, потому что они дела царя и великого князя не берегут. Речи к крымским вельможам о том же. Грамота великого князя в Кафу к Захарью Евреину на приезд его в Москву (Д. Кр. № 1, стр. 90-100).

Лета 92, княжо Васильево Ноздроватого посольство ко царю к Менли-Гирею, к Ази-Гирееву сыну. А поехал с Москвы марта 14.

Правити посольство князю Василью Ивановичю Ноздроватому от великого князя царю Менли-Гирею. Князь велики Иван челом бьет. Князь велики послал видети твое здоровье, волного человека.

Князь велики велел тобе говорити: прислал еси ко мне послов своих Мамышь улана да Мулкоман мурзу, и ярлыки свои с ними прислал еси; а в ярлыкех писал еси и словом еси ко мне приказал своими послы и с моим боярином со князем с Иваном: как еси пожаловал, меня братом и другом собе учинил, и правду еси мне учинил и ярлыки дал, по тому и жалуешь, на том и стоишь, другу другом быти, а [38] недругу недругом быти. И яз тобе о том челом бью. - Князь велики велел тобе говорити: а и вперед бы еси пожаловал, на чем еси мне молвил и правду дал и ярлыки дал, на том бы еси и стоял, другу бы еси моему друг был, а недругу недруг был; а яз как тобе молвил и правду дал, на том и стою, другу есми твоему друг, а недругу есми твоему недруг; а добра твоего аж даст Бог и до живота хочю смотрити.

А се говорити назавтрее царю наедине. Князь велики велел тобе говорити: приказывал есми к тобе с своим боярином со князем с Иваном, чтобы еси, по своему крепкому слову и по ярлыком, как еси мне молвил и правду дал и ярлыки дал, с королем не канчивал. И ты ко мне писал в ярлыкех своих и словом еси ко мне приказывал с своими послы и с моим боярином: как еси на чем мне молвил и правду дал и ярлыки дал, на том и стоишь; а с королем не канчивал и вперед не хочешь с ним канчивати. — Князь велики велел тобе говорити: и ты бы пожаловал и вперед по своей правде и по своим ярлыком мне полнил, с королем бы еси не канчивал; а каково будет мне с королем дело, и аз тобя без вести не держу. — Князь велики велел тобе говорити: прислал еси к брату своему, к Нурдовлату царю ярлык свой, а зовешь его к собе, а ко мне еси прислал же ярлыки свои о своей братье. Ино в одном ярлыке пишешь так: чтобы мне брата твоего Нурдовлата царя держати у собя; а как будет твоему делу пригож, и ты ко мне пришлешь своего человека, и мне бы тогды к тобе брата твоего Нурдовлата царя отпустити. А в другом твоем ярлыке пишет так: что еси и наперед сего ко мне приказывал о своей братье с своим человеком с Кудобердеем, чтобы мне твоего дела беречи; а нынечя еси ко мне тоже писал в ярлыкех своих о своей братье, чтобы мне твоего дела беречи. Ино нынечя брат твой Нурдовлат царь, по твоему ярлыку и по твоему к нему приказу, хотел к тебе пойти. И яз, оберегаючи твоего дела и по твоим ярлыком, брата есми твоего Нурдовлата царя у собя унял, а держу твою братью и истому своей земле чиню тебя деля, а и вперед аж дасть Бог, как есми тебе на чем молвил, на том и до живота хочю стояти и добра твоего везде смотрити.

Да после всех дел говорити царю. Князь велики велел тобе говорити: что еси ко мне приказывал о том, что от твоего человека от Бабашиха бежал его человек к Москве; и яз того человека здесе доискався, и велел есми его отдати твоим послом, да Бабышихову человеку Тайдаку.— Князь велики велел тобе говорити: что ми еси приказывал о Карачь мырзе о Темирхозине сыне, чтобы ми нелюбья ему с сердца сложити и поминок ему послати, ино и наперед сего тот, Карачь и у нас бывал, а наше жалованье видел; да и тамо есмя его своим [39] жалованьем находили: попали пак ему головы русские в полон, и яз и к тебе о том приказывая, чтобы еси велел ему те головы русские отдати; да и к нему еси в самому приказывал. И ты ему велел был тот полон отдати, и он ся тебя ослушал да и меня, полону не отдал, и яз за то в нему и поминков не слал. А нынечя еси ко мне о нем приказал, и яз тобя для поминок есми ему послал и нелюбья есми ему отдал. А и вперед учнет нам Карачь служити и дела нашего смотрити, и мы ему свое жалованье хотим чинити.

А вспросит царь князя Василья о Байраше, о Менекове сыне, о чем князь велики Байрашу поминка не послал? И князю Василью говорити так. Князь велики велел тобе говорити: сказывал ми мой боярин князь Иван, что еси велел брату своему царевичю да Байрашу моего боярина князя Ивана проводити того деля, чтобы нашим послом на обе стороны путь был чист. А приказал еси им имянно проводити моего боярина до Мерла, и царевичь хотел до Мерла проводити, ино деи Байраш, не хотя моего боярина проводити, да пошел деи от царевичя прочь; и яз ему нынеча за то и поминка не послал, коли твоего дела да и моего не бережет.

Память князю Василью. Аж даст Бог едучи прочь, молвити ему царю так. Князь велики велел тобе говорити: прислал еси ко мне своего человека Сарыку; а прислал еси его ко мне без дела. И яз нынеча Сарыку пожаловал тебя для; а вперед бы еси ко мне безделных людей не посылал.

А учнет говорити царь о том: ко мне князь велики приказал, чтобы яз с королем не канчивал; а князь велики пак не помирит ли ся с королем? И князь Василью говорити: осподарь мой князь велики к тобе приказал, чтобы еси пожаловал, на своем слове стоял, на чем еси ему молвил, другу бы еси его друг был, а недругу недруг; а осподарь мой на чем тобе молвил, на том и стоит, твоему другу друг, а недругу недруг. А ты бы пожаловал с королем не канчивал. А како будет ему с королем дело, и он тебя без вести не держит. Да того князю Василью беречи накрепко, чтобы царь с королем не канчивал.

А взмолвит царь так: в ярлыце написано межи нас с великим князем, что нам быти заодин и на Ахмата царя; ино Ахмата нынеча нет; а на его месте которой будет царь, а на того князь велики со мною как? И князю Василью молвити так: написано, господине, в ярлыце, что вам с моим осподарем быти заодин на всякого своего недруга; и осподарь мой князь велики на том стоит, на всякого недруга с тобою один человек.

А будет князю Василью тамо весть полная, что король пойдет на [40] великого князя. Ино говорити царю о том, чтобы царь пожаловал, по своему крепкому слову и по ярлыку, пошел на королеву землю. А учинится князю Василью тамо весть полная про то: будет царь ординской великому князю немирен, а пойдет на великого князя. Ино говорити царю о том, чтобы царь пожаловал, по своему крепкому слову и по ярлыку, пошел на Орду.

Да то памятовати князю Василью. Учнет царь посла своего посылати к великому князю, ино говорити о том: как пожаловал царь великого князя, братом и другом собе учинил и правду на том дал, по тому бы и жаловал, посла бы своего послал без пошлин.

II. А се говорити царевичю Ямгурчею. Князь велики велел тобе говорити: со царем промеж нас братьство и дружба учинилася. И ты бы у царя у брата своего промеж нас дела нашего берегл, а нам бы еси дружбу свою чинил; а мы аж даст Бог тебе хотим свою дружбу чинити.

А се говорити князю Азике. Князь велики велел тобе говорити: со царем промеж нас братство и дружба учинилася. И ты бы у царя промеж нас дела нашего берегл, а нам бы еси дружбу свою чинил; а мы аж даст Бог тобе хотим свою дружбу чинити.

А се говорити князю Василью Карачь мырзе Темирьхозину сыну. Князь велики велел тобе говорити: приказывал ко мне царь о тобе, чтобы ми тобе нелюбья с сердца сложити, а поминок тобе послати. Ино, Карачь, ведомо тобе самому, что еси наперед сего у нас бывал, а наше еси жалованье видел, да и там есмя тобя своим жалованьем находили: попали пак тобе головы руские в полон, и яз о том ко царю приказывал, да и к тобе есми к самому приказывал, и царь тобе велел те головы полоненые отдати; и ты ся царя ослушал да и меня, того еси полону не отдал, и яз за то к тобе и добро свое оставил и поминков есми к тобе не слал. А нынеча во мне приказывал царь о тобе, и яз нынеча, царя для, поминок есми к тобе послал и нелюбья есми тобе отдал. А вперед учнешь нам служити и дела нашего смотрити, и мы и вперед хотим тобе свое добро чинити и поминки слати.

Да память князю Василью о том: говорити ему от великого князя хозе Асану, чтобы тамо купил великому князю лалы да яхонты добрые да зерна великие женчюжные.

Да и Кокосу ему также говорити от великого князя, чтобы купил великому князю лалы да яхонты да зерна жемчюжные великие, да прислали бы к великому князю; а цену им князь велики за то заплатит, да сверх того ещо своим жалованием пожалует. [41]

III. Сякова грамота послана была в Кафу к Захарье к Скарье, к жидовину, с золотою печатью, с Лукой с подьячим, со князем с Васильем вместе; и Скарьи тогды в Кафе не было, был в ту пору за морем, и Лука ту грамоту назад привезл.

Божиею милостию, великий осподарь Русские земли, велики князь Иван Васильевич, царь всеа Руси, Володимерьски и Московски и Новгородски и Псковски и Югорьски и Вятски и Пермьски и иных, Захарье Евреянину. Писал к нам еси с нашим гостем с Гаврилом с Петровым о том, чтобы ти у нас быти. И ты бы к нам поехал. А будешь у нас, наше жалование к собе увидишь. А похочешь нам служити, и мы тебя жаловати хотим; а не похочешь у нас быти, а всхочешь от нас опять в свою землю поехати, и мы тобя отпустим доброволно, не издержав. А писан на Москве, месяца марта 14.